Mangin Suod sa Dios

Luyag Niya nga Magmadinalag-on Kita

Josue 1:6-9

GUSTO gid sang mga ginikanan nga mangin madinalag-on kag malipayon ang ila kabataan. Amo man sini ang gusto sang aton langitnon nga Amay, nga si Jehova, para sa aton. Ginatudluan niya kita kon ano ang aton himuon para magmadinalag-on kay palangga niya kita. Halimbawa, binagbinaga ang ginsiling sang Dios kay Josue nga mabasa sa Josue 1:6-9.

Hunahunaa ang mga hitabo nga makita sa tuo. Sang mapatay si Moises, si Josue ang nagbulos nga lider sang minilyon ka Israelinhon. Sang nagahanda na sila nga magsulod sa duta nga ginsaad sang Dios sa ila mga katigulangan, ginlaygayan sang Dios si Josue. Kon sundon niya ini, mangin madinalag-on sia. Pero, indi lamang si Josue ang mabuligan sini nga laygay. Kon sundon naton ini, mangin madinalag-on man kita.—Roma 15:4.

Tatlo ka beses nga ginsilingan ni Jehova si Josue nga magpakabakod kag magpakaisog para madumalahan sing maayo ang pungsod pasulod sa Ginsaad nga Duta. (Bersikulo 6, 7, 9) Pero, paano sia mangin maisog kag mabakod?

Mahimo ini ni Josue sa bulig sang inspirado nga mga sinulatan. “Sundon mo gid sing mayo ang tanan nga kasuguan nga ginhatag sa imo ni Moises nga akon alagad.” (Bersikulo 7, APD) Sadto nga tion, mahimo nga pila pa lang ka tulun-an sang Biblia ang nasulat. * Pero, indi buot silingon nga kon may Biblia na ang isa, magamadinalag-on na sia. Agod mabuligan si Josue, kinahanglan nga himuon niya ang duha ka butang.

Una, dapat basahon ni Josue ang Pulong sang Dios adlaw-adlaw. Si Jehova nagsiling: “Magpamalandong ka sa [sini] sa adlaw kag gab-i.” (Bersikulo 8) Ang isa ka libro nagsiling: “Ginsugo sang Dios si Josue nga dumdumon ang Iya Kasuguan paagi sa ‘pagbasa sini sing mahinay’ sa iya kaugalingon, ukon sa ‘pagpamalandong’ sa sini.” Kon basahon kag pamalandungan ni Josue ang Pulong sang Dios kada adlaw, mangin madinalag-on sia sa pag-atubang sa mga kabudlayan sa ulihi.

Ikaduha, dapat sundon ni Josue ang iya mga natun-an. Ginsilingan sia ni Jehova: “Mahibaluan mo kon paano mo matuman ang tanan nga nasulat dira. Sa sini nga paagi mangin mainuswagon kag madinalag-on ka.” (Bersikulo 8, APD) Mangin madinalag-on si Josue kon himuon niya ang kabubut-on sang Dios. Sigurado gid ini kay ang kabubut-on sang Dios wala nagakapaslawan.—Isaias 55:10, 11.

Ginsunod ni Josue ang laygay ni Jehova. Gani, nangin malipayon sia subong matutom nga alagad ni Jehova.—Josue 23:14; 24:15.

Gusto mo man bala nga mangin madinalag-on kag malipayon pareho kay Josue? Amo gid sini ang luyag ni Jehova para sa imo. Pero, indi bastante nga may ara ka lang Biblia. Nagsiling ang isa ka matutom kag madugay na nga Cristiano: “Basaha ang Biblia kag iaplikar ini.” Kon regular mo nga ginabasa ang Pulong sang Dios kag ginaaplikar ini sa imo kabuhi, “mangin mainuswagon kag madinalag-on ka” kaangay ni Josue.

[Nota]

^ par. 4 Ang inspirado nga mga sinulatan nga matigayon sadto ni Josue mahimo amo lang ang lima ka tulun-an ni Moises (Genesis, Exodo, Levitico, Numeros, kag Deuteronomio), ang tulun-an ni Job, kag ang isa ukon duha ka salmo.