Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

ANG LALANTAWAN OKTUBRE 2009

 Tudlui ang Inyo Kabataan

Nakita ni Sem ang Kalautan sang Duha ka Kalibutan

Nakita ni Sem ang Kalautan sang Duha ka Kalibutan

SANG una, may duha ka grupo sang tawo nga nagkabuhi sa indi pareho nga tion. Ang anak ni Noe nga si Sem naluwas sang ginsilutan sang Dios sang kamatayon ang una nga grupo sang tawo. Nahibaluan mo bala kon ngaa nagkalamatay ang una nga grupo sang mga tawo kag paano naluwas si Sem kag ang iya pamilya?— * Istoryahan naton ini.

Sang bata pa si Sem, “ang ginahimo sang mga tawo sa kalibutan puro na lang kalautan,” siling sang Biblia. Ang tanan nga ginapanumdom sang tawo “permi malain.” Kabalo ka bala kon ano ang ginhimo sang Dios?— Nagpadala ang Dios sing daku nga baha ukon anaw para mapatay ang malain nga mga tawo. Si apostol Pedro nagsulat: “Ang kalibutan sadto nalaglag sang gin-anaw ini sang tubig.”—Genesis 6:5, Ang Pulong sang Dios; 2 Pedro 3:6.

Nakahibalo ka bala kon ngaa ginpatay sang Dios ang mga tawo sang una?— Kay malain sila kag ang tanan nila nga ginapamensar “permi malain.” May ginsiling si Jesus parte sini. “Sa wala pa ang anaw,” siling niya, ang mga tawo nagakinalipay, “nagakaon kag nagainom,” kag “nagapangasawa kag . . . nagapamana.” Nagsiling pa gid si Jesus: “Wala sila magsapak tubtob nga nag-abot ang anaw kag nag-anod sa ila tanan.”—Mateo 24:37-39.

Ngaa wala naluwas ang mga tawo?— Ang tatay ni Sem nga si Noe “isa ka manugbantala sang pagkamatarong,” pero ang mga tawo wala namati sa iya. Namati si Noe sa Dios kag naghimo sang arka, isa ka daku nga barko, para maluwas sia kag ang iya pamilya sa Anaw. Si Noe lang, ang iya asawa, ang ila tatlo ka bata nga sanday Sem, Ham, kag Japet, kag ang ila mga asawa ang nagtuman sa Dios. Ang iban naman nagpinagusto lang sa luyag nila himuon amo nga nagkalaanod sila sa Anaw.—2 Pedro 2:5; 1 Pedro 3:20.

Pagligad sang isa ka tuig sa tapos sang Anaw, si Sem kag ang iya pamilya naggua sa arka. Ang tanan nga malain nga tawo wala na, pero wala ini magdugay. Si Canaan, nga hinablos ni Sem sa iya utod nga si Ham, naghimo sing malain amo nga nagsiling si Noe: “Pinakamalaut si Canaan.” Ang apo ni Ham nga si Nimrod malain man. Ginkontra niya ang matuod nga Dios nga si Jehova, kag ginsugo niya ang mga tawo nga maghimo sing mataas nga torre nga gintawag Babel para makilala sila. Ano sa  banta mo ang ginbatyag ni Sem kag sang iya amay sa sini?—Genesis 9:25; 10:6-10; 11:4, 5.

Nasubuan gid sila, kag amo man si Jehova. Kabalo ka bala kon ano ang ginhimo ni Jehova?— Ginlainlain niya ang lenguahe sang mga tawo para indi sila mag-intiendihanay. Gani, gin-untatan sang mga tawo ang paghimo sing torre kag naglinapta sila sa lainlain nga lugar. Nag-updanay ang mga tawo nga may pareho sang lenguahe. (Genesis 11:6-9) Pero wala gin-islan sang Dios ang lenguahe ni Sem kag sang iya pamilya. Amo nga makaupdanay sila gihapon kag makabuligay sa pag-alagad sa Dios. Nahibaluan mo bala kon daw ano kalawig nga nag-alagad si Sem kay Jehova?—

Nagkabuhi si Sem sing 600 ka tuig. Mga 98 na ang iya edad sang nag-abot ang Anaw, kag nabuhi pa sia sing 502 ka tuig pagkatapos sini. Sigurado gid nga ginbuligan niya si Noe sa paghimo sang arka kag sa pagpaandam sa mga tawo nga magaabot ang Anaw. Pero, ano sa banta mo ang ginhimo ni Sem sang nagkabuhi sia sing sobra 500 ka tuig sa tapos sang Anaw?— Gintawag ni Noe si Jehova subong “ang Dios ni Sem.” Gani, mahimo nga padayon sia nga nag-alagad kay Jehova kag nagbulig sa iya pamilya nga mag-alagad man sa Dios. Sanday Abraham, Sara, kag Isaac nangin pamilya ni Sem sang ulihi.—Genesis 9:26; 11:10-31; 21:1-3.

Pamensara naman karon ang kalibutan nga ginaistaran naton. Sugod sang adlaw ni Sem, nagdamo pa gid ang kalautan. Ano ayhan ang matabo sa kalibutan?— Ang Biblia nagsiling nga “ang kalibutan nagataliwan.” Pero nagpromisa man ini: “Sia nga nagahimo sang kabubut-on sang Dios nagapabilin sing dayon.” Gani, kon sundon naton ang Dios, mahimo man kita maluwas pakadto sa bag-o nga kalibutan. Dayon sa bulig sang Dios, magakabuhi kita sa duta sing malipayon kag sing walay katapusan!—1 Juan 2:17; Salmo 37:29; Isaias 65:17.

^ par. 3 Kon ginabasa mo ini sa bata, magdulog ka kon makita mo ang dash (—) kag pasabta sia.