Magdiretso sa kaundan

Magdiretso sa listahan sang kaundan

Posible Bala nga Magtuo sa Manunuga?

Posible Bala nga Magtuo sa Manunuga?

 Posible Bala nga Magtuo sa Manunuga?

“KON pamensaron ko nga may Manunuga, nagainit lang ang ulo ko kay kon may ara gid man, ngaa ginpabay-an niya nga mag-antos ang mga tawo bisan pa may gahom sia?” Amo ini ang ginsiling sang isa anay ka ateista sang ginpamatay ang iya mga hinigugma sa Holocaust. Indi lang sia ang nagabatyag sing amo sini.

Madamo nga tawo ang indi kumbinsido nga may Dios ukon ginapapati na lang nila ang ila kaugalingon nga wala sing Dios bangod nangin biktima sila sang grabe nga kapintas. Ngaa amo sini ang ila ginabatyag? Mas maayo bala ang kahimtangan sang mga tawo kon wala sing Dios ukon relihion? Posible bala nga magtuo sa mahigugmaon nga Manunuga ang isa ka ateista?

Ang Kapaslawan sang Relihion

Daw indi mapatihan nga relihion ang rason kon ngaa nagadamo ang wala nagapati sa Dios. Ang istoryador nga si Alister McGrath nagsiling: “Naakig gid ang mga tawo sa pagpinagusto kag kapaslawan sang relihion amo nga nagdamo ang mga ateista.” Ang relihion sa masami ang sa likod sang mga inaway kag pagpamintas. Ang pilosopo kag ateista nga si Michel Onfray nagpalibog kon paano maimpluwensiahan sang Biblia ang duha ka sahi sang tawo, ang isa “nagatinguha nga mangin balaan” kag ang isa “nagahimo sing kalautan” pareho sang terorismo.

Madamo nga tawo ang may mapait nga inagihan sa relihion. Sang nangin soldado ang isa ka pamatan-on nga taga-Sweden nga si Bertil, nabatian niya nga nagsiling ang ila pari nga wala sing malain sa pagpatay kay nagsiling si Jesus nga ang mga nagakapot sang espada, mapatay sa espada. Ang buot niya silingon may isa nga dapat magkapot sang espada, gani ang soldado mahimo nga alagad sang Dios.—Mateo 26:52. *

Napatay ang tatay ni Bernadette sang Bug-os Kalibutan nga Inaway II. Sa lubong sang iya tatlo ka tuig nga pakaisa, nadumduman pa niya nga naakig gid sia sa ginsiling sang pari: “Ginkuha na sang Dios ini nga bata para mangin anghel.” Sang ulihi, nagbata sia sing dis-ebol pero wala man sia gihapon malugpayan sang ila simbahan.

Si Ciarán, nga nagdaku sa masingki nga lugar sa Northern Ireland, naakig gid sa panudlo nga kalayuhon nga impierno. Nakasiling sia anay nga naugot gid sia sa Dios nga naghimo sini nga kapintas. Ginhangkat pa gani niya ang Dios nga patyon sia kon matuod gid nga nagaluntad ini. Indi lang si Ciarán ang nagabatyag sing kaakig sa mga ginatudlo sang simbahan. Ang matuod, ang mga doktrina sang simbahan mahimo amo pa gani ang ginhalinan sang teoriya sang ebolusyon. Suno kay Alister McGrath, ang “tuman nga kaugot” ni Darwin sa doktrina sang kalayuhon nga impierno—indi ang iya pagpati sa ebolusyon—amo ang rason kon ngaa nangduhaduha sia nga may Dios. Nagsiling pa si McGrath nga “nasubuan gid si Darwin sa pagkapatay sang iya bata nga babayi.”

Para sa iban, ang mga tawo nga may relihion mga panatiko kag wala nagapamensar. Si Irina, nga daw natak-an na sa wala pulos nga mga sermon kag sulitsulit nga pangamuyo sang mga pari, nagsiling: “Pamatyag ko ang mga tawo nga nagapamati sa mga sermon sang pari wala nagapamensar.” Si Louis naman naugot sa kapintas sang mga panatiko sa simbahan, amo nga nagsiling sia: “Sang una, daw natak-an lang ako sa relihion, pero subong nakita ko gid  ang makahalalit nga impluwensia sini amo nga naugot gid ako sa tanan nga relihion.”

Mas Maayo Bala Kon Wala sing Dios?

Indi katingalahan nga para sa madamo, ang relihion balagbag sa pag-uswag kag paghidait sang katawhan. Nagahunahuna pa gani ang iban nga basi mas maayo pa ang aton kahimtangan kon wala sing Dios ukon relihion. Pero kon sikwayon sang kalabanan nga tawo ang relihion, madula ayhan ang mga problema?

Ang pilosopo sang ika-18 nga siglo nga si Voltaire mabaskog nga nagprotesta sa korapsion kag pag-abuso sang simbahan sang iya tion. Pero, ginabaton niya nga kinahanglan naton ang isa ka Supremo nga Persona para mahibaluan ang husto kag sala. Sang ulihi, ang German nga pilosopo nga si Friedrich Nietzsche, nagpabantog sang ideya nga ang Dios patay. Pero, nahadlok man sia sa pagkadula sang moral nga talaksan kag sa malain nga resulta sang ateismo. May rason bala sila nga mahadlok?

Ang awtor nga si Keith Ward nagsiling nga samtang nagamoderno ang pangabuhi sang tawo, “naglala pa gid” ang pagpamintas kag pagpamatay. Kag wala napauntat sang ateismo ang korapsion ukon ang pagpakanubo sa iban nga rasa. Bangod sini, ginbaton sang maalam nga mga tawo, bisan sang mga ateista nga bentaha gid kon magpati kita sa Dios.

Ginpadaku ni Keith Ward ang kapuslanan sang pagpati sa Dios: “Ang pagtuo nagabulig sa isa nga himuon kon ano ang husto, subong sang pag-atipan sa kalibutan nga gintuga sang Dios.” Ginapakita sang pila ka pagtuon nga nagadamo ang mga tawo nga mabinuligon bangod nagapati sila sa Dios, kag ang pagkamabinuligon nagapahalipay sa ila. Ini nga pagtuon nagaugyon sa prinsipio nga ginsiling ni Jesus: “May kapin nga kalipay sa paghatag sangsa pagbaton.”—Binuhatan 20:35.

Ang isa ka social worker nga ateista anay nagdayaw gid sa ikasarang sang Biblia nga bag-uhon ang kabuhi sang tawo. Nagsiling sia: “Sa sulod sang pila ka tuig, wala gid ako nagmadinalag-on sa pagbulig sa mga tawo nga bag-uhon ang ila malain nga mga batasan. Pero nakibot ako nga puede gali bag-uhon sang mga tawo ang ila kabuhi sa bulig sang Biblia. Nakita ko man nga wala na nila ginbalikan ang ila malain nga pagkabuhi.”

Pero suno sa pila ka ateista, ang pagpati sa Dios nagresulta sa pinatyanay kag pag-ilinaway sa baylo nga magresulta sa kaayuhan. Ginabaton nila nga may maayo gid man nga epekto sa iban ang pagtuo, pero daw indi gihapon sila magpati sa sini. Ngaa?

Dugang Pa nga Rason

Madamo ang nagapati nga ang ebolusyon napamatud-an na. Halimbawa, si Anila nga taga-Albania gintudluan nga wala sing Dios. “Sa eskwelahan, gintudluan kami nga wala pulos kag dinumaan na ang pagpati sa Dios,” siling niya. “Pirme namon ginatun-an ang matahom nga mga butang parte sa tanom kag sa buhi nga mga tinuga. Nagapati ako nga nagluntad ining mga butang bangod sa ebolusyon, kay daw nagahisanto gid ini sa siensia.” Narealisar niya subong nga “ginbaton lang niya ini nga pagpati nga wala gin-usisa ang mga pamatuod.”

Ang iban naman indi magpati sa Manunuga bangod sa ila kaakig sa Dios. Amo sini ang masami nga mga reaksion nila kon kadtuan sila  sang mga Saksi ni Jehova kag sugiran sang paglaum halin sa Biblia. Halimbawa, si Bertil nga ginsambit kaina, ginkadtuan sang isa ka pamata-on nga Saksi. Sa pensar niya: ‘Ay kaluoy lang sa imo. Nagsala ka gid sa imo ginkadtuan!’ Si Bertil nagsiling: “Ginpasulod ko sia kag ginpaukpan sang akon kaakig sa Dios, sa Biblia, kag sa relihion.”

Si Gus nga taga-Scotland nangin biktima sang inhustisya. Sang primero ginbais niya kag gindebate ang mga Saksi ni Jehova. Namangkot sia pareho sang ginpamangkot sang Hebreo nga propeta nga si Habacuc: “Ngaa ginapakita mo pa sa akon ini nga kalautan kag kagamo?”—Habakuk 1:3, Ang Pulong sang Dios.

Halin pa sang una indi maintiendihan sang mga tawo kon ngaa daw wala nagapasilabot ang Dios sa kalautan. (Salmo 73:2, 3) Ang isa ka Pranses nga manunulat nga si Simone de Beauvoir nagsiling anay: “Mas madali patihan ang isa ka kalibutan nga wala sing manunuga sangsa isa ka kalibutan nga may manunuga pero wala man sing labot sa nagakatabo sa mga tawo.”

Bangod indi mapaathag sang madamo nga relihion kon ngaa daw wala sing labot ang Dios sa mga tawo, buot bala silingon nga wala na gid ini sing paathag? Si Gus nagsiling nga nakita gid man niya ang “matuod nga sabat kon ngaa gintugutan sang Labing Gamhanan nga Manunuga nga temporaryo nga mag-antos ang mga tawo.” Siling niya, “daku ang nabulig sadto nga sabat sa akon.” *

Bisan ang pila nga nagapangangkon nga mga ateista nagapangduhaduha man sa ebolusyon. Nagabatyag sila nga kinahanglan nila ang Dios sa ila kabuhi kag nagapangamuyo pa gani sa Iya. Tan-awon naton kon ngaa nangusisa ang pila ka ateista kag agnostiko tuhoy sa Dios kag kon paano sila sang ulihi nagtuo kag nangin suod sa Manunuga.

Ano ang Nakabulig sa ila nga Magtuo sa Dios?

Ginpakita sang pamatan-on nga Saksi nga nagbisita kay Bertil ang daku gid nga kinalain sang matuod nga mga Cristiano kag sang mga relihion nga nagapangangkon lang nga mga Cristiano. Wala lamang nakumbinsi si Bertil  sa iya mga pamatuod nga may Manunuga, kundi nagsiling pa sia: “Bisan pa nagpakatig-a ako grabe gid ang iya pasensia sa akon. . . . Kalmado lang sia, pirme nakahanda, kag ginadal-an gid niya ako sing mga literatura. Amo nga nagdayaw gid ako sa iya.” *

Si Svetlana, nga naimpluwensiahan sang ebolusyon kag Komunismo, nagapati sa survival of the fittest ukon ang mga mabakod amo lang ang mabilin. Pero nalainan man sia sa sini nga pagpati. Naglibog pa gid ang iya ulo sang nagtuon sia parte sa medisina. Nagsiling sia: “Sa amon subject nga ateismo ginatudluan kami nga ang mabakod amo lang ang mabilin. Pero sa medisina naman, ginatudluan kami nga dapat namon buligan ang mga maluya.” Natingala man sia kon ngaa ang tawo nga ginapatihan nga naghalin sa amu nagaantos sing mga problema, pero ang amu ya wala. Wala niya ginapaabot nga masabat ini nga pamangkot, nagsiling sia: “Paagi sa Biblia, ginpaathag sa akon ni lola nga ang kabangdanan sang aton mga problema amo ang aton pagkadihimpit.” Nalipay gid si Svetlana nga mahibaluan ang sabat sang Biblia kon ngaa nagaantos ang maayo nga tawo.

Si Leif nga taga-Scandinavia nagapati gid sa ebolusyon kag para sa iya ang Biblia mga istorya lang para sa kabataan. Pero isa ka adlaw, ginpamangkot sia sang iya abyan: “Kabalo ka bala nga ginasulit mo lang ang ginahambal sang iban nga wala ka gani kabalo kon ano ang ginaunod sang Biblia?” Bangod sini nagsiling si Leif: “Narealisar ko nga ginbaton ko lang ang ebolusyon, nga wala ko anay gin-usisa. . . . Sa banta ko daku ang mabulig nga makarealisar ang mga ateista kon matun-an nila ang mga tagna sa Biblia kag ang mga katumanan sini.”—Isaias 42:5, 9.

Si Ciarán, nga ginsambit kaina, nadismaya sa tinuig niya nga pagpakigbahin sa pulitika. Samtang ginabinagbinag niya ang kahimtangan sang kabuhi, nakahunahuna sia: Ang gamhanan lamang kag mahigugmaon nga Dios ang makasolbar sang problema nga ginaatubang sang kalibutan kag sia lamang ang makabulig sa aton mga problema. ‘Hay, tani makilala ko man ini nga Dios,’ siling niya. Nasubuan gid si Ciarán amo nga nangamuyo sia sa Dios: “Kon nagapamati ka sa akon, buligi ako palihug sa akon mga problema pati na ang mga tawo nga nagaantos.” Pagligad sang pila ka adlaw, ginbisitahan sia sang isa sa mga Saksi ni Jehova. Ginpaathag sa iya sang Saksi paagi sa Biblia nga may malaut nga impluwensia sa likod sang gobierno sang tawo. (Efeso 6:12) Nag-ugyon gid sa sini si Ciarán bangod sa iya mga nasaksihan amo nga nangusisa pa gid sia sing dugang. Pagkatapos nga matun-an pa gid niya ang Biblia, nagbakod ang iya pagtuo sa mahigugmaon nga Manunuga.

Ikaw kag ang Manunuga

Madamo ang nagaduhaduha ukon wala pa gani nagapati sa Manunuga bangod sa malain nga ginahimo sang relihion, sa panudlo sang mga ateista kaangay sang ebolusyon, kag sa paglapnag sang kalautan. Pero kon usisaon mo ang Biblia, makita mo ang matuod nga mga sabat sa imo mga pamangkot. Ginapaathag man sini ang mga panghunahuna sang Dios, “mga hunahuna sang paghidait kag indi sang malaut, sa paghatag sa inyo sing paglaum” sa palaabuton. (Jeremias 29:11) Para naman kay Bernadette nga may bata nga dis-ebol kag nagapangduhaduha nga may Dios, ini nga paglaum daw subong sang makapaumpaw nga bulong sa iya mga pag-antos.

Natandog gid ang hunahuna kag tagipusuon sang madamo nga ateista sa paathag sang Biblia kon ngaa ginatugutan sang Dios ang pag-antos. Kon usisaon mo ang Biblia, mahibaluan mo man ang mga sabat sa sini nga mga pamangkot kag makumbinsi ka nga may Dios nga ‘indi malayo sa tagsa sa aton.’—Binuhatan 17:27.

[Mga Nota]

^ par. 6 Para sa dugang nga impormasyon, tan-awa ang artikulo nga “Puede Bala Mag-entra sa Inaway ang mga Cristiano?” sa pahina 29-31.

^ par. 22 Para mahibaluan mo ang dugang nga rason kon ngaa gintugutan sang Dios ang kalautan, basaha ang pahina 106 asta 114 sa libro nga Ano Gid ang Ginatudlo sang Biblia? nga ginabalhag sang mga Saksi ni Jehova.

^ par. 25 Para sa dugang nga pamatuod sang pagpanuga, tan-awa ang Septiembre 2006 nga Magmata! nga “May Yara Bala Manunuga?,” nga ginabalhag sang mga Saksi ni Jehova.

[Kahon sa pahina 13]

Mga Pamangkot nga Indi Masabat sang Ebolusyon

• Paano nahimo ang kabuhi halin sa isa nga wala sing kabuhi?—SALMO 36:9.

• Ngaa ang tanom nagapamunga kag ang mga sapat nagabata suno lamang sa ila sahi?—GENESIS 1:11, 21, 24-28.

• Kon ang tawo naghalin sa amu, ngaa wala ka sing makita nga tawo-nga-amu subong?—SALMO 8:5, 6.

• Paano mapaathag sang teoriya nga “survival of the fittest” ang pagkamabinuligon sang tawo?—ROMA 2:14, 15.

• Ano ang matuod nga paglaum sang katawhan?—SALMO 37:29.

[Mga Retrato sa pahina 12, 13]

Paano matuga sang isa ka mahigugmaon nga Dios ang isa ka kalibutan nga nagaantos ang kabataan?

Madamo ang wala nagapati sa Dios bangod sa kalautan sang relihion