Mangin Suod sa Dios

Ano Gid Bala ang Ginapangayo ni Jehova sa Aton?

Deuteronomio 10:12, 13

MATUMAN bala ako ukon indi? Kon kaisa, daw kabudlay ini sabton. Ang mga tawo nga tama ka estrikto kag mabudlay pahamut-an paganot nga ginatuman. Pero ang mga sumilimba ni Jehova nga Dios wala nagapaganot sa pagtuman sa iya. Ngaa? Tan-awon naton kon ano ang ginsiling ni Moises sa Deuteronomio 10:12, 13. *

Sang ginpadaku ni Moises ang mga ginapatuman sang Dios, namangkot sia: “Ano bala ang [ginapangayo] sa imo sang GINOO nga imo Dios?” (Bersikulo 12) Bangod ang Dios amo ang Soberanong Ginuo kag ang Tuburan kag Manugsakdag sang Kabuhi, may kinamatarong sia nga pangayuon sa aton ang bisan ano nga luyag niya. (Salmo 36:9; Isaias 33:22) Gani, puede gid niya kita piliton nga tumanon sia. Pero indi amo sina si Jehova. Ngaa? Kay luyag niya nga mangin ‘matinumanon kita gikan sa tagipusuon.’—Roma 6:17.

Ngaa ginatuman naton ang Dios sing kinabubut-on? Ginsambit ni Moises ang isa ka rason: ‘Kahadluki ang GINOO nga imo Dios.’ * (Bersikulo 12) Indi ini kahadlok nga silutan kita kundi isa ini ka mapuslanon kag tudok nga pagtahod sa Dios kag sa iya mga kasuguan. Kon may amo kita sini nga kahadlok sa Dios, indi gid naton luyag nga mapasubo sia.

Apang, ano gid dapat ang magpahulag sa aton nga tumanon ang Dios? Si Moises nagsiling: ‘Higugmaa si Jehova, kag alagda Sia sa bug-os mong tagiposoon kag sa bug-os mong kalag.’ (Bersikulo 12) Indi lamang balatyagon ang nagapahulag sa aton sa paghigugma sa Dios. Suno sa paathag sang isa ka libro: “Ang Hebreo nga verb para sa balatyagon nagapatuhoy man kon kaisa sa mga butang nga ginahimo naton bangod sa sugo sang aton balatyagon.” Buot silingon, kon ginahigugma gid naton ang Dios, himuon naton ang mga butang nga makapahalipay sa iya.—Hulubaton 27:11.

Dapat bala naton tumanon ang tanan nga ginasugo sang Dios? Si Moises nagsiling: ‘Maglakat sa tanan niyang dalanon.’ (Bersikulo 12) Luyag ni Jehova nga tumanon naton ang tanan niya nga sugo sa aton. Makapalain bala ini para sa aton? Indi gid!

Pakamaayuhon kita sang Dios kon tumanon naton sia sing kinabubut-on. Si Moises nagsiling: “Tumana ang tanan niya nga mga kasugoan. Ginahatag ko ini sa inyo karon nga adlaw para sa inyo kaayuhan.” (Bersikulo 13, Maayong Balita nga Biblia) Ang tanan nga kasuguan ni Jehova para gid sa aton kaayuhan. Ngaa? Kay suno sa Biblia, “ang Dios gugma.” (1 Juan 4:8) Gani, ang tanan nga ginasugo niya sa aton para gid sa aton dayon nga kaayuhan. (Isaias 48:17) Kon himuon naton ang tanan nga ginapangayo ni Jehova sa aton, malikawan naton ang madamo nga problema karon kag matigayon naton ang walay katapusan nga pagpakamaayo sa palaabuton sa paggahom sang iya Ginharian. *

Matuman bala ako ukon indi? Kon may ginapangayo si Jehova sa aton, isa lang ang dapat himuon. Ang kinabubut-on nga pagtuman sang tanan niya nga sugo amo gid pirme ang pinakamaayo. Kon himuon naton ini, magasuod pa gid kita kay Jehova, ang Dios nga nagahigugma kag nagaulikid gid sa aton.

[Mga Nota]

^ par. 1 Bisan pa ang ginsiling ni Moises ginpatuhoy sa mga Israelinhon sang una, ang prinsipio sini maaplikar gihapon sa tanan nga luyag magpahamuot sa Dios.—Roma 15:4.

^ par. 3 Sa bug-os nga tulun-an sang Deuteronomio, ginpadaku ni Moises nga ang kahadlok sa Dios amo dapat ang prinsipio nga maggiya sa kabuhi sang Iya mga alagad.—Deuteronomio 4:10; 6:13, 24; 8:6; 13:4; 31:12, 13.

^ par. 6 Para sa dugang nga impormasyon, tan-awa ang “Ano ang Katuyuan sang Dios sa Duta?” sa kapitulo 3 sang libro nga Ano Gid ang Ginatudlo sang Biblia? nga ginabalhag sang mga Saksi ni Jehova.