Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

ANG LALANTAWAN SEPTIEMBRE 2009

 Pamangkot sang mga Bumalasa

Sa Ano nga Paagi si Jesus kag ang Amay Isa?

Sa Ano nga Paagi si Jesus kag ang Amay Isa?

“Ako kag ang Amay isa,” siling ni Jesus. (Juan 10:30) Ginagamit sang iban ini nga teksto para pamatud-an nga si Jesus kag ang iya Amay duha ka bahin sang Trinidad. Amo bala sini ang buot silingon sang ginhambal ni Jesus?

Binagbinagon naton ang mga bersikulo sa palibot sini nga teksto. Sa bersikulo 25,nagsiling si Jesus nga ang iya mga ginabuhat ginahimo niya sa ngalan sang iya Amay. Halin sa bersikulo 27 asta 29, naghambal sia parte sa simbuliko nga karnero, nga ginhatag sa iya sang iya Amay. Ining mga ginhambal ni Jesus indi mahangpan sang iya mga tagpalamati kon sia kag ang iya Amay isa lang ka persona. Sa baylo, ang buot silingon ni Jesus amo, ‘Kami sang akon Amay nahiusa gid, gani wala sing makaagaw sang karnero sa akon, subong nga wala sing makaagaw sa ila sa akon Amay.’ Pareho ini sa isa ka anak nga nagasiling sa kaaway sang iya amay, ‘Kon sakiton mo ang akon amay, ginasakit mo man ako.’ Wala gid sing may magsiling nga ini nga anak kag ang iya amay isa lang. Pero makita nila nga nahiusa gid sila sang iya amay.

Nangin “isa” man si Jesus kag ang iya Amay, si Jehova nga Dios, bangod isa lang ang ila katuyuan, talaksan, kag mga ginapatuman. Indi kaangay ni Satanas nga Yawa kag sang una nga mag-asawa nga sanday Adan kag Eva, indi gid gusto ni Jesus nga mangin independiente sa Dios. “Ang Anak indi makahimo sang bisan ano sa iya lamang kaugalingon, kundi ang makita niya lamang nga ginahimo sang Amay,” paathag ni Jesus. “Kay ang bisan ano nga ginahimo sinang Isa, ginahimo man ini sang Anak sa amo man nga paagi.”—Juan 5:19; 14:10; 17:8.

Bisan pa mabakod ang ila paghiusa, magkatuhay gihapon ang Amay kag ang iya Anak nga si Jesus. Duha sila ka persona nga may nanuhaytuhay nga personalidad. May kaugalingon si Jesus nga balatyagon, hunahuna, eksperiensia, kag may kahilwayan sia sa pagpili. Pero, nagapasakop sia sa iya Amay. Suno sa Lucas 22:42, nagsiling si Jesus: “Indi ang akon kabubut-on, kundi ang imo kabubut-on ang matuman.” Wala sing pulos ang iya ginsiling kon indi sia makahimo sing tuhay nga desisyon sa iya Amay. Kon isa gid man ka persona si Jesus kag ang iya Amay, ngaa nangamuyo pa sia sa Dios kag mapainubuson nga nagbaton nga may mga butang nga nahibaluan sang Amay nga wala sia makahibalo?—Mateo 24:36.

Ang mga miembro sang madamo nga relihion nagasimba sa mga dios nga nagapakig-away sa mga miembro sang ila mismo pamilya. Halimbawa, sa Griego nga mitolohiya, ginpahalin ni Cronus ang iya amay nga si Uranus sa puesto kag ginpangkaon ang iya mga anak. Tuhay gid ini sa paghiusa nga nabase sa matuod nga gugma sa tunga ni Jehova nga Dios kag sang iya Anak nga si Jesus! Bangod sini, ginahigugma gid naton sila. Ang matuod, may ara kita indi matupungan nga pribilehiyo nga mahiusa sa sining duha ka pinakamataas nga Persona sa bug-os nga uniberso. Tuhoy sa iya mga sumulunod, si Jesus nangamuyo: “Nagapangabay ako, . . . nga sila tanan mangin isa, subong nga ikaw, Amay, nahiusa sa akon kag nagahiusa ako sa imo, agod sila man mahiusa sa aton.”—Juan 17:20, 21.

Gani sang si Jesus nagsiling, “Ako kag ang Amay isa,” wala niya ginapatuhuyan ang indi mapaathag nga Trinidad, kundi ginapatuhuyan niya ang paghiusa ukon ang pinakasuod nga kaangtanan sa tunga sang duha ka persona.