Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

ANG LALANTAWAN HUNYO 2009

 Tudlui ang Inyo Kabataan

Ginluwas si Pablo sang Iya Hinablos

Ginluwas si Pablo sang Iya Hinablos

NAHIBALUAN mo bala nga si apostol Pablo may mga paryente nga sumulunod ni Jesus? *— Ginapakita sang Biblia nga ang iya utod nga babayi kag ang iya hinablos nga lalaki mga sumulunod ni Jesus. Kag ining hinablos ni Pablo nagluwas sang iya kabuhi! Wala naton nahibaluan ang iya ngalan kag kon sin-o ang iya nanay, pero nahibaluan naton ang iya ginhimo. Gusto mo bala nga mahibal-an ini?—

Bag-o lang natapos ni Pablo ang iya ikatlo nga paglakbay subong misyonero kag yara sia sa Jerusalem. Mahimo nga tuig 56 C.E. sadto. Gindakop si Pablo para bistahon. Pero indi gusto sang mga kaaway ni Pablo nga mag-atubang pa sia sa korte. Gusto nila nga mapatay na sia! Gani nagplano sila nga magpadala sing mga 40 ka lalaki para lambatan kag patyon si Pablo.

Pero, nahibaluan sang hinablos ni Pablo ini nga plano. Gusto mo bala mahibaluan ang ginhimo niya?— Ginkadtuan niya si Pablo kag ginsugiran sini nga plano. Amo nga ginsilingan gilayon ni Pablo ang isa ka opisyal nga soldado: “Dalha ini nga pamatan-on sa kumander sang militar kay may inugsugid sia.” Gindala sia sang soldado sa kumander, nga si Claudio Lisias, kag ginpaathag sang soldado nga may importante nga isugid ang pamatan-on. Para makaistoryahanay sila, gindala ni Claudio ang hinablos ni Pablo sa malayo, kag ginsugid sa iya sang pamatan-on ang plano nga pagpatay kay Pablo.

Ginsilingan ni Claudio ang hinablos ni Pablo: “Indi pag-isugid kay bisan sin-o nga ginpaathag mo ini sa akon.” Dayon ginpatawag niya ang duha ka opisyal sang mga soldado kag ginmanduan sila nga maghanda sing 200 ka soldado, 70 ka manugkabayo, kag 200 ka manugbangkaw para pakadtuon sa Cesarea. Sang alas nuebe sina nga gab-i, ining 470 ka lalaki nagbulig para madul-ong si Pablo sa Romano nga Gobernador nga si Felix sa Cesarea. Sa iya sulat kay Felix, ginsugid ni Claudio ang plano nga pagpatay kay Pablo.

Gani napilitan ang mga Judiyo nga magkadto sa korte sa Cesaria para iakusar si Pablo. Siempre, wala sila sing ebidensia nga nakahimo sia sing malain. Pero, ginpriso sia gihapon sing duha ka tuig. Amo nga naglisensia sia nga dalhon sa Roma ang iya kaso, kag gindala sia didto.—Binuhatan 23:16–24:27; 25:8-12.

 Ano ang matun-an naton parte sa hinablos nga lalaki ni Pablo?— Kinahanglan nga mangin maisog kita sa pagsugid sang mga butang nga husto. Kon himuon naton ini, maluwas naton ang kabuhi sang iban. Bisan pa nahibaluan ni Jesus nga “ginatinguhaan sia nga patyon” sang iya mga kaaway, padayon niya nga ginsugid sa mga tawo ang Ginharian sang Dios. Nagsiling si Jesus nga amo man sini ang aton himuon. Kag mahimo naton ini kon maisog kita pareho sang hinablos nga lalaki ni Pablo.—Juan 7:1; 15:13; Mateo 24:14; 28:18-20.

Ginsilingan ni Pablo ang iya pamatan-on nga abyan nga si Timoteo: “Hatagi sang dalayon nga igtalupangod ang imo kaugalingon kag ang imo panudlo. Magpabilin ka sa sining mga butang, kay sa paghimo sini maluwas mo ang imo kaugalingon kag ang mga nagapamati sa imo.” (1 Timoteo 4:16) Sigurado gid nga ginsunod sang hinablos nga lalaki ni Pablo ini nga pagpalig-on sang iya tiyo. Sundon mo man bala ini?

^ par. 3 Kon ginabasa mo ini sa isa ka bata, ang dash isa ka palatandaan nga dapat ka magdulog kag pasabton ang bata.