Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN MAYO 2009

Brooklyn Bethel—100 ka Tuig nga Kasaysayan

Brooklyn Bethel—100 ka Tuig nga Kasaysayan

Puluy-an Bethel 122-124 Columbia Heights

13-17 Hicks Street (1909-1918)

ANG tuig 1909 amo ang isa sa importante nga tuig sa New York City. Ang Queensboro Bridge nga nagaangot sa banwa sang Queens kag sang Manhattan ginbuksan, kag subong man ang Manhattan Bridge nga nagaangot sa Manhattan kag Brooklyn.

Importante man ini nga tuig para sa mga Saksi ni Jehova. Antes sini, si Charles Taze Russell nga presidente sang Watch Tower Bible and Tract Society, ang legal nga korporasyon sang mga Saksi ni Jehova, nakakita sing posibilidad nga mapasangkad ang pagwali sing maayong balita sang Ginharian sang Dios. (Mateo 24:14) Nagapati sia nga ang pagsaylo sang opisina halin sa Pittsburgh, Pennsylvania, pakadto sa Brooklyn, New York, isa ka importante nga tikang. Nagsugod ang paghanda sa pagsaylo sang 1908, kag nakasaylo gid man sila sang maaga nga bahin sang masunod nga tuig.

Ngaa Masaylo sa Brooklyn?

Ang mga nagapanguna sa pagwali nga buluhaton sang una nakahibalo nga ang pagwali paagi sa naimprinta nga mga sermon sa pamantalaan isa ka epektibo nga paagi sa pagpalapnag  sang kamatuoran sa Biblia. Ang matuod, sang 1908, ang sermon ni Russell parte sa Biblia kada semana mabasa sa 11 ka pamantalaan nga may kabug-usan nga sirkulasyon nga 402,000.

Pero, nagsulat si Russell: “Nagsiling ang mga kauturan nga pamilyar sa mga pamaagi sang pamantalaan . . . nga kon ang mga sermon kada semana maghalin sa [daku nga siudad] posible gid nga mabasa ini sa bug-os nga Estados Unidos; kag mahimo nga sa isa ka tuig, ginatos na ka pamantalaan ang magaimprinta sini sing regular.” Gani, nangita sila sing pinakamaayo nga lokasyon agod mapasangkad ang pagwali nga hilikuton.

Mga sermon ni Russell sa pamantalaan

Ngaa sa Brooklyn? Nagsiling si Russell: “Pagkatapos makapangamuyo sa Dios, tanan kami nagdesisyon nga maayo nga lugar ang Brooklyn, N.Y., kay madamo ini sing pumuluyo . . . kag kilala ini nga ‘Siudad sang mga Simbahan,’ amo nga maayo gid ini nga sentro para sa pagpangani nga hilikuton.” Ginapakita sang mga resulta nga maalamon ini nga desisyon. Sa malip-ot lamang nga tion, 2,000 na ka pamantalaan ang nag-imprinta sang mga sermon ni Russell.

May isa pa ka rason kon ngaa maayo sa New York. Sang 1909, ang mga sanga nga opisina sang mga Saksi ginbuksan sa Great Britain, Germany, kag Australia, kag madamo pa nga sanga ang ginaplano nga buksan. Gani, mas maayo kon mahamtang ang headquarter malapit sa pantalan kag sa alagyan pakadto sa iban nga lugar.

Ngaa Gintawag nga Bethel?

18 Concord Street (1922-1927)

117 Adams Street (1927 asta karon)

Ang orihinal nga headquarter sang Watch Tower Bible and Tract Society gintukod sang katuigan 1880, sa Allegheny (karon bahin sang Pittsburgh), Pennsylvania. Sang una, gintawag ini nga Bible House. Sang 1896, 12 lamang ang nagaboluntaryo sa sini nga pasilidad.

Pero sang nagsaylo sila sa Brooklyn sang 1909,  ang bag-o nga ilistaran sang mga nagaboluntaryo diri gintawag nga Bethel. * Ngaa Bethel? Ang propedad nga ginbakal sang Watch Tower Society sa 13-17 Hicks Street ginapanag-iyahan anay sang isa ka kilala nga ministro nga si Henry Ward Beecher kag ginatawag nga Beecher Bethel. Ginbakal man ang balay sang mga Beecher sa 124 Columbia Heights. Ang Marso 1, 1909, nga The Watch Tower nagsiling: “Talalupangdon gid nga nabakal ang daan nga Beecher Bethel kag sa wala ginapaabot, nabakal man ang ila balay. . . . Ang bag-o nga balay tawgon naton nga ‘Bethel,’ kag ang opisina kag awditoryum nga ‘The Brooklyn Tabernacle’; amo ini ang ginbulos sa ngalan nga ‘Bible House.’”

Karon, ang daku nga pasilidad sa Brooklyn kag sa duha pa ka lugar sa New York State, sa Wallkill kag Patterson, lakip na ang ilistaran, imprintahan, kag mga opisina, ginatawag gihapon nga Bethel. Ang matuod, sa bug-os nga kalibutan karon, may puluy-an Bethel sa 113 ka pungsod. May sobra na sa 19,000 ka boluntaryo nga mga ministro ang nagabulig sa pagpaambit sing mensahe sa Biblia.

35 Myrtle Avenue (1920-1922)

Mainit nga Pag-abiabi sa mga Bisita

Gindedikar ang mga pasilidad sang Enero 31, 1909. Lunes, Septiembre 6, 1909, amo ang adlaw sa pagbaton sing mga bisita sa Bethel. Ginatos ka Estudyante sang Biblia, nga amo anay ang tawag sa mga Saksi ni Jehova, ang naglibot sa pasilidad. Madamo sa ila ang naghalin sa isa ka Cristianong pagtilipon sa Saratoga Springs, nga mga 320 kilometros sa aminhan sang New York City. Personal sila nga gin-abiabi kag gintamyaw ni Charles Taze Russell. *

Padayon gihapon nga ginaabiabi ang mga bisita sa Bethel. Ang matuod, kada tuig sobra sa 40,000 ka tawo ang naga-tour sa mga pasilidad sa Brooklyn. May importante gihapon nga papel ang Bethel sa Brooklyn sa pagpalapnag sang mensahe sang Ginharian ni Jehova, agod mapakamaayo ang minilyon ka tawo.

Imprintahan sa Wallkill

Patterson Educational Center

^ par. 11 Ang Hebreong tinaga nga “Bethel” nagapahangop sing “Balay sang Dios.” Sa Biblia, ang Bethel isa ka kilala nga siudad sa Israel. Ang siudad lamang sang Jerusalem ang masami nga ginasambit.

^ par. 14 Para sa dugang nga detalye parte sa sini nga kasaysayan, tan-awa ang Jehovah’s Witnesses—Proclaimers of God’s Kingdom, pahina 718-723, nga ginhimo sang mga Saksi ni Jehova.