Proteksion Batok sa Malaut nga Espiritu

SI James nagdaku sa isla sang Malaita, sa Solomon Islands. Sugod sang bata pa sia, gintudluan na sia nga dapat padunggan ang mga espiritu. “Wala gid sa pensar ko nga pangabayon ang mga espiritu nga halitan ang iban,” siling niya, “pero wala gid magsulod sa pensar ko nga posible man gali mangin malipayon ang akon kabuhi nga wala sing rarafono [isa ka tradisyunal nga paagi sa pagpangayo sing pangamlig sa mga espiritu] agod indi mahalitan.”

Subong sang nagakatabo sa mga tawo sa iban nga bahin sang kalibutan, nagapati man ang mga tawo sa Solomon Islands nga ang mga espiritu makabulig ukon makahalit sa isa ka tawo. Ang matuod, ginapalangga sang madamo nga Melanesian ang mga espiritu kag wala nila ini ginakahadlukan.

Makita sa lainlain nga paagi ang pagpati sa kon ano ang mahimo sang mga espiritu. Halimbawa, sang bata pa si James, ginapasulod gilayon sang mga nanay ang ila bata sa balay kon mabatian nila ang huni sang pispis nga korokoro (koel). Ngaa? Nagapati sila nga kon maghuni ini, may maabot nga kahalitan.

Ang pila sa ila nagabutang sing pinasahi nga puti nga bato sa ibabaw sang puertahan sang ila mga balay. Amo man sini ang ginhimo ni James, bangod nagapati sia nga proteksionan sila sang bato batok sa pagpanghalit sang espiritu. Kag kon nagatrabaho si James, ginatipon niya ang nabilin sa iya balon sa panyaga kag taguon ini sa iya bag agod ihaboy. Ginakulbaan sia nga basi makuha ini sang manughiwit kag gamiton ini agod hiwitan sia.

Bisan pa ini nga mga buhat indi kinaandan sa inyo lugar, ayhan kaangay ni James nagabatyag ka nga kinahanglan mo sundon ang inyo kinabatasan agod maproteksionan ka batok sa malaut nga mga espiritu. Mahimo nga nagapati ka nga dapat sundon mo ini nga mga kinabatasan agod indi ka mahalitan.

Kon nagapati ka sa Biblia, wala sing duhaduha nga gusto mo mahibaluan ang sabat sa masunod nga mga pamangkot: (1) Ano nga halit ang mahimo sang malaut nga espiritu sa imo? (2) Maimpluwensiahan ka bala sang mga demonyo kon sundon mo ang pila ka kinabatasan? (3) Paano ka makabaton sing matuod nga proteksion batok sa malaut nga mga espiritu kag mangin malipayon?

 Kon Paano Nagapanghalit ang Malaut nga mga Espiritu

Ginasugid sang Biblia nga ang malaut nga espiritu indi amo ang espiritu sang mga napatay. “Ang buhi nakahibalo nga mapatay sila,” siling sang Pulong sang Dios, “apang ang patay wala makahibalo sang bisan ano.” (Manugwali 9:5) Ang matuod, ang malaut nga mga espiritu amo ang rebelde nga mga anghel nga nag-upod kay Satanas sa pagpatalang sa mga tawo.—Bugna 12:9.

Maathag nga nagsiling ang Biblia nga kinahanglan naton ang proteksion batok sa malaut nga mga espiritu. Nagsulat si apostol Pablo sa mga Cristiano sa Efeso: “Nagapakigdumog kita, indi batok sa dugo kag unod, kundi batok sa . . . malaut nga mga puersa nga espiritu sa langitnon nga mga duog.” Ginalaragway ni apostol Pedro ang manuggahom sang tanan nga malaut nga espiritu, si Satanas nga Yawa, subong isa ka “nagangurob nga leon, nga nagapangita sing matukob.”—Efeso 6:12; 1 Pedro 5:8.

Ginahalitan ni Satanas ang mga tawo paagi sa pagpatalang ukon pagsulay sa ila nga lapason ang Dios. Nagasiling ang Biblia nga si Satanas “padayon nga nagahimo sang iya kaugalingon nga anghel sang kapawa.” (2 Corinto 11:14) Nagapakunokuno sia nga nagaamlig nga espiritu, pero sa pagkamatuod malain ang iya tuyo. Ginabulag ni Satanas ang hunahuna sang mga tawo sa kamatuoran parte sa iya kag parte sa Dios. (2 Corinto 4:4) Ngaa gusto niya patalangon ang mga tawo?

Ginahandum ni Satanas nga simbahon sia sang mga tawo, direkta man ukon indi direkta. Sang ang Anak sang Dios yari sa duta, gusto ni Satanas nga ‘magyaub kag magsimba sa iya si Jesus.’ Si Jesus nagsiling: “Palayo ka, Satanas! Kay nasulat na, ‘Si Jehova nga imo Dios ang dapat mo simbahon.’” (Mateo 4:9, 10) Ginsikway ni Jesus ang bisan ano nga buhat sang pagsimba kay Satanas.

Si Jehova amo ang labing gamhanan nga espiritu kag indi niya pagtugutan nga padayon nga mahalitan ang mga nagatuman sa iya. (Salmo 83:18; Roma 16:20) Pero kon luyag naton pahamut-an si Jehova nga Dios kaangay sang ginhimo ni Jesus, dapat naton likawan ang bisan ano nga buhat sang pagpasakop kay Satanas ukon sa iya mga demonyo. Agod mahimo ini, kinahanglan mahibaluan naton ang mga kinabatasan nga nagapakita sing pagsimba sa malaut nga mga espiritu. Paano mo ini mahimo?

Hibalua ang mga Kinabatasan nga Wala Nahamut-an sang Dios

Ginpaandaman ni Jehova nga Dios ang iya katawhan sang una, ang mga Israelinhon, batok sa pagsunod sa pila ka kinabatasan sang kaingod nga mga pungsod. Nagsiling sia: “Manginwalay makita sa imo nga bisan sin-ong . . . nagagamit sing pagpamakot, ang manuglagpat, ukon manugbabaylan, ukon diwatahan, ukon manugtiwtiw.” Parte sa mga nagasunod sa sini nga mga kinabatasan, ang Biblia nagsiling: “Ang bisan sin-o nga nagahimo sining mga butang kangil-aran sa GINOO.”—Deuteronomio 18:10-12.

Gani, kon parte sa mga kinabatasan nga lapnag sa inyo lugar, binagbinaga ang masunod nga mga pamangkot: Ini bala nga mga kinabatasan nagapalig-on sa pagpati sa mga disparatis? Nagapangayo bala ini sing proteksion paagi sa madyik halin sa wala sing kabuhi nga mga butang? Nagadalahig bala ini sang paggamit ukon proteksion batok sa hiwit? Nagadalahig bala ini sang isa ka buhat sang pagpasakop sa isa ka espiritu luwas kay Jehova ukon sa iya tinangdo nga representante, si Jesus?—Roma 14:11; Filipos 2:9, 10.

Importante nga sikawayon naton ang bisan ano nga kinabatasan nga nagapalig-on sa sini nga mga buhat. Ngaa? Gintuytuyan sang Dios si apostol Pablo sa pagsulat: “Indi kamo makaambit sa ‘lamesa ni Jehova’ kag sa lamesa sang mga demonyo.” Ginsilingan niya ang mga nagatinguha sa pagpahamuot sa Dios kag sa iban nga espiritu nga ‘pagpukaw ini sang kaimon ni Jehova.’ (1 Corinto 10:20-22) Gusto ni Jehova nga Dios nga sia lamang ang dapat simbahon, kag bagay gid ini sa iya.—Exodo 20:4, 5.

Binagbinaga man ini nga pamangkot: Ini bala nga kinabatasan nagapakita sang ideya nga ang isa ka tawo wala sing salabton sa iya mga ginabuhat? Halimbawa, ang panghilahi kag paghulid  antes sang kasal ginakangil-aran sa madamo nga lugar kag ginapakamalaut man sang Biblia. (1 Corinto 6:9, 10) Pero, sa pila ka kultura sa Pasipiko, mahimo nga batunon ini sang mga tawo kon ang isa ka babayi mangangkon nga “na-green leaf” * sia, buot silingon nga nakigskeso sia bangod nga ginlumay sia.

Pero, ang Biblia nagatudlo sa aton nga may salabton kita sa aton mga ginabuhat. (Roma 14:12; Galacia 6:7) Halimbawa, ang una nga babayi nga si Eva, nagbatyag nga gintiplang sia ni Satanas nga supakon ang Dios, nga nagasiling: “Ang man-ug nagdaya sa akon, kag nagkaon ako.” Pero, ginsilutan sia ni Jehova sa iya ginbuhat. (Genesis 3:13, 16, 19) Manabat man kita sa iya sa aton paggawi.—Hebreo 4:13.

Ano ang Dapat Mo Himuon?

Kon gusto mo pahamut-an ang Dios kag sundon ang mga prinsipio sa Bibila, kinahanglan nga himuon mo ang tanan agod batuan si Satanas. Sang unang siglo, ang bunayag nga mga tawo sa Efeso nagpakita sing maayong halimbawa sa sini nga bahin. Agod mahilway ang ila kaugalingon batok sa impluwensia sang malaut nga espiritu, gintipon nila ang tanan nga libro parte sa espiritismo kag “ginsunog ini sa atubangan sang tanan.”—Binuhatan 19:19.

Antes sang pagsunog sang mga libro, ini nga mga tawo “nagkari kag nagtu-ad kag nagsugid sing hayag sang ila mga binuhatan.” (Binuhatan 19:18) Bangod natandog sila sa panudlo ni Pablo parte kay Cristo, wala lamang nila ginsunog ang ila mga libro sa espiritismo kundi ginbag-o man nila ang ila pagpati sa ila mga kinabatasan.

Matuod, ang pagbiya sa mga kinabatasan mahimo nga indi mahapos. Amo sini ang naeksperiensiahan ni James nga ginsambit kaina. Nagtuon sia sing Biblia upod sa mga Saksi ni Jehova kag nagustuhan niya ang iya natun-an. Pero, padayon gihapon sia nga naghimo sing rarafono. Sang gin-usisa niya ang iya balatyagon sa sini nga mga kinabatasan, natukiban niya nga nagapati sia sa mga saad ni Jehova sa palaabuton apang nagapati gihapon sia nga agod indi mahalitan, kinahanglan niya sundon ang ila mga kinabatasan.

Ano ang nakabulig kay James agod mabag-o ang iya pagpati? Nagsiling sia: “Nangamuyo ako kay Jehova sing proteksion kag bulig agod magsalig ako sa iya. Sa amo man nga tion, ginbiyaan ko ang amon tradisyunal nga mga kinabatasan.” Nahalitan bala sia? “Wala,” siling ni James. “Ang natabo lamang amo nga nakatuon ako nga magsalig kay Jehova. Nakita ko kon daw ano ka suod si Jehova sa iya mga abyan.” Ang matuod, sang nagligad nga pito ka tuig, nag-alagad si James subong bug-os tion nga ministro, nga nagabulig sa iban nga makatuon sa Biblia.

Ngaa indi mo pagsundon ang ginhimo ni James? Usisaa ang mga kinabatasan sa inyo lugar, kag gamita ang imo “ikasarang sa pagpangatarungan” kag hibaluon kon bala nahisanto ini sa “kabubut-on sang Dios.” (Roma 12:1, 2) Dayon magtipon sing kaisog agod mabayaan mo ang mga disparatis. Kon himuon mo ini, makasalig ka nga ‘batunon ka’ kag proteksionan ni Jehova. (2 Corinto 6:16-18) Kaangay ni James, maeksperiensiahan mo man nga matuod ang ginsaad sang Biblia: “Ang ngalan sang GINOO torre nga mabakud; ang matarung nagadalagan pasulud sini kag may kalig-onan.”—Hulubaton 18:10.

[Nota]

^ par. 18 Ini nga termino nagapatuhoy sa kinabatsan nga pag-orasyon sa isa ka pinasahi nga dahon sang tanom ukon pagkaon. Dayon ginahatag ini sa isa ka babayi. Ang dahon ukon pagkaon amo kuno ang rason kon ngaa maluyag ang babayi sa isa ka lalaki. Ini nga kinabatasan indi pareho kon ginpadroga ang isa ka babayi nga lipod sa iya ihibalo kag ginpilit sia nga makigsekso. Sa sini nga kaso, wala sing sala ang babayi nga biktima.

[Retrato sa pahina 19]

“Korokoro”

[Credit Line]

Courtesy of Dr. Bakshi Jehangir

[Retrato sa pahina 19]

Babayi nga nagapamulot sing nauyang nga pagkaon agod indi ini magamit sa paghiwit