Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN ABRIL 2009

 Tudlui ang Inyo Kabataan

Si Jehoas Nagtalikod kay Jehova Bangod sa Malain nga Kaupdanan

Si Jehoas Nagtalikod kay Jehova Bangod sa Malain nga Kaupdanan

MAKAHALADLOK gid nga tion sadto sa Jerusalem, ang siudad nga ginatindugan sang templo sang Dios. Daw indi mapatihan ang natabo. Bag-o lang ginpatay si Hari Ahazias. Dayon, ginpapatay sang iya iloy nga si Rayna Atalia ang iya mga apo nga mga anak ni Ahazias! Kabalo ka bala kon ngaa ginpamatay niya sila?— * Para sia lang ang makapungko sa trono.

Pero, wala nahibaluan ni Atalia nga ang isa sa iya mga apo, ang lapsag nga si Jehoas, wala mapatay. Gusto mo bala mahibaluan kon ngaa?— Kay man, gintago si Jehoas sang iya tiya nga si Josaba sa templo sang Dios. Puede niya matago didto ang bata kay ang iya bana nga si Jehoiada amo ang Mataas nga Saserdote. Gani, nagbuligay sila nga mag-asawa para indi maano si Jehoas.

Sa sulod sang anom ka tuig, gintago nila si Jehoas sa templo. Didto gintudluan nila sia parte kay Jehova nga Dios kag sa iya mga kasuguan. Sang ulihi, sang pito na ka tuig si Jehoas, naghimo sing paagi si Jehoiada para mangin hari si Jehoas. Gusto mo bala mahibaluan kon paano ini ginhimo ni Jehoiada kag kon ano ang natabo sa lola ni Jehoas, ang malain nga si Rayna Atalia?—

Sekreto nga ginpatawag ni Jehoiada ang mga manugbantay anay sang hari sang Jerusalem. Ginsugiran niya sila nga ginluwas nila nga mag-asawa ang lapsag nga anak ni Hari Ahazias. Dayon gindala ni Jehoiada si Jehoas sa mga manugbantay, kag narealisar nila nga sia dapat ang mangin hari. Gani, naghimo sila sing plano.

Ginpagua ni Jehoiada si Jehoas kag ginkoronahan sia. Dayon, ang mga tawo ‘nagpamalakpak kag nagsiling, “Mabuhi ang hari!”’ Ginpalibutan sang mga manugbantay si Jehoas para indi sia maano. Sang mabatian ni Atalia ang kinasadya, nagua sia kag indi tani magpasugot. Pero ginsugo ni Jehoiada ang mga manugbantay nga patyon si Atalia.—2 Hari 11:1-16.

Ginluwas si Jehoas

Sa banta mo, gintuman bala ni Jehoas si Jehoiada kag naghimo pirme sing maayo?— Huo, matinumanon sia sang buhi pa si Jehoiada. Ginsigurado pa  gani niya nga ang mga tawo mag-amot sing kuarta para mapakay-o ang templo sang Dios, nga ginpabay-an sang iya amay nga si Ahazias kag sang iya lolo nga si Jehoram. Pero tan-awon ta ang natabo sang mapatay ang Mataas nga Saserdote nga si Jehoiada.—2 Hari 12:1-16.

Sadto nga tion, mga 40 na ang edad ni Jehoas. Dapat ang iya upod pirme mga alagad ni Jehova, pero nangamigo sia sa mga tawo nga nagasimba sa butig nga mga dios. Ang bata ni Jehoiada nga si Zacarias amo na ang saserdote ni Jehova. Ano sa banta mo ang ginhimo ni Zacarias sang mahibaluan niya ang malain nga mga butang nga ginhimo ni Jehoas?—

Ginsilingan ni Zacarias si Jehoas: “Bangud nga ginbayaan ninyo ang GINOO, sia man nagbiya sa inyo.” Naakig gid sa sini si Jehoas, gani nagsugo sia nga batuhon si Zacarias asta mapatay. Hamak mo—ginluwas si Jehoas sa manugpatay, pero karon sia mismo ang nagpapatay kay Zacarias!—2 Cronica 24:1-3, 15-22.

Nakita mo bala ang mga leksion nga matun-an naton sa sini nga istorya?— Indi gid naton gusto nga magpareho kay Atalia, nga madumot kag mapintas. Sa baylo, dapat naton palanggaon ang aton mga kauturan kag bisan ang aton mga kaaway, pareho sa gintudlo sa aton ni Jesus. (Mateo 5:44; Juan 13:34, 35) Kag dumduma, kon sang primero nagahimo kita sing maayo pareho ni Jehoas, dapat ang aton pirme mga amigo kag amiga mga tawo nga nagahigugma kay Jehova kag nagapalig-on sa aton nga padayon nga alagaron sia.

^ par. 3 Kon ginabasa mo ini sa isa ka bata, ang dash, isa ka palatandaan nga dapat ka magdulog kag pasabton ang bata.