Mangin Suod sa Dios

Isa ka Manunuga nga Takus Naton Dayawon

Bugna 4:11

NAPALIGBAN mo na bala kon ano ang katuyuan sang aton kabuhi? Ang mga nagapati nga ang kabuhi resulta lamang sang ebolusyon wala nakasapo sing sabat sa sini nga pamangkot. Apang tuhay ang mga nagbaton sang mabakod nga kamatuoran nga si Jehova nga Dios amo ang Tuburan sang kabuhi. (Salmo 36:9) Nahibaluan nila nga may katuyuan ang Dios sa pagtuga sa aton. Ina nga katuyuan narekord sa Bugna 4:11. Usisaon naton kon paano ini nga mga pinamulong, nga ginsulat ni apostol Juan, nagapaathag kon ngaa yari kita diri.

Ginsulat ni Juan ang isa ka ambahanon sa langit nga nagadayaw sa Dios: “Takus ka, Jehova, nga amon Dios, nga magbaton sang himaya kag dungog kag gahom, bangod gintuga mo ang tanan nga butang, kag bangod sang imo kabubut-on nagluntad sila kag natuga.” Si Jehova lamang ang takus nga himayaon. Ngaa? Bangod ‘gintuga niya ang tanan nga butang.’ Ano karon ang dapat himuon sang iya intelihente nga mga tinuga?

Ginasiling sini nga bersikulo nga si Jehova takus “magbaton” sing himaya, dungog, kag gahom. Indi gid maduhaduhaan nga sia ang labing mahimayaon, labing dungganon, kag labing gamhanan nga Persona sa bug-os nga uniberso. Apang, ang kalabanan nga tawo wala nagakilala sa iya subong aton Manunuga. Bisan pa sa sini, may mga tawo nga nakakita gid sa “di-makita nga mga kinaiya” sang Dios paagi sa iya mga tinuga. (Roma 1:20) Bangod sang ila pagkamapinasalamaton, napahulag sila nga himayaon kag padunggan si Jehova. Ginasugid nila sa tanan nga luyag mamati sa dalayawon nga pamatuod nga si Jehova ang nagtuga sang tanan nga butang sa makatilingala nga paagi amo nga takus sia sang aton pagsimba.​—Salmo 19:1, 2; 139:14.

Apang, paano si Jehova nagabaton sing gahom gikan sa iya mga sumilimba? Siempre pa, wala sing tinuga nga makahatag sing gahom sa labing gamhanan nga Manunuga. (Isaias 40:25, 26) Apang, bangod gintuga kita sa dagway sang Dios, may mga kinaiya man kita nga kaangay niya, isa sa sini amo ang gahom. (Genesis 1:27) Kon ginaapresyar gid naton ang ginhimo sang aton Manunuga para sa aton, mapahulag kita nga gamiton ang aton gahom kag kusog sa pagpadungog kag paghimaya sa iya. Imbes nga gamiton ang aton kusog para sa aton kaugalingon nga mga intereses, nahibaluan naton nga takus si Jehova nga Dios sa pagbaton sang tanan naton nga gahom ukon kusog sa pag-alagad sa iya.​—Marcos 12:30.

Ti, ngaa yari kita diri? Ang ulihi nga bahin sang Bugna 4:11 nagsabat: “Bangod sang imo kabubut-on nagluntad sila [tanan nga tinuga] kag natuga.” Wala kita nagluntad sa aton kaugalingon nga pagbuot. Kundi, nagluntad kita bangod sa kabubut-on sang Dios. Bangod sini, kon magkabuhi kita para lamang sa aton kaugalingon, wala gid ini sing pulos nga sahi sang kabuhi. Agod matigayon ang kalinong sa kaugalingon, kalipay, kaayawan, kag kadalag-an, kinahanglan naton mahibaluan ang kabubut-on sang Dios kag magkabuhi nahisuno sa sini. Nian mahibaluan naton ang rason kon ngaa gintuga kita kag nagluntad.​—Salmo 40:8.

[Credit Line sang piktyur sa pahina 31]

NASA, ESA, and A. Nota (STScI)