Mangin Suod sa Dios

Mahigugmaon sa Hustisya

Hebreo 10:26-31

NANGIN biktima ka na bala sing inhustisya ukon kapintas apang ang naghimo sini wala naghinulsol ukon ginsilutan? Mabudlay gid ini nga kahimtangan ilabi na kon ang isa nga ginapaabot mo nga maghigugma kag mag-ulikid sa imo amo pa ang naghimo sini nga kalainan. Mahimo mamangkot ka, ‘Ngaa gintugutan ini sang Dios?’ * Ang matuod, ginadumtan ni Jehova nga Dios ang tanan nga sahi sang inhustisya. Ginapalig-on kita sang iya Pulong, ang Biblia, nga silutan niya ang batinggilan nga mga makasasala. May kaangtanan sini, binagbinagon naton ang ginsiling ni apostol Pablo nga narekord sa Hebreo 10:26-31.

Nagsulat si Pablo: “Kon hungod kita nga maghimo sang sala sa tapos mabaton ang sibu nga ihibalo tuhoy sa kamatuoran, wala na sing nabilin nga halad tungod sa mga sala.” (Bersikulo 26) Takus gid silutan ang hungod nga mga makasasala. Ngaa? Una, ang ila pagpakasala indi lamang resulta sang ila kaluyahon ukon sang ila di-kahimpitan, sa baylo, sulitsulit gid nila nga ginahimo ini. Ikaduha, naanad na sila kag hungod nga nagapakasala kag puno sing kalautan ang ila tagipusuon. Ikatlo, nagapakasala sila indi bangod wala sila sing may nahibaluan. May yara sila “sibu nga ihibalo sa kamatuoran” tuhoy sa kabubut-on kag mga ginapatuman sang Dios.

Paano ginatamod sang Dios ang di-mahinulsulon nga mga makasasala? “Wala na sing nabilin nga halad tungod sa mga sala,” siling ni Pablo. Ang dulot sang Dios para sa katawhan nga amo ang halad ni Cristo, nagatabon sang nahimo naton nga mga sala bangod sa pagkadihimpit. (1 Juan 2:1, 2) Apang, ginapakita sang di-mahinulsulon nga mga makasasala nga wala nila ginapabaloran ining hamili nga dulot. Sa pagtamod sang Dios, ‘gintapak nila ang Anak sang Dios, kag ginkabig nga kinaandan lang ang dugo’ ni Jesus. (Bersikulo 29) Paagi sa ila ginahimo, ginatamay nila si Jesus kag ‘ginahikayan’ ang iya dugo nga daw subong bala nga wala ini sing balor. (Maayong Balita nga Biblia) Ining wala sing apresasyon nga mga tawo indi makabenepisyo sa halad ni Cristo.

Ano ang madangatan sang mga malauton? Ang Dios sang hustisya nagsiling: “Akon ang pagtimalos; ako ang magabalos.” (Bersikulo 30) Dapat tandaan sang hungod nga mga nagapakasala kag nagapanghalit sa iban nga wala gid sing may makalikaw sa silot sang Dios. Sa masami, anihon gid nila ang ila ginasab-ug. (Galacia 6:7) Kon indi man sa karon, magaatubang sila gihapon sa Dios sa palaabuton kon tinluan na niya ang duta gikan sa tanan nga inhustisya. (Hulubaton 2:21, 22) Si Pablo nagpaandam: “Makahaladlok ang mahulog sa mga kamot sang buhi nga Dios.”​—Bersikulo 31.

Makapaumpaw kag makapalig-on gid ilabi na sa mga biktima sang inhustisya nga wala gali ginakunsinti ni Jehova nga Dios ang mga batinggilan kag hungod nga nagapakasala. Bug-os kita nga makasalig sa pagtimalos sang Dios nga nagadumot sa tanan nga sahi sang inhustisya.

[Footnote]

^ par. 4 Para sa pagbinagbinag kon ngaa gintugutan sang Dios ang pag-antos, tan-awa ang pahina 106-114 sang libro nga Ano Gid ang Ginatudlo sang Biblia? nga ginabalhag sang mga Saksi ni Jehova.