“Ano ang Ila Ginahimo Dira?”

AMO sina ang pamangkot sang mga nagalabay sa daku nga pasilidad sang mga Saksi ni Jehova sa siudad sang Mogale (Krugersdorp), malapit sa Johannesburg, Bagatnan nga Aprika. Gani, sang Oktubre 12 kag 13, 2007, ginbuksan sang mga Saksi ang pasilidad para sa mga interesado nga magduaw. May duha ini ka katuyuan. Una, agod mauntat na ang butig nga mga huringhuring kag ikaduha, agod makita sang mga tawo kon paano ginasakdag sang sanga talatapan ang hilikuton nga ginsugo ni Jesucristo.​—Mateo 28:19, 20.

Ang mga boluntaryo sa sanga talatapan nagbutang sing mga karatula nga nagaabiabi sa nagasululod nga mga bisita. Ginhatagan nila sing pinasahi nga mga imbitasyon ang mga kaingod. Gin-agda man nila ang pila ka mga negosyante kag ang pamilya sini. Ano ang resulta? Kapin sa 500 ka bisita nga indi mga Saksi ang nag-tour sa pasilidad.

Nanamian gid sila sa MAN Roland Lithoman web-offset press nga makaimprinta tubtob 90,000 ka magasin kada oras. Nagdayaw man ang mga bisita sa bookbindery kag sa malapad nga shipping area diin ginahanda kag ginapadala ang kapin sa 14 ka tonelada nga literatura kada adlaw. Ang mga katapo sang nagkalainlain nga mga departamento naghanda man sing matahom nga mga displey lakip na diri ang sumaryo sang maragtas sang pag-imprinta halin sa kinaraan tubtob sa moderno nga pamaagi sa pag-imprinta. Sa isa naman ka displey, ginpakita kon paano ginaamligan sang sanga talatapan ang palibot. Halimbawa, may pinasahi sila nga kagamitan nga nagasuyop sang makahililo nga mga gas kag baho gikan sa mga nagapamala sa imprintahan, kag may salaan nga nagatipon sang mga yab-ok halin sa papel.

Ang isa ka lokal nga pamantalaan nagsiling nga ang 700 ka boluntaryo nga nagapuyo sa pasilidad “mga ordenado nga ministro nga nagdedikar sang ila kaugalingon kay Jehova.” Nagsiling man ini nga ang imprintahan “tuman katinlo kag ang tanan nga hilikuton may iskedyul nga ginasunod.” Ang isa ka tawo nga nagapamatok anay sa mga Saksi ni Jehova nag-tour man. Sang ulihi, sia nagsulat: “Panginbulahan sa inyo. Subong pa lang ako nakakita sang amo sini katinlo kag katahom nga pasilidad.”

Madamo sa mga bisita ang nagpabutyag man sing apresasyon sa ila pag-tour sa pasilidad. Nakibot sila nga ang sanga talatapan may pasad sa Biblia nga mga literatura sa 151 ka lenguahe kag nagaimprinta sing mga publikasyon para sa 18 ka pungsod sa bagatnan kag sentral nga Aprika. Ang mga pasilidad sang sanga talatapan sang mga Saksi ni Jehova sa bug-os nga kalibutan bukas pirme para sa mga maluyag mag-tour sa tion nga may trabaho. Ngaa indi ka mamangkot sa malapit nga sanga talatapan sa inyo lugar kon ano oras ka puede maka-tour?

[Piktyur sa pahina 14]

Imbitasyon

[Piktyur sa pahina 14]

Nag-abot nga mga bisita nga ma-tour sa pasilidad

 [Piktyur sa pahina 15]

Sanga talatapan sang Bagatnan nga Aprika sa siudad sang Mogale, Bagatnan nga Aprika

[Piktyur sa pahina 15]

MAN Roland Lithoman web-offset press

[Piktyur sa pahina 15]

Bookbindery

[Piktyur sa pahina 15]

Shipping