Ano ang Epekto sa Imo sang Matun-an Mo ang Kamatuoran Tuhoy sa Impierno?

ANG mga nagatudlo nga ang impierno isa ka duog nga ginapaantos ang mga tawo nagapakahuya gid kay Jehova nga Dios kag nagasumpakil sa iya mga kinaiya. Matuod, ang Biblia nagsiling nga laglagon sang Dios ang mga malauton. (2 Tesalonica 1:6-9) Apang ang matarong nga kaakig indi amo ang nagapangibabaw nga kinaiya sang Dios.

Ang Dios indi malaut ukon madumot. Namangkot pa gani sia: “Nalipay [bala] ako magtan-aw nga mapatay ang isa ka malaut nga tawo?” (Ezequiel 18:23, Maayong Balita) Kon ang Dios wala nalipay sa kamatayon sang malauton, paano niya mabatas nga makita sila nga nagaantos sing walay katapusan?

Ang nagapangibabaw nga kinaiya sang Dios amo ang gugma. (1 Juan 4:8) Ang matuod, “ang Ginuo maayo sa tanan, kag ang iya kaluoy yara sa tanan niya nga ginhimo.” (Salmo 145:9, Biblia sang Katilingban sang mga Kristiano) Gani, luyag man sang Dios nga palambuon naton ang tinagipusuon nga gugma sa iya.​—Mateo 22:35-38.

Kahadlok sa Impierno Ukon Gugma sa Dios?

Ang panudlo nga ang mga kalag ginapaantos sa impierno nagaresulta sa di-nagakaigo nga kahadlok sa Dios. Sa pihak nga bahin, kon matun-an sang isa ang kamatuoran tuhoy sa Dios, mapahulag sia nga higugmaon ang Dios. Subong resulta, mapalambo niya ang nagakaigo nga kahadlok sa Dios. “Ang kahadluk sa GINOO amo ang pamuno sang kaalam; ang tanan nga nagahimo sang iya mga sogo may maayong paghangup,” siling sang Salmo 111:10. (Ang Biblia) Ini nga sahi sang kahadlok indi makahalalit, kundi isa ka tudok nga pagtahod para sa Manunuga. Nagapahulag ini sa aton nga indi sia pagpaakigon.

Binagbinaga kon ano ang epekto sa 32 anyos nga si Kathleen sang matun-an niya ang kamatuoran tuhoy sa impierno. Sang una, adik sia, imoral, nabuyo sa mga party, masingki kag naugot sa iya kaugalingon. Gin-ako niya: “Samtang ginatulok ko ang akon isa ka tuig nga bata nga babayi, sa pensar ko, ‘Ano ining ginahimo ko sa iya man? Sunugon gid ako sini sa impierno.’” Ginhimo niya ang tanan  agod untatan na ang paggamit sing droga, apang wala ini sing epekto. “Gusto ko man nga mangin maayo,” siling niya, “pero daw wala na gid sing pulos ang akon kabuhi. Isa pa, halos tanan nagahimo man sing malain, ti ano pa abi ang rason nga mangin maayo ako?”

Nian naistorya ni Kathleen ang mga Saksi ni Jehova. “Natun-an ko nga wala man gali sing nagadabadaba nga impierno. Rasonable gid ang mga pamatuod sang Kasulatan,” siling ni Kathleen. “Daku gid nga paumpaw sa akon sang mahibaluan ko nga indi ako pagasunugon sa impierno.” Apang natun-an man niya ang saad sang Dios nga ang mga tawo mahimo mabuhi sing walay katapusan sa duta nga wala na sing kalautan. (Salmo 37:10, 11, 29; Lucas 23:43) Nakunyag sia sa pagsiling: “Karon may matuod na ako nga paglaum​—ang magkabuhi sing walay katapusan sa Paraiso!”

Mauntat ayhan si Kathleen sa paggamit sing droga kon nahadlok lang sia sa impierno? Sia nagsiling: “Kon daw ginapangita gani sang akon ginhawa ang droga, nagapakitluoy ako kay Jehova nga Dios nga buligan niya ako. Ginadumdom ko nga ginatamod niya ini nga mahigko, kag indi ko luyag nga paslawon sia. Ginsabat niya ang akon mga pangamuyo.” (2 Corinto 7:1) Ang kahadlok nga indi mapahamut-an ang Dios amo ang nagbulig kay Kathleen nga untatan ang paggamit sing droga.

Ang gugma sa Dios kag ang nagakaigo nga kahadlok sa iya​—indi ang kahadlok nga paantuson sa impierno—​amo ang magapahulag sa aton nga tumanon ang Dios agod mangin malipayon kita sing dayon. Ang salmista nagsulat: “Bulahan ang mga tawo nga nagakahadlok sa Ginuo, nga nagalakat sa iya mga dalanon.”​—Salmo 128:1, Biblia.

[Kahon/​Piktyur sa pahina 9]

SIN-O ANG PAGAHILWAYON GIKAN SA IMPIERNO?

Ang pila ka manugbadbad sang Biblia nagtuga sing kagumon sang ginbadbad nila nga “impierno” ang duha ka magkatuhay nga Griegong tinaga nga Geʹen·na kag Haiʹdes. Suno sa Biblia, ang mga tawo nga yara sa Geʹen·na pagalaglagon sing bug-os, buot silingon wala na sila sing paglaum nga mabanhaw pa. Sa pihak nga bahin, ang mga yara sa Haiʹdes, ukon Hades, may paglaum pa nga mabanhaw.

Gani, sang napatay si Jesus kag ginbanhaw, ginpasalig ni apostol Pedro ang iya mga tagpalamati nga ‘ang kalag ni Jesus wala ginpabay-an sa Hades,’ ukon Sheol. (Binuhatan 2:27, 31, 32; Salmo 16:10; Ang Biblia) Si Jesus wala magkadto sa isa ka duog nga may kalayo. Ang “Hades” ukon impierno, amo ang lulubngan. Apang indi lamang si Jesus ang ginhilway sang Dios gikan sa Hades.

May kaangtanan sa pagkabanhaw, ang Biblia nagsiling: “Ginhatag sang Kamatayon kag Hades ang mga patay nga yara sa ila.” (Bugna 20:13, 14, Ang Biblia) Ang paghilway sang “Hades” nagakahulugan nga ibalik liwat sang Dios ang kabuhi sang mga ginhukman niya nga takus banhawon. (Juan 5:28, 29; Binuhatan 24:15) Isa gid ka makalilipay nga paglaum sa palaabuton nga makita liwat ang aton napatay na nga mga hinigugma! Amo gid sini ang himuon ni Jehova, ang Dios sang walay latid nga gugma.