Mga Hitabo sa Aton Panahon nga Ginsugid sing Abanse

GINASUGID sing abanse sang Biblia nga ang Ginharian sang Dios magadala sing dayon nga paghidait kag kalipay sa duta. (Daniel 2:44) Sa pangamuyo nga Amay Namon, gintudluan ni Jesus ang iya mga disipulo nga mangamuyo: “Magkari ang imo ginharian. Matuman ang imo kabubut-on sa duta, subong sang sa langit.” (Mateo 6:10) Ginsugid ni Jesus sa iya mga disipulo sa Bukid sang mga Olibo ang mga hitabo kag mga kahimtangan nga mahanabo antes mag-abot ina nga Ginharian. Ining mga hitabo mahangpan lamang sang mga tawo nga may bunayag sing tagipusuon nga nagatuon sa Biblia. Pila sa sining mga hitabo ang nakita mo na?

Bug-os Kalibutan nga mga Inaway. Nagsiling si Jesus: “Ang pungsod magatindog batok sa pungsod kag ang ginharian batok sa ginharian.” (Mateo 24:7) Antes natabo ang una nga bug-os kalibutan nga inaway sang 1914, ang mga guerra ginagmay lamang. Ang Bug-os Kalibutan nga Inaway I wala lamang nakaapektar sa halos bug-os nga kalibutan kundi nagpadasig  man sa paghimo sing mas makamamatay nga mga armas. Halimbawa, sa sina nga tion gingamit ang bag-ong imbento nga mga eroplano sa paghulog sang bomba sa inosente nga mga tawo. Bangod sa paghimo sing madamo nga armas, mas madamo nga tawo ang napatay sa inaway. Sa 65 milyones ka soldado nga ginpadala sa patag-awayan, mga katunga sini ang napatay ukon nasamaran. Samtang nagapadayon ang ika-20 nga siglo, nagadamo man ang nagakalamatay sa inaway. Suno sa isa ka istoryador, ang mga soldado kag inosente nga mga tawo nga napatay sa Bug-os Kalibutan nga Inaway II, “indi na maisip kon pila.” Kag ang mga guerra nagapadayon gihapon tubtob sa karon.

Lapnag nga Gutom. “May kakulang sa kalan-on,” siling ni Jesus. (Mateo 24:7) Sang 2005, nagsiling ang magasin nga Science: “May yara 854 milyones ka tawo sa bug-os nga kalibutan (mga 14 porsiento sang aton populasyon) nga kulang gid sing pagkaon.” Sang 2007, 33 ka pungsod ang wala sing bastante nga pagkaon para sa ila mga pumuluyo, report sang Food and Agriculture Organization sang United Nations. Ngaa natabo ini kay bugana man ang patubas sang uyas sa bug-os nga kalibutan? Ang isa ka rason amo nga ang talamnan kag uyas nga ginagamit sa pagpakaon sang mga tawo gingamit sa paghimo sang ethanol, nga gatong sa salakyan. “Ang kadamuon sang uyas nga kinahanglanon agod makapatubas sing ethanol nga makapuno sang tangke sang isa ka four-wheel-drive SUV bastante na para sa isa ka tuig nga pagkaon sang isa ka tawo,” suno sa pamantalaan nga The Witness sa Bagatnan nga Aprika. Bisan sa manggaranon nga mga pungsod, nagamahal man ang pagkaon, amo nga indi nila madungan bakal ang ila mga kinahanglanon. Daw indi sila kahibalo kon ano ang unahon​—pagkaon ukon bulong?

Mabaskog nga mga Linog. Si Jesus nagsiling: “May mabaskog nga mga linog.” (Lucas 21:11) Kon sa banta mo mas madamo karon nga tawo ang naapektuhan sang mga linog, husto ka gid. Suno sa obserbasyon sang siesmologo nga si R. K. Chadha sang 2007, “labi nga nagadamo ang pagtay-ug sang duta sa bug-os nga kalibutan.” “Wala sing may nakahibalo kon ngaa.” Dugang pa, madamo ang napatay sa sining mga kalamidad bangod sa pagdamo sang populasyon sa mga lugar nga pirme may linog. Bangod sa linog nga nag-igo sa Dagat Indian sang 2004 nga ginsundan sang tsunami, ang 2004 amo “ang may pinakamadamo nga napatay sa linog sa nagligad nga halos 500 ka tuig” kag amo ini ang “ikaduha sa pinakamadamo nga napatay sa rekord sang maragtas,” suno sa U.S. Geological Survey.

Mabudlay Bulngon nga mga Balatian. “May mga peste,” siling ni Jesus. (Lucas 21:11) Sa bug-os nga kalibutan, ang madugay na nga mga balatian kag ang mga nagatuluhaw karon nagapaantos sa mas madamo nga tawo, kag mabudlay ini bulngon. Halimbawa, ang bug-os kalibutan nga tulumuron nga dulaon ang malaria sulitsulit nga ginatun-an kay indi gihapon ini makontrol sang tawo. Dugang pa, minilyon ang nagakapatay sa dugay na nga mga balatian subong sang TB, subong man sa AIDS kag sa iban pa nga bag-o nga mga balatian. Suno sa report sang World Health Organization, “ikatlo nga bahin sang populasyon sa bug-os nga kalibutan ang may bakterya sang TB.” Nagsiling man ini nga bangod sa HIV, nangin epidemia ang TB sa madamo nga pungsod. Kada segundo, isa ka tawo ang nagakalatnan sang TB, kag ang TB labi nga nagabato sa bulong. Sang 2007, ang isa ka pasyente sa Europa nga may TB “wala nagaayo sa bisan ano nga bulong,” report sang magasin nga New Scientist.

Paglain sang Moral kag Pagbinatasan sang Tawo. “Bangod sang paglapnag sang pagkamalinapason ang gugma sang kalabanan magaugdaw,” siling ni Jesus. (Mateo 24:12) Luwas sa ginsiling ni Jesus, nagsambit man si Pablo nga magalain ang moral kag pagbinatasan sang tawo. Ginlaragway niya nga ang mabudlay nga “katapusan nga mga  adlaw” magaabot anay antes tapuson sang Ginharian sang Dios ining sistema sang kalibutan. “Ang mga tawo mangin mahigugmaon sa kaugalingon, mahigugmaon sa kuarta, nagapabugal sang kaugalingon, matinaastaason, manugpasipala, di-matinumanon sa mga ginikanan, di-mapinasalamaton, di-mainunungon, wala sing kinaugali nga pagpalangga, indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, maluib, matig-a sing ulo, nagapahambog, mahigugmaon sa kinasadya sa baylo nga mahigugmaon sa Dios, may dagway sang diosnon nga debosyon apang nagapanghiwala sang gahom sini.” (2 Timoteo 3:1-5) Nakamutik ka bala nga mas nagalain karon ang pamatasan sang mga tawo kon ipaanggid sang una?

Wala ginsambit ni Jesus kag ni Pablo ang tanan nga natabo sa maragtas, sa katilingban sang tawo, kag sa gobierno nga amo ang kabangdanan sa kahimtangan sang kalibutan sa karon. Apang, ang mga ginsiling nila sadto nga mahanabo kag mangin pagbinatasan sang tawo nagakatuman gid karon. Kamusta naman sa palaabuton? Ang ginsugid ni Isaias tuhoy sa pag-abot sang Mesias nagalaragway man sa maayo nga mga pagbag-o nga pagahimuon sang Ginharian sang Dios sa duta. Binagbinagon naton ini sa masunod nga artikulo.

[Piktyur sa pahina 6]

“Ang pungsod magatindog batok sa pungsod”

[Piktyur sa pahina 7]

“May mga peste”

[Credit Line]

© WHO/​P. Virot