Pamangkot sang Amon Bumalasa

Ngaa Wala Nagapakigbahin sa Inaway ang mga Saksi ni Jehova?

Ang mga Saksi ni Jehova, bisan diin man sila nagapuyo, madugay na nga kilala sa maragtas nga wala nagapakigbahin sa inaway sa tunga sang mga pungsod ukon sa tunga sang mga grupo nga nagainaway sa sulod mismo sang pungsod. “Wala gid nagapakigbahin sa inaway ang mga Saksi ni Jehova,” siling sang Australian Encyclopedia mga 50 ka tuig na ang nagligad.

Ang panguna nga rason kon ngaa wala nagapakigbahin ang mga Saksi sa sina nga mga inaway bangod batok ina sa ila Cristianong konsiensia. Nahanas ang ila konsiensia sa mga sugo kag halimbawa ni Ginuong Jesucristo. Gintudluan niya ang iya mga disipulo nga higugmaon ang ila isigkatawo. Nagsugo man sia: “Padayon nga higugmaa ang inyo mga kaaway, himui sang maayo ang mga nagadumot sa inyo.” (Lucas 6:27; Mateo 22:39) Sang ginpangapinan si Jesus sang isa niya ka disipulo gamit ang espada, ginsilingan Niya sia: “Itagob ang imo espada, kay ang tanan nga nagagamit sang espada mapatay paagi sa espada.” (Mateo 26:52) Busa, paagi sa pulong kag buhat, maathag nga ginpakita niya nga ang iya mga sumulunod indi dapat maggamit sang armas sa inaway.

Ang isa pa ka rason kon ngaa wala nagapakigbahin sa inaway ang mga Saksi ni Jehova bangod isa sila ka relihioso nga grupo nga may mga katapo sa bug-os nga kalibutan. Ang inaway nagabungkag sang paghiusa sang mag-ulutod kag indi ini nahisuno sa sugo ni Jesus nga dapat may ‘gugma sa tunga nila’.​—Juan 13:35.

Ining mga prinsipio sang gugma wala lamang ginahambal sang mga Saksi ni Jehova, sa baylo ginakabuhi gid ini nila. Subong halimbawa, usisaa ang ila tindog sa tion sang Bug-os Kalibutan nga Inaway II, sang 1939-1945. Sa Estados Unidos, kapin sa 4,300 ka Saksi ni Jehova ang ginpriso bangod nangindi sila nga makigbahin sa inaway. Sa Britanya, kapin sa 1,500 lakip na ang kapin sa 300 ka babayi ang ginpriso bangod nangindi sila sa mga hilikuton may kaangtanan sa inaway. Sa Nazi Alemanya, kapin sa 270 ka Saksi ang ginpapatay sang Gobierno bangod nangindi sila nga magbuylog sa inaway. Sa idalom sang paggahom sang Nazi, kapin sa 10,000 ka Saksi ang ginpriso ukon ginbutang sa mga kampo konsentrasyon. Grabe man ang pag-antos sang mga Saksi sa Japan. Ang bisan sin-o nga namatyan sang hinigugma sa tion sang Bug-os Kalibutan nga Inaway II​—ukon sa mga inaway pagkatapos sini—​makasalig nga wala ni isa sang mga Saksi ni Jehova nga responsable ukon balasulon sa sinang kamatayon.

Ang pagtamod sang mga Saksi ni Jehova sa inaway maathag nga ginpabutyag sa katapusan nga mga tinaga ni Wolfgang Kusserow. Sang 1942 ginpugutan sing ulo sang mga Nazi ining 20-anyos nga Aleman bangod nangindi sia nga makigbahin sa inaway. (Isaias 2:4) Nagsiling sia sa atubang sang korte militar: “Ginpadaku ako subong isa ka Saksi ni Jehova, suno sa pulong sang Dios nga nasulat sa Balaan nga Kasulatan. Ang labing daku kag balaan nga sugo niya sa katawhan amo: ‘Higugmaon mo ang imo Dios labaw sa tanan kag ang imo isigkatawo subong sang imo kaugalingon.’ Ang isa pa ka sugo mabasa: ‘Indi ka magpatay.’ Ginpasulat bala ini tanan sang aton Manunuga para sa mga kahoy?”​—Marcos 12:29-31; Exodo 20:13.

Nagapati ang mga Saksi ni Jehova nga si Jehova lamang, ang labing gamhanan nga Dios, ang makapaluntad sing dayon nga kalinong sa duta. Nagapaabot sila nga tumanon niya ang Iya saad nga pauntaton niya ang “mga inaway tubtub sa ukbung sang duta.”​—Salmo 46:9.