Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

ANG LALANTAWAN HUNYO 2008

 Tudlui Ang Inyo Kabataan

Gusto Niya Magbulig

Gusto Niya Magbulig

MAY kilala ka bala nga nagamasakit sing grabe?— Gusto mo bala makabulig sa iya?— Ano abi kon sa iban sia nga pungsod nagaistar ukon lain ang iya relihion? Buligan mo bala gihapon sia agod mag-ayo?— Sang nagligad nga mga 3,000 ka tuig, may isa ka bata nga babayi nga gusto gid makabulig agod mag-ayo ang isa ka tawo. Istoryahan naton ang natabo sadto.

Ini nga bata nagaistar sa pungsod sang Israel. Ang Israel kag ang pungsod sang Siria pirme nagaaway. (1 Hari 22:1) Isa ka adlaw, nagkadto sa Israel ang mga Sirianhon kag ginbihag nila ang bata nga babayi. Gindala nila sia sa Siria kag ginhimo sia nga suluguon sang asawa ni Naaman, ang pangulo sang mga soldado sang Siria. May aro si Naaman. Balatian ini nga nagadunot kag nagaak-ak sang panit.

Ginsugiran sining bata nga babayi ang asawa ni Naaman kon paano mag-ayo ang iya bana. Nagsiling sia: ‘Kon didto tani sa Samaria si ginuong Naaman, ayuhon ni Eliseo nga manalagna ni Jehova nga Dios ang iya aro.’ Makapakumbinsi gid ang pag-istorya sang bata parte kay Eliseo, amo nga nagpati si Naaman nga mapaayo gid sang manalagna ang iya aro. Gani, sa pahanugot sang hari sang Siria nga si Ben-hadad, naglakbay si Naaman upod sa iya mga tinawo sing mga 150 kilometros agod pangitaon si Eliseo.

Una, nagkadto anay sila kay Jehoram nga hari sang Israel. Ginpakita nila sa iya ang sulat ni Hari Ben-hadad nga nagapangayo sing bulig para kay Naaman. Apang si Jehoram wala nagatuo kay Jehova ukon sa iya manalagna nga si Eliseo. Abi ni Jehoram nagapangita lang sing away si Ben-hadad. Sang mahibaluan ini ni Eliseo, ginsilingan niya si Hari Jehoram: “Pakari-a sia karon sa akon.” Gusto ipakita ni Eliseo nga may gahom ang Dios sa pag-ayo sa aro ni Naaman.2 Hari 5:1-8.

Nagkadto si Naaman sa balay ni Eliseo upod ang iya mga kabayo kag mga kangga. Abi ni Naaman magua si Eliseo kag kuyabkuyaban sang iya kamot ang aro, agod mag-ayo sia. Pero, ginsugo ni Eliseo ang iya alagad nga hambalon si Naaman: ‘Magpaligo ka sing makapito sa Suba Jordan, kag magaayo ka.’ Naakig gid si Naaman kay ang alagad lang ang naggua! Sa kaakig, nagtalikod sia kag gusto niya nga magpauli na lang.2 Hari 5:9-12.

 Ano ang himuon mo kon isa ka sa mga tinawo ni Naaman?— Ti, ginpamangkot sia sang iya mga tinawo: ‘Bisan mabudlay ang ipahimo sa imo ni Eliseo, indi bala nga tumanon mo sia? Ngaa indi mo paghimuon ining simple nga butang—magpaligo kag magaayo ka?’ Maayo gid kay namati si Naaman sa ila. “Naglusong sia kag naglumoy sing makapito sa Jordan . . . , kag ang iya unud nag-uli kaangay sa unud sang diotay nga bata.”

Ginkadtuan liwat ni Naaman si Eliseo kag nagsiling: “Yari karon, ginakilala ko nga walay Dios sa bug-os nga duta kondi sa Israel.” Nagsaad sia kay Eliseo nga indi na sia “magdolot sing halad-nga-sinonog ukon halad sa iban nga mga dios kondi sa GINOO.”2 Hari 5:13-17.

Gusto mo man bala nga buligan ang iban nga makilala si Jehova kag mahibaluan nila ang mga butang nga mahimo Niya, pareho sa ginhimo sang bata nga babayi?— Sang yari sa duta si Jesus, ang isa ka aruon nagtuo sa iya kag nagsiling: ‘Kon luyag mo gid nga buligan ako, mahimo mo.’ Kabalo ka bala kon ano ang sabat ni Jesus sa iya?— “Luyag ko.” Kag gin-ayo ni Jesus ang tawo, pareho sa pag-ayo ni Jehova kay Naaman.Mateo 8:2, 3.

Kabalo ka bala nga nagsaad si Jehova nga Dios sing bag-o nga kalibutan, kag ang tanan nga tawo indi na magmasakit ukon mapatay?— (2 Pedro 3:13; Bugna 21:3, 4) Sigurado gid nga gusto mo isugid sa iban ining makalilipay nga palaabuton!