Magdiretso sa kaundan

Magdiretso sa listahan sang kaundan

“Basahon Ko Ini sa Tupad sang Dabok Karon sa Gab-i”

“Basahon Ko Ini sa Tupad sang Dabok Karon sa Gab-i”

 Sulat Gikan sa Australia

“Basahon Ko Ini sa Tupad sang Dabok Karon sa Gab-i”

KON hinambitan gani ang naligwin nga mga duog sang Australia, mahimo nga mahanduraw naton ang kigas nga mga desyerto, nagatagiti nga init, kag tuman kalapad nga kawayangan. Apang, mga 180,000 ka tawo ukon mga 1 ka porsiento sang populasyon sini nga pungsod, ang nagapuyo sa sining suludlon nga mga duog.

Mga Saksi ni Jehova ang akon mga ginikanan, kag sang gamay pa ako, gindala nila ako sa sining naligwin nga mga duog agod magbantala. Indi ko gid malipatan ining matahom kag tuman kalapad nga duog, subong man ang mabukod kag daw wala sing problema nga mga pumuluyo sini. Karon nga may pamilya na ako, luyag ko nga dal-on man agod magbantala sa sini nga duog ang akon asawa kag ang amon duha ka bata, nga nagaedad sing 10 kag 12 anyos.

Pagplano sang Amon Bakasyon

Ginplano namon sing maayo kag ginsuma ang amon magasto sa amon paglakat. Daw ano kalayo ang amon masarangan nga kadtuan? Daw ano kadugay ang amon bakasyon? May mag-asawa kag duha ka bug-os tion nga ministro gikan sa amon kongregasyon nga luyag mag-upod sa amon. Nagsugtanay kami nga malakat sa tion sang bakasyon sa klase. Nian, nagsulat kami sa sanga talatapan sang mga Saksi ni Jehova sa Sydney, agod magpangabay sing teritoryo nga amon bantalaan. Gin-asayn nila sa amon ang naligwin nga duog malapit sa gamay nga banwa sang Goondiwindi, nga mga 400 kilometros sa katundan sang Brisbane, diin nagapuyo kami.

Ginsugiran man kami nga may isa ka diutay nga kongregasyon sang mga Saksi ni Jehova sa Goondiwindi. Isa pa ini ka pagpakamaayo kay makilala namon ang mga Saksi didto, kag mangin pinasahi gid ini nga bahin sang amon lakat. Ginkontak namon ang kongregasyon kag ginpahibalo sila nga maabot kami. Nalipay gid sila kag nagsiling sila nga paabuton nila kami.

Antes kami naglakat, naghinun-anon anay kami kon paano namon ipresentar ang maayong balita sang Ginharian sa mga tawo sa naligwin nga mga duog. Siempre pa, luyag namon nga respetuhon ang kultura kag kustombre sang mga tumandok nga masugilanon namon. Halimbawa, ginakabig sang pila ka tribo nga para lang sa ila ang duta nga ila ginapuy-an. Gani, pagpakita sing di-pagtahod ang pagsulod sa ila komunidad kon indi sila magpasugot.

Pagkadto sa Naligwin nga Duog

Nag-abot gid man ang amon ginakalangkagan nga adlaw. Nagdala kami sing duha ka salakyan, ginkarga sa sini ang amon kagamitan kag mga pagkaon, kag nagbiyahe pakadto sa Goondiwindi. Sang primero nag-agi kami sa mga kaumhan, apang samtang nagalayo ang amon pagbiyahe, naagyan namon ang hilamunon nga kapatagan nga may malaka nga mga puno sang eucalyptus. Wala sing gal-um ang kalangitan kag kanami sang silak sang adlaw. Pila ka oras  sang ulihi, nakaabot gid man kami sa Goondiwindi. Nag-arkila kami sing dalayunan sa isa ka trailer park, kag didto nagpaligad sang gab-i.

Pagkaaga, Domingo nga adlaw, kanami sang pagbutlak sang adlaw kag dupoydupoy sang hangin. Nagaugyon gid ang panahon sa amon plano nga magbantala. Kinaandan nga ang temperatura sa sini nga duog kon tig-ilinit sobra pa sa 40 degrees Celsius. Una namon nga ginkadtuan ang isa ka komunidad sang mga tumandok nga mga 30 kilometros ang kalayuon. Ginpakadto kami sang mga tawo sa may edad na kag ubanon nga babayi nga si Jenny. Sia ang lider sang ila komunidad. Nagpamati sia sing maayo sa amon mensahe tuhoy sa Biblia kag malipayon nga ginbaton ang libro nga Magtuon Gikan sa Daku nga Manunudlo. * Nian ginpasulod niya kami sa ila komunidad agod masugilanon man namon ang mga pumuluyo didto.

Ang mga bata didto nagdinalagan agod unahan kami kag ipahibalo ang amon pag-abot. Ang tanan nga tagbalay nga nasugilanon namon nagpamati gid sing maayo sa amon mensahe kag nagbaton sing literatura parte sa Biblia. Madasig nga naubos ang amon dala nga mga literatura, kag kinahanglan na namon nga magbalik sa banwa agod magtambong sa pagtinipon sang kongregasyon. Antes kami maghalin, nagsaad kami nga balikan ang mga wala namon masugilanon.

Sina nga hapon sa Kingdom Hall, malipayon kami nga naghambalanay, kag bisan bag-o lang kami nagkilalahay nangin mag-abyan gilayon kami sang mga kauturan. Ang 25 ka Saksi didto matutom nga nagapalapnag sang mensahe sang Ginharian sa mga 11,000 ka tawo nga nagalapta sa mga 30,000 kilometros kuadrados nga mga kaumhan. “Madamo gid nga salamat sa inyo pagkadto kag pagbulig sa amon,” siling sang isa ka Saksi didto. Sa tapos sang amon malipayon nga pagtinipon, nagpamahaw kami. Antes kami nagtulog sina nga gab-i, ginpakaon anay namon ang mga possum nga nagalagawlagaw sa amon dalayunan.

“Sa Tupad sang Dabok Karon sa Gab-i”

Sa masunod nga duha ka adlaw, ginkadtuan namon ang malaka nga mga pamalay sa dulunan sang Queensland kag New South Wales. Sa sini nga kaumhan, may manubo nga mga kahoykahoy nga eucalyptus nga yara sa malapad nga halalban sang mga karnero kag mga baka. Sa alagyan, may pila ka kangaroo. Ang ila mga dulunggan nagatindog kag nagahulaghulag, nga nagapamatyag sa amon. May nakita man kami nga mga emu (daku nga pispis nga wala nagalupad) sa uluunhan, nga daw sisin-o nga nagalakatlakat sa toril sang mga kabayo.

Sang Martes sang hapon, may nasumalang kami nga daku nga panong sang baka. Halin pa sang una, ginadala sang mga bakero ang ila panong sa sini nga duog, ilabi na kon tigpalamangag. Dugaydugay nasugata namon ang bakero nga nagapangabayo. Nagdulog kami sa higad sang dalan, naggua ako sa salakyan, kag gintamyaw sia. “Maayong adlaw man,” sabat sang bakero. Nagdulog ining may edad na nga lalaki upod sa iya ido, kag nakigsugilanon sa amon.

Sa tapos makahambalanay sing makadali tuhoy sa tigpalamangag, ginsugid ko sa iya ang amon mensahe. “Ang matuod, halin sang bata ako, wala pa gid ako makabati sing tuhoy sa Biblia!” siling niya. Nagapati sia nga ang mga lider sang relihion ang balasulon sa pagnubo sang moral sa kalibutan. Apang, ginatahod gid niya ang Biblia. Maayo ang amon paghambalanay parte sa Biblia, kag gintanyagan ko sia sing libro nga Ano Gid ang Ginatudlo Sang Biblia? * Ginbaton niya ini kag ginsulod sa bulsa sang iya bayo kag nagsiling, “Kon mahibaluan ko diri ang ginatudlo sang Biblia, basahon ko ini sa tupad sang dabok karon sa gab-i.”

Pagpauli

Pagkagab-i, ginsugid namon ang amon mga eksperiensia sa mga kauturan sa Kingdom Hall. Nagsaad sila nga kadtuan nila ang nasapwan namon nga mga tawo nga interesado sa Biblia. Pagkatapos sang amon pagtinipon, daw mabudlay magpaalam. Pila pa lang kami ka adlaw nga kilalahay sang mga kauturan apang nag-abyanay na kami tanan kag makalilipay gid ang amon pagpalig-unay.​—Roma 1:12.

Pagkaaga, nagpauli na kami. Kon pamensaron namon ang nagkalatabo sa amon bakasyon, masiling gid namon nga ginpakamaayo ni Jehova ang amon mga panikasog. Labi pa gid kami nga nagsuod sa Iya. Pag-abot namon sa balay, ginpamangkot ko ang mga bata: “Sa dason naton nga bakasyon, gusto ninyo bala nga sa kabukiran naman kita makadto?” “Indi, Tay,” sabat nila, “gusto namon nga magbantala liwat sa naligwin nga mga duog.” Ang akon asawa nag-ugyon man: “Sige, mabantala naman kita sa naligwin nga mga duog. Amo ini ang pinakamaayo nga bakasyon!”

[Mga footnote]

^ par. 11 Ginbalhag sang mga Saksi ni Jehova.

^ par. 17 Ginbalhag sang mga Saksi ni Jehova.