Dapat Gid Luwason!

HINALI lang nga ginbahaan ang isa ka minahan malapit sa Pittsburgh, Pennsylvania, E.U.A. Siam ka minero ang nakibon sa idalom-duta nga nagadalom sing 73 metros. Pagligad sang tatlo ka adlaw, nakagua sila sa minahan nga wala maano. Paano sila naluwas?

Paagi sa mga mapa sang minahan kag sang Global Positioning System, nagkutkot ang mga manugtabang sing 65 sentimetros kalapad nga buho kag gintunton ang korte-kapsula nga hawla sa nahamtangan sang mga minero. Nian, isaisa sila nga ginpasaka. Nalipay gid ang mga minero kag nagpasalamat nga ginluwas sila gikan sa ila kuntani nangin lulubngan.

Ang kalabanan sa aton indi gid man mabutang sa katalagman ang kabuhi ukon maeksperiensiahan ang naagihan sang siam ka minero. Apang, tanan kita dapat luwason gikan sa makahalalit nga resulta sang balatian, katigulangon kag kamatayon. “Ang tawo nga natawo sa babayi malip-ot sing mga adlaw, kag puno sang kagamo,” siling sang matutom nga tigulang nga si Job. “Nagagowa sia kaangay sang bulak, kag ginakutul, nagapalagyo man sia subong sang landong, kag wala nagapadayon.” (Job 14:1, 2) Bisan pa mga 3,500 ka tuig na nga ginsulat ining mga tinaga, matuod ini gihapon karon, kay sin-o bala sa aton ang makalikaw sa kamatayon? Bisan diin man kita nagapuyo ukon bisan ginahalungan pa naton ang aton panglawas, kinahanglan kita nga luwason, kay tanan kita nagaantos, nagatigulang kag nagakapatay.

Ginatinguhaan gid sang mga sientista kag sang iban nga mga tawo nga palawigon pa gid ang kabuhi. Tulumuron sang isa ka organisasyon nga “dulaon ang kamatayon” kag “buligan ang ila mga katapo nga mabuhi sing walay katapusan.” Apang, walay sapayan sang pinakaulihi nga mga tukib sa siensia kag sang daku nga handum sang tawo nga mabuhi, napamatud-an nga husto ang ginsiling ni Moises 3,500 ka tuig na ang nagligad nga ang kabuhi sang tawo 70 ukon 80 anyos lamang.—Salmo 90:10.

Nagaugyon ka man ukon wala sa pagtamod ni Job tuhoy sa kabuhi kag kamatayon, indi mo gid malikawan nga samtang nagaligad ang mga tinuig, ‘magadalagan ka man kaangay sang landong,’ padulong sa kamatayon kag bayaan mo ang imo mga abyan, pamilya, kag puluy-an, kag ang tanan mo nga ginpangabudlayan. “Ang buhi nakahibalo nga mapatay sila,” siling sang maalam nga si Hari Solomon sang Israel sang una. “Apang ang patay wala makahibalo sang bisan ano, kag wala na sila sing balus; kay ang ila handumanan nalimtan.”—Manugwali 9:5.

Makapasubo nga ang kamatayon, suno sa Biblia, “naggahom subong hari,” kaangay sang mapintas nga manuggahom sang katawhan. Kon amo, kinahanglan gid nga luwason ang katawhan gikan sa ila panguna nga kaaway, ang kamatayon. (Roma 5:14; 1 Corinto 15:26) Indi ini masarangan bisan sang labing hanas nga mga manugtabang sa tion sang emerhensia. Apang, masarangan ini sang Manunuga sang katawhan nga si Jehova nga Dios kag naghimo sia sing paagi agod luwason ka.

[Credit Line sang piktyur sa pahina 3]

Photo by Gene J. Puskar-Pool/Getty Images