Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Pebrero 2008

 Tudlui ang Inyo Kabataan

Wala Nangampo si Marcos

Wala Nangampo si Marcos

GINSULAT ni Marcos ang isa sa apat ka libro sang Biblia nga nagasaysay sang kabuhi ni Jesus. Amo ini ang pinakamalip-ot kag pinakamahapos basahon sa apat. Sin-o si Marcos? Sa banta mo kilala ayhan niya si Jesus? * Lantawon naton kon ano ang mabudlay nga mga pagtilaw nga gin-atubang ni Marcos kag hibaluon naton kon ngaa wala sia nangampo sa pag-alagad subong Cristiano.

Una nga ginhinambitan ang ngalan ni Marcos sa Biblia sang ginpabilanggo ni Hari Herodes Agripa si apostol Pedro. Sang isa ka gab-i, ginhilway sang isa ka anghel si Pedro, kag nagkadto sia gilayon sa puluy-an sang iloy ni Marcos, nga si Maria, nga taga-Jerusalem. Natabo ini mga napulo na ka tuig ang nagligad sang ginpatay si Jesus sa tion sang Paskua sang 33 C.E.Binuhatan 12:1-5, 11-17.

Nahibaluan mo bala kon ngaa nagkadto si Pedro sa puluy-an ni Maria?— Ayhan kilala niya ang pamilya ni Maria kag nahibaluan niya nga ang mga disipulo ni Jesus nagatipon sa puluy-an ni Maria. Ang pakaisa ni Marcos nga si Bernabe madugay na nga disipulo, ayhan kutob pa sang Kapiestahan sang Pentecostes 33 C.E. Ginhinambitan sang Biblia ang iya kaalwan sa bag-o nga mga disipulo sadto nga tion. Gani mahimo nga kilala ni Jesus si Bernabe, subong man ang iya tiya nga si Maria kag ang anak sini nga si Marcos.Binuhatan 4:36, 37; Colosas 4:10.

Sa iya Ebanghelyo, ginsulat ni Marcos nga sang gab-i nga gindakop si Jesus, may isa ka pamatan-on nga nagapanapot lamang sing “pino nga lino sa iya lawas.” Sang gindakop si Jesus sang mga kaaway, ginsulat ni Marcos nga nakapalagyo ang pamatan-on. Sa banta mo sin-o ayhan ining pamatan-on?— Husto, posible gid nga si Marcos! Gani, bangod dis-oras na sadto nga gab-i sang magbiya si Jesus kag ang iya mga apostoles, mahimo nga nagdalidali suksok si Marcos sing panapton kag nagsunod sa ila.Marcos 14:51, 52.

Sin-o ayhan ini nga pamatan-on? Ano ang natabo sa iya, kag ngaa?

Madamo gid sing kahigayunan si Marcos nga makaupod ang mga alagad sang Dios kag masaksihan ang importante nga mga hitabo may kaangtanan sa katuyuan sang Dios. Posible man nga yara sia sang ginbubo ang balaan nga espiritu sang Pentecostes 33 C.E., kag suod sia sa matutom nga mga alagad sang Dios, subong kay Pedro. Nakaupdanay man sila sang iya pakaisa nga si Bernabe, nga amo ang nagbulig agod mapakilala si Saulo kay Pedro mga tatlo ka tuig sa tapos nga nagpakita si Jesus kay Saulo sa isa ka palanan-awon. Pagligad sang pila ka tuig, ginpadala si Bernabe sa Tarso agod pangitaon didto si Saulo.Binuhatan 9:1-15, 27; 11:22-26; 12:25; Galacia 1:18, 19.

 Sang 47 C.E., si Bernabe kag si Saulo ginpili subong mga misyonero. Gin-upod nila si Marcos, apang sa wala mapaathag nga kabangdanan, ginbiyaan sila sang ulihi ni Marcos kag nagpauli sa Jerusalem. Si Saulo, nga kilala sa iya Romanong ngalan nga Pablo, naakig kay Marcos. Kag wala niya ginpalampas ang ginhimo ni Marcos, kay para sa iya isa gid ini ka serioso nga butang.Binuhatan 13:1-3, 9, 13.

Sang nakabalik sila gikan sa ila paglakbay subong mga misyonero, ginbalita ni Pablo kag ni Bernabe ang ila madinalag-on nga paglakbay. (Binuhatan 14:24-28) Pila ka bulan sang ulihi, nagplano sila nga duawon liwat ang bag-o nga mga disipulo nga ila nabantalaan. Luyag ni Bernabe nga updon si Marcos, apang nahibaluan mo bala kon ano ang ginahunahuna ni Pablo?— Para sa iya “indi nagakaigo nga paupdon sia” bangod ginbayaan sila sadto ni Marcos. Ang masunod nga natabo pat-od gid nga ginkasubo ni Marcos!

Sa tapos ‘magsilabo ang kaakig,’ nagbulagay sanday Pablo kag Bernabe. Gin-upod ni Bernabe si Marcos sa pagbantala sa Cipre, kag ginpili naman ni Pablo si Silas sa pagduaw liwat sa bag-o nga mga disipulo, suno sa naplano na. Mahimo nga tuman ang kasubo ni Marcos kay naglainay sing buot sanday Pablo kag Bernabe tungod sa iya!Binuhatan 15:36-41.

Wala kita makahibalo kon ngaa nagbiya kag nagpauli si Marcos sadto. Ayhan may rason man sia. Husto man ini ukon indi, maathag nga kumbinsido si Bernabe nga indi na ini matabo liwat. Kag wala gid sia magsala. Wala nangampo si Marcos! Sang ulihi nag-upod si Marcos kay Pedro subong misyonero sa Babilonia, nga tuman kalayo sa iya puluy-an. Gikan didto, nagpadala si Pedro sing mga panamyaw, kag sa  sini ginlakip niya sa pagsiling: “Subong man si Marcos nga akon anak.”1 Pedro 5:13.

Suod gid sanday Pedro kag Marcos bangod magkaupod sila nga nag-alagad sa Dios! Ginapakita man ini sa aton sang Ebanghelyo ni Marcos. Nasaksihan gid ni Pedro ang ministeryo ni Jesus kag ginsaysay niya ini kay Marcos. Kag ginsulat naman ini ni Marcos sa iya Ebanghelyo. Halimbawa, ipaanggid ang iya ginsulat tuhoy sa unos sa Dagat sang Galilea. Gindugang ni Marcos ang mga detalye kon diin nga bahin sang sakayan nagakatulog si Jesus kag kon ano ang iya ginatulugan, mga butang ini nga pamilyar sa isa ka mangingisda kaangay ni Pedro. Maayo nga usisaon naton ini paagi sa pagbasa kag pagpaanggid sa mga rekord sang Biblia sa Mateo 8:24; Marcos 4:37, 38; kag Lucas 8:23.

Sang ulihi, sang nabilanggo si Pablo sa Roma, ginhatagan niya sing komendasyon si Marcos tungod sa iya mainunungon nga pagsakdag. (Colosas 4:10, 11) Kag sang nabilanggo liwat si Pablo didto, ginsulatan niya si Timoteo kag ginpangabay ini nga updon si Marcos, kay suno sa iya: “Makabulig sia sa akon sa pag-alagad.” (2 Timoteo 4:11) Daw ano kadaku nga pribilehiyo sa pag-alagad ang natigayon ni Marcos bangod wala sia nangampo!

Ano nga mga pagpakamaayo ang nabaton ni Marcos tungod wala sia nangampo?

^ par. 3 Kon nagabasa ka upod sa isa ka bata, ang kurit (—) isa ka pahanumdom nga dapat ka magdulog kag palig-unon ang bata nga ipabutyag ang iya kaugalingon.