Ang Matun-an Naton kay Jesus

Tuhoy sa Matuod nga Dios

May ngalan bala ang Dios?

Si Jesus nagtudlo nga ang Dios may ngalan. Nagsiling sia: “Gani, mangamuyo kamo sa sining paagi: ‘Amay namon nga yara sa langit, pakabalaanon ang imo ngalan.’” (Mateo 6:9) Ginapakita sang Biblia nga ang ngalan sang Dios amo si Jehova. (Salmo 83:18) Tuhoy sa iya mga disipulo, si Jesus nangamuyo sa iya Amay: “Ginpakilala ko ang imo ngalan sa ila.”​​—⁠Juan 17:26.

Sin-o si Jehova?

Gintawag ni Jesus si Jehova nga “ang lamang matuod nga Dios” bangod si Jehova amo ang Manunuga. (Juan 17:3) Si Jesus nagsiling: “Wala bala ninyo mabasahi nga sia nga nagtuga sa ila sa ginsuguran naghimo sa ila nga lalaki kag babayi?” (Mateo 19:4) Si Jesus nagsiling man: “Ang Dios Espiritu.” (Juan 4:24) Amo kon ngaa indi naton makita ang Dios.​​—⁠Exodo 33:17-​20.

 Ano ang ginasugo sang Dios sa aton?

Sang ginpamangkot si Jesus kon ano ang labing importante nga sugo, nagsabat sia: “Ang nahauna amo, ‘Pamatii, O Israel, si Jehova nga aton Dios isa lamang nga Jehova, kag higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.’ Ang ikaduha amo ini, ‘Higugmaon mo ang imo isigkatawo subong sang imo kaugalingon.’”​​—⁠Marcos 12:28-​31.

Paano naton mapakita nga ginahigugma naton ang Dios?

Si Jesus nagsiling: “Ginahigugma ko ang Amay.” Paano niya ini ginpakita? “Ginahimo ko ang suno sa sugo nga ginhatag sang Amay sa akon,” siling niya. (Juan 14:31) Nagsiling man sia: “Pirme ko ginahimo ang mga butang nga kalahamut-an sa iya.” (Juan 8:29) Mapahalipay naton ang Dios paagi sa pagkuha sing ihibalo tuhoy sa iya. Samtang nagapangamuyo para sa iya mga disipulo, si Jesus nagsiling: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios.”​​—⁠Juan 17:⁠3; 1 Timoteo 2:4.

Paano naton matun-an ang tuhoy sa Dios?

Ang isa ka paagi amo ang pagtan-aw sa mga butang nga gintuga niya. Halimbawa, si Jesus nagsiling: “Tan-awa sing maayo ang mga pispis sa langit, kay wala sila nagasab-ug sang binhi ukon nagaani ukon nagatipon sa mga tambubo; apang ginapakaon sila sang inyo langitnon nga Amay. Indi bala mas importante pa kamo sangsa ila?” Ano ang luyag ni Jesus nga matun-an naton sa mga pispis? Indi kita dapat mag-untat sa pag-alagad sa Dios bangod sa mga kabalaka sa mga kinahanglanon sa kabuhi.​​—⁠Mateo 6:​26-​33.

Ang pinakamaayo nga paagi nga matun-an naton ang tuhoy kay Jehova amo ang pagtuon sa iya Pulong, ang Biblia. Gintawag ni Jesus ang Kasulatan nga “pulong sang Dios.” (Lucas 8:21) Si Jesus nagsiling sa Dios: “Ang imo pulong kamatuoran.”​​—⁠Juan 17:17; 2 Pedro 1:​20, 21.

Ginbuligan ni Jesus ang mga tawo nga matun-an ang kamatuoran tuhoy kay Jehova. Tuhoy kay Jesus, ang isa sa iya mga disipulo nagsiling: “Wala bala nagadabdab ang aton tagipusuon sang nagapakighambal sia sa aton sa dalan, samtang ginapaathag niya sa aton ang Kasulatan?” (Lucas 24:32) Agod matun-an ang tuhoy sa Dios, dapat kita magpaubos kag handa magpatudlo. Si Jesus nagsiling: “Kon indi kamo magliso kag mangin subong sang mga bata, indi gid kamo makasulod sa ginharian sang langit.”​​—⁠Mateo 18:3.

Ngaa ang ihibalo tuhoy sa Dios nagapahalipay?

Kinahanglan naton mahangpan ang katuyuan sang kabuhi. Gani, ginabuligan kita sang Dios nga mahangpan ini. Si Jesus nagsiling: “Malipayon ang mga mahunahunaon sang ila espirituwal nga kinahanglanon.” (Mateo 5:3) Ginatudlo ni Jehova sa aton ang labing maayo nga dalanon sang kabuhi. “Malipayon ang mga nagapamati sa pulong sang Dios kag nagatuman sini!” siling ni Jesus.​​—⁠Lucas 11:28; Isaias 11:9.

Para sa dugang nga impormasyon, tan-awa ang kapitulo 1 sang libro nga Ano Gid ang Ginatudlo Sang Biblia? *

[Footnote]

^ par. 17 Ginbalhag sang mga Saksi ni Jehova.

[Piktyur sa pahina 16]

“Ginpakilala ko ang imo ngalan sa ila.”​—⁠Juan 17:26

[Mga piktyur sa pahina 16, 17]

Matun-an naton ang tuhoy kay Jehova paagi sa iya mga tinuga kag paagi sa Biblia