Sa Amon mga Bumalasa

NALIPAY kami sa pagpahibalo sa inyo nga sugod sa sini nga gua, may ginbag-o kami sa pormat sang Ang Lalantawan. Apang, may mga bahin man nga wala namon ginbag-o.

Ang ngalan sang magasin amo gihapon, Ang Lalantawan Nagabantala Sang Ginharian ni Jehova. Gani, padayon nga padunggan sang Ang Lalantawan si Jehova subong amo ang matuod nga Dios kag lipayon ang mga bumalasa sini paagi sa maayong balita sang iya Ginharian. Ginapaathag sang mga artikulo sa pahina 5 tubtob 9 sini nga gua kon ano ang Ginharian kag kon san-o ini maabot. Dugang pa, padayon gihapon nga palambuon sang Ang Lalantawan ang pagtuo kay Jesucristo, sakdagon ang kamatuoran sa Biblia, kag ipaathag ang kahulugan sang mga nagakatabo sa kalibutan sa bulig sang mga tagna sa Biblia, subong sang ginahimo sini nga magasin sa sulod sang madamo na nga dekada.

Ano, nian, ang mangin bag-o? Makawiwili nga mga bahin ang magagua kada petsa uno nga edisyon sang tagsa ka bulan. *

Makapukaw sang hunahuna nga mga bahin ang magagua kada bulan. Ang artikulo nga “Nahibaluan Mo Bala?” magahatag sing makawiwili nga mga impormasyon tuhoy sa kahulugan sang pinili nga mga kasaysayan sa Biblia. Ang artikulo nga “Mangin Suod sa Dios” magapadaku sang mga punto nga matun-an naton tuhoy kay Jehova gikan sa espesipiko nga mga teksto sa Biblia. Ang bahin nga “Pamangkot Sang Amon Bumalasa” magahatag sing sabat sa kinaandan nga mga pamangkot tuhoy sa Biblia. Halimbawa, madamo nga tawo ang nagapamangkot, “Yara bala sa imo tagipusuon ang Ginharian sang Dios?” Makita mo ang sabat sa pahina 13.

Ang pila ka regular nga mga bahin, para gid sa mga pamilya. Ipresentar sang bahin nga “Mga Sekreto Sang Kalipay sa Pamilya,” nga magagua apat ka beses kada tuig, ang nagakatabo nga mga problema sa pamilya kag ipakita man sini kon paano makabulig ang mga prinsipio sang Biblia sa paglubad sini nga mga problema. Ang artikulo nga “Tudlui ang Inyo mga Anak,” nga basahon sang mga ginikanan upod sa ila mga anak, magagua sing lang-at-lang-at nga bulan. Lang-atan ini sang artikulo nga “Para sa mga Pamatan-on,” nga gindesinyo para sa ila agod makatuon sila tuhoy sa Biblia.

May pila ka bahin nga magagua sing makap-at kada tuig. Ang bahin nga “Iluga ang Ila Pagtuo” magapalig-on sa aton nga ilugon ang halimbawa sang isa ka karakter sa Biblia. Halimbawa, sa pahina 18 tubtob 21 sini nga gua, mabasa mo ang isa ka makapahulag nga kasaysayan tuhoy kay manalagna Elias kag matun-an naton kon paano naton mailog ang iya pagtuo. Sa bahin nga “Isa ka Sulat Gikan kay . . . ” mabasa naton ang report sang mga misyonero kag sang iban pa gikan sa nanuhaytuhay nga bahin sang kalibutan. Binagbinagon sang bahin nga “Ang Matun-an Naton kay Jesus” ang sadsaran nga mga panudlo sang Biblia sa simple lamang nga paagi.

Nagasalig kami nga maluyagan gihapon Ang Lalantawan sang mga bumalasa nga nagaapresyar sa Biblia kag luyag makatuon kon ano gid ang ginatudlo sini nga libro. Ginalauman namon nga makabulig ini nga magasin agod mabulong ang imo kauhaw sa kamatuoran sang Biblia.

ANG MGA MANUGBALHAG

[Footnote]

^ par. 4 Duha na karon ang edisyon sang Ang Lalantawan kada bulan. Ang petsa 1 pangpubliko kag ang petsa 15 tulun-an nga edisyon nga gamiton sang mga Saksi ni Jehova sa ila mga miting sa kongregasyon, apang imbitado man ang publiko.