Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Disiembre 2015

 SUGILANON SANG KABUHI

Nasapwan Ko ang Paghidait sa Dios kag sa Akon Iloy

Nasapwan Ko ang Paghidait sa Dios kag sa Akon Iloy

“KAG ngaa indi mo gusto simbahon ang imo mga katigulangan?” pamangkot ni Nanay. “Nahibaluan mo bala nga bangod sa ila buhi ka? Indi mo bala sila pagpasalamatan? Paano mo masikway ang mga kustombre nga ginpaliton sa mga henerasyon? Ang pagpangindi nga padunggan ang aton mga katigulangan nagapakita nga wala sing pulos ang aton pagsimba.” Naghibi dayon si Nanay.

Indi amo sini kon maghambal si Nanay. Sia pa gani ang nagpatuon sa akon sa Biblia, bisan pa nga ginhimo niya ini para lang indi sia ang matun-an. Ginatuman ko gid sia, pero subong nabudlayan ako nga indi sia pagsundon. Apang sini nga tion, dapat himuon ko ini agod pahamut-an si Jehova. Wala ko tani ini mahimo kon indi bangod sa iya kusog.

NANGIN CRISTIANO

Pareho sang kalabanan nga tawo sa Japan, mga Budhista kami. Pero ang duha ko lang ka bulan nga pagtuon sa mga Saksi ni Jehova nagkumbinsi sa akon nga matuod ang Biblia. Sang nahibaluan ko nga may langitnon ako nga Amay, luyag ko nga kilalahon sia. Malipayon namon nga ginhambalan ni Nanay ang akon natun-an. Nagsugod ako sa pagtambong sa mga miting sa Kingdom Hall kada Domingo. Samtang nagadugang ang akon nahibaluan sa kamatuoran, ginsilingan ko si Nanay nga indi na ako mag-entra sa mga ritwal sang Budhista. Nagbag-o dayon ang iya panimuot. Nagsiling sia: “Makahuluya nga may miembro sang pamilya nga wala nagapalangga sa aton mga katigulangan.” Ginpauntat niya ako sa pagtuon sa Biblia kag sa pagtambong sa mga miting. Indi ko gid maimadyin nga amo sini ang isiling ni Nanay! Daw iban sia nga tawo.

Natun-an ko sa Efeso kapitulo 6 nga luyag ni Jehova nga tumanon ko ang akon mga ginikanan. Gin-apinan ni Tatay si Nanay. Sang primero, nangatarungan ako nga kon sundon ko sila, mamati sila sa akon kag mabalik ang paghidait sa amon pamilya. Kinahanglan ko man maghanda kay malapit na lang ang mga eksam para makaeskwela ako sa hayskul. Gani nagpasugot ako sa ila luyag sa sulod sang tatlo ka bulan, pero nagsaad ako kay Jehova nga matambong na ako sa mga miting pagkatapos sini.

Nangin indi maayo ang akon desisyon sa duha ka rason. Una, abi ko indi magbag-o ang akon panimuot sa sulod sang tatlo ka bulan. Sa baylo, gingutom dayon ako sa espirituwal, kag naglayo pa gid ako kay Jehova. Ikaduha, sa baylo nga pasugtan ako, ginpilit pa gid ako nanday Nanay kag Tatay nga untatan ang pag-alagad kay Jehova.

 BULIG KAG PAGPAMATOK

Madamo ako sang nakilala sa Kingdom Hall nga ginpamatukan sang ila pamilya. Ginpasalig nila ako nga palig-unon ako ni Jehova. (Mat. 10:34-37) Ginpatalupangod nila sa akon nga makabulig ako para maluwas ang akon pamilya. Gani nangamuyo ako sing hanuot kay luyag ko nga matun-an kon paano magsalig kay Jehova.

Madamo nga sahi ang pagpamatok sang akon pamilya. Ginhimo ini ni Nanay paagi sa pagpakiluoy kag pagpangatarungan. Sa masami, nagahipos lang ako. Kay kon maghambal ako, pirme lang kami nagabaisay kon sin-o ang husto sa amon nga duha. Kon gintahod ko kuntani ang balatyagon kag mga pagpati ni Nanay, mahimo nga nagtawhay ang kahimtangan. Gindugangan sang akon mga ginikanan ang akon mga buluhaton sa balay para indi na ako makagua. Kon kaisa indi na ako makasulod sa balay ukon ginaubusan ako sing pagkaon.

Nangayo sing bulig si Nanay sa iban. Nakitluoy sia sa akon maestro, pero wala ini magdampig sa iya. Gindala ako ni Nanay sa iya manedyer para kumbinsihon ako sini nga wala sing pulos ang tanan nga relihion. Sa balay, gintawgan ni Nanay ang amon mga paryente kag nagahibi sia nga nagapangayo sing bulig. Nasubuan ako sa sini, pero sa mga miting ginpalig-on ako sang mga gulang nga dumdumon kon daw ano kadamo ang ginapanaksihan ni Nanay sing indi hungod.

Dayon, nangin problema ang parte sa pag-eskwela sa unibersidad. Plano sang akon mga ginikanan nga hatagan ako sing pinakamaayo nga paagi para mangin madinalag-on. Nagalaum sila nga makakita ako sang maayo nga trabaho. Indi namon ini mahambalan sing  matawhay, amo nga makapila ko ginsulatan sanday Nanay kag Tatay para ipaathag ang akon mga tulumuron. Akig nga ginpaandaman ako ni Tatay: “Kon sa banta mo makakita ka sing trabaho, dapat makakita ka na buas, kay kon indi, maghalin ka diri sa balay.” Ginpangamuyo ko ini kay Jehova. Sang masunod nga adlaw samtang nagabantala ako, duha ka sister ang nagpangabay sa akon nga mangin tutor sang ila bata. Nagpahaganhagan ini sang kahimtangan sa balay. Wala ini maluyagan ni Tatay kag wala na niya ako ginaistorya; ang matuod, wala na niya ako ginasapak. Nagsiling si Nanay nga mas gusto pa niya nga mangin kriminal ako sangsa mangin Saksi ni Jehova.

Ginbuligan ako ni Jehova nga tadlungon ang akon panghunahuna kag kon ano ang dapat ko himuon

Kon kaisa nagapamensar ako kon luyag bala ni Jehova nga asta gid diri nga indi ko pagsundon ang akon mga ginikanan. Pero bangod sang padayon nga pagpangamuyo kag pagpamalandong sang mga teksto sa Biblia parte sa gugma ni Jehova, nabuligan ako sini nga tamdon ang pagpamatok sing positibo kag mahangpan nga bangod ini sang kabalaka sang akon mga ginikanan sa akon. Ginbuligan ako ni Jehova nga tadlungon ang akon panghunahuna kag kon ano ang dapat ko himuon. Subong man, samtang nagapakigbahin pa gid ako sa ministeryo, nagadugang man ang akon kalipay sa sini. Gani gusto ko na magpayunir.

PAGPAYUNIR

Sang nahibaluan sang pila ka sister nga luyag ko magpayunir, ginsilingan nila ako nga hulaton ko anay nga magkalma ang akon mga ginikanan. Nangamuyo ako sing kaalam, nag-research, gin-usisa ko ang akon motibo, kag gin-istorya ko ang hamtong nga mga kauturan. Nakahinakop ako nga luyag ko pahamut-an si Jehova. Dugang pa, indi man sigurado nga magbag-o ang panimuot sang akon mga ginikanan kon indi ako anay magpayunir.

Nagpayunir ako sang manugtapos ako sa hayskul. Nangin tulumuron ko nga mag-alagad kon diin mas daku ang kinahanglanon. Pero indi gusto sang akon mga ginikanan nga magbiya ako sa balay. Gani naghulat ako asta nga nag-20 anyos ako. Para mapahamtang ang buot ni Nanay, ginpangabay ko ang sanga talatapan nga iasayn ako sa bagatnan nga Japan, diin may mga paryente kami.

Ginpakamaayo ako sa akon asaynment kay pila sa akon gintun-an ang nabawtismuhan. Nagtuon man ako sang Ingles para mapasangkad ko pa ang akon pag-alagad. Duha ka espesyal payunir nga brother ang yara man sa amon kongregasyon. Nakita ko ang ila kakugi kag kon paano nila ginabuligan ang iban. Gani nangin tulumuron ko nga mangin espesyal payunir. Sini nga tion, duha na ka beses nga nagmasakit sing grabe si Nanay. Sa sini nga mga tinion, nagpauli ako para atipanon sia. Natingala sia, amo nga medyo nagbag-o ang iya panimuot.

MADAMO NGA PAGPAKAMAAYO

Pagligad sang pito ka tuig, nakabaton ako sang sulat kay Atsushi, isa sa mga espesyal payunir nga nasambit ko na. Nagsiling sia nga luyag niya mangasawa kag luyag niya mahibaluan kon ano ang akon masiling. Wala ako maluyag kay Atsushi, kag wala ako magdumdom nga maluyag sia sa akon. Pagligad sang isa ka bulan, ginbalusan ko sia nga luyag ko nga magkilalahay pa gid kami. Nadiskobrehan namon nga pareho gali kami sing tulumuron. Luyag namon magpadayon sa bug-os tion nga ministeryo kag handa mag-alagad bisan diin. Sang ulihi, nagpakasal kami. Nalipay gid ako nga nagtambong sa amon kasal sanday Nanay, Tatay, kag ang pila namon ka paryente!

Nepal

Wala magdugay, samtang nagaalagad kami subong regular payunir, gintangdo si Atsushi nga tal-us nga manugtatap sang sirkito. Nag-abot pa gid dayon ang iban pa nga pagpakamaayo. Gin-asayn kami nga espesyal payunir kag dayon sa pag-alagad sa sirkito. Pagkatapos namon  maduaw ang tanan nga kongregasyon sa sirkito sing makaisa, may nagtawag sa amon halin sa sanga talatapan. Ang pamangkot? ‘Batunon bala namon ang asaynment sa Nepal sa pag-alagad sa sirkito?’

Madamo gid ang natun-an ko parte kay Jehova sang mag-alagad ako sa pila ka pungsod

Nagpalibog ako kon ano ang batyagon sang akon mga ginikanan nga maasayn kami sing amo sina kalayo. Gani gintawgan ko sila sa telepono. Si Tatay ang nakasabat, kag nagsiling sia: “Maayo nga lugar ang inyo kadtuan.” Sang nagligad lang gali nga semana, ginhatagan sia sang iya abyan sing libro parte sa Nepal, kag namensar pa gani si Tatay nga maayo ini nga lugar pamasyaran.

Samtang nagaalagad kami sing malipayon sa mainabyanon nga mga Nepalese, isa pa ka pagpakamaayo ang nag-abot sa amon. Nalakip sa amon sirkito ang Bangladesh, isa ka lugar nga malapit lang pero madamo sing kinatuhayan. Nanuhaytuhay gid ang pamaagi sa pag-alagad sa latagon. Pagkatapos sang lima ka tuig, gin-asayn kami liwat sa Japan, kag nagaalagad kami sa sirkito.

Madamo gid ang natun-an ko parte kay Jehova sang mag-alagad ako sa pungsod sang Japan, Nepal, kag Bangladesh. Ang kada pungsod may pinasahi nga palibot kag kultura. Kag sa kada pungsod, pinasahi ang kada tawo. Nakita ko kon paano ginaatipan, ginabaton, ginabuligan, kag ginapakamaayo ni Jehova ang mga indibiduwal.

Ginpakamaayo man ako ni Jehova. Gintugutan niya ako nga makilala sia kag himuon ang iya hilikuton, kag ginhatagan man niya ako sang maayo nga Cristianong bana. Gintuytuyan ako sang Dios nga makahimo sing husto nga mga desisyon, kag subong may maayo na ako nga kaangtanan sa iya kag sa akon pamilya. Bangod kay Jehova, nagsuod kami liwat ni Nanay. Daku gid ang akon pasalamat nga nasapwan ko ang paghidait sa Dios kag sa akon iloy.

Nalipay gid kami sa pag-alagad sa sirkito