Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) NOBIEMBRE 2015

Hanasa ang Imo Bata nga Alagaron si Jehova

Hanasa ang Imo Bata nga Alagaron si Jehova

‘Palihug ang alagad sang matuod nga Dios magtudlo sa amon kon paano padakuon ang mabun-ag nga bata.’—HUK. 13:8.

AMBAHANON: 88, 120

1. Ano ang reaksion ni Manoa sang mahibaluan niya nga mangin amay na sia?

NAKIBOT gid si Manoa sang mabatian niya ang balita sang iya asawa. Sigurado gid sila nga baw-as ang iya asawa. Apang, nagpakita ang anghel ni Jehova sa iya asawa, kag mahanabo ang imposible: Magabusong ang asawa ni Manoa kag magabun-ag sing bata nga lalaki! Sigurado gid nga nalipay si Manoa, pero nakahibalo man sia nga daku ini nga responsibilidad. Sa isa ka pungsod nga puno sang kalautan, paano nila mapadaku ang ila bata nga nagaalagad sa Dios? “Nagpangabay si Manoa kay Jehova,” nga nagasiling: “Palihug pabalika ang alagad sang matuod nga Dios [ang anghel] nga ginpadala mo agod matudluan kami kon paano padakuon ang mabun-ag nga bata.”—Huk. 13:1-8.

2. Ano ang nalakip sa paghanas sa imo bata? (Tan-awa man ang kahon nga “ Ang Imo Pinakaimportante nga mga Estudyante sa Biblia.”)

2 Kon ikaw isa ka ginikanan, mahangpan mo ang pangabay ni Manoa. May mabug-at ka man nga responsibilidad sa pagbulig sa imo bata nga makilala kag higugmaon si Jehova. (Hulu. 1:8) Para mahimo ini, ang Cristiano nga mga ginikanan nagahiwat sang mapuslanon kag regular nga Pangpamilya nga Pagsimba. Pero, agod mapatudok mo sa hunahuna sang imo bata ang mga kamatuoran sa Biblia, indi lang pangpamilya nga pagtuon kada semana ang dapat  himuon. (Basaha ang Deuteronomio 6:6-9.) Paano mo mapatudok ang kamatuoran sa imo bata? Binagbinagon sini nga artikulo kag sang masunod kon paano mailog sang mga ginikanan ang halimbawa ni Jesus. Bisan indi isa ka amay si Jesus, makabenepisyo ang mga ginikanan sa paagi niya sang pagtudlo bangod gintudluan kag ginhanas niya ang iya mga disipulo sing mapinalanggaon, mapainubuson, kag may paghantop. Binagbinagon naton ang tagsa sini nga mga kinaiya.

PALANGGAA ANG IMO BATA

3. Paano ginpakita ni Jesus nga palangga niya ang iya mga disipulo?

3 Wala magpangalag-ag si Jesus sa paghambal sa iya mga disipulo nga palangga niya sila. (Basaha ang Juan 15:9.) Ginpakita man niya nga palangga niya ang iya mga disipulo paagi sa suod kag pirme nga pagpakig-upod sa ila. (Mar. 6:31, 32; Juan 2:2; 21:12, 13) Ang pagpakig-upod ni Jesus sa ila indi lang puro trabaho. Sa amo, wala sila nagpangduhaduha kon bala palangga gid niya sila. Paano mo mailog ang paagi ni Jesus sang pagtudlo?

4. Paano mo makumbinsi ang imo kabataan nga palangga mo sila? (Tan-awa ang piktyur sa umpisa sini nga artikulo.)

4 Ihambal sa imo kabataan nga palangga mo sila, kag ipakita pirme nga importante gid sila sa imo. (Hulu. 4:3; Tito 2:4) Si Samuel, nga taga-Australia, nagsiling: “Sang bata pa ako, ginabasahan ako ni Tatay kada gab-i sang Ang Akon Libro sang mga Sugilanon sa Biblia. Ginasabat niya ang mga pamangkot ko, ginahakos niya ako, kag ginahalukan antes magtulog. Nakibot gid ako sang ulihi sang mahibaluan ko nga nagdaku gali sia sa isa ka pamilya nga indi kinaandan ang paghakos kag paghalok! Pero nanikasog gid sia nga ipabatyag sa akon nga palangga niya ako. Subong resulta, nagsuod ako sa iya, nangin kontento kag malipayon.” Buligi ang imo kabataan nga magbatyag pareho sina paagi sa pirme pagsiling sa ila, “Palangga ta ka.” Ipakita nga palangga mo ang imo kabataan. Mag-istorya, magkaon, kag maghampang upod sa ila.

5, 6. (a) Ano ang ginahimo ni Jesus sa mga ginahigugma niya? (b) Paano ang nagakaigo nga pagdisiplina makabulig sa kabataan nga magbatyag sing pagpalangga kag pagsalig?

 5 Nagsiling si Jesus: “Ginasabdong ko kag ginadisiplina ang tanan nga ginahigugma ko.” * (Bug. 3:19) Bisan pa sulitsulit nga nagbinaisay ang mga disipulo ni Jesus kon sin-o ang pinakamataas sa ila, wala sia mangampo. Wala man niya ginbalewala kon indi nila masunod ang iya laygay. Sa nagakaigo nga tion kag lugar, mahigugmaon kag malulo niya sila nga ginasabdong.—Mar. 9:33-37.

6 Ipakita nga palangga mo ang imo kabataan paagi sa pagdisiplina sa ila. Kon kaisa, bastante na nga ipaathag sa ila kon ngaa ang ila dalanon husto ukon sala. Ukon mahimo indi matuman sang imo bata ang imo ginsiling. (Hulu. 22:15) Kon matabo ina, iluga si Jesus. Sa nagakaigo nga tion kag lugar, mahigugmaon kag malulo nga disiplinaha ang imo bata paagi sa mapinasensiahon nga pagtuytoy, paghanas, kag pagtadlong. “Wala nagabag-obag-o ang akon mga ginikanan kon nagadisiplina,” siling ni Elaine nga isa ka utod sa Bagatnan nga Aprika. “Kon magsiling sila nga silutan ako kon maglalis ako, ginatuman nila ini. Pero wala gid sila nagadisiplina nga akig ukon wala makapaathag kon ngaa ginadisiplina nila ako. Subong resulta, nangin malipayon ako kag may pagsalig. Nahibaluan ko kon diin lang ako asta, kag nahangpan ko kon ano ang ginapatuman sa akon.”

MAGPAKITA SANG PAGPAUBOS

7, 8. (a) Paano nagpakita si Jesus sang pagpaubos sa iya mga pangamuyo? (b) Paano ang imo mga pangamuyo makatudlo sa imo kabataan nga magsalig sa Dios?

7 Handurawa kon ano ang ginbatyag sang mga disipulo ni Jesus sang mabatian nila, ukon mahibaluan sang ulihi, ang isa sa katapusan niya nga mga pangamuyo sang tawo pa sia: “Abba, Amay, ang tanan nga butang posible sa imo; kuhaa sa akon ini nga kopa. Apang, indi suno sa luyag ko, kundi suno sa luyag mo.” * (Mar. 14:36) Base sa ginpangamuyo ni Jesus, walay duhaduha nga natun-an sang iya mga sumulunod nga kon ang himpit nga Anak sang Dios mapainubuson nga nangamuyo sing bulig, sila dapat amo man.

8 Ano ang matun-an sang imo kabataan sa imo mga pangamuyo? Matuod, nagapangamuyo ka kay Jehova indi lang para tudluan ang imo kabataan. Sa baylo, kon mapainubuson ka nga nagapangamuyo upod sa imo kabataan, matun-an man nila nga magsalig kay Jehova. Si Ana, nga taga-Brazil, nagsiling: “Kon may mga problema, pareho sang pagmasakit sang akon lolo kag lola, nagapangamuyo ang akon mga ginikanan kay Jehova nga hatagan sila sing kusog nga malandas ang problema kag sing kaalam agod makahimo sing maalamon nga mga desisyon. Bisan pa sa mabudlay gid nga kahimtangan, gintugyan nila ang ila mga problema kay Jehova. Gani natun-an ko nga magsalig kay Jehova.” Kon nagapangamuyo ka upod sa imo kabataan, indi lang mangamuyo para sa ila. Mangabay kay Jehova nga buligan ka man niya—halimbawa, sa paglisensia sa imo amo kon puede ka makabiya sa obra para magtambong sa kombension, sa pagbantala nga may kaisog sa inyo kaingod, ukon sa iban pa nga paagi. Mapainubuson nga magsalig sa Dios, kag matun-an man ini sang imo kabataan.

9. (a) Paano gintudluan ni Jesus ang iya mga disipulo nga mag-alagad sing mapainubuson sa iban? (b) Kon handa ka sa pag-alagad sa iban, ano ang matun-an sang imo kabataan?

9 Paagi sa ginahambal kag halimbawa ni Jesus, ginhanas niya ang iya mga disipulo nga mag-alagad sing mapainubuson sa iban.  (Basaha ang Lucas 22:27.) Gintudluan niya ang iya mga apostoles nga mangin masinakripisyuhon sa pag-alagad kay Jehova kag sa pagpakig-angot sa ila mga masigkatumuluo. Paagi sa imo halimbawa, matudluan mo ang imo kabataan nga mangin mapainubuson kag masinakripisyuhon. “Wala ko ginaisip ang tion nga ginhinguyang sang akon bana sa iban subong isa ka gulang,” siling ni Debbie, nga may duha ka bata. “Nakahibalo ako nga kon kinahanglan sang amon pamilya ang iya atension, ihatag gid niya ini sa amon.” (1 Tim. 3:4, 5) Ang iya bana nga si Pranas nagdugang: “Sang ulihi, gusto gid makigbahin sang amon kabataan sa mga asembleya kag sa teokratiko nga mga proyekto. Nag-uswag sila, nagdamo ang ila abyan, kag napahamtang ang ila buot!” Ang ila bilog nga pamilya subong nagaalagad kay Jehova sing bug-os tion. Paagi sa imo pagpaubos kag pagsakripisyo, matun-an sang imo kabataan nga mag-alagad sa iban.

MAGPAKITA SANG PAGHANTOP

10. Sang magsunod kay Jesus ang mga tawo, paano niya ginpakita ang paghantop?

10 May paghantop si Jesus bangod gintan-aw niya indi lamang ang makita sang mata kundi ginhibalo niya ang rason kon ngaa amo sina ang paggawi sang mga tawo. Isa ka bes, ang pila sa iya mga tagpalamati sa Galilea gusto gid magsunod sa iya. (Juan 6:22-24) Pero mabasa ni Jesus ang ila tagipusuon, kag nahantop niya nga mas interesado sila sa pagkaon sangsa ginatudlo niya sa ila. (Juan 2:25) Nakita niya kon ano ang ila sayop, gani amat-amat niya sila nga gintadlong, kag ginpaathag niya kon paano sila mag-uswag.—Basaha ang Juan 6:25-27.

Nalipay bala ang imo bata sa pagbantala? (Tan-awa ang parapo 11)

11. (a) Maghatag sing halimbawa sa kon paano ang paghantop makabulig sa imo nga mahibaluan kon bala nalipay sa pag-alagad ang imo bata. (b) Ano ang himuon mo para malipay ang imo bata sa pag-alagad?

11 Bisan pa indi ka makabasa sang tagipusuon, mapakita mo man ang paghantop kag mahibaluan kon ano ang pagtamod sang imo bata sa pag-alagad sa latagon. Madamo nga ginikanan ang nagauntat sing makadali samtang nagabantala para makapahuway kag makapamahaw ang ila kabataan. Pero puede mo hantupon ang kahimtangan kag pamangkuton ang imo kaugalingon, ‘Nanamian bala ang akon bata sa pag-alagad ukon sa pagpamahaw?’ Kon nahantop mo nga wala nalipay ang imo kabataan sa  pag-alagad, maghimo sang tulumuron upod sa ila. Mamensar sing makawiwili nga mga paagi agod mabuligan sila nga makigbahin sing bug-os sa pag-alagad kaupod mo.

12. (a) Paano ginpaandaman ni Jesus ang iya mga sumulunod parte sa kahigkuan sa moral? (b) Paano nangin suno sa tion ang paandam ni Jesus?

12 Nagpakita man si Jesus sing paghantop paagi sa paghibalo kon ano ang sayop nga mga tikang nga nagadul-ong sa sala. Halimbawa, nahibaluan sang iya mga sumulunod nga sala ang seksuwal nga imoralidad. Pero nagpaandam si Jesus sa sayop nga mga tikang padulong sa imoralidad, nga nagasiling: “Ang bisan sin-o nga nagatulok sa isa ka babayi kag nagahandum sa pagpakighilahi sa iya, nakapakighilahi na sa iya tagipusuon. Gani kon ang imo tuo nga mata nagapasandad sa imo, lukata ini kag ihaboy.” (Mat. 5:27-29) Suno gid sa tion ang iya laygay para sa mga Cristiano nga nagkabuhi sang naggahom ang Roma. Sa mga palaguaon sa entablado sa Roma, “makita sang mata kag mabatian sang dulunggan ang mga binastos,” sulat sang isa ka manunulat sang kasaysayan, “kag kon ano ang pinakabastos nga mga eksena amo gid ang ginapalakpakan.” Mahigugmaon gid kag mahinantupon si Jesus kay ginpaandaman niya ang iya mga disipulo parte sa mga butang nga magapabudlay sa isa nga magpabilin nga matinlo sa moral!

13, 14. Paano mo maamligan ang imo kabataan sa indi matinlo nga kalingawan?

13 Ang paghantop makabulig agod maamligan ang imo kabataan sa espirituwal. Subong, bisan ang mga bata pa kaayo mahimo na makasumalang sang pornograpiya kag iban pa nga imoral nga materyal. Siempre pa, ginapaandaman sang Cristiano nga mga ginikanan ang ila kabataan nga sala ang indi matinlo nga kalingawan. Pero, ang paghantop makabulig man sa imo nga mahibaluan ang mga kabangdanan nga mahimo mangin interesado ang imo bata sa pornograpiya. Pamangkuta ang imo kaugalingon: ‘Ano ang mahimo magsulay sa akon bata nga maglantaw sang pornograpiya? Nakahibalo bala sia kon ngaa makahalalit ini? Mahapos bala ako palapitan amo nga makapangayo sia sang bulig sa akon kon ginasulay sia nga maglantaw sang pornograpiya?’ Bisan bata pa sila kaayo, mahimo mo sila hambalan: “Kon makakita ka sang imoral nga website kag ginasulay ka nga maglantaw, indi ka mahuya nga magpalapit kag mag-istorya sa akon. Gusto ta ka buligan.”

14 Mabuligan ka man sang paghantop nga pilion sing maayo ang imo mismo kalingawan. “Bilang mga ginikanan, ang aton ginapili nga mga kanta, pelikula, ukon libro makaimpluwensia sa aton pamilya,” siling ni Pranas, nga ginsambit kaina. “Mahimo mo masiling sa ila ang madamo nga butang, pero ginalantaw sang imo kabataan ang imo ginahimo kag ginailog ka nila.” Kon makita sang imo kabataan nga ginapili mo gid ang matinlo nga kalingawan, posible nga amo man sini ang ila himuon.—Roma 2:21-24.

PAMATIAN KA SANG MATUOD NGA DIOS

15, 16. (a) Ngaa makasalig kamo nga buligan kamo sang Dios sa paghanas sa inyo kabataan? (b) Ano ang aton binagbinagon sa masunod nga artikulo?

15 Ano ang natabo kay Manoa sang nangayo sia sang bulig sa pagpadaku sa iya bata? “Ginpamatian sang matuod nga Dios si Manoa.” (Huk. 13:9) Mga ginikanan, pamatian man kamo ni Jehova. Sabton niya ang inyo mga pangamuyo kag buligan niya kamo sa paghanas sa inyo kabataan. Mangin madinalag-on kamo kon himuon ninyo ini nga may pagpalangga, pagpaubos, kag paghantop.

16 Ginabuligan ni Jehova ang mga ginikanan nga magmadinalag-on sa paghanas sa ila magagmay nga kabataan, gani buligan man niya ang mga ginikanan sa paghanas sa ila mga tin-edyer. Binagbinagon sa masunod nga artikulo kon paano ninyo mailog ang pagpalangga, pagpaubos, kag paghantop ni Jesus samtang ginahanas ninyo ang inyo mga tin-edyer nga alagaron si Jehova.

^ par. 5 Suno sa Biblia, ang disiplina nagalakip sang mahigugmaon nga pagtuytoy, paghanas, pagtadlong, kag kon kaisa pagsilot—pero indi bangod sa kaakig.

^ par. 7 Ang The International Standard Bible Encyclopedia nagsiling: “Sa adlaw-adlaw nga paghambalanay sang tion ni Jesus, ang paggamit sang ʼabbāʼ nagapakita sang suod nga kaangtanan kag pagtahod sang mga anak sa ila amay.”