Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) OKTUBRE 2015

Padayon nga Magpamalandong sa Espirituwal nga mga Butang

Padayon nga Magpamalandong sa Espirituwal nga mga Butang

“Hunahunaa sing maayo ini nga mga butang; mag-ukod sa sini, agod ang imo pag-uswag makita sang tanan nga tawo.”—1 TIM. 4:15.

AMBAHANON: 57, 52

1, 2. Ngaa pinasahi gid ang utok sang tawo?

BANGOD sang lenguahe, ang mga tawo makabasa, makasulat, makahambal, makahangop sang ginahambal, makapangamuyo, kag makaamba sang pagdayaw kay Jehova. Makatilingala gid ini kag nadalahig sa sini ang mga bahin kag mga sistema sang utok nga indi pa bug-os nga mahangpan sang mga sientipiko. Bangod pinasahi gid ang aton utok, makatuon kita sang isa ka lenguahe. “Ang ikasarang sang mga bata nga makatuon sang lenguahe,” siling sang propesor sa mga lenguahe, “isa ka pinasahi nga kinaiya sang [mga tawo].”

2 Ang ikasarang sang tawo sa paggamit sang lenguahe isa ka regalo sang Dios. (Sal. 139:14; Bug. 4:11) Pinasahi gid ang ginhatag sang Dios sa aton nga utok bangod sang isa pa ka rason. Indi pareho sa mga sapat, gintuga ang mga tawo “suno sa larawan sang Dios.” May kahilwayan sila sa pagpili, kag mahimo nila gamiton ang lenguahe sa paghimaya sa Dios.—Gen. 1:27.

3. Ano nga matahom nga regalo ang ginhatag ni Jehova para mangin maalam kita?

3 Para sa tanan nga gusto magpadungog sa Ginhalinan sang lenguahe, ginhatag sang Dios ang matahom nga regalo, ang Biblia. Matigayon ang kompleto ukon ang bahin sini sa sobra  2,800 ka lenguahe. Kon ginapamalandungan mo ining balaan nga mga sinulatan, ginahunahuna mo ang mga panghunahuna sang Dios. (Sal. 40:5; 92:5; 139:17) Gani malipay ka sa pagpamalandong sa mga butang nga “makapaalam sa imo para sa kaluwasan.”—Basaha ang 2 Timoteo 3:14-17.

4. Ano ang buot silingon sang magpamalandong, kag ano nga mga pamangkot ang binagbinagon naton?

4 Kon nagapamalandong ka, nagapokus ka kag nagapamensar sa isa ka butang, maayo man ini ukon malain. (Sal. 77:12; Hulu. 24:1, 2) Makabenepisyo gid kita kon pamalandungan naton si Jehova nga Dios kag ang iya Anak nga si Jesucristo. (Juan 17:3) Pero mahimo kita mamangkot, Paano kita magbasa nga makapamalandong kita? Ano ang aton mapamalandungan, kag ano ang aton himuon para pirme kita makapamalandong kag manamian kita sa sini?

TINGUHAI NGA MAKABENEPISYO KA SA IMO PAGTUON

5, 6. Ano ang makabulig sa imo para mas mahangpan mo kag madumduman ang imo ginabasa?

5 Kon kaisa, mahimo sang imo utok ang makatilingala nga mga butang nga indi mo matalupangdan. Halimbawa, nagaginhawa ka, nagalakat, nagabisikleta, ukon naga-type nga wala mo na ini ginahunahuna. Amo man sini kon kaisa kon nagabasa. Gani, importante gid nga magkonsentrar sa kahulugan sang imo ginabasa. Pagkatapos mo basahon ang isa ka parapo ukon antes ka magsugod sa bag-o nga subtitulo sa isa ka publikasyon, mahimo ka magpundo kag magpamalandong sa imo nabasa para mapat-od mo nga nahangpan mo gid ini. Pero mahimo maglagaw ang imo hunahuna bangod sang mga tublag kag indi pagkonsentrar, amo nga indi ka makabenepisyo sa imo ginabasa. Paano ini malikawan?

6 Natukiban sang mga sientipiko nga kon nagabasa ka sing matunog samtang nagatuon, mas madali mo ini madumduman. Nahibaluan ini sang Manunuga sang aton utok. Gani ginsugo niya si Josue nga basahon ang Iya libro sang Kasuguan “sa mahinay nga tingog [footnote].” (Basaha ang Josue 1:8.) Kon basahon mo ang Biblia sa mahinay nga tingog, mas madumduman mo gid ini. Makabulig man ini sa imo nga mas makakonsentrar.

7. San-o ang pinakamaayo nga tion nga magpamalandong sa Pulong sang Dios? (Tan-awa ang piktyur sa umpisa sini nga artikulo.)

7 Mahimo nga mahapos lang magbasa, pero kinahanglan ang konsentrasyon para makapamalandong. Amo sini kon ngaa mas gusto sang indi perpekto nga utok nga himuon ang mas mahapos. Gani, pinakamaayo nga magpamalandong kon wala ka nakapoy kag ara ka sa malinong nga lugar nga wala gawa sing tublag. Nagpamalandong ang salmista samtang nagahigda sia kag nagabugtaw sa kagab-ihon. (Sal. 63:6) Nahibaluan ni Jesus, nga may perpekto nga panghunahuna, nga mas maayo magpamalandong kag mangamuyo sa malinong nga mga lugar.—Luc. 6:12.

MAAYO NGA MGA BUTANG NGA DAPAT PAMALANDUNGAN

8. (a) Magluwas sa Pulong sang Dios, ano pa ang puede naton pamalandungan? (b) Ano ang ginabatyag ni Jehova kon nagahambalanay kita parte sa iya?

8 Magluwas sa ginabasa mo sa Biblia, may iban pa nga puede mo pamalandungan. Halimbawa, kon nagatan-aw ka sa matahom nga gintuga sang Dios, magpamalandong sa sini. Bilang resulta, madayaw mo si Jehova bangod sang iya kaayo kag masugid mo ini sa imo kaupod. (Sal. 104:24; Binu. 14:17) Ginapabaloran bala ni Jehova ang aton pangamuyo kag paghambalanay parte sa iya? Ginasabat ini sang iya hamili nga Pulong. Parte sa sining katapusan nga mga adlaw,  ginapasalig kita: “Gani naghambalanay ang mga nagakahadlok kay Jehova, kag si Jehova padayon nga nagapamati sing maayo sa ila. Kag isa ka libro nga nagaunod sang mga ngalan nga ginadumdom sang Dios ang ginsulat sa atubangan niya tuhoy sa mga nagakahadlok kay Jehova kag tuhoy sa mga nagapamalandong sa iya ngalan.”—Mal. 3:16.

Ginapamalandungan mo bala ang mga kinahanglanon kag kahimtangan sang imo mga ginatudluan sing Biblia? (Tan-awa ang parapo 9)

9. (a) Suno kay Pablo, ano ang pamalandungan ni Timoteo? (b) Paano naton masunod ang laygay ni Pablo kon nagahanda kita sa aton ministeryo?

9 Nagsiling si apostol Pablo kay Timoteo nga ‘hunahunaon niya sing maayo [ukon, ‘pamalandungan,’ footnote]’ ang epekto sang iya paghambal, paggawi, kag pagpanudlo. (Basaha ang 1 Timoteo 4:12-16.) Pareho kay Timoteo, madamo kita sang espirituwal nga mga hilikuton nga dapat pamalandungan. Halimbawa, kinahanglan naton magpamalandong kon nagahanda kita para sa aton ginatudluan sing Biblia. Mahimo kita mamensar sang makapahunahuna nga pamangkot ukon ilustrasyon para mabuligan ang nagatuon nga mag-uswag. Kon himuon naton ini, magabakod ang aton pagtuo kag mangin mas epektibo kita kag mas mapagsik sa aton pagtudlo sang Biblia. Amo man sini ang resulta kon ginahanda naton ang aton tagipusuon antes mag-alagad sa latagon. (Basaha ang Esdras 7:10.) Ang pagbasa sang isa ka kapitulo sa libro sang Binuhatan sa Biblia ‘magapadabdab’ sang aton kakugi sa ministeryo. Makabulig sa aton ang pagpamalandong sa mga teksto sa Biblia nga ginaplano naton nga gamiton kag mga publikasyon nga itanyag naton. (2 Tim. 1:6) Pamensara ang mga tawo sa inyo teritoryo kag kon ano ang makapainteres sa ila. Makabulig ini tanan nga paghanda para epektibo kita nga makapanaksi “nga nagapasundayag sang gahom sang espiritu” halin sa Pulong sang Dios.—1 Cor. 2:4.

10. Ano pa nga espirituwal nga mga butang ang dapat naton pamalandungan?

 10 Nagasulat ka bala sang mga nota kon kaisa sa mga pamulongpulong publiko, asembleya, kag kombension? Mapamalandungan mo ini kon ginarepaso mo ang imo natun-an sa Pulong sang Dios kag sa iya organisasyon. May bag-o man kita nga mabasa kag mapamalandungan sa kada bulan nga isyu sang Lalantawan kag Magmata! nga mga magasin kag sa mga publikasyon nga ginapagua sa mga kombension. Kon nagabasa ka sang Tuigan nga Libro, makabulig kon magpundo ka anay antes basahon ang masunod nga eksperiensia. Tion ini nga mapamalandungan mo ang imo nabasa kag matandog sini ang imo tagipusuon. Mahimo mo kuritan ang panguna nga mga punto ukon sulatan sang mga nota ang mardyin, kay makabulig ini sa imo kon nagahanda ka sa pagduaw liwat, pag-shepherding, ukon sa imo pamulongpulong. Labaw sa tanan, kon pirme ka nagapundo kag nagapamalandong kon nagabasa sang mga publikasyon nga nabase sa Biblia, mahangpan mo ang imo ginabasa kag makapangamuyo ka kay Jehova para pasalamatan sia sa maayo nga mga butang nga imo natun-an.

MAGPAMALANDONG KADA ADLAW SA PULONG SANG DIOS

11. Ano dapat ang panguna naton nga ginapamalandungan, kag ngaa? (Tan-awa man ang footnote.)

11 Siempre, ang Pulong sang Dios amo dapat ang panguna naton nga ginapamalandungan. Ano abi kon matabo nga dumilian ka sa paggamit sang Biblia? * Wala sang makapugong sa imo sa pagpamalandong sa imo nasaulo, pareho sang imo paborito nga mga teksto kag ambahanon sang Ginharian. (Binu. 16:25) Kag magabulig ang espiritu sang Dios para madumduman mo ang imo mga natun-an.—Juan 14:26.

12. Ano ang maayo nga iskedyul sa pagbasa sa Biblia?

12 Puede mo magamit ang pila ka adlaw kada semana para sa pagbasa kag pagpamalandong sa naiskedyul nga pagbasa sa Biblia sa Teokratikong Eskwelahan Para sa Ministeryo. Sa iban nga adlaw, puede mo mapamalandungan ang mga ginsiling kag ginhimo ni Jesus. Nalakip sa bantog nga mga libro sa Biblia ang mga Ebanghelyo nga rekord sang kabuhi kag ministeryo ni Jesus. (Roma 10:17; Heb. 12:2; 1 Ped. 2:21) May publikasyon pa gani para sa katawhan sang Dios nga parte sa mga eksperiensia ni Jesus sa duta nga ginpasunod suno sa tion nga natabo ini. Makabulig gid ini sa aton, ilabi na kon basahon naton kag pamalandungan sing maayo ang magkaanggid nga mga kasaysayan sa mga Ebanghelyo sa kada kapitulo.—Juan 14:6.

NGAA IMPORTANTE GID ANG PAGPAMALANDONG?

13, 14. Ngaa dapat gid kita padayon nga magpamalandong sa espirituwal nga mga butang, kag ano ang mangin epekto sini sa aton?

13 Ang pagpamalandong sa espirituwal nga mga butang makabulig sa isa ka Cristiano nga mangin hamtong. (Heb. 5:14; 6:1) Indi magabakod ang pagtuo sang isa kon diutay lang ang iya tion sa pagpamalandong parte kay Jehova kag kay Jesus. Mahimo sia maanod palayo sa kamatuoran. (Heb. 2:1; 3:12) Nagpaandam si Jesus nga kon indi naton pagpamatian, ukon pagbatunon, ang Pulong sang Dios “nga may maayo nga tagipusuon,” indi naton ini ‘mahuptan.’ Mahimo kita ‘madaug sang mga kabalaka kag mawili sa manggad kag kalipayan sini nga kabuhi.’—Luc. 8:14, 15.

14 Gani, padayon kita nga magpamalandong sa Pulong sang Dios. Mapalig-on kita sini nga ilugon ang mga kinaiya kag personalidad  ni Jehova nga makita sa Biblia. (2 Cor. 3:18) Daku gid ini nga kadungganan! Matahom gid nga mga pribilehiyo ang padayon nga pagtuon parte sa Dios kag ang pag-ilog sa aton mahigugmaon nga langitnon nga Amay sing wala sing katapusan.—Man. 3:11.

15, 16. (a) Paano kita makabenepisyo kon pamalandungan naton ang espirituwal nga mga butang? (b) Ngaa mabudlay kon kaisa magpamalandong, pero ngaa dapat gid naton ini himuon?

15 Kon padayon kita nga magpamalandong sa espirituwal nga mga butang, magapabilin kita nga makugi sa kamatuoran. Gani mapalig-on naton ang aton mga kauturan kag ang mga interesado nga aton mabantalaan. Kon pamalandungan naton sing maayo ang pinakadaku nga regalo sang Dios, ang halad-gawad ni Jesus, mas mapabaloran naton ang aton suod nga kaangtanan sa aton Balaan nga Amay nga si Jehova. (Roma 3:24; Sant. 4:8) Si Mark, nga taga-Bagatnan nga Aprika nga napriso sing tatlo ka tuig bangod nagpabilin sia nga neutral bilang Cristiano, nagsiling: “Puede mapaanggid ang pagpamalandong sa makawiwili nga paglakbay. Kon pirme kita nagapamalandong sa espirituwal nga mga butang, mas madamo kita sing mahibaluan parte sa aton Dios nga si Jehova. Kon nagaluya ang akon buot ukon nabalaka ako sa palaabuton, ginabasa ko ang Biblia kag ginapamalandungan ini. Dayon maayo na ang pamatyag ko.”

16 Matuod nga puno gid sang tublag ang kalibutan subong amo nga kabudlay gid kon kaisa magpamalandong sa espirituwal nga mga butang. Nagsiling ang isa pa ka matutom nga utod nga taga-Aprika nga si Patrick: “Ang akon hunahuna pareho sa bulutangan sang mga sulat nga puno sang lainlain nga impormasyon, maayo kag malain, nga kinahanglan ko pilion kada adlaw. Kon ginausisa ko ang akon ginahunahuna, may makita ako nga ‘makatulublag nga panghunahuna,’ kag dapat ko ini ipangamuyo kay Jehova para makapamalandong ako sing maayo. Nagakinahanglan ini sing diutay nga tion antes ako makapamalandong sa espirituwal nga mga butang, pero nagasuod ako kay Jehova. Bangod sini, mas mahangpan ko ang kamatuoran.” (Sal. 94:19, footnote.) Makabenepisyo gid ang tanan nga ‘nagausisa sing maayo sang Kasulatan sa adlaw-adlaw’ kag nagapamalandong sa ila natun-an.—Binu. 17:11.

SAN-O KA NAGAPAMALANDONG?

17. San-o ka nagapamalandong?

17 Temprano pa nagabugtaw ang iban sa aga para magbasa, magpamalandong, kag magpangamuyo. Ginahimo ini sang iban kon magpahuway sa trabaho sa tigpalanyaga. Mahimo mo ini sa gab-i ukon antes ka magtulog. Gusto sang iban magbasa sang Biblia sa aga kag antes magtulog. Ano man nga tion ang pilion naton, dapat naton ini basahon “sa adlaw kag gab-i,” ukon sing regular. (Jos. 1:8) Ang importante amo ang pagbuhin sang tion sa indi importante nga mga butang para makapamalandong sa Pulong sang Dios kada adlaw.—Efe. 5:15, 16.

18. Ano ang ginasiling sang Biblia parte sa tanan nga nagapamalandong sa Pulong sang Dios kada adlaw kag nagapanikasog nga iaplikar ang ila natun-an?

18 Pirme nagapromisa ang Pulong sang Dios sing mga pagpakamaayo sa tanan nga nagapamalandong sa sini kag nagapanikasog nga iaplikar ang ila natun-an. (Basaha ang Salmo 1:1-3.) “Malipayon ang mga nagapamati sa pulong sang Dios kag nagatuman sini,” siling ni Jesus. (Luc. 11:28) Labaw sa tanan, kon nagapamalandong kita sa espirituwal nga mga butang kada adlaw, ginapadunggan naton ang Daku nga Manunuga sang aton makatilingala nga utok, kag padyaan niya kita sing kalipay subong kag sing wala katapusan nga kabuhi sa iya matarong nga bag-ong kalibutan.—Sant. 1:25; Bug. 1:3.

^ par. 11 Tan-awa ang artikulo nga “Ang Amon Pagpakig-away Agod Magpabilin nga Mabakod sa Espirituwal” sa Disiembre 1, 2006, nga Ang Lalantawan.