Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Oktubre 2015

Makita Mo Bala ang Gahom sang Dios sa Imo Kabuhi?

Makita Mo Bala ang Gahom sang Dios sa Imo Kabuhi?

“Ang kamot ni Jehova makilala sang iya mga alagad.”—ISA. 66:14.

AMBAHANON: 65, 26

1, 2. Ano ang ginahunahuna sang iban parte sa Dios?

MADAMO ang nagahunahuna nga wala nagapasilabot ang Dios sa ila ginahimo. Ang matuod, nagapati ang iban nga indi interesado ang Dios sa nagakatabo sa mga tawo. Sang nanghalit ang Bagyo nga Yolanda (Haiyan) sa sentral nga bahin sang Pilipinas sang Nobiembre 2013, ang meyor sang isa ka daku nga siudad nagsiling: “Ara guro sa iban nga lugar ang Dios.”

2 Abi sang iban indi makita sang Dios ang ila ginahimo. (Isa. 26:10, 11; 3 Juan 11) Pareho sila sa ginlaragway ni apostol Pablo sang nagsiling sia: “Indi nila luyag nga makilala sing sibu ang Dios.” “Napuno sila sang tanan nga sahi sang pagkadimatarong, kalautan, kakagod, [kag] kalainan.”—Roma 1:28, 29.

3. (a) Ano ang ipamangkot naton sa aton kaugalingon parte sa Dios? (b) Sa Biblia, ano sa masami ang ginapatuhuyan sang “kamot” ni Jehova?

3 Kamusta kita? Indi pareho sang ginsambit kaina, nahibaluan naton nga makita ni Jehova ang tanan naton nga ginahimo. Pero makita man bala naton nga interesado sia kag nagabulig sa aton? Isa pa, nalakip bala kita sa mga ginpatuhuyan ni Jesus nga ‘makakita sa Dios’? (Mat. 5:8) Para mahangpan ini, binagbinagon naton  anay ang mga halimbawa sa Biblia sang mga nakakita sang kamot ukon gahom sang Dios kag sang mga wala nagapati sa sini. Dayon tun-an naton kon paano naton maathag nga makita ang gahom ni Jehova sa aton kabuhi paagi sa aton pagtuo. Samtang ginabinagbinag naton ini, dumduma nga masami ginasambit sang Biblia ang “kamot” sang Dios kon nagapatuhoy sa iya gahom, nga ginagamit niya para buligan ang iya mga alagad kag laglagon ang mga nagapamatok sa iya.—Basaha ang Deuteronomio 26:8.

INDI SILA MAGPATI SA GAHOM SANG DIOS

4. Ngaa indi magpati ang mga kaaway sang Israel sa gahom sang Dios?

4 Sa Israel sang una, makita kag mabatian sang mga tawo kon paano ginbuligan sang Dios ang mga Israelinhon. Milagruso nga ginluwas ni Jehova ang iya katawhan sa Egipto, kag ginpierde ang madamo nga mga hari. (Jos. 9:3, 9, 10) Bisan pa nabatian kag nakita ini sang halos tanan nga hari sa katundan nga bahin sang Jordan, “nagtingob sila sa pagpakig-away kay Josue kag sa Israel.” (Jos. 9:1, 2) Sang nagapakig-away na ini nga mga hari, maathag nila nga makita ang gahom sang Dios. Paagi kay Jehova, “nagpundo ang adlaw kag ang bulan tubtob nakatimalos ang pungsod sa iya mga kaaway.” (Jos. 10:13) Pero “gintugutan ni Jehova nga magtig-a ang ila [sang mga kaaway] tagipusuon agod makig-away sila sa Israel.” (Jos. 11:20) Indi magpati ang mga kaaway sang Israel nga ang Dios ang nagapakig-away para sa iya katawhan, gani napierde sila.

5. Ano ang indi pagpatihan sang malaut nga si Hari Ahab?

5 Maathag man kuntani nga nakita sang malaut nga si Hari Ahab ang gahom sang Dios. Ginsilingan sia ni Elias: “Wala sing tun-og kag ulan nga magtupa sa duta . . . luwas lang kon isugo ko ini!” (1 Hari 17:1) Maathag nga halin kay Jehova ang iya ginsiling, pero wala magpati si Ahab. Sang ulihi, sang nangamuyo si Elias, nakita ni Ahab ang kalayo halin sa langit nga nagsunog sa halad ni Elias. Dayon ginsilingan ni Elias si Ahab nga tapuson ni Jehova ang tigpalamangag: “Maglakat ka dayon kay basi maabtan ka sang mabaskog nga ulan!” (1 Hari 18:22-45) Nakita ini tanan ni Ahab pero wala sia gihapon magpati nga gahom ini sang Dios. Ini kag ang una nga mga halimbawa nagatudlo sa aton sang importante nga leksion nga dapat naton makita ang pagpanghikot sang gahom ni Jehova.

NAKITA NILA ANG GAHOM NI JEHOVA

6, 7. Ano ang maathag nga nakita sang iban sang tion ni Josue?

6 Tuhay sa malaut nga mga hari, nakita sang iban ang gahom sang Dios, bisan pa pareho sila sing kahimtangan. Halimbawa, indi pareho sa kalabanan nga pungsod nga nakig-away sa Israel sang tion ni Josue, nakighidait ang mga Gibeonhon sa Israel. Ngaa? Nagsiling sila kay Josue: “Ang imo mga alagad nagkadto diri . . . tungod sa ngalan ni Jehova nga imo Dios, bangod nabatian namon ang iya kabantugan kag ang tanan nga ginhimo niya.” (Jos. 9:3, 9, 10) Maalamon nila nga ginkilala nga ang matuod nga Dios ang nagabulig sa Israel.

7 Nakita man ni Rahab ang gahom sang Dios. Sang mahibaluan niya kon paano ginluwas ni Jehova ang Iya katawhan, ginsilingan niya ang duha ka Israelinhon nga espiya: “Nahibaluan ko gid nga ihatag ni Jehova sa inyo ang duta.” Bisan pa mabutang sia sa katalagman, nagtuo sia nga luwason sia ni Jehova kag ang iya pamilya.—Jos. 2:9-13; 4:23, 24.

8. Ngaa nagpati ang iban nga Israelinhon sa gahom sang Dios?

8 Indi pareho sa malaut nga hari sang Israel nga si Ahab, ang iban nga Israelinhon nga nakasaksi sa pagpadala ni Jehova sing kalayo sa pangabay ni Elias nagpati nga gahom ini sang Dios. Sang nakita nila ang  kalayo halin kay Jehova nga nagsunog sa halad, nagsiling sila: “Si Jehova ang matuod nga Dios!” (1 Hari 18:39) Maathag gid ini nga pamatuod para sa ila!

9. Paano naton makita si Jehova kag ang iya gahom subong?

9 Ang maayo kag indi maayo nga mga halimbawa nga aton nabinagbinag nagabulig sa aton nga mahangpan kon paano makita ang Dios ukon ang iya gahom. Kon makilala naton sia, makita man naton ang iya gahom kay makita naton ang iya mga kinaiya kag mga ginahimo paagi sa ‘mga mata sang aton tagipusuon.’ (Efe. 1:18) Gusto gid naton nga mangin pareho sa mga maathag nga nakakita sa pagbulig ni Jehova sa iya katawhan. Pero, may pamatuod gid bala kita nga ginabuligan sang Dios ang mga tawo subong?

PAMATUOD SUBONG SANG GAHOM SANG DIOS

10. Ano ang pamatuod nga ginabuligan ni Jehova ang mga tawo subong? (Tan-awa ang piktyur sa umpisa sini nga artikulo.)

10 May rason gid kita sa pagpati nga ginabuligan gihapon ni Jehova ang mga tawo. Pirme kita makabati sang mga eksperiensia sang mga nagpangamuyo para buligan sila sa espirituwal kag dayon nasabat ini. (Sal. 53:2) Sang nagapamalaybalay si Allan sa isa ka gamay nga isla sa Pilipinas, nasugilanon niya ang isa ka babayi nga naghibi. Nagsiling si Allan: “Sa sina lang nga aga, nangamuyo ang babayi kay Jehova nga tani makita sia sang mga Saksi. Nakatuon na sia sa Biblia upod sa mga Saksi sang tin-edyer pa sia pero nauntat ini sang nagpamana sia kag nagsaylo sa sini nga isla. Ginsabat dayon sang Dios ang iya pangamuyo amo nga nakahibi sia.” Wala pa isa ka tuig, gindedikar niya ang iya kabuhi kay Jehova.

Makita mo bala ang pamatuod nga ginabuligan ni Jehova ang iya katawhan subong? (Tan-awa ang parapo 11-13)

11, 12. (a) Paano ginabuligan ni Jehova ang iya mga alagad? (b) Isugid ang eksperiensia sang utod nga ginbuligan sang Dios.

11 Nakita sang madamo nga alagad sang Dios ang pamatuod sang iya bulig sang nauntatan nila ang ila mga bisyo pareho sang pagpanigarilyo, pag-abuso sa droga, ukon pagtan-aw sing pornograpiya. Nagsiling ang iban nga sulitsulit nila nga gintinguhaan nga himuon ini sadto pero wala sila nagmadinalag-on. Pero sang nangayo sila sing bulig kay Jehova, ginhatag niya “ang gahom nga labaw sa kinaandan,” gani nauntatan nila ang ila mga bisyo.—2 Cor. 4:7; Sal. 37:23, 24.

12 Ginbuligan ni Jehova ang madamo niya nga alagad nga mabatas ang mga problema. Halimbawa, nabudlayan gid si Amy sang gin-asayn sia nga magbulig sa pagpatindog sing Kingdom Hall kag balay para sa mga misyonero sa isa ka gamay nga isla sa Pasipiko. Nagsiling sia: “Nagdayon kami sa gamay nga hotel, kag nagaubog kami kada adlaw sa nagabaha nga mga dalan pakadto sa amon ginaobrahan.” Dapat man sia magpasibu sa mga kustombre sa sini nga lugar, kag pirme wala kuryente ukon tubig. Nagsiling pa si Amy: “Naglain pa gid, nahambalan ko sing masakit ang isa ka utod nga babayi nga kaupod namon. Nagalalain ako nga nagpauli. Sa sulod sang madulom ko nga kuarto, ginsugid ko kay Jehova ang tanan ko nga nabatyagan kag nangayo ako sing bulig sa iya.” Sang may kuryente na, ginbasa ni Amy ang Lalantawan nga magasin nga may artikulo parte sa programa sang gradwasyon sa Gilead nga nagbinagbinag sang tanan niya nga problema: bag-o nga kultura, kahidlaw sa iya pamilya, bag-o nga mga kaupod. Nagsiling sia: “Pamatyag ko daw ginaistorya ako ni Jehova sadto nga gab-i. Ginpalig-on gid ako sini nga magpadayon sa akon asaynment.”—Sal. 44:25, 26; Isa. 41:10, 13.

13. Ano ang pamatuod nga ginabuligan ni Jehova ang iya katawhan “sa pagpangapin kag legal nga pagpamatuod sa maayong balita”?

13 Ang isa pa ka pamatuod sang bulig ni Jehova amo nga nangin madinalag-on ang  mga Saksi ni Jehova “sa pagpangapin kag legal nga pagpamatuod sa maayong balita.” (Fil. 1:7) Gintinguhaan sang pila ka gobierno nga untaton ang tanan nga hilikuton sang katawhan sang Dios. Pero kon dumdumon naton nga nagdaug ang mga Saksi ni Jehova sa indi magkubos sa 268 ka kaso sa mataas nga mga hukmanan, lakip ang 24 ka kaso sa European Court of Human Rights sugod lang sang tuig 2000, maathag nga wala gid sing makapugong sa gahom sang Dios.—Isa. 54:17; basaha ang Isaias 59:1.

14. Ngaa makita ang gahom sang Dios sa aton pagbantala kag sa aton paghiusa?

14 Ang pagbantala sang maayong balita sa bilog nga kalibutan nahimo lamang paagi sa bulig sang Dios. (Mat. 24:14; Binu. 1:8) Bangod man sa paghiusa sang katawhan ni Jehova nga naghalin sa tanan nga pungsod—nga indi mailog sang kalibutan—mahangpan naton kon ngaa nagasiling ang mga wala nagasimba kay Jehova: “Ang Dios yara gid sa inyo.” (1 Cor. 14:25) Gani madamo ang aton pamatuod nga ginabuligan sang Dios ang iya katawhan. (Basaha ang Isaias 66:14.) Pero subong indibiduwal, maathag mo bala nga makita ang gahom ni Jehova sa imo kabuhi?

MAKITA MO BALA ANG GAHOM NI JEHOVA SA IMO KABUHI?

15. Ngaa kon kaisa indi naton maathag nga makita ang gahom ni Jehova sa aton kabuhi?

15 Ngaa kon kaisa indi naton maathag nga makita ang gahom sang Dios sa aton kabuhi? Mahimo nga nabudlayan gid kita sa mga problema naton. Gani, mahimo nga malipatan naton kon paano na kita nabuligan ni Jehova. Sang gusto patyon ni Rayna Jezebel si manalagna Elias, nalipatan sing makadali ni Elias kon paano sia ginbuligan sang Dios sang una. Ang Biblia nagsiling parte kay Elias: “Nangabay sia nga mapatay na lang sia.” (1 Hari 19:1-4) Ano ang solusyon sa iya problema? Dapat sia mangayo sing pagpalig-on kay Jehova.—1 Hari 19:14-18.

16. Paano naton makita ang Dios pareho kay Job?

16 Grabe gid ang kabalaka ni Job amo  nga indi na nangin pareho sa Dios ang iya pagtamod sa iya kahimtangan. (Job 42:3-6) Pareho kay Job, mahimo nga kinahanglan kita manikasog pa gid para makita ang Dios. Paano? Dapat naton pamalandungan ang ginasiling sang Kasulatan nga may kaangtanan sa nagakatabo sa aton. Kon makita naton kon paano kita ginabuligan ni Jehova, mangin mas matuod sia sa aton. Gani makasiling kita pareho kay Job: “Sang una nabatian ko lang sa iban ang tuhoy sa imo, apang karon nakita ko na ikaw.”

Ginagamit ka bala ni Jehova para makita man sia sang iban? (Tan-awa ang parapo 17 kag 18)

17, 18. (a) Paano naton makita nga ginabuligan kita ni Jehova? (b) Magsugid sing eksperiensia nga nagapakita nga ginabuligan kita sang Dios subong.

17 Paano naton makita ang gahom ni Jehova? Yari ang pila ka halimbawa: Mahimo nga nagapati ka nga ang Dios gid ang nagbulig sa imo nga matun-an ang kamatuoran. May tion bala nga sang nagtambong ka sa Cristianong mga miting, nabatian mo ang isa ka bahin kag nagsiling ka: “Amo gid ini ang kinahanglan ko”? Ukon mahimo nasabat ang imo pangamuyo. Mahimo nga nagdesisyon ka nga pasangkaron ang imo pag-alagad kag nagdayaw ka gid kon paano ka ginbuligan ni Jehova. Ukon naeksperiensiahan mo bala nga naghalin ka sa imo trabaho para sa imo espirituwalidad kag dayon nakita mo nga gintuman sang Dios ang iya promisa: “Indi ko gid kamo pagpabay-an”? (Heb. 13:5) Kon alisto kita sa espirituwal, makita naton kon paano kita pirme ginabuligan ni Jehova.

18 Ginsugid ni Sarah nga taga-Kenya ang iya eksperiensia: “Ginpangamuyo ko ang akon ginatudluan sing Biblia kay daw wala sia nagapabalor sa iya pagtuon. Ginpamangkot ko si Jehova kon bala untaton ko na lang ang pagtuon. Pagkatapos ko gid ‘Amen,’ nag-ring ang akon telepono. Nagtawag ang ginatudluan ko sing Biblia kag nagsiling nga gusto niya mag-upod sa akon sa pagtambong sa miting! Nakibot gid ako!” Kon alisto ka, makita mo man kon paano ka ginabuligan sang Dios. Si Rhonna nga utod nga taga-Asia nagsiling: “Kinahanglan mo gid tun-an kon paano makita nga ginagiyahan ka ni Jehova. Kon makita mo na ini, makalilipay gid mahibaluan nga interesado sia sa aton!”

19. Ano pa gid ang kinahanglan para makita naton ang Dios?

19 Nagsiling si Jesus: “Malipayon ang mga putli sing tagipusuon, kay makita nila ang Dios.” (Mat. 5:8) Paano kita mangin “putli sing tagipusuon”? Dapat mangin matinlo ang aton hunahuna kag untatan naton ang malain nga paggawi. (Basaha ang 2 Corinto 4:2.) Kon mabakod ang aton espirituwalidad kag matarong ang aton paggawi, makita naton ang Dios. Binagbinagon sa masunod nga artikulo kon paano makabulig ang aton pagtuo para maathag pa gid naton nga makita ang gahom ni Jehova sa aton kabuhi.