Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Oktubre 2015

Mag-alagad kay Jehova nga Wala sing Tublag

Mag-alagad kay Jehova nga Wala sing Tublag

“Si Maria . . . padayon nga nagapamati sa [ginatudlo ni Jesus]. . . . Masako si Marta sa pag-atipan sa madamo nga hilikuton.”—LUC. 10:39, 40.

AMBAHANON: 94, 134

1, 2. Ngaa ginhigugma ni Jesus si Marta, pero ano ang nagapakita nga indi sia perpekto?

ANO ang mapensaran mo parte kay Marta nga ginsambit sa Biblia? Bisan pa sia lang ang babayi nga ginsambit gid ang ngalan nga ginhigugma ni Jesus, may putli man nga gugma si Jesus sa iban pa nga diosnon nga mga babayi, pareho sang iya palangga nga iloy nga si Maria kag ang utod ni Marta nga si Maria man. (Juan 11:5; 19:25-27) Ngaa amo sini ang pagsambit sang rekord sa Ebanghelyo parte kay Marta?

2 Ginhigugma ni Jesus si Marta indi lang bangod maabiabihon sia kag mapisan, kundi bangod man sa iya espirituwalidad. Nagapati gid sia sa mga gintudlo ni Jesus. Nagatuo gid sia kay Jesus bilang ang ginpromisa nga Mesias. (Juan 11:21-27) Pero indi man sia perpekto pareho naton tanan. Sang nagbisita si Jesus sa ila balay, ginsilingan niya si Jesus nga tadlungon ang isa ka sitwasyon nga para sa iya indi husto. “Ginuo,” siling ni Marta, “balewala lang bala sa imo nga ginapabay-an ako sang akon utod sa pagpanghikot sing isahanon? Gani silinga sia nga magbulig  sa akon.” (Basaha ang Lucas 10:38-42.) Ano ang matun-an naton sa sini nga kasaysayan?

NATUBLAG SI MARTA

3, 4. Paano ginpili ni Maria “ang maayo nga bahin,” kag ano nga laygay ang mahimo gid nga ginsunod ni Marta? (Tan-awa ang piktyur sa umpisa sini nga artikulo.)

3 Gusto gid ni Jesus hatagan sing espirituwal nga regalo sanday Marta kag Maria bangod maabiabihon sila. Ginpanginpuslan ni Maria ang kahigayunan nga makatuon sa Dakung Manunudlo, gani nagpungko sia “sa tiilan sang Ginuo . . . , nga nagapamati sa iya ginatudlo.” Amo man kuntani sini ang ginhimo ni Marta. Kag mahimo gid nga ginkomendahan man sia kuntani ni Jesus.

4 Pero masako si Marta sa paghanda sang espesyal nga pagkaon kag sa iban pa nga ulubrahon para mangin matawhay ang pagbisita ni Jesus. Bangod sini tanan, nabalaka gid sia kag naugot na kay Maria. Nakita ni Jesus nga kadamo gid sang ginahimo ni Marta, gani mainayuhon sia nga nagsiling: “Marta, Marta, nagakabalaka ka gid sa madamo nga butang.” Dayon nagpanugda sia nga bastante na ang isa lang ka pagkaon. Ginpatuhuyan dayon ni Jesus si Maria kag gindayaw sia: “Ginpili ni Maria ang maayo nga bahin, kag indi ini pagkuhaon sa iya.” Mahimo nga nalipatan ni Maria kon ano ang iya ginkaon sadto, pero indi gid niya malipatan ang komendasyon kag maayong espirituwal nga pagkaon nga nabaton niya paagi sa pagpamati kay Jesus. Pagligad sang sobra 60 ka tuig, nagsulat si apostol Juan: “Ginahigugma ni Jesus si Marta kag ang iya utod nga babayi.” (Juan 11:5) Ginapakita sini nga ginsunod ni Marta ang mahigugmaon nga laygay ni Jesus kag matutom niya nga gin-alagad si Jehova sa bug-os niya nga kabuhi.

5. Ano ang kahimtangan sang kalibutan subong kon ipaanggid sa tion sang Biblia, kag ano ang dapat naton ipamangkot?

5 Mas madamo bala sang makatublag sa aton subong kon ipaanggid sa tion sang Biblia? “Subong pa lang natabo sa kasaysayan sang tawo nga nangin moderno na gid ang komunikasyon, pag-imprinta, magasin, radyo, pelikula, telebisyon. . . . Adlaw-adlaw kita nga ginapaulanan sang bag-o nga mga tublag . . . Ginhunahuna anay nga amo ini ang ‘Tion sang Paghangop.’ Pero labi ini nga nangin ‘Tion sang mga Tublag.’” Ginsiling ini sa isa ka grupo sang mga estudyante sa Estados Unidos sang nagligad nga sobra 60 ka tuig. Ang Septiembre 15, 1958, nga The Watchtower nagsiling: “Posible nga magdamo pa gid ang mga tublag samtang nagahilapit ang katapusan sini nga kalibutan.” Matuod gid ini! Gani dapat kita mamangkot: Ano ang himuon naton para malikawan ang mga tublag kag mangin pareho kita kay Maria nga nakapokus sa espirituwal nga mga butang?

INDI BUG-OS NGA PAGGAMIT SA KALIBUTAN

6. Paano ginagamit sang katawhan ni Jehova ang teknolohiya sang kalibutan?

6 Para ipalapnag ang matuod nga pagsimba, pirme ginagamit sang dutan-on nga bahin sang organisasyon sang Dios ang teknolohiya sang kalibutan. Halimbawa, binagbinaga ang “Photo-Drama of Creation,” nga isa ka produksion nga may mga slide kag mabatian nga pelikula nga de-kolor. Antes kag pagkatapos sang Bug-os Kalibutan nga Inaway I, minilyon sa bilog nga kalibutan ang nalugpayan sini nga presentasyon, kay ginlaragway sa konklusion sini ang magaabot nga Isa ka Libo ka Tuig nga Paggahom ni Jesucristo nga may paghidait. Sang ulihi, ginwaragwag sa radyo ang mensahe parte sa Ginharian nga nabatian sang minilyon pa sa  bilog nga duta. Subong, ginagamit sing maayo ang kompyuter kag Internet para ipalapnag ang maayong balita asta sa mga tawo sa malayo nga mga isla kag sa tanan nga bahin sang duta.

Indi pagtuguti nga matublag sang indi importante nga mga butang ang imo espirituwal nga mga hilikuton (Tan-awa ang parapo 7)

7. (a) Ngaa makatalagam ang sobra nga paggamit sa kalibutan? (b) Sa ano kita dapat maghalong? (Tan-awa ang footnote.)

7 Pero nagapaandam ang Biblia parte sa katalagman sang sobra nga paggamit sa kalibutan. (Basaha ang 1 Corinto 7:29-31.) Madali lang nga mauyang ang daku nga tion sang Cristiano sa mga butang nga indi man malain, pareho sang mga kalingawan, pagbasa, pagtan-aw sang TV, pagpamasyar, paglagaw sa mga balaligyaan, kag pagpangita sang pinakabag-o nga mga gadyet ukon mga luho. Ang paggamit sang mga social network, pag-text, pagpadala sang mga e-mail, kag pirme nga paghibalo sang pinakaulihi nga mga balita kag mga report sa sports makaubos sang aton tion kag makaaladik. * (Man. 3:1, 6) Kon indi naton paglimitehan ang tion nga ginagamit naton sa indi importante nga mga butang, mapatumbayaan naton ang pinakaimportante sa tanan—ang aton pagsimba kay Jehova.—Basaha ang Efeso 5:15-17.

8. Ngaa importante gid ang laygay nga indi paghigugmaon ang mga butang sa kalibutan?

8 Gindesinyo ni Satanas ang iya kalibutan para maganyat kag matublag kita. Matuod ini sang unang siglo, kag labi na subong. (2 Tim. 4:10) Gani dapat naton tumanon ini nga laygay: “Indi ninyo paghigugmaa . . . ang mga butang sa kalibutan.” Kon pirme kita nagahimo sing mga pagbag-o para masunod ini nga laygay, magadalom ang aton gugma sa Amay kag indi kita matublag. Gani mahimo naton ang kabubut-on sang Dios kag makapabilin kita nga suod sa iya.—1 Juan 2:15-17.

MAGPOKUS SA PINAKAIMPORTANTE

9. Ano ang ginsiling ni Jesus parte sa aton malaragwayon nga mata, kag ano nga halimbawa ang ginpakita niya?

9 Ang ginlaygay ni Jesus kay Marta nahisuno gid sa iya gintudlo kag halimbawa. Ginpalig-on niya ang iya mga disipulo nga ‘ipokus’ ang ila malaragwayon nga mata sa pag-alagad sa Ginharian kag indi matublag. (Basaha ang Mateo 6:22, 33.) Wala si Jesus sing madamo nga materyal nga pagkabutang; wala sia sing balay ukon duta.—Luc. 9:58; 19:33-35.

10. Ano nga halimbawa ang ginpakita ni Jesus sa una nga bahin sang iya ministeryo?

 10 Madamo kuntani sang makatublag kay Jesus sa iya ministeryo, pero wala niya ini gintugutan. Sa una nga bahin sang iya ministeryo, sang gintudluan niya ang mga tawo kag naghimo sang mga milagro sa Capernaum, nagpakiluoy sila nga indi sia maghalin sa ila siudad. Pero ano ang ginhimo ni Jesus? Nagsiling sia: “Dapat ko man ibantala ang maayong balita sang Ginharian sang Dios sa iban nga mga siudad, kay tungod sini ginpadala ako.” (Luc. 4:42-44) Gani nagbantala kag nagpanudlo si Jesus sa bilog nga Palestina. Bisan pa perpekto sia, kinahanglan man niya magpahuway kay ginkapoy man sia kon kaisa sa iya pagpangabudlay sa pag-alagad sa Dios.—Luc. 8:23; Juan 4:6.

11. Ano ang ginsiling ni Jesus sa tawo nga may problema sa pamilya, kag ano ang ginpaandam niya?

11 Sang ginatudluan ni Jesus ang iya mga sumulunod kon paano atubangon ang pagpamatok, nagsaligbat ang isa ka tawo: “Manunudlo, silinga ang akon utod nga partihan niya ako sang iya palanublion.” Pero wala magpasilabot si Jesus sa sini. “Lalaki,” siling ni Jesus sa iya, “sin-o ang nagtangdo sa akon subong hukom ukon manughusay sa inyo nga duha?” Ginpadayon ni Jesus ang iya pagpanudlo, kag ginpaandaman niya ang mga nagapamati sa iya sang katalagman nga matublag sang handum sa materyal nga mga butang ang ila pag-alagad sa Dios.—Luc. 12:13-15.

12, 13. (a) Pila ka adlaw antes mapatay si Jesus, ngaa nagdayaw gid ang pila ka Griego nga mga proselita? (b) Ano ang reaksion ni Jesus sang gusto nila makigkita sa iya?

12 Ang katapusan nga semana ni Jesus bilang tawo makakalapoy gid. (Mat. 26:38; Juan 12:27) Madamo sia sing dapat himuon, kag malapit na ang makahuluya nga pagbista kag mapintas nga pagpatay sa iya. Halimbawa, binagbinaga ang natabo sang Domingo, Nisan 9, sang 33 C.E. Suno sa gintagna, nagsulod si Jesus sa Jerusalem nga nagasakay sa tinday nga asno, kag gindayaw sia sang mga tawo bilang “ang isa nga nagakari subong Hari sa ngalan ni Jehova.” (Luc. 19:38) Pagkadason nga adlaw, nagsulod si Jesus sa templo kag maisugon nga gintabog ang makagod nga mga negosyante nga nagapangilkil sa ila mga masigka-Judiyo sa balay sang Dios.—Luc. 19:45, 46.

13 May pila ka Griego nga mga proselita sa Jerusalem nga nagdayaw gid kay Jesus amo nga ginpangabay nila si apostol Felipe nga makigkita sila kay Jesus. Pero nagkonsentrar si Jesus sa mas importante nga mga butang. Indi gid niya gusto nga mangin bantog para lang malikawan nga patyon sang mga kaaway sang Dios bilang halad. Gani sa tapos mapaathag nga mapatay sia, nagsiling sia kanday Andres kag Felipe: “Ang nagahigugma sa iya kabuhi nagalaglag sini, apang ang nagadumot sa iya kabuhi sa sini nga kalibutan magatipig sini para sa kabuhi nga wala sing katapusan.” Sa baylo nga pasugtan ini nga mga Griego, ginpalig-on niya sila nga sundon ang iya pagsakripisyo kag nagpromisa: “Kon ang bisan sin-o mag-alagad sa akon, padunggan sia sang Amay.” Pat-od gid nga ginsugid ini ni Felipe sa ila.—Juan 12:20-26.

14. Bisan pa ginauna ni Jesus ang pagbantala, ano ang nagapakita nga balanse sia?

14 Bisan pa ginauna ni Jesus ang pagbantala sang maayong balita, may iban pa sia nga ginhimo. Ginbaton niya ang imbitasyon sa kasal kag nagbulig pa gani para mangin malipayon ini nga okasyon paagi sa milagruso nga paghimo sa tubig nga mangin alak. (Juan 2:2, 6-10) Ginbaton man niya ang mga imbitasyon para magpanihapon upod sa iya suod nga mga abyan kag sa iban  nga puede mangin disipulo. (Luc. 5:29; Juan 12:2) Pero, pirme may tion si Jesus sa pagpangamuyo, pagpamalandong, kag sa pagpahuway kon kinahanglanon.—Mat. 14:23; Mar. 1:35; 6:31, 32.

‘IHABOY ANG TAGSA KA KABUG-ATAN’

15. Ano ang ginlaygay ni apostol Pablo, kag ano nga halimbawa ang ginpakita niya?

15 “Ihaboy man naton ang tagsa ka kabug-atan,” sulat ni apostol Pablo, nga nagpaanggid sang pagkabuhi sang dedikado nga Cristiano sa palumba. (Basaha ang Hebreo 12:1.) Ginhimo gid ni Pablo ang iya ginbantala, kay ginbiyaan niya ang madinalag-on nga propesyon sa Judaismo nga makahatag kuntani sa iya sang manggad kag kabantugan. Nagpokus sia sa “mas importante nga mga butang” kag nagpangabudlay sa pag-alagad sa Dios, nga nagalakbay sa Siria, Asia Minor, Macedonia, kag Judea. “Ginakalimtan ko ang mga butang sa likuran kag ginalab-ot ang mga butang sa unahan, nagatinguha ako nga mabaton ang padya,” sulat ni Pablo parte sa iya paglaum nga kabuhi nga wala sing katapusan sa langit. (Fil. 1:10; 3:8, 13, 14) Wala sing asawa si Pablo, gani nakabulig ini sa iya nga “pirme alagaron ang Ginuo sing tinagipusuon nga wala sing tublag.”—1 Cor. 7:32-35.

16, 17. Minyo man kita ukon indi, paano naton masunod ang halimbawa ni Pablo bilang disipulo sang Cristo? Isugid ang isa ka eksperiensia.

16 Pareho ni Pablo, wala nagpamana ukon nagpangasawa ang pila ka alagad sang Dios para makakonsentrar sa pag-alagad sa Ginharian kay mas diutay ang ila responsibilidad sa pamilya. (Mat. 19:11, 12) Ang minyo nga mga alagad sang Dios masami nga may madamo nga responsibilidad sa pamilya. Pero minyo man kita ukon indi, ‘mahaboy naton ang tagsa ka kabug-atan’ kag maalagad ang Dios nga diutay lang ang tublag. Mahimo nga kinahanglan naton likawan ang mga batasan nga nagauyang sang aton tion kag panikasugan nga dugangan ang aton tion sa pag-alagad sa Dios.

17 Binagbinaga ang mag-asawa nga taga-Wales nga sanday Mark kag Claire, nga nagpayunir pagkatapos sila makagradweyt sa hayskul kag nagpadayon sa pagpayunir pagkatapos sila ginkasal. “Ginpasimple pa gid namon ang amon kabuhi paagi sa pagbiya sa amon balay nga may tatlo ka kuarto kag sa amon part-time nga trabaho para makapakigbahin sa internasyonal nga pagpanukod,” paathag ni Mark. Sa sulod sang 20 ka tuig, nagkadto sila sa madamo nga lugar sa Aprika para magbulig sa pagpatindog sang mga Kingdom Hall. Isa ka bes, 15 ka dolyar na lang ang nabilin sa ila kuarta, pero gin-atipan sila ni Jehova. “Nalipay gid kami,” siling ni Claire, “sa pag-alagad kay Jehova kada adlaw. Nagdamo ang amon mga abyan, kag nabaton namon ang amon kinahanglanon. Diutay lang ang amon ginbiyaan kon ipaanggid sa amon kalipay sa pag-alagad kay Jehova sing bug-os tion.” Pareho man sa ila ang naeksperiensiahan sang madamo nga nagaalagad sing bug-os tion. *

18. Ano nga mga pamangkot ang dapat binagbinagon sang iban?

18 Kamusta ikaw? Ano ang himuon mo kon matalupangdan mo nga indi ka na makugi sa pag-alagad sa Ginharian bangod natublag ka na sang iban nga butang? Mahimo nga kinahanglan mo pauswagon ang imo personal nga pagbasa kag pagtuon sang Biblia. Paano? Ipaathag ini sa masunod nga artikulo.

^ par. 17 Tan-awa man ang sugilanon sang kabuhi nanday Hadyn kag Melody Sanderson sa artikulo nga “Paghimo sang Nahibaluan Ko Amo ang Husto.” (Ang Lalantawan, Marso 1, 2006) Ginbiyaan nila ang ila negosyo sa Australia nga daku sing kita kag nag-alagad sing bug-os tion. Basaha ang natabo sang naubos ang ila kuarta samtang nagaalagad bilang mga misyonero sa India.