Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Oktubre 2015

“Dugangi ang Amon Pagtuo”

“Dugangi ang Amon Pagtuo”

“Buligi ako nga magbakod pa ang akon pagtuo!”—MAR. 9:24.

AMBAHANON: 81, 135

1. Daw ano ka importante ang pagtuo? (Tan-awa ang piktyur sa umpisa sini nga artikulo.)

NAPAMANGKOT mo na bala ini, ‘Luwason ayhan ako ni Jehova sa dakung kapipit-an kag pasudlon sa bag-ong kalibutan?’ May pila ka kinahanglanon para maluwas, pero ginpadaku ni apostol Pablo ang isa nga importante gid: “Kon wala sing pagtuo imposible nga mapahamut-an ang Dios.” (Heb. 11:6) Daw simple lang ini pamatian, pero ang matuod, “indi tanan nga tawo may pagtuo.” (2 Tes. 3:2) Ginabuligan kita sini nga mga teksto nga mahangpan nga importante gid ang mabakod nga pagtuo.

2, 3. (a) Suno kay Pedro, daw ano ka importante ang pagtuo? (b) Ano nga mga pamangkot ang aton binagbinagon?

2 Ginpatalupangod ni apostol Pedro nga importante gid ang pagtuo sang ginsambit niya ang “pagtuo nga natilawan” nga ‘mangin kabangdanan nga makabaton sing kadayawan, himaya, kag kadungganan sa tion sang pagpahayag kay Jesucristo.’ (Basaha ang 1 Pedro 1:7.) Bangod malapit na ang dakung kapipit-an, indi bala nga gusto naton pat-uron nga isa kita sa mga may mabakod nga pagtuo nga pagadayawon sang aton mahimayaon nga Hari kon ipahayag sia? Gusto gid naton nga kita “ang sahi nga may pagtuo sa pagtipig sang aton kabuhi.” (Heb. 10:39) Gani, mapangabay man naton ang ginpangabay sang isa ka tawo: “Buligi ako nga magbakod pa ang akon pagtuo!” (Mar. 9:24) Ukon  pareho sa mga apostoles ni Jesus, makasiling kita: “Dugangi ang amon pagtuo.”—Luc. 17:5.

3 Bangod sini, mahimo kita mamangkot, Paano naton mapabakod ang aton pagtuo? Paano naton mapakita nga may pagtuo kita? Ngaa makasalig kita nga masabat ang aton pangabay nga dugangan ang aton pagtuo?

ANG MABAKOD NGA PAGTUO NAGAPAHALIPAY SA DIOS

4. Kay sin-o mga halimbawa ang makapalig-on sa aton nga pabakuron ang aton pagtuo?

4 Bangod “ang tanan nga butang nga ginsulat sadto ginsulat sa pagtudlo sa aton,” makatuon kita sa madamo nga halimbawa sa Biblia sang mga may pagtuo. (Roma 15:4) Kon basahon naton ang kasaysayan nanday Abraham, Sara, Isaac, Jacob, Moises, Rahab, Gideon, Barak, kag sang iban pa, mapalig-on kita nga usisaon ang aton pagtuo. (Heb. 11:32-35) Kag kon basahon man naton ang mga sugilanon sang kabuhi sang aton mga kauturan subong nga may tumalagsahon nga pagtuo, mapalig-on kita nga magpanikasog nga pabakuron ang aton pagtuo. *

5. Paano ginpakita ni Elias nga mabakod ang iya pagtuo kay Jehova, kag ano ang ginapalig-on sa aton sang iya halimbawa?

5 Ang isa ka halimbawa nga makita sa Biblia amo si manalagna Elias. Hunahunaa ang masunod nga mga hitabo nga nagapakita nga nagsalig gid sia kay Jehova. Sang ginpahibalo ni Elias si Hari Ahab nga magapahanabo si Jehova sing tigpalamangag, may pagsalig sia nga nagsiling: “Nagapanumpa ako sa ngalan ni Jehova, ang buhi nga Dios . . . , wala sing tun-og kag ulan nga magtupa sa duta . . . luwas lang kon isugo ko ini!” (1 Hari 17:1) Nagtuo si Elias nga iaman ni Jehova ang kinahanglanon niya kag sang iban sa tion sang tigpalamangag. (1 Hari 17:4, 5, 13, 14) Nagsalig sia nga mabanhaw ni Jehova ang isa ka bata. (1 Hari 17:21) Wala gid sia magduhaduha nga magapadala si Jehova sing kalayo sa pagsunog sa iya ginhalad sa Bukid Carmel. (1 Hari 18:24, 37) Sang tion nga tapuson na ni Jehova ang tigpalamangag, bisan wala pa sing palatandaan nga maulan, ginsilingan ni Elias si Ahab: “Magtaklad ka kag magkaon kag mag-inom, kay mabatian na ang gahod sang nagapadulong nga mabaskog nga ulan.” (1 Hari 18:41) Indi bala nga ginapalig-on kita sini nga usisaon kon mabakod man ang aton pagtuo?

PAANO NATON MAPABAKOD ANG ATON PAGTUO?

6. Ano ang pangayuon naton kay Jehova para magbakod ang aton pagtuo?

6 Indi kita makatigayon sing pagtuo kon sa aton lamang kaugalingon nga ikasarang. Ang pagtuo isa sa mga kinaiya nga ginapatubas sang balaan nga espiritu sang Dios. (Gal. 5:22) Gani maalamon kita kon sundon naton ang ginlaygay ni Jesus nga mangamuyo nga padayon kita nga hatagan sing espiritu bangod ginapasalig niya kita nga ‘ihatag gid sang Amay ang balaan nga espiritu sa mga nagapangayo sa iya.’—Luc. 11:13.

7. Ilaragway kon paano magpabilin nga mabakod ang aton pagtuo.

7 Dapat naton panikasugan nga magpabilin nga mabakod ang aton pagtuo. Mapaanggid ang aton pagtuo sa dabok. Sa primero, mahimo nga nagadabdab gid ini. Pero kon pabay-an ini, sa ulihi magabaga na lang ini kag mangin abo. Pero kon pirme mo ini ginagatungan, padayon ini nga magadabdab.  Magapabilin man nga mabakod ang aton pagtuo kon pirme kita nagatuon sang Pulong sang Dios. Kon padayon kita nga nagatuon sang Biblia, magadalom ang aton gugma sa sini kag sa Awtor sini, gani magabakod pa gid ang aton pagtuo.

8. Paano naton mapabakod ang aton pagtuo?

8 Paano mo pa gid mapabakod ang imo pagtuo? Indi lang mangin kontento sa imo natun-an antes ka mabawtismuhan. (Heb. 6:1, 2) Tun-i ang natuman na nga mga tagna sa Biblia bangod makapabakod man ini sang imo pagtuo. Magamit mo man ang Pulong sang Dios para mahibaluan kon bala mabakod gid ang imo pagtuo.—Basaha ang Santiago 1:25; 2:24, 26.

9, 10. Paano mapabakod ang aton pagtuo paagi sa: (a) maayo nga kaupdanan? (b) mga miting sa kongregasyon? (c) pagbantala?

9 Ginsilingan ni apostol Pablo ang iya mga masigka-Cristiano nga ‘makapalig-unay sila paagi sa ila pagtuo.’ (Roma 1:12) Kon nagapakig-upod kita sa aton mga kauturan, ilabi na sa may “pagtuo nga natilawan,” mapabakod naton ang pagtuo sang kada isa. (Sant. 1:3) Ang pagpakig-upod sa malain nga mga tawo nagaguba sang aton pagtuo, pero ginapabakod ini sang maayo nga kaupdanan. (1 Cor. 15:33) Amo kon ngaa ginalaygayan kita nga indi pagpabay-an “ang aton pagtilipon,” kundi padayon nga ‘magpalig-unay sa isa kag isa.’ (Basaha ang Hebreo 10:24, 25.) Isa pa, ang ginatudlo mismo sa aton sa mga miting nagapabakod sang aton pagtuo. Nahisuno ini sa ginsiling ni Pablo: “Ang tawo nagatuo lang pagkatapos niya mabatian ang pulong.” (Roma 10:17) Regular na bala nga bahin sang aton kabuhi ang Cristianong mga miting?

10 Kon nagabantala kita kag nagatudlo sa iban, mapabakod naton indi lamang ang ila pagtuo kundi pati man ang aton pagtuo. Pareho sang mga Cristiano sang una, matun-an naton nga magsalig sing bug-os kay Jehova kag maisugon nga magbantala sa bisan ano nga kahimtangan.—Binu. 4:17-20; 13:46.

11. Ngaa may mabakod nga pagtuo sanday Caleb kag Josue, kag paano kita mangin kaangay nila?

11 Nagabakod ang aton pagtuo kon makita naton nga ginabuligan kita ni Jehova kag ginasabat niya ang aton mga pangamuyo. Natabo ini kanday Caleb kag Josue. Nagtuo sila kay Jehova sang nagpangespiya sila sa Ginsaad nga Duta. Pero nagbakod pa gid ang ila pagtuo sang nakita nila nga pirme sila ginabuligan ni Jehova. Gani may pagsalig nga nagsiling si Josue sa mga Israelinhon: “Wala sing bisan isa sa tanan nga ginsaad sa inyo ni Jehova nga inyo Dios ang napaslawan.” Nagsiling pa sia sang ulihi: “Gani kahadluki ninyo si Jehova kag mag-alagad kamo sa iya nga may integridad kag katutom. . . . Ako kag ang akon panimalay magaalagad kay Jehova.” (Jos. 23:14; 24:14, 15) Kon maeksperiensiahan naton ang kaayo ni Jehova, matigayon man naton ini nga klase sang pagtuo.—Sal. 34:8.

PAGPAKITA SANG ATON PAGTUO

12. Suno kay Santiago, ano ang kinahanglan para mapakita ang pagtuo?

12 Paano naton mapakita nga mabakod ang aton pagtuo? Amo ini ang sabat ni disipulo Santiago: “Ipakita ko sa imo ang akon pagtuo paagi sa akon mga buhat.” (Sant. 2:18) Makita sa aton mga buhat nga may pagtuo gid kita. Binagbinagon naton ang pila ka halimbawa.

Ang mga nagaalagad sa ila bug-os nga masarangan nagapakita nga mabakod ang ila pagtuo (Tan-awa ang parapo 13)

13. Ngaa ang pagbantala isa ka paagi para mapakita naton ang aton pagtuo?

13 Ang pagbantala isa ka maayo gid nga paagi para mapakita naton ang aton pagtuo. Ngaa? Kay ginahimo naton ini bangod nagatuo kita nga maabot ang katapusan sining sistema sang mga butang suno sa gintalana nga tion sang Dios, kag “indi ini  maulihi!” (Hab. 2:3) Mahibaluan naton nga mabakod ang aton pagtuo kon handa kita sa pagbantala. Ginahimo bala naton ang aton bug-os nga masarangan, kag ginatinguhaan nga pasangkaron ang pagpakigbahin naton sa sini? (2 Cor. 13:5) Huo, ang ‘pagbantala sang pulong para sa kaluwasan’ isa gid ka paagi para mapakita ang aton pagtuo.—Basaha ang Roma 10:10.

14, 15. (a) Paano naton mapakita ang aton pagtuo kada adlaw? (b) Isugid ang isa ka eksperiensia nga halimbawa sang mabakod nga pagtuo.

14 Mapakita man naton ang aton pagtuo kon ginabatas naton ang mga problema kada adlaw. Kon nagamasakit kita, nagaluya ang buot, nasubuan, imol, ukon may iban pa nga problema, nagasalig kita nga buligan kita ni Jehova kag sang iya Anak ‘sa tion nga kinahanglan naton ini.’ (Heb. 4:16) Mapakita naton ini nga pagsalig kon nagapangamuyo kita indi lamang para sa aton espirituwal nga mga kinahanglanon. Nagsiling si Jesus nga mahimo man naton ipangamuyo ang materyal nga mga butang, pati na ang ‘pagkaon sa tagsa ka adlaw suno sa kinahanglan naton.’ (Luc. 11:3) Ang mga kasaysayan sa Biblia nagapamatuod nga mahatag ni Jehova ang aton mga kinahanglanon. Sa tion sang tigpalamangag sa Israel, nag-aman si Jehova sing pagkaon kag tubig para kay Elias. “Ginadalhan sia sang mga uwak sing tinapay kag karne kada aga kag kada gab-i, kag nagainom sia sa sapa,” suno sa sugo ni Jehova. (1 Hari 17:3-6) Nagatuo kita nga iaman man ni Jehova ang aton mga kinahanglanon.

Mapakita naton ang aton pagtuo kon ginabatas naton ang mga problema kada adlaw (Tan-awa ang parapo 14)

15 Nagasalig kita nga ang pagsunod sa mga prinsipio sa Biblia magabulig sa aton nga matigayon ang aton mga kinahanglanon. Naeksperiensiahan ni Rebecca, nga isa ka minyo nga utod sa Asia, nga matuod ini sa iya pamilya. Ginsunod nila ang Mateo 6:33 kag Hulubaton 10:4 paagi sa pag-una sa mga intereses sang Ginharian kag pagtrabaho sing mapisan. Sang nakita sang iya bana nga mabutang sa katalagman ang ila espirituwalidad bangod sa trabaho sini, naghalin ang iya bana sa obra. Pero may apat sila ka kabataan. Ginsugid ni Rebecca ang natabo: “Naghimo kami sang mga  pangyam-is kag ginbaligya ini. Amo ini ang amon palangabuhian sa sulod sang mga tinuig, kag wala gid kami ginpabay-an ni Jehova. Wala gid kami nagutman.” Naeksperiensiahan mo man bala nga ang Biblia nagahatag sang pinakamaayo nga giya sa mga tawo subong?

16. Ano ang matabo kon magsalig kita sa Dios?

16 Indi gid kita magduhaduha nga kon sundon naton ang panuytoy sang Dios, makabenepisyo gid kita. Ginkutlo ni Pablo ang ginsiling ni Habacuc: “Ang matarong nga tawo magakabuhi tungod sa pagtuo.” (Gal. 3:11; Hab. 2:4) Gani, dapat kita magtuo sa Isa nga makabulig gid sa aton. Ginpahanumdom kita ni Pablo nga “ang Dios, suno sa iya gahom nga nagapanghikot sa aton, makahimo sing sobra pa kabugana labaw sa aton ginapangayo ukon ginahunahuna.” (Efe. 3:20) Ginahimo sang mga alagad ni Jehova ang iya kabubut-on sa bug-os nila nga masarangan, pero bangod nahibaluan nila nga may mga limitasyon sila, nagasalig sila nga pakamaayuhon sila ni Jehova. Indi bala nga nalipay kita nga kaupod naton ang Dios?

PANGABAY NGA DUGANGAN ANG PAGTUO

17. (a) Paano ginsabat ang pangabay sang mga apostoles nga dugangan ang ila pagtuo? (b) Ngaa makasalig kita nga sabton man ang aton pangabay?

17 Sa nabinagbinag na naton, mahimo magbatyag kita pareho sa mga apostoles sang nagsiling sila sa Ginuo: “Dugangi ang amon pagtuo.” (Luc. 17:5) Ginsabat ang ila pangabay ilabi na sang Pentecostes 33 C.E. sang ginbubo sa ila ang balaan nga espiritu kag mas nahangpan nila ang katuyuan sang Dios. Nagpabakod ini sang ila pagtuo. Bangod sini, ginsugdan nila ang pinakamasangkad nga pagbantala sadto nga tion. (Col. 1:23) Sabton man bala ang aton pangabay nga dugangan ang aton pagtuo? Ginapasalig kita sa sini sang Biblia kon ‘magpangamuyo kita suno sa kabubut-on sang Dios.’—1 Juan 5:14.

18. Paano ginapakamaayo ni Jehova ang nagapabakod sang ila pagtuo?

18 Nalipay gid si Jehova sa mga nagasalig sing bug-os sa iya. Sabton ni Jehova ang aton pangabay nga dugangan ang aton pagtuo, kag magabakod pa gid ang aton pagtuo, kag sa ulihi mangin ‘takus kita sa Ginharian sang Dios.’—2 Tes. 1:3, 5.

^ par. 4 Halimbawa, tan-awa ang mga sugilanon sang kabuhi nanday Lillian Gobitas Klose (Hulyo 22, 1993, nga Awake!), Feliks Borys (Pebrero 22, 1994, nga Awake!), kag Josephine Elias (Septiembre 2009 nga Magmata!).