Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) SEPTIEMBRE 2015

“Magtindog Kamo sing Malig-on sa Inyo Pagtuo”

“Magtindog Kamo sing Malig-on sa Inyo Pagtuo”

“Magtindog kamo sing malig-on sa inyo pagtuo, . . . magpakabakod kamo.”1 COR. 16:13.

AMBAHANON: 60, 64

1. (a) Ano ang natabo kay Pedro sang nag-unos sa Dagat sang Galilea? (Tan-awa ang piktyur sa umpisa sini nga artikulo.) (b) Ngaa amat-amat nga naglugdang si Pedro?

SI APOSTOL Pedro kag ang iban nga disipulo nabudlayan na sa pagbugsay sang ila sakayan sa Dagat sang Galilea bangod sa unos sina nga gab-i. Dayon nakita nila si Jesus nga nagalakat sa dagat. Nangabay si Pedro kay Jesus kon puede sia makalakat sa tubig pakadto sa iya. Sang nagpasugot si Jesus, nanaug si Pedro sa sakayan kag milagruso nga naglakat sa mabalod nga dagat pakadto sa iya. Pero wala madugay, amat-amat nga naglugdang si Pedro. Ngaa? Nagtulok sia sa unos amo nga hinadlukan sia. Nagsinggit si Pedro kay Jesus, nga gilayon nga nag-uyat sa iya kamot kag nagsiling: “Ikaw nga diutay sing pagtuo, ngaa nagduhaduha ka?”Mat. 14:24-32.

2. Ano ang binagbinagon naton?

2 Binagbinagon naton ang tatlo ka punto sa natabo kay Pedro nga may kaangtanan sa pagtuo: (1) kon paano nagtuo sang primero si Pedro nga buligan sia sang Dios, (2) kon ngaa nagluya ang pagtuo  ni Pedro, kag (3) kon ano ang nakabulig kay Pedro nga mapabakod liwat ang iya pagtuo. Ang pagbinagbinag sini nga mga punto makabulig sa aton nga makita kon paano kita ‘magtindog sing malig-on sa aton pagtuo.’1 Cor. 16:13.

NAGATUO NGA BULIGAN SANG DIOS

3. Ngaa nanaug si Pedro sa sakayan, kag ano ang ginhimo naton nga pareho man sa sini?

3 Sang nanaug si Pedro sa sakayan kag naglakat sa tubig, nahimo niya ini bangod sa iya pagtuo. Gintawag sia ni Jesus, kag nagsalig si Pedro nga buligan man sia sang gahom sang Dios pareho sa pagbulig sini kay Jesus. Sing kaanggid, sang nagdedikar kita kay Jehova kag nagpabawtismo, ginhimo naton ini bangod sa aton pagtuo. Gintawag kita ni Jesus nga mangin iya mga sumulunod para sundon ang iya mga tikang. Dapat kita magtuo kay Jesus kag sa Dios, nga nagasalig nga buligan nila kita sa lainlain nga paagi.Juan 14:1; basaha ang 1 Pedro 2:21.

4, 5. Ngaa importante gid ang pagtuo?

4 Importante gid ang pagtuo. Kaangay ni Pedro nga nakalakat sa tubig bangod sa iya pagtuo, mahimo man naton ang daw imposible masarangan sang tawo bangod sa aton pagtuo. (Mat. 21:21, 22) Halimbawa, madamo sa aton ang daku gid ang ginbag-o sa aton mga panimuot kag paggawi nga daw indi na kita makilala sang mga nakakilala anay sa aton. Ginbuligan kita ni Jehova sa aton mga panikasog kay ginhimo naton ini bangod sa aton pagtuo sa iya. (Basaha ang Colosas 3:5-10.) Sang nagdedikar kita kay Jehova bangod sa aton pagtuo, nangin mga abyan niya kita, nga indi gid naton mahimo kon sa aton lang ikasarang.Efe. 2:8.

5 Padayon kita nga ginapabakod sang aton pagtuo. Bangod sa pagtuo, mabatuan naton ang mga pagsalakay sang aton gamhanan nga kaaway, ang Yawa. (Efe. 6:16) Dugang pa, ang aton pagsalig kay Jehova nagapahaganhagan sang aton kabalaka sa mabudlay nga mga tion. Si Jehova nagsiling nga kon napahulag kita sang aton pagtuo nga unahon ang intereses sang Ginharian, iaman niya ang aton materyal nga mga kinahanglanon. (Mat. 6:30-34) Labaw sa sina, bangod sa aton pagtuo mabaton naton ang regalo nga indi gid matigayon sang bisan sin-o nga tawo sa iya lang ikasarang—ang kabuhi nga wala sing katapusan.Juan 3:16.

ANG PAGTULOK SA IBAN NGA BUTANG MAKAPALUYA SANG ATON PAGTUO

6, 7. (a) Sa ano naton mapaanggid ang unos kag mga balod sa palibot ni Pedro? (b) Ngaa dapat naton dumdumon nga posible magluya ang aton pagtuo?

6 Ang hangin kag mga balod sa palibot ni Pedro mahimo ipaanggid sa mga pagtilaw kag pagsulay nga maeksperiensiahan naton bilang Cristiano. Bisan tama ini kabudlay, masarangan naton ini sa bulig ni Jehova. Dumduma nga wala naglugdang si Pedro bangod sa mabaskog nga hangin ukon daku nga balod. Binagbinaga ang natabo. Sang nakita niya ang unos, hinadlukan sia. (Mat. 14:30) Wala na magtulok si Pedro kay Jesus, gani nagluya ang iya pagtuo. Mahimo man kita maglugdang kon magtulok kita sa “unos,” kag magduhaduha kon bala buligan gid man kita ni Jehova.

7 Dapat naton dumdumon nga posible magluya ang aton pagtuo, kay ang Biblia nagpatuhoy sa pagluya sang pagtuo bilang “ang sala nga madali magsalawid sa aton.” (Heb. 12:1) Subong sang natabo kay Pedro, madali magluya ang aton pagtuo kon magtulok kita sa iban nga butang. Paano naton mahibaluan nga nagakatabo na ini sa aton? Binagbinaga ang pila ka pamangkot para mausisa naton ang aton kaugalingon.

8. Paano naton mahibaluan nga nagaduhaduha na kita sa katumanan sang mga ginpromisa sang Dios?

8 Nagapati pa bala ako nga matuman ang mga ginpromisa sang Dios? Halimbawa, nagpromisa  ang Dios nga laglagon niya ini nga sistema sang mga butang. Pero, nagluya na bala ang aton pagtuo sa ginpromisa sang Dios bangod sa madamo nga kalingawan sa kalibutan? Mahimo na kita magduhaduha kon malapit na gid man ang katapusan. (Hab. 2:3) Ari ang isa pa ka halimbawa. Nagpromisa ang Dios nga patawaron niya kita base sa gawad. Pero kon ginakonsiensia gihapon kita sang mga sala naton sang una, mahimo na kita magduhaduha kon bala ‘napatawad’ na gid man ni Jehova ang tanan naton nga sala. (Binu. 3:19) Bilang resulta, mahimo madula ang aton kalipay sa pag-alagad sa Dios kag mag-untat na kita sa pagbantala.

9. Ano ang matabo kon magkonsentrar na kita sa personal nga mga handum?

9 Mapisan pa bala ako sa pag-alagad sa Dios? Ginpakita ni apostol Pablo nga kon makugi kita sa pag-alagad kay Jehova mabaton naton “ang bug-os nga kapat-uran sang paglaum tubtob sa katapusan.” Pero, ano ang matabo kon magkonsentrar na kita sa personal nga mga handum, pareho sang pagtrabaho nga may daku nga sueldo pero makasablag sa aton pagsimba? Magaluya ang aton pagtuo, kag “mangin uyaya” na kita, nga diutay na lang ang mahimo naton para kay Jehova sangsa aton masarangan.Heb. 6:10-12.

10. Paano naton mapakita nga may pagtuo kita kay Jehova kon patawaron naton ang iban?

10 Nabudlayan bala ako magpatawad? Kon masaklaw kita sang iban, mahimo magkonsentrar kita sa aton nabatyagan kag masulay kita nga maakig sa ila ukon indi na sila pagbugnuhon. Pero kon patawaron naton sila, ginapakita naton nga may pagtuo kita kay Jehova. Ngaa? Ang mga nakasala sa aton daw pareho lang nga nakautang sa aton, kay nakautang man kita sa Dios bangod nakasala kita sa iya. (Luc. 11:4, footnote) Kon patawaron naton ang iban, dapat kita magsalig nga ang kahamuot sang Dios sa aton mas importante sangsa sukton naton sila sang ila sala. Nahibaluan sang mga disipulo ni Jesus nga kinahanglan ang pagtuo para mapatawad ang  iban. Sang ginsilingan niya sila nga patawaron bisan ang sulitsulit nga nakasala sa ila, nangabay sila: “Dugangi ang amon pagtuo.”Luc. 17:1-5.

11. Ngaa mahimo indi kita makabenepisyo sa laygay nga halin sa Kasulatan?

11 Naugot bala ako kon ginalaygayan ako halin sa Kasulatan? Imbes nga tan-awon naton nga makabenepisyo kita sa laygay, mahimo magkonsentrar kita sa sala sang laygay ukon sang nagalaygay. (Hulu. 19:20) Mahimo naton mawasi ang kahigayunan nga mapahisuno ang aton panghunahuna sa panghunahuna sang Dios.

12. Ano ang ginapakita kon pirme nagareklamo ang isa batok sa mga ginagamit ni Jehova sa pagpanguna sa iya katawhan?

12 Nagakumod bala ako sa gintangdo nga mga utod nga lalaki sa kongregasyon? Sang nagpati ang mga Israelinhon sa malain nga report sang napulo ka wala sing pagtuo nga espiya, nagkumod sila kanday Moises kag Aaron. Ginpamangkot dayon ni Jehova si Moises: “Tubtob san-o nga indi sila magtuo sa akon?” (Num. 14:2-4, 11) Huo, ang pagkumod sang mga Israelinhon nagapakita nga wala sila sing pagsalig sa Dios, nga nagtangdo kanday Moises kag Aaron. Sing kaanggid, kon pirme kita nagareklamo batok sa mga ginagamit sang Dios sa pagpanguna sa iya katawhan, indi bala ginapakita sini nga nagluya na ang aton pagtuo sa Dios?

13. Ngaa indi kita magkasubo kon makita naton nga nagaluya ang aton pagtuo?

13 Pero, indi ka magkasubo kon makita mo nga nagaluya ang imo pagtuo. Bisan si Pedro nga isa ka apostol hinadlukan man kag nagpangduhaduha. Ang matuod, may mga tion nga ginsaway man ni Jesus ang tanan nga apostoles bangod sa ila ‘diutay nga pagtuo.’ (Mat. 16:8) Dumduma nga makatuon kita sang importante nga leksion sa ginhimo ni Pedro pagkatapos magluya ang iya pagtuo kag amat-amat sia nga naglugdang sa dagat.

TULUKA SI JESUS PARA MAGBAKOD ANG IMO PAGTUO

14, 15. (a) Ano ang ginhimo ni Pedro sang amat-amat sia nga naglugdang? (b) Indi naton literal nga makita si Jesus, gani paano kita ‘magtulok sing maayo’ sa iya?

14 Sang nagtulok si Pedro sa unos kag amat-amat nga naglugdang, puede kuntani nga nagbalik na lang sia sa sakayan. Makahibalo sia maglangoy, kag amo sini kuntani ang iya una nga ginhimo. (Juan 21:7) Pero imbes nga magsalig sa iya kaugalingon, nagtulok sia liwat kay Jesus kag nagpabulig. Kon matalupangdan naton nga nagaluya ang aton pagtuo, dapat naton ilugon si Pedro. Pero paano?

15 Nagtulok si Pedro kay Jesus, gani dapat man kita ‘magtulok sing maayo kay Jesus, nga Pangulo nga Ahente kag Manughimpit sang aton pagtuo.’ (Basaha ang Hebreo 12:2, 3.) Indi kaangay ni Pedro, indi naton literal nga makita si Jesus. Pero “nagatulok kita sing maayo kay Jesus” kon tun-an naton ang iya mga panudlo kag mga ginhimo, kag dayon ginasunod ini sing maayo. Binagbinaga ang pila ka tikang nga puede naton himuon base sa halimbawa nga ginhatag ni Jesus. Kon sundon naton ini, mabaton naton ang kinahanglanon nga bulig para magbakod ang aton pagtuo.

Paagi sa pagtulok sa halimbawa ni Jesus kag pagsunod sing maayo sa iya mga tikang, magabakod ang aton pagtuo (Tan-awa ang parapo 15)

16. Paano naton tun-an ang Biblia para magbakod ang aton pagtuo?

16 Pabakura ang imo pagsalig sa Biblia. Kumbinsido si Jesus nga ang Biblia Pulong sang Dios, kag nagahatag ini sing pinakamaayo nga giya sa kabuhi. (Juan 17:17) Bilang pag-ilog sa halimbawa ni Jesus, dapat naton basahon ang Biblia adlaw-adlaw, tun-an ini, kag pamalandungan ang aton matun-an sa sini. Magluwas sa regular nga pagtuon mo sa Biblia, tun-i pa gid sing dugang ang mga topiko nga indi mo mahangpan. Halimbawa, mahimo mo mapabakod ang imo pagpati nga malapit na gid ang katapusan sining sistema sang mga butang paagi sa detalyado nga pagtuon sang mga pamatuod sa Kasulatan nga nagakabuhi na kita sa katapusan nga mga adlaw. Pabakura ang  imo pagsalig sa mga promisa sang Biblia sa palaabuton paagi sa pagtuon sa madamo nga tagna nga natuman na. Palig-una ang imo pagsalig sa praktikal nga kapuslanan sang Biblia paagi sa pagbinagbinag sang mga halimbawa sang mga tawo nga nangin maayo ang kabuhi bangod sa Biblia. *1 Tes. 2:13.

17. Paano nakapabilin nga matutom si Jesus bisan sa grabe nga pagtilaw, kag paano mo sia mailog?

17 Magtulok sa mga pagpakamaayo nga ginpromisa ni Jehova. Bangod padayon nga nagtulok si Jesus “sa kalipay nga ginbutang sa iya atubangan,” nakapabilin sia nga matutom bisan sa grabe nga pagtilaw. (Heb. 12:2) Wala gid sia maganyat sang mga ginatanyag sang kalibutan. (Mat. 4:8-10) Mailog mo si Jesus paagi sa pagpamalandong sa matahom nga mga promisa ni Jehova sa imo. Imadyina ini paagi sa pagsulat ukon pagdrowing sang imo ginalauman kon dulaon na sang Dios ining malaut nga sistema. Ilista kon sin-o ang gusto mo makita sa mga pagabanhawon kag kon ano ang gusto mo iistorya sa ila. Tamda ini nga mga promisa sang Dios indi lamang para sa tanan kundi para gid sa imo.

18. Paano ka mabuligan sang pangamuyo nga magbakod ang imo pagtuo?

18 Mangamuyo para sa dugang nga pagtuo. Gintudluan ni Jesus ang iya mga disipulo nga mangayo kay Jehova sing balaan nga espiritu. (Luc. 11:9, 13) Samtang ginahimo mo ini, mangamuyo sing dugang nga pagtuo, nga isa ka aspekto sang bunga sang espiritu. Mangin espesipiko sa imo ginapangabay, nga nagapangayo sing bulig sa Dios nga madula mo ang bisan ano nga batasan nga nagapakita nga nagaluya ang imo pagtuo, pareho sang indi pagpatawad.

19. Sin-o dapat ang pilion naton nga mangin abyan?

19 Makig-upod sa mga may pagtuo. Ginpili gid ni Jesus ang iya mga abyan, ilabi na ang mga suod sa iya. Napamatud-an sang mga apostoles, nga suod gid sa iya, ang ila pagtuo kag pagkamainunungon paagi sa pagtuman sa iya mga sugo. (Basaha ang Juan 15:14, 15.) Gani pilia ang mga abyan nga nagapakita sang ila pagtuo paagi sa pagtuman kay Jesus. Kag dumduma nga ang maayo nga pag-abyanay may bukas nga komunikasyon, bisan pa nagalakip ini sing paghatag ukon pagbaton sing laygay.Hulu. 27:9.

20. Ano ang benepisyo kon ginabuligan naton ang iban nga magbakod ang ila pagtuo?

20 Buligi ang iban nga magbakod ang ila pagtuo. Paagi sa pulong kag buhat, ginpabakod ni Jesus ang pagtuo sang iya mga disipulo. (Mar. 11:20-24) Dapat man naton sia ilugon kay kon ginabuligan naton ang iban nga magbakod ang ila pagtuo, nagabakod man ang aton pagtuo. (Hulu. 11:25) Sa imo pagbantala kag pagpanudlo, ipadaku ang mga pamatuod nga may Dios, nga nagaulikid sia sa aton, kag Pulong niya ang Biblia. Buligi man ang mga kauturan nga magbakod ang ila pagtuo. Kon may nakita ka nga pagpangduhaduha sa ila, mahimo nga nagareklamo na sila batok sa gintangdo nga mga utod nga lalaki, indi sila dayon paglikawi. Sa baylo, mataktikanhon nga buligi sila nga mapabakod liwat ang ila pagtuo. (Jud. 22, 23) Kon nagaeskwela ka kag ginahambalan ang teoriya sang ebolusyon, mangin maisog sa pagpangapin sang imo pagpati sa pagpanuga—mahimo makibot ka sa epekto sini sa iban.

21. Ano ang promisa ni Jehova sa kada isa sa aton?

21 Sa bulig sang Dios paagi kay Jesus, nadula ni Pedro ang iya kahadlok kag pagpangduhaduha, kag nangin maayo sia nga halimbawa sang pagtuo para sa mga Cristiano sang una. Ginabuligan man kita tanan ni Jehova nga mangin malig-on sa aton pagtuo. (Basaha ang 1 Pedro 5:9, 10.) Takus gid ang pagpanikasog naton nga pabakuron ang aton pagtuo, kay mabaton naton ang wala tupong nga mga padya.

^ par. 16 Halimbawa, tan-awa ang serye nga “Ang Biblia Nagapabag-o sang Kabuhi” sa pangpubliko nga edisyon sang Ang Lalantawan.