Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) AGOSTO 2015

Pamalandungi ang Mapinadayunon nga Gugma ni Jehova

Pamalandungi ang Mapinadayunon nga Gugma ni Jehova

“Pamalandungan ko ang tanan mo nga binuhatan.”SAL. 77:12.

AMBAHANON: 18, 61

1, 2. (a) Ngaa kumbinsido ka nga ginahigugma ni Jehova ang iya katawhan? (b) Gintuga ang mga tawo nga may ano nga kinahanglanon?

NGAA kumbinsido ka nga ginahigugma ni Jehova ang iya katawhan? Antes mo sabton ina, binagbinaga ini nga mga halimbawa: Tinuig na nga ginapalig-on sang iya mga masigkatumuluo si Sister Taylene nga mangin balanse kag indi magpaabot sing tuman sa iya kaugalingon. Nagsiling sia: “Kon wala ako ginahigugma ni Jehova, kuntani indi tayuyon ang iya laygay sa akon.” Si Brigitte, nga solo nga nagpadaku sang iya duha ka bata sa tapos mapatay ang iya bana, nagsiling: “Ang pagpadaku sang kabataan sa sistema ni Satanas isa sang pinakamabudlay nga hangkat ilabi na sa nagasolo nga ginikanan. Apang kumbinsido ako sang gugma ni Jehova kay gingiyahan niya ako sa kasubo kag kasakit, kag wala gid niya gintugot ang labaw sa akon masarangan.” (1 Cor. 10:13) Si Sandra nagapakigbato sa isa ka malubha nga balatian nga indi mabulong. Sa isa ka kombension, ginpakitaan sia sing personal nga interes sang asawa sang isa ka kilala nga utod. “Bisan pa indi namon sia kilala sing personal,” siling sang bana ni Sandra, “ang iya tudok nga kabalaka nagpahalipay gid sa amon. Bisan ang diutay nga ekspresyon sang gugma halin sa kauturan nagapakita kon daw ano kadaku ang gugma ni Jehova sa amon.”

 2 Gintuga ang mga tawo nga may kinahanglanon sa paghigugma kag sa pagbatyag nga ginahigugma. Madali nga maluyahan sing buot kon ini nga kinahanglanon indi mapun-an bangod sang wala ginapaabot nga mga hitabo ukon kapaslawan, pagbalatian, pagpamigado, ukon indi madinalag-on nga pagministeryo. Kon nagabatyag kita nga wala na kita ginahigugma ni Jehova, dapat naton dumdumon nga hamili kita sa iya kag yara sia, nga ‘nagauyat sang aton tuo nga kamot’ kag nagabulig sa aton. Indi gid niya kita pagkalimtan kon matutom kita sa iya.—Isa. 41:13; 49:15.

3. Ano ang makapabakod sang aton kombiksion nga ang gugma ni Jehova sa aton mapinadayunon?

3 Ang mga indibiduwal nga ginsambit kaina kumbinsido gid nga gin-unungan sila sang Dios sa mabudlay nga mga kahimtangan. Makatigayon man kita sing kombiksion nga yara sia sa aton tupad. (Sal. 118:6, 7) Ini nga artikulo magabinagbinag kon paano ang gugma sang Dios maathag nga makita sa (1) iya pagpanuga, (2) iya Pulong, (3) pangamuyo, kag (4) gawad. Ang pagpamalandong sa maayo nga mga butang nga ginhimo ni Jehova pat-od nga magadugang sang aton pagkamapinasalamaton sa iya mapinadayunon nga gugma.—Basaha ang Salmo 77:11, 12.

PAGPAMALANDONG SA PAGPANUGA NI JEHOVA

4. Ano ang ginapakita sang pagpamalandong sa mga gintuga ni Jehova?

4 Makita bala naton ang mapinadayunon nga gugma sa aton ni Jehova paagi sa iya mga gintuga? Huo, bangod ang pagpanuga mismo sang Dios pagpakita sang iya gugma. (Roma 1:20) Gindesinyo niya ang duta sa paagi nga magaluntad kita kag mabuhi. Apang, kapin pa sa pagluntad ang luyag niya para sa aton. Kinahanglan magkaon kita agod padayon nga mabuhi. Ginsiguro ni Jehova nga ang duta makapatubas sang nagkalainlain nga tanom nga maayo kaunon. Ginhimo pa gani niya nga makalilipay kag makaalayaw ang pagkaon! (Man. 9:7) Si Sister Catherine nagakalipay gid sa pag-obserbar sa mga tinuga, ilabi na sa tion sang tigpamulak sa Canada. Nagsiling sia: “Makadalayaw gid ang pagbalik sang kabuhi sang tanan nga butang—ang mga bulak nagainulhot lang sa duta kag ang mga pispis nagabalik halin sa malayo nga paglakbay, lakip ang gamay nga hummingbird nga nagapanultol sa tuluk-an sa gua sang bintana sang akon kusina. Ginahigugma gid kita ni Jehova amo nga ginapabatyag niya kita sing tuman nga kalipay.” Nagakalipay ang aton mahigugmaon nga Amay sa iya mga gintuga, kag luyag niya nga malipay man kita sa sini.—Binu. 14:16, 17.

5. Paano ang gugma ni Jehova maathag nga makita sa iya pagtuga sa mga tawo?

5 Gintuga kita ni Jehova nga may ikasarang sa paghimo sang mapuslanon kag makalilipay nga mga hilikuton nga makadugang sang aton kalipay sa kabuhi. (Man. 2:24) Gintuyo niya nga ang duta mapuno sang tawo, dumalahan nila, kag gamhan ang mga isda, mga pispis, kag tanan nga buhi nga sapat. (Gen. 1:26-28) Kag tuman gid ka mahigugmaon si Jehova nga ginhatagan kita sang mga kinaiya nga mailog sia!—Efe. 5:1.

PAGPABALOR SA PULONG SANG DIOS

6. Ngaa dapat may madalom kita nga apresasyon sa Pulong sang Dios?

6 Nagpakita ang Dios sang iya daku nga gugma paagi sa paghatag sa aton sang iya Pulong. Ginapahayag sini ang dapat naton mahibaluan tuhoy sa iya kag ang iya pagpakig-angot sa katawhan. Halimbawa, ang Kasulatan nagasugid sa aton kon paano sia nakig-angot sa mga Israelinhon, nga pirme lang nagasupak sa iya. Ang Salmo 78:38 nagasiling: “Maluluy-on sia; ginapatawad niya ang ila sala kag wala niya sila ginalaglag. Ginapunggan niya pirme ang iya kaakig sa baylo nga paibwalon ang iya kasingkal.” Ang pagpamalandong sa sini nga bersikulo magabulig sa  imo nga apresyahon sing personal nga si Jehova nagahigugma kag nagaulikid sa imo. Makasalig ka nga bilidhon ka kay Jehova.—Basaha ang 1 Pedro 5:6, 7.

7. Ngaa dapat gid naton pabaloran ang Biblia?

7 Dapat pabaloran gid naton ang Biblia kay amo ini ang panguna nga paagi nga nagakomunikar ang Dios sa aton. Ang mahigugmaon kag mainawaon nga pagpakig-angot sang mga ginikanan sa ila kabataan importante gid agod matigayon ang pagsalig sa isa kag isa kag agod mabatyagan nga ginahigugma. Ano ang mapaabot naton kay Jehova? Bisan indi naton sia makita ukon mabatian, “nagapakighambal” sia sa aton paagi sa iya Pulong, kag dapat kita mamati. (Isa. 30:20, 21) Luyag ni Jehova nga tuytuyan kita, kag amligan sa katalagman. Luyag man niya nga makilala naton sia kag saligan.—Basaha ang Salmo 19:7-11; Hulubaton 1:33.

Bisan pa ginsabdong ni Jehu si Jehosapat, “may maayo nga nakita” si Jehova sa hari (Tan-awa ang parapo 8 kag 9)

8, 9. Ano ang luyag ni Jehova nga mahibaluan naton? Iilustrar ini paagi sa halimbawa sa Biblia.

8 Luyag ni Jehova nga mahibaluan naton nga ginahigugma niya kita kag wala sia nagatan-aw sang aton di-kahimpitan. Ginapangita niya ang maayo sa aton. (2 Cron. 16:9) Halimbawa, ginpakita niya ini kay Hari Jehosapat sang Juda. Sang isa ka higayon, indi maalamon nga nagsugot si Jehosapat nga mag-upod kay Hari Ahab sang Israel agod agawon liwat ang Ramot-gilead sa mga Sirianhon. Bisan pa nagpasalig sang kadalag-an ang 400 ka butig nga manalagna sa malauton nga si Ahab, gintagna sang matuod nga manalagna ni Jehova nga si Micaya nga malutos sia. Napatay si Ahab sa inaway, kag diutayan man nga mapatay si Jehosapat. Sang nakabalik sia sa Jerusalem, ginsabdong sia bangod nakig-alyansa sia kay Ahab. Bisan pa sini, si Jehu nga anak ni Hanani nga manugpanan-aw nagsiling kay  Jehosapat: “May maayo nga nakita ang Dios sa imo.”—2 Cron. 18:4, 5, 18-22, 33, 34; 19:1-3.

9 Sang panugod sang iya paghari, ginsugo ni Jehosapat ang mga prinsipe, Levinhon, kag saserdote nga magkadto sa tanan nga siudad sang Juda agod itudlo sa iya mga sakop ang Kasuguan ni Jehova. Epektibo gid ini kay ang katawhan sa palibot nga mga pungsod nagkahadlok kay Jehova. (2 Cron. 17:3-10) Huo, indi gid maalamon ang ginhimo ni Jehosapat, apang nakita ni Jehova ang iya maayo nga hinimuan. Ini nga rekord sang Biblia nagapahanumdom sa aton nga bisan pa sang aton indi kahimpitan, mapinadayunon nga higugmaon kita ni Jehova kon bug-os tagipusuon naton nga ginapahamut-an sia.

PAG-APRESYAR SA PRIBILEHIYO SANG PANGAMUYO

10, 11. (a) Ngaa ang pangamuyo espesyal nga aman halin kay Jehova? (b) Paano naton dapat tamdon ang pangamuyo? (Tan-awa ang piktyur sa umpisa sini nga artikulo.)

10 Ang isa ka mahigugmaon nga amay nagahatag sing tion nga pamatian ang iya kabataan kon luyag nila nga makighambal sa iya. Luyag niya mahibaluan ang ila palaligban kag kabalaka kay interesado sia kon ano ang yara sa ila tagipusuon. Ang aton langitnon nga Amay, si Jehova, nagapamati sa aton kon magpalapit kita sa iya paagi sa hamili nga pribilehiyo sang pangamuyo.

11 Makapalapit kita kay Jehova sa bisan ano nga tion paagi sa pangamuyo. Wala sia sang ginpahamtang nga restriksion sa aton. Abyan naton sia nga handa pirme sa pagpamati sa aton. Si Taylene, nga ginsambit kaina, nagsiling: “Mahambal mo ang bisan ano kag ang tanan sa iya.” Kon ginasugid naton sa Dios paagi sa pangamuyo ang pinakamadalom naton nga hunahuna, mahimo nga sabton niya kita paagi sa Biblia, sa isa ka artikulo sang magasin, ukon paagi sa makapalig-on nga ginsiling sang aton masigkatumuluo. Nabatian ni Jehova ang aton mga pangabay kag nahangpan niya kita bisan pa wala sing makahangop sa aton. Ang iya sabat sa aton mga pangamuyo isa ka matahom nga ekspresyon sang iya mapinadayunon nga gugma sa aton.

12. Ngaa dapat naton binagbinagon ang mga pangamuyo nga narekord sa Biblia? Maghatag sang halimbawa.

12 Madamo kita sing matun-an sa mga pangamuyo nga narekord sa Pulong sang Dios. Gani kon kaisa maayo nga binagbinagon ini nga mga pangamuyo sa tion sang pangpamilya nga pagsimba. Ang pagpamalandong sa kon paano ginpabutyag sang mga alagad ni Jehova sadto ang ila pinakamadalom nga panghunahuna sa Dios magabulig sa aton nga mapauswag ang aton mga pangamuyo. Halimbawa, binagbinaga ang mahinulsulon nga pangamuyo ni Jonas sa tiyan sang daku nga isda. (Jon. 1:17–2:10) Repasuha ang tinagipusuon nga pangamuyo ni Solomon kay Jehova sang inagurasyon sang templo. (1 Hari 8:22-53) Pamalandungi ang modelo nga pangamuyo ni Jesus. (Mat. 6:9-13) Labaw sa tanan, regular nga “ipahibalo sa Dios ang inyo mga pangabay.” Subong resulta, “ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna.” Magadugang pa gid ang aton pagpasalamat sa mapinadayunon nga gugma ni Jehova.—Fil. 4:6, 7.

MAGPASALAMAT SA GAWAD

13. Ano nga kahigayunan ang nabuksan sa mga tawo bangod sa mahigugmaon nga aman sang gawad?

13 Ang wala tupong nga dulot sang halad-gawad ni Jesus ginhatag “agod maagom naton ang kabuhi.” (1 Juan 4:9) Nagapatuhoy sa sining superlatibo nga ekspresyon sang gugma sang Dios, nagsulat si apostol Pablo: “Napatay ang Cristo para sa indi diosnon nga mga tawo sa gintalana nga tion sang Dios. Kay halos wala sing bisan sin-o nga manginmatay para sa isa ka matarong nga tawo; apang para sa maayo nga tawo, ayhan may handa nga manginmatay.  Apang ginpakita sang Dios ang iya gugma sa aton paagi sa pagtugot nga mapatay ang Cristo para sa aton samtang makasasala pa kita.” (Roma 5:6-8) Ining daku nga ekspresyon sang gugma sang Dios nagbukas sa katawhan sang kahigayunan nga makatigayon sang maayo nga kaangtanan kay Jehova.

14, 15. Ano ang buot silingon sang gawad para sa (a) hinaplas nga mga Cristiano? (b) mga may dutan-on nga paglaum?

14 May pila nga nagabatyag sang mapinadayunon nga gugma ni Jehova sa pinasahi nga paagi. (Juan 1:12, 13; 3:5-7) Kay hinaplas sila sang balaan nga espiritu, nangin mga ‘anak sila sang Dios.’ (Roma 8:15, 16) Ginlaragway ni Pablo ang hinaplas nga mga Cristiano subong ‘ginbuhi kag ginpapungko sa langitnon nga mga lugar nga nahiusa kay Cristo Jesus.’ (Efe. 2:6) Natigayon nila ini nga espirituwal nga kahimtangan bangod ‘ginpat-inan sila sang ginsaad nga balaan nga espiritu, nga isa ka pauna nga garantiya sang ila palanublion,’ nga amo ang ‘paglaum nga natigana para sa ila sa langit.’—Efe. 1:13, 14; Col. 1:5.

15 Para sa madamo nga tawo nga nagatuo sa gawad, nabuksan sa ila ang kahigayunan nga mangin mga abyan ni Jehova nga may paglaum nga mangin mga anak sang Dios nga gin-adoptar kag magakabuhi sa wala sing katapusan sa ginsaad nga Paraiso sa duta. Sa amo, paagi sa gawad, ginpakita ni Jehova ang iya gugma sa kalibutan sang katawhan. (Juan 3:16) Kon nagalaum kita nga magkabuhi sing wala sing katapusan sa duta kag padayon kita nga nagaalagad kay Jehova sing matutom, makasalig kita nga maagom naton ang malipayon nga kabuhi sa bag-o nga kalibutan. Nagakaigo gid nga tamdon naton ang gawad subong pinakadaku nga pamatuod sang mapinadayunon nga gugma sang Dios sa aton!

PAG-APRESYAR SA GUGMA NI JEHOVA

16. Ano ang mahimo sang pagpamalandong sa madamo nga paagi nga ginpakita ni Jehova ang iya gugma sa aton?

16 Indi naton masarangan isipon ang nagkalainlain nga pagpakita ni Jehova sang iya indi mapaslawan nga gugma sa aton. Si salmista David nag-amba: “Para sa akon, hamili gid ang imo mga panghunahuna! O Dios ko, tuman kadamo sini! Kon isipon ko ini, madamo pa ini sangsa balas.” (Sal. 139:17, 18) Dapat tugutan naton ini nga panghunahuna nga magpalambo sa aton sang handum nga higugmaon si Jehova subong balos sa iya mahigugmaon nga pag-ulikid sa aton. Gani, ihatag naton ang aton bug-os nga masarangan sa iya.

17, 18. Ano ang pila ka paagi nga mapakita naton ang aton gugma sa Dios?

17 Madamo sing paagi nga mapabutyag naton ang aton gugma kay Jehova. Halimbawa, ginapakita naton ang aton gugma sa Dios kag isigkatawo paagi sa makugi nga pagpakigbahin sa hilikuton nga pagbantala sang Ginharian. (Mat. 24:14; 28:19, 20) Ginapakita naton nga matuod gid nga ginahigugma naton si Jehova paagi sa pagbatas sang mga pagtilaw sa pagtuo subong mga manughupot sing integridad. (Basaha ang Salmo 84:11; Santiago 1:2-5.) Kon magabudlay pa gid ang pagtilaw sa aton, makasalig kita nga nahibaluan sang Dios ang aton pag-antos kag magabulig sia sa aton, kay hamili kita sa iya.—Sal. 56:8.

18 Ang aton gugma kay Jehova magapahulag sa aton nga pamalandungan ang iya mga gintuga kag iban pa nga dalayawon nga binuhatan. Ginapakita naton nga ginahigugma naton ang Dios kag ginapabaloran ang iya Pulong paagi sa maukod nga pagtuon sa Biblia. Ang gugma kay Jehova magapasuod pa gid sa aton sa iya sa pangamuyo. Kag ang aton gugma sa Dios magadalom samtang ginapamalandungan naton ang halad-gawad nga ginhatag niya para sa aton mga sala. (1 Juan 2:1, 2) Pila lang ini sang madamo nga rason nga higugmaon naton si Jehova subong pag-apresyar sang iya mapinadayunon nga gugma sa aton.