Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) AGOSTO 2015

Padayon nga Magpaabot!

Padayon nga Magpaabot!

“Bisan pa maatrasar ini, padayon nga paabuta ini!”HAB. 2:3.

AMBAHANON: 128, 45

1, 2. Ano nga panimuot halin sadto ang nagapakilala sa mga sumilimba ni Jehova?

MADUGAY na nga nagapaabot ang mga sumilimba ni Jehova sa katumanan sang mga tagna. Halimbawa, si Jeremias nagtagna nga paagi sa Babilonia mangin kagulub-an ang Juda, kag amo gid ina ang natabo sang 607 B.C.E. (Jer. 25:8-11) Si Isaias, nga nagtagna sang pagpasag-uli ni Jehova, nagpahayag: “Malipayon ang tanan nga padayon nga nagalaum sa iya.” (Isa. 30:18) Si Miqueas, nga nagtagna man tuhoy sa katawhan sang Dios sadto, malig-on nga nagsiling: “Magabantay ako nga nagahulat kay Jehova.” (Miq. 7:7) Siniglo man nga nagpaabot ang mga alagad sang Dios sa katumanan sang mga tagna tuhoy sa Mesias, ukon Cristo.—Luc. 3:15; 1 Ped. 1:10-12. *

2 Ang mga alagad sang Dios karon padayon man nga nagapaabot, kay ang mga tagna tuhoy sa Mesias padayon pa nga nagakatuman. Paagi sa Mesianikong Ginharian, tapuson ni Jehova sa indi madugay ang pag-antos sang mga tawo paagi sa paglaglag sa mga malauton kag pagluwas sa iya katawhan sa sining magamo nga kalibutan nga ginagamhan ni Satanas. (1 Juan 5:19) Gani magpabilin kita nga alisto kag nagasalig nga ining sistema madali na lang matapos.

3. Ano nga pamangkot ang nagautwas kon madugay na kita nga nagahulat nga magaabot ang katapusan?

 3 Subong mga alagad ni Jehova, nalangkag kita nga makita nga ang kabubut-on sang Dios ‘matuman sa duta subong sang sa langit.’ (Mat. 6:10) Apang sa tapos sang madugay nga pagpaabot sa katapusan sining sistema, mahimo mamangkot ang iban, ‘May maathag pa bala kita nga mga rason nga padayon nga magpaabot?’ Tan-awon naton.

NGAA PADAYON NGA MAGPAABOT?

4. Ano ang isa ka maayo nga rason kon ngaa padayon kita nga magbantay?

4 Ginasiling sang Biblia kon ano dapat ang aton mangin panimuot sa nagahilapit nga kalaglagan sining sistema sang mga butang. Ginsilingan ni Jesus ang iya mga sumulunod nga ‘padayon nga magbantay’ kag ‘magpadayon nga nagamata.’ (Mat. 24:42; Luc. 21:34-36) Ini mismo isa na ka maayo nga rason nga magpabilin nga magpaabot—si Jesus mismo ang nagsiling sa aton! Sa sini nga bahin, ang organisasyon ni Jehova nagpahamtang sang halimbawa. Ang mga publikasyon sini padayon nga nagapalig-on sa aton nga ‘hulaton kag pirme dumdumon ang presensia sang adlaw ni Jehova’ kag ipahamtang ang aton paglaum sa ginsaad nga bag-o nga kalibutan sang Dios.Basaha ang 2 Pedro 3:11-13.

5. Ngaa mas kinahanglanon nga mangin mabinantayon sa aton tion subong?

5 Nagakaigo para sa mga Cristiano nga nagkabuhi siniglo na ang nagligad ang padayon nga pagpaabot, apang mas importante ini sa aton. Ngaa? Bangod nagakabuhi kita sa tion sang presensia sang Cristo. Ang tanda sang iya presensia nangin maathag halin sang 1914. Kag ang madamo nga tanda, nga nagalakip sa nagalala nga kahimtangan sang kalibutan kag bug-os kalibutan nga pagbantala sang Ginharian, nagakahulugan nga nagakabuhi kita sa “hingapusan sang sistema sang mga butang.” (Mat. 24:3, 7-14) Sanglit wala ginsiling ni Jesus kon daw ano kalawig ang tion nga magaligad antes mag-abot ang katapusan, dapat kita nga mas alisto, kag mabinantayon.

6. Ngaa makapaabot kita nga ang kahimtangan sang kalibutan magalain pa gid samtang nagahilapit ang katapusan?

6 Mahimo mamangkot kita: Indi ayhan ang “hingapusan sang sistema sang mga butang” nagapatuhoy pa sa palaabuton nga ang kahimtangan sang kalibutan magalain pa gid? Ginpakita sang Biblia nga ang kalautan magadugang pa gid “sa katapusan nga mga adlaw.” (2 Tim. 3:1, 13; Mat. 24:21; Bug. 12:12) Gani makapaabot kita nga ining malain nga kahimtangan sang kalibutan karon, padayon pa nga magalain.

7. Ano ang ginapakita sang Mateo 24:37-39 tuhoy sa kahimtangan sang kalibutan sa tion sang katapusan nga mga adlaw?

7 Apang daw ano kalain sang mga kahimtangan ang ginapaabot mo antes sang “dakung kapipit-an”? (Bug. 7:14) Halimbawa, nagapaabot ka bala nga may inaway sa tagsa ka pungsod, wala na gid sing pagkaon, kag may balatian sa tagsa ka panimalay? Kon amo sina ang kahimtangan, mahimo nga bisan ang mga maduhaduhaon mapilitan nga batunon nga nagakatuman ang tagna sang Biblia. Apang, nagsiling si Jesus nga ang kalabanan ‘indi makatalupangod’ sang iya presensia, kag magapadayon sila sa ila naandan nga rutina sang pagkabuhi tubtob nga ulihi na ang tanan. (Basaha ang Mateo 24:37-39.) Gani, ginapahangop sang Kasulatan nga ang kahimtangan sang kalibutan sa tion sang katapusan nga mga adlaw indi gid man mangin tuman kalain tubtob sa punto nga mapilitan ang mga tawo sa pagpati nga malapit na ang katapusan.—Luc. 17:20; 2 Ped. 3:3, 4.

8. Ano ang maathag sa mga nagatuman sang sugo ni Jesus nga ‘padayon nga magbantay’?

8 Apang agod matuman ang katuyuan sang kabilugan nga tanda, ang katumanan sini dapat mangin talalupangdon agod makuha ang atension sang mga nagasunod sa laygay ni  Jesus nga ‘padayon nga magbantay.’ (Mat. 24:27, 42) Kag amo ini ang nagakatabo halin sang 1914. Halin sadto tubtob karon, ang mga tanda padayon nga nagakatuman. Maathag nga nagakabuhi na kita karon sa “hingapusan nga sistema sang mga butang”—isa ka malip-ot nga tion nga nagapadulong kag nagalakip sa kalaglagan sining malauton nga sistema.

9. Ngaa dapat kita magpabilin nga nagapaabot sa katapusan sining sistema?

9 Kon amo, ngaa ang mga Cristiano subong dapat nga padayon nga magpaabot? Bangod sang aton pagtuman kay Jesucristo nagapabilin kita nga nagapaabot. Aton man ginakilala ang tanda sang iya presensia. Ang aton pagpaabot napasad, indi sa pagpati sa bisan ano lang, kundi sa malig-on nga pamatuod sa Kasulatan nga nagapahulag sa aton nga magpabilin nga alisto, nagamata, nagabantay, kag nagapaabot sa katapusan sining malauton nga sistema.

TUBTOB SAN-O?

10, 11. (a) Ginhanda ni Jesus ang iya mga sumulunod sa ano nga posibilidad? (b) Ano ang ginsiling ni Jesus sa iya mga sumulunod nga himuon kon magalawig ang ila paghulat sa katapusan sangsa ginapaabot nila? (Tan-awa ang piktyur sa umpisa sini nga artikulo.)

10 Madamo sa aton ang dinekada na nga nagapabilin nga nagamata sa espirituwal. Apang, indi naton dapat pagtugutan nga ang pagligad sang malawig nga tion magpaluya sa aton determinasyon nga padayon nga magpaabot. Dapat handa kita sa pag-abot ni Jesus subong Manuglaglag agod tapuson ining sistema sang mga butang. Dumduma nga ginpalig-on ni Jesus ang iya mga sumulunod: “Magpadayon kamo sa pagbantay, magpadayon kamo nga nagamata, kay wala kamo makahibalo kon san-o ang gintalana nga tion. Kaangay ini sa isa ka tawo nga naglakbay sa iban nga pungsod nga nagbiya sang iya balay kag gintugyan ini sa iya mga ulipon, kag ginhatagan niya ang tagsatagsa sa ila sing hilikuton, kag nagsugo sa manugbantay sa puertahan nga magpadayon sa pagbantay. Gani, padayon kamo nga magbantay, kay wala kamo makahibalo kon san-o magaabot ang agalon sang balay, kon sa kagab-ihon ukon sa tungang-gab-i ukon sa kaagahon ukon sa aga, agod nga kon mag-abot sia sing hinali, indi niya kamo maabtan nga nagakatulog. Apang ang ginasiling ko sa inyo, ginasiling ko man sa tanan: Magpadayon kamo nga magbantay.”Mar. 13:33-37.

11 Sa tapos mahibaluan nga ang presensia sang Cristo nagsugod sang 1914, ang mga sumulunod ni Jesus naghanda para sa posible nga pag-abot dayon sang katapusan. Ginhimo nila ini paagi sa pagpasangkad sang ila hilikuton nga pagbantala sang Ginharian. Ginpahangop ni Jesus nga magakari sia sa ulihi—“sa kaagahon ukon sa aga.” Kon matabo ina, ano ang himuon sang iya mga sumulunod? Nagsiling sia: “Padayon kamo nga magbantay.” Gani ang malawig nga paghulat indi rason nga palantangon sa hunahuna ang katapusan ukon mag-untat sa pagpaabot.

12. Ano ang ginpamangkot ni Habacuc kay Jehova, kag ano ang sabat sang Dios?

12 Binagbinaga si manalagna Habacuc, nga ginsugo nga itagna ang kalaglagan sang Jerusalem. Sang ginsugdan niya ini, tinuig na nga ginapahibalo ang madamo nga paandam sa kalaglagan sang siudad. Naglab-ot na sa punto nga ‘ginapigos sang malauton ang matarong kag nangin tiko ang hustisya.’ Gani, indi katingalahan nga namangkot si Habacuc: “O Jehova, tubtob san-o ako manawag sa imo?” Sa baylo nga sabton ini sing direkta, ginpasalig ni Jehova ang iya matutom nga manalagna nga ang gintagna nga kalaglagan indi “maulihi.” Ginsilingan sang Dios si Habacuc nga ‘padayon nga magpaabot.’Basaha ang Habacuc 1:1-4; 2:3.

13. Ano kuntani ang panimuot ni Habacuc, kag ngaa indi ina maalamon?

13 Ano abi kon ginluyahan sing buot si Habacuc kag naghunahuna: ‘Tinuig ko na nga nabatian nga malaglag ang Jerusalem. Basi  madugay pa ini? Daw indi realistiko nga padayon nga magpanagna nga daw malaglag ang siudad sa gilayon. Bahala na ang iban sa sini.’ Kon amo sina ang ginhunahuna ni Habacuc, kuntani nadula niya ang iya maayo nga kaangtanan kay Jehova—kag posible ang iya man nga kabuhi sa tion nga ginlaglag sang Babilonia ang Jerusalem!

14. Ngaa makapat-od kita nga indi mapaslawan ang aton padayon nga pagpaabot?

14 Sa bag-o nga kalibutan, wala kita sing rason nga hunahunaon nga may gintagna tuhoy sa hingapusan nga sistema sang mga butang nga wala natuman. Ang pagpamalandong sa kon ano ang aktual nga natabo magadugang sang aton pagsalig kay Jehova kag sa iya mga saad nga matuman pa. (Basaha ang Josue 23:14.) Pat-od gid nga mangin mapinasalamaton kita sa Dios, nga “may awtoridad sa pagtalana sang tion kon san-o mahanabo ang mga butang,” sa iya paglaygay sa aton nga magkabuhi nga alisto nga “ang katapusan sang tanan nga butang malapit na.”—Binu. 1:7; 1 Ped. 4:7.

ANG PAGPAABOT NAGAKAHULUGAN NGA MANGHIKOT!

Makugi ka bala nga nagapakigbahin sa pagbantala sang maayong balita? (Tan-awa ang parapo 15)

15, 16. Ngaa ang masangkad nga pagbantala amo ang pinakaimportante nga hilikuton subong?

15 Makapaabot gid kita nga ang organisasyon ni Jehova padayon nga magapahanumdom sa aton nga dapat naton alagdon ang Dios nga may pagkahilingagawon. Ginahatag ini nga mga pahanumdom indi lamang agod mangin masako kita sa pag-alagad sa Dios kundi agod buligan kita nga magpabilin nga kumbinsido nga ang tanda sang presensia sang Cristo nagakatuman subong. Ano ang pinakaimportante nga hilikuton naton subong? Amo ang padayon nga pag-una sang Ginharian kag pagkamatarong sang Dios paagi sa makugi nga pagpakigbahin sa pagbantala nga hilikuton sang maayong balita!—Mat. 6:33; Mar. 13:10.

16 Nagsiling ang isa ka sister: “Paagi sa pagbantala sang maayong balita sang Ginharian sang Dios, makabulig kita sa pagluwas sa mga tawo sa pat-od nga kamatayon sa nagapakari nga kalaglagan sang kalibutan.” Nakahibalo sia tuhoy sa sini, kay sia kag ang iya bana nakaluwas sa isa sa pinakagrabe nga aksidente sa dagat—ang pagkalunod sang luxury liner nga Wilhelm Gustloff sang 1945. Bisan pa sa sinang makatalagam nga kahimtangan, mahimo nga indi mahibaluan sang isa kon ano gid ang importante. Nadumduman sang sister ang isa ka babayi nga nagasinggit: “Ang akon mga maleta! Ang akon mga maleta! Ang akon alahas! Ara sa kabin ang tanan ko nga alahas. Wala gid ako sang nakuha!” Apang ang iban nga pasahero, nga napahulag sang espiritu sang pagkamabinuligon, nagrisgo sang ila kabuhi nga luwason ang mga yara sa nagayelo nga dagat. Kaangay sadtong mabinuligon nga mga pasahero, himuon naton ang aton pinakamasarangan agod buligan ang mga tawo. Padayon naton nga huptan sa aton hunahuna  ang pagkahilingagawon sang aton pagbantala nga hilikuton kag buligan ang iban nga maluwas sa nagahilapit nga kalaglagan sang kalibutan antes mangin ulihi ang tanan.

Maalamon bala ang imo mga desisyon agod indi matublag ang imo pagbatyag sang pagkahilingagawon? (Tan-awa ang parapo 17)

17. Ngaa nagapati kita nga ang katapusan magaabot bisan ano nga oras?

17 Ang mga hitabo sa kalibutan maathag nga nagapakita nga ang mga tagna sang Biblia nagakatuman karon kag malapit na gid ang katapusan sang malauton nga sistema sang mga butang. Gani, indi naton paghunahunaon nga madugay pa magliso “ang napulo ka sungay” kag “ang mabangis nga sapat” sa Bugna 17:16 sa Babilonia nga Daku, ang bug-os kalibutan nga emperyo sang butig nga relihion. Dumdumon naton pirme nga ang Dios amo ang ‘magabutang sa ila mga tagipusuon’ agod himuon ini—kag mahimo ini matabo sing hinali, sa bisan ano nga oras! (Bug. 17:17) Ang katapusan sining bug-os nga sistema sang mga butang malapit na. Maayo ini nga rason agod pamatian naton ang paandam ni Jesus: “Mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi, kag ina nga adlaw magaabot sa inyo sing hinali subong sang siod.” (Luc. 21:34, 35; Bug. 16:15) Gani alagdon naton si Jehova nga may pagkahilingagawon, kag may pagsalig ‘nga nagapanghikot sia para sa mga nagalaum sa iya.’—Isa. 64:4.

18. Ano nga pamangkot ang aton binagbinagon sa masunod nga artikulo?

18 Samtang ginahulat naton ang katapusan sining malauton nga sistema sang mga butang, sundon naton ang ginsiling ni disipulo Judas: “Mga hinigugma, palig-una ang inyo kaugalingon sa inyo labing balaan nga pagtuo kag mangamuyo kamo suno sa panuytoy sang balaan nga espiritu, agod makapabilin kamo sa gugma sang Dios, samtang nagahulat kamo sang kaluoy sang aton Ginuong Jesucristo nga nagadul-ong sa kabuhi nga wala sing katapusan.” (Jud. 20, 21) Apang paano naton mapakita nga nagakabuhi kita nga nagapaabot sang ginsaad sang Dios nga bag-o nga kalibutan kag nagakalangkag gid sa sini? Amo ina ang tema sang aton masunod nga artikulo.

^ par. 1 Para sa listahan sang pila ka tagna sang Biblia tuhoy sa Mesias kag sa katumanan sini, tan-awa ang pahina 200 sang libro nga Ano Gid ang Ginatudlo sang Biblia?