Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) AGOSTO 2015

Maghanda Karon Para sa Kabuhi sa Bag-o nga Kalibutan

Maghanda Karon Para sa Kabuhi sa Bag-o nga Kalibutan

“Silinga sila nga maghimo sang maayo, . . . agod makapanguyapot sila sing malig-on sa matuod nga kabuhi.”1 TIM. 6:18, 19.

AMBAHANON: 125, 40

1, 2. (a) Ano nga pisikal nga mga pagpakamaayo sa Paraiso sa duta ang ginakalangkagan mo gid? (Tan-awa ang piktyur sa umpisa sini nga artikulo.) (b) Ano nga espirituwal nga mga pagpakamaayo ang yara sa bag-o nga kalibutan?

‘ANG MATUOD NGA KABUHI.’ Para sa kalabanan sa aton, ina nga ekspresyon nagapahanumdom sang paglaum nga kabuhi nga wala sing katapusan sa Paraiso sa duta. Ang matuod, gin-angot ni apostol Pablo ang “kabuhi nga wala sing katapusan” sa “matuod nga kabuhi.” (Basaha ang 1 Timoteo 6:12, 19.) Nagapaabot kita sang kabuhi nga dayon nga makahatag sa aton sang wala sing katapusan nga kaayawan kag kalipay. Daw mabudlay handurawon nga kada aga magabugtaw kita nga mapagros sa pisikal, mental, kag emosyonal. (Isa. 35:5, 6) Hunahunaa kon daw ano ka makalilipay nga makaupod naton ang aton mga hinigugma kag mga abyan, lakip na ang mga ginbanhaw! (Juan 5:28, 29; Binu. 24:15) May kahigayunan man kita nga mapauswag ang aton mga ikasarang sa siensia, musika, arkitektura, kag iban pa.

2 Labaw sa tanan nga maayo nga butang nga ginalauman naton sa bag-o nga kalibutan amo ang espirituwal nga mga pagpakamaayo. Makalilipay gid nga mahibaluan nga napakabalaan ang ngalan ni Jehova kag nabindikar ang iya pagkasoberano! (Mat. 6:9, 10)  Malangkag gid kita nga matuman ang orihinal nga katuyuan ni Jehova sa katawhan kag sa duta. Kag hunahunaa lang kon daw ano kahapos nga mangin suod kay Jehova samtang nagapadulong kita sa kahimpitan kag malab-ot ini sa ulihi!—Sal. 73:28; Sant. 4:8.

3. Ano ang dapat naton handaan karon?

3 Mabaton naton ini nga mga pagpakamaayo, kay ginpasalig kita ni Jesus nga “sa Dios ang tanan nga butang posible.” (Mat. 19:25, 26) Apang kon nagapaabot kita nga magkabuhi sa sinang bag-o nga kalibutan—kag padayon nga magkabuhi sa tapos sang Isa ka Libo ka Tuig nga Paggahom sang Cristo—dapat manghikot kita karon agod ‘makapanguyapot sing malig-on’ sa kabuhi nga wala sing katapusan. Dapat magkabuhi kita nga nagapaabot sa katapusan sining malauton nga kalibutan, kag maghimo sing tikang karon agod makahanda sa pagkabuhi sa bag-o nga kalibutan. Paano naton mahimo ini samtang yari kita sa malauton nga sistema sang mga butang?

KON PAANO MAGHANDA

4. Iilustrar kon paano kita makahanda karon sa pagkabuhi sa bag-o nga kalibutan.

4 Paano kita maghanda karon sa pagkabuhi sa bag-o nga kalibutan sang Dios? Halimbawa, kon nagaplano kita nga magsaylo sa iban nga pungsod. Paano naton mahandaan ini? Mahimo nga sugdan naton nga tun-an ang lenguahe sang mga tawo sa sina nga pungsod. Maayo man nga tun-an ang ila kustombre. Mahimo man nga tilawan naton ang pila sang ila mga pagkaon. Sa sina nga paagi, daw subong bala nga nagaistar na kita sa sina nga pungsod. Isa pa, amo gid ina ang ginapaabot sa aton kon yara na kita didto. Sing kaanggid, makahanda kita sa pagkabuhi sa bag-o nga kalibutan paagi sa pagkabuhi karon nga daw yara na kita didto. Binagbinaga ang masunod nga mga halimbawa.

5, 6. Paano ang pagpasakop sa teokratiko nga kahimusan karon magahanas sa aton sa pagkabuhi sa bag-o nga kalibutan?

5 Sa bag-o nga kalibutan, ang pagkasoberano sang Dios pagasakdagon sing bug-os. Makalilipay gid ini sangsa maiyaiyahon nga paggahom nga ginapasanyog sa sining kalibutan nga ginagamhan ni Satanas! Posible nga pabor ang iban sang pagkaindependiente kag indi rasonable nga pagpilit sang ila personal nga luyag, apang ano ang resulta sini? Bangod napaslawan sa pagbaton sang panuytoy sang Dios nagresulta ini sa pag-antos, kasubo, kag mga trahedya. (Jer. 10:23) Ginapaabot naton ang tion nga ang tanan magapasakop sa mahigugmaon nga pagkasoberano ni Jehova!

6 Makalilipay nga magpasakop sa mga kahimusan ni Jehova sa bag-o nga kalibutan samtang ginapatahom naton ang duta, ginatudluan ang mga ginbanhaw, kag ginahimo ang kabubut-on ni Jehova sa katawhan. Apang ano abi kon ginsugo kita nga himuon ang isa ka hilikuton nga wala naton maluyagan? Magapasakop bala kita sa sina nga sugo paagi sa paghimo sang aton bug-os nga masarangan kag magakalipay sa aton asaynment? Kalabanan sa aton magasabat, huo! Apang nagapasakop bala kita karon sa teokratiko nga panuytoy? Kon amo sina, nagahanda kita sa pagkabuhi nga wala sing katapusan sa idalom sang paggahom ni Jehova.

7, 8. (a) Ngaa dapat naton palambuon ang espiritu sang pagkooperar? (b) Ano nga mga pagbag-o ang naeksperiensiahan sang pila ka Cristiano? (c) Ano ang mapat-od naton tuhoy sa kabuhi sa duta sa bag-o nga kalibutan?

7 Makahanda kita sa pagkabuhi sa bag-o nga kalibutan indi lamang paagi sa pagpasakop sa mga kahimusan ni Jehova kundi paagi man sa pagpalambo karon sang pagkakontento kag espiritu sang pagkooperar. Kon nagakooperar kita sa mga nagapanguna karon kag kontento nga may kalipay sa aton bag-o nga mga asaynment sang pag-alagad, posible gid nga amo man sina ang aton panimuot sa bag-o nga kalibutan. (Basaha ang Hebreo 13:17.) Ang mga palanublion sang mga Israelinhon sa Ginsaad nga Duta ginpartida paagi sa pagabutgabot. (Num. 26:52-56; Jos. 14:1, 2) Siempre pa,  wala kita makahibalo karon kon diin paistaron ang kada isa sa aton sa bag-o nga sistema sang mga butang. Apang ang pagkooperar magapabatyag sa aton sang pagkakontento kag daku nga kalipay samtang ginahimo naton ang kabubut-on ni Jehova bisan diin man kita paistaron sa sina nga tion.

8 Ang pagkabuhi sa idalom sang paggahom sang Ginharian takus sang aton panikasog nga magkooperar sa organisasyon ni Jehova kag sa paghimo sang aton teokratiko nga mga asaynment. Apang nagabag-o ang aton mga kahimtangan pagligad sang mga tion. Halimbawa, ang pila ka miembro sang pamilya Bethel sa Estados Unidos gin-asayn sa latagon kag nagakalipay karon sa bugana nga pagpakamaayo sa lain naman nga porma sang bug-os tion nga pag-alagad. Bangod sang katigulangon ukon iban pa nga rason, ang iban nga nagalakbay nga manugtatap gin-asayn subong espesyal payunir. Kon napalambo naton ang pagkakontento, nangamuyo sang bulig sang Dios, kag nagahimo sang aton pinakamasarangan sa pag-alagad sa iya, makabatyag kita sang kalipay kag makabaton sang madamo nga pagpakamaayo bisan pa sa sining mabudlay nga katapusan nga mga adlaw. (Basaha ang Hulubaton 10:22.) Kamusta naman ang aton ginapaabot sa palaabuton? Mahimo may lugar kita nga luyag istaran sa bag-o nga kalibutan, apang posible nga pangabayon kita nga magsaylo sa lain nga lugar. Bisan diin kita mag-alagad sa sina nga tion kag kon ano ang iasayn nga himuon naton, makapat-od kita nga mangin mapinasalamaton kag kontento kita, upod ang tagalumapaw nga kalipay.—Neh. 8:10.

9, 10. (a) Sa bag-o nga kalibutan, paano naton mapakita nga nagahulat kita? (b) Paano naton mapakita ang kinaiya sang paghulat?

9 Sa bag-o nga kalibutan, dapat man mapalambo naton ang kinaiya sang paghulat. Halimbawa, nabalitaan naton nga may pila ka ginbanhaw kag nagkalipay gid ang ila mga himata kag mga abyan tungod sini. Apang, sa aton bahin kinahanglan pa kita maghulat nga banhawon ang aton mga hinigugma. Kon amo sina, magakalipay ka bala upod sa iban kag magahulat? (Roma 12:15) Ang pagtuon karon sa paghulat sa katumanan sang mga saad ni Jehova magabulig sa aton nga maghulat sa palaabuton.Man. 7:8.

10 Makahanda man kita para sa kabuhi sa bag-o nga kalibutan paagi sa paghulat sa ginapahayag nga kamatuoran. Mapisan bala kita magtuon kag nagahulat samtang ang aton paghangop sa kamatuoran sang Biblia amat-amat nga nagaathag karon? Kon amo sina, indi gid kita mabudlayan nga ipakita ang kinaiya sang paghulat sa bag-o nga kalibutan samtang ginapahibalo ni Jehova ang iya mga ginapatuman sa mga tawo.—Hulu. 4:18; Juan 16:12.

11. Ano ang ginatudlo ni Jehova sa aton karon tuhoy sa aton kaangtanan sa iban, kag paano kita makabenepisyo sa sini sa bag-o nga kalibutan?

11 Isa pa ka kinaiya nga mapuslanon para sa kabuhi sa bag-o nga kalibutan amo ang pagkamapinatawaron. Sa tion sang Isa ka Libo ka Tuig nga Paggahom sang Cristo, kinahanglan sang tion agod madula sang matarong kag sang indi matarong ang ila indi himpit nga mga kinaiya. (Binu. 24:15) Mangin mahigugmaon bala kita sa isa kag isa sa sina nga tion? Kon tun-an naton nga mangin mapinatawaron kag likawan ang indi maayo nga kaangtanan sa iban karon, mangin mahapos para sa aton ang paghimo sini sa palaabuton.—Basaha ang Colosas 3:12-14.

12. Ipaathag ang kaangtanan sang aton pagkabuhi karon sa ginapaabot naton sa palaabuton.

12 Ang kabuhi sa bag-o nga kalibutan wala nagakahulugan nga makuha naton ang tanan naton nga gusto sa tion nga luyag naton. Sa baylo, ang kabuhi didto nagalakip sang pagkamapinasalamaton kag pagkakontento sa bisan ano nga kahimtangan samtang nagapanginpulos kita sa pagpasakop sa mahigugmaon nga pagkasoberano ni Jehova. Nagakahulugan ini nga dapat naton ikabuhi ang mga kinaiya nga ginatudlo ni Jehova sa aton karon. Paagi sa  pagtuon sa pagkabuhi karon kaangay sang ginapaabot sa aton sa palaabuton, ginapalambo naton ang mga kinaiya nga kinahanglan ipakita tubtob sa wala sing katapusan. Ginapalig-on naton ang aton pagtuo sa “magaabot nga napuy-an nga duta.” (Heb. 2:5; 11:1) Dugang pa, ginapakita naton karon nga nalangkag gid kita sa matarong nga kahimtangan nga magaluntad sa duta sa palaabuton. Sa pagkamatuod, nagahanda kita para sa kabuhi nga wala sing katapusan sa bag-o nga kalibutan sang Dios.

MAGPOKUS KARON SA ESPIRITUWAL NGA HILIKUTON

Makigbahin sing malipayon sa ministeryo

13. Ano nga sahi sang mga hilikuton ang prioridad naton sa bag-o nga kalibutan?

13 Binagbinaga pa ang isa ka paagi agod makahanda kita sa matuod nga kabuhi sa palaabuton. Bisan pa ginsaad sa aton ang bugana nga pagkaon kag kinahanglanon sa bag-o nga kalibutan, makatigayon kita sang daku nga kaayawan paagi sa pagpuno sang aton espirituwal nga kinahanglanon. (Mat. 5:3) Ang espirituwal nga mga hilikuton amo ang aton panguna nga prioridad, kag ipakita naton nga nagakalipay kita kay Jehova. (Sal. 37:4) Paagi sa pag-una sang espirituwal nga mga butang karon, nagahanda kita sa matuod nga kabuhi sa palaabuton.—Basaha ang Mateo 6:19-21.

14. Ano nga espirituwal nga mga tulumuron ang makabulig sa mga pamatan-on agod mahuptan sa ila hunahuna ang pag-alagad sa wala sing katapusan?

14 Paano naton madugangan ang aton kalipay sa aton teokratiko nga mga hilikuton? Isa ka paagi amo ang pagpahamtang sang espirituwal nga mga tulumuron. Kon ikaw isa ka pamatan-on kag nagahunahuna sing serioso sa imo karera sa pag-alagad kay Jehova, repasuha ang pila ka materyal nga ginbalhag tuhoy sa pila ka sahi sang bug-os tion nga pag-alagad kag himua ini nga tulumuron. * Makighambal sa isa nga madugay na sa bug-os tion nga pag-alagad. Sa paghimo sang pag-alagad nga imo karera, nagahanda ka para sa padayon nga pag-alagad sa Dios sa bag-o nga kalibutan, diin ang teokratiko nga paghanas sa imo kag ang imo eksperiensia makabulig gid sa imo.

Makigbahin sa teokratiko nga mga hilikuton

15. Ano nga espirituwal nga mga tulumuron ang mahimo sang mga manugbantala sang Ginharian?

15 Subong mga manugbantala sang Ginharian ano nga tulumuron ang puede naton himuon? Mahimo nga mangin tulumuron naton nga pauswagon ang pila ka aspekto sang aton ikasarang sa pag-alagad. Ukon makapanikasog kita nga pauswagon ang aton paghangop sa mga prinsipio sang Biblia kag kon paano ini iaplikar. Mahimo mo man pauswagon ang imo pagbasa sa publiko kag paghambal ukon paghatag sang komento sa mga miting. Madamo ka pa sang mahunahuna sangsa sini. Ang punto amo: Ang pagpahamtang sang espirituwal nga mga tulumuron makadugang sang imo kapagsik sa teokratiko nga mga hilikuton,  kag magabulig sa imo nga makahanda sa pagkabuhi sa bag-o nga kalibutan.

GINAPAKAMAAYO NA KITA KARON!

Apresyaha ang espirituwal nga pagkaon

16. Ngaa ang pag-alagad kay Jehova amo ang pinakamaayo nga paagi sa pagkabuhi?

16 Nagakahulugan bala nga pabay-an na lang naton ang aton maayo ukon malipayon nga pagkabuhi karon bangod nagahanda kita sa bag-o nga kalibutan sang Dios? Indi gid! Ang pag-alagad kay Jehova amo ang pinakamakaalayaw nga paagi sang pagkabuhi. Indi ini basta napilitan nga pag-alagad agod makalampuwas kita sa daku nga kapipit-an. Amo ini ang pagkadesinyo sa aton, ang paagi nga makatigayon kita sing daku nga kalipay. Ang panuytoy ni Jehova kag ang iya mainunungon nga gugma mas maayo pa sa kabuhi nga indi suod sa iya. (Basaha ang Salmo 63:1-3.) Siempre pa, indi kinahanglan nga maghulat kita sa bag-o nga kalibutan agod matigayon ang espirituwal nga mga pagpakamaayo nga resulta sang bug-os tagipusuon nga pag-alagad kay Jehova—kag ini sarang naton matigayon karon! Ang matuod, ang pila sa aton madugay na nga nakatigayon sining mga pagpakamaayo, kag nahibaluan naton sa aton naeksperiensiahan nga wala na sang paagi sa pagkabuhi nga makahatag sang daku nga kaayawan.—Sal. 1:1-3; Isa. 58:13, 14.

Mangayo sing Makasulatanhon nga panuytoy

17. Ano ang duog sang personal nga mga interes kag kalipay sa Paraiso?

17 Ang personal nga mga interes kag kalipay matigayon man sa bag-o nga kalibutan sang Dios. Isa pa, ngaa gintuga kita ni Jehova nga luyag magbatyag nga may hinimuan kag magkalipay sa maayo nga kalingawan kon wala man lang gali sia sing tuyo nga busgon ini nga mga handum? (Man. 2:24) Ini kag ang iban pa nagapakita nga ‘ihatag ni Jehova ang handum sang tagsa ka buhi nga butang.’ (Sal. 145:16) Ang kalingawan kag ang pagliwaliwa may kaugalingon nga duog, apang labi pa gid kita nga malipay sa sini kon unahon naton ang aton kaangtanan kay Jehova. Amo man sini sa Paraiso sa duta. Maalamon gid nga magtuon kita nga ibutang ang personal nga interes sa husto nga lugar samtang ginauna naton ang Ginharian kag nagapokus sa espirituwal nga mga pagpakamaayo nga sarang matigayon karon sang katawhan sang Dios!—Mat. 6:33.

18. Paano naton mapakita nga nagahanda kita nga magkabuhi sing wala katapusan sa Paraiso?

18 Sa magaabot nga Paraiso, matigayon naton ang kalipay nga wala pa gid naton mabatyagan. Ipakita naton nga nalangkag gid kita sa matuod nga kabuhi paagi sa paghanda karon. Palambuon naton ang diosnon nga mga kinaiya kag magkalipay sa pagpakigbahin sing makugi sa pagbantala sang Ginharian nga ginasugo sa aton. Malipayon man naton nga panikasugan ang espirituwal nga mga butang. Kag upod ang bug-os nga pagtuo sa mga saad ni Jehova, magkabuhi kita karon nga nagapaabot sa pagkabuhi sa bag-o nga kalibutan!

^ par. 14 Tan-awa ang Young People Ask—Answers That Work, Vol. 2, p. 311-318.