Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2015

Amo Ini ang Aton Duog sang Pagsimba

Amo Ini ang Aton Duog sang Pagsimba

“Ang kakugi sa imo balay nagadabdab sa sulod ko.”JUAN 2:17.

AMBAHANON: 127, 118

1, 2. (a) Ano nga mga duog sang pagsimba ang gingamit sang mga alagad ni Jehova sang una? (b) Ano ang ginbatyag ni Jesus parte sa templo sang Dios sa Jerusalem? (c) Ano ang katuyuan sini nga artikulo?

HALIN sang una, ang mga alagad sang Dios may mga duog para sa putli nga pagsimba. Mahimo nga naggamit si Abel sang altar sang naghalad sia sa Dios. (Gen. 4:3, 4) Sanday Noe, Abraham, Isaac, Jacob, kag Moises naghimo sang mga halaran. (Gen. 8:20; 12:7; 26:25; 35:1; Ex. 17:15) Sa panuytoy ni Jehova, nagpatindog ang mga Israelinhon sang tabernakulo. (Ex. 25:8) Sang ulihi, nagpatindog sila sang templo para sa pagsimba kay Jehova. (1 Hari 8:27, 29) Sang nakabalik ang mga Judiyo halin sa pagkabihag sa Babilonia, regular sila nga nagatipon sa mga sinagoga. (Mar. 6:2; Juan 18:20; Binu. 15:21) Nagtipon ang mga Cristiano sang una sa mga balay sang mga miembro sang kongregasyon. (Binu. 12:12; 1 Cor. 16:19) Sa karon, ang katawhan ni Jehova nagatipon sa linibo ka Kingdom Hall sa bilog nga kalibutan para magtuon kag magsimba.

2 Daku gid ang gugma kag apresasyon ni Jesus sa templo ni Jehova sa Jerusalem amo nga ginpatuhoy sang manunulat sang Ebanghelyo sa iya ang matagnaon nga pulong: “Ang kakugi sa imo balay nagadabdab sa sulod ko.” (Sal. 69:9; Juan  2:17) Wala sing Kingdom Hall nga matawag nga “balay ni Jehova” sa pareho nga kahulugan nga maaplikar sa templo sa Jerusalem. (2 Cron. 5:13; 33:4) Pero, may mga prinsipio sa Biblia nga nagapakita sa aton kon paano gamiton kag tahuron ang aton mga duog sang pagsimba subong. Katuyuan sini nga artikulo nga repasuhon ang pila sini nga mga prinsipio kag binagbinagon kon paano ini naaplikar sa pagtigayon sing husto nga pagtamod, sa paggasto, kag sa pagmentinar sa aton mga Kingdom Hall. *

PAGPAKITA SING PAGTAHOD SA PUTLI NGA PAGSIMBA

3-5. Ano ang katuyuan sang Kingdom Hall, kag paano ini dapat mag-apektar sa aton pagtamod sa mga miting nga ginahiwat diri?

3 Ang Kingdom Hall amo ang sentro sang putli nga pagsimba sa lokal nga komunidad. Nalakip sa espirituwal nga mga aman ni Jehova para sa aton amo ang semanal nga mga miting sa Kingdom Hall. Diri naton mabaton ang importante nga espirituwal nga paumpaw kag panuytoy paagi sa iya organisasyon. Masiling nga ang tanan nga nagatambong sa mga miting daw pareho lang nga gin-agda ni Jehova kag sang iya Anak. Bisan pa pirme kita ginaagda nga magkaon sa “lamesa ni Jehova,” indi gid naton dapat pagpasapayan ini nga imbitasyon.—1 Cor. 10:21.

4 Para kay Jehova, importante gid ini nga tion sa pagsimba kag pagpalig-unay sa isa kag isa amo nga gintuytuyan niya si apostol Pablo nga palig-unon kita nga indi pagpabay-an ang aton mga pagtilipon. (Basaha ang Hebreo 10:24, 25.) Ginapakita bala naton nga ginatahod naton si Jehova kon nagapalya kita sa Cristianong mga miting bangod sa manabaw nga mga rason? Mapakita naton nga ginaapresyar gid naton si Jehova kag ang iya mga ginaaman kon nagahanda kita kag bug-os tagipusuon nga nagapakigbahin sa sini nga mga miting.—Sal. 22:22.

5 Ang aton pagtamod sa Kingdom Hall—sa pisikal man nga istruktura sini kag sa espirituwal nga hilikuton nga ginahimo diri—dapat nagapakita sing nagakaigo nga pagtahod. Indi bala nga ang aton panimuot sa sini nga bahin naangot sa aton pagtamod sa ngalan sang Dios, nga masami makita sa karatula sang Kingdom Hall?—Ipaanggid ang 1 Hari 8:17.

6. Ano ang ginsiling sang iban parte sa aton mga Kingdom Hall kag sa mga nagatambong sa mga miting diri? (Tan-awa ang piktyur sa umpisa sini nga artikulo.)

6 Ang pagtahod naton sa aton mga duog sang pagsimba masami matalupangdan sang mga indi Saksi. Halimbawa, ang isa ka lalaki sa Turkey nagsiling: “Nagdayaw gid ako sa katinlo kag pagkaorganisado nga nakita ko sa Kingdom Hall. Ang mga tawo didto maayo mamayo, nagayuhum, kag ginatamyaw nila ako. Nagdayaw gid ako sa sini.” Regular na sia nga nagtambong sa mga miting, kag sang ulihi nabawtismuhan. Sa isa ka siudad sa Indonesia, gin-agda sang kongregasyon ang mga opisyal sang gobierno kag ang mga kaingod sa ila bag-o nga Kingdom Hall antes ini gindedikar. Nagkadto ang meyor. Nagdayaw gid sia sa kalidad sang bilding, sa katuyuan sini, kag sa matahom nga hardin. “Ang katinlo sini nga duog nagapabanaag sang inyo matuod nga pagtuo,” siling niya.

Ang ginahimo naton mahimo magpakita nga wala naton ginatahod ang Dios (Tan-awa ang parapo 7 kag 8)

7, 8. Ano ang importante nga dumdumon sang mga nagatambong sa Cristianong mga miting?

7 Ang aton pagtahod sa Dios nga nagaagda sa aton sa Cristianong mga miting dapat makita sa aton pamatasan, pamayo, kag katinlo. Ang pagtahod nagalakip man sa paglikaw sa kon ano ang sobra. Natalupangdan nga ang pila tama ka estrikto sa kon ano ang nagakaigo nga paggawi sa pagtambong sa mga miting sa kongregasyon, pero ang iban  tama naman ka kaswal sa Kingdom Hall. Siempre, gusto ni Jehova nga komportable ang iya mga alagad kag mga bisita diri. Indi man gusto sang mga nagatambong nga madisturbo ang mga miting bangod sa ila tama ka kaswal nga pamayo, pagkaon, pag-text ukon pagpakig-istorya sa tion sang miting, kag iban pa. Dapat ipaintiende sang mga ginikanan sa ila kabataan nga ang Kingdom Hall indi lugar para magdinalagan ukon maghampang.—Man. 3:1.

8 Bangod sa kaakig, gintabog ni Jesus ang mga negosyante sa templo sang Dios. (Juan 2:13-17) Ang aton mga Kingdom Hall duog man para sa putli nga pagsimba kag espirituwal nga edukasyon. Gani ang ano man nga negosyo nga wala sing kahilabtanan sa espirituwal dapat himuon sa iban nga lugar.—Ipaanggid ang Nehemias 13:7,8.

PAG-AMAN KAG PAGGASTO PARA SA MGA KINGDOM HALL

9, 10. (a) Paano gin-aman kag gingastuhan ang bag-o nga mga Kingdom Hall, kag ano ang resulta? (b) Anong mahigugmaon nga aman ang nakabulig gid sa mga kongregasyon nga wala sing pinansial nga ikasarang sa pagpatindog sing Kingdom Hall?

9 Daku gid ang panikasog sang organisasyon ni Jehova para maaman kag mabuligan sa pinansial ang mga Kingdom Hall. Ang pagdesinyo, pagpatindog, kag pagkay-o sini ginahimo sang mga boluntaryo nga wala sing sueldo. Ano ang resulta? Halin sang Nobiembre 1, 1999, sobra sa 28,000 ka matahom kag bag-o nga sentro sang putli nga pagsimba ang gin-aman sa mga kongregasyon sa bilog nga kalibutan. Buot silingon nga sang nagligad nga 15 ka tuig, may aberids nga lima ka bag-o nga Kingdom Hall ang ginpatindog kada adlaw.

10 Ginapanikasugan gid nga masuportahan ang pagpatindog sing mga Kingdom Hall kon diin may kinahanglanon. Ining mahigugmaon nga pag-aman nabase sa prinsipio sa Kasulatan nga ang sobra sang iban magapuno sa kakulangan sang iban, para “may pag-alalangay.” (Basaha ang 2 Corinto 8:13-15.) Bilang resulta, ang matahom kag bag-o nga mga sentro sang putli nga pagsimba gin-aman sa mga kongregasyon nga wala sing pinansial nga ikasarang sa pagpatindog sing Kingdom Hall.

11. Ano ang ginsiling sang pila ka kauturan parte sa ila bag-o nga Kingdom Hall, kag ano ang ginbatyag mo sa sini?

11 Ang isa ka kongregasyon sa Costa Rica nga nakabenepisyo sa sini nga aman nagsulat: “Kon magtindog kami sa atubangan sang Kingdom Hall, pamatyag namon daw nagadamgo lang kami! Daw indi kami makapati. Ang amon matahom nga tilipunan natapos sa sulod lang sang walo ka adlaw! Nangin posible ini bangod sa pagpakamaayo ni Jehova, sa mga kahimusan sang iya organisasyon, kag pagsuportar sang amon pinalangga nga mga kauturan. Ini nga duog sang pagsimba isa gid ka hamili nga regalo, isa ka hiyas nga ginhatag sa amon ni Jehova. Grabe gid ang  amon kalipay sa sini.” Indi bala nga nalipay ka nga mabatian ining mga pagpasalamat bangod sa bag-o nga mga Kingdom Hall kag mahibaluan nga naeksperiensiahan man sang iban naton nga mga kauturan sa liniboka lokasyon sa bilog nga kalibutan ini nga kalipay? Hilikuton ini ni Jehova, kay sa tapos mapatindog ang bag-o nga mga Kingdom Hall, masami nga madamo nga interesado ang nagatambong sa mga miting kag gusto nga makilala pa gid ang aton mahigugmaon nga Manunuga.—Sal. 127:1.

12. Paano ka makabulig sa pagpatindog sang Kingdom Hall?

12 Madamo nga utod nga lalaki kag babayi ang nalipay gid bangod nakapakigbahin sila sa pagpatindog sang mga Kingdom Hall. Makabulig man kita sa pagpanukod mismo ukon indi, tanan kita may pribilehiyo nga sakdagon ini nga mga proyekto paagi sa aton mga donasyon. Ang kakugi sa putli nga pagsimba nakabulig sa pag-aman sang kagastuhanan sa teokratiko nga mga proyekto sa tion sang Biblia, kag amo man subong—sa paghimaya kay Jehova.—Ex. 25:2; 2 Cor. 9:7.

PAGPANINLO SA KINGDOM HALL

13, 14. Ano nga mga prinsipio sa Kasulatan ang naaplikar sa paghupot sang aton Kingdom Hall nga matinlo kag mahipid?

13 Kon matapos na ang bag-o nga Kingdom Hall, kinahanglan matinlo kag mahipid ini pirme para mapabanaag ang mga kinaiya kag personalidad sang Dios nga aton ginasimba—ang Dios nga organisado. (Basaha ang 1 Corinto 14:33, 40.) Ginaangot sang Biblia ang pagkabalaan kag espirituwal nga katinlo sa pisikal nga katinlo. (Bug. 19:8) Gani kon gusto sang mga tawo nga batunon sila ni Jehova, dapat huptan nila ang pisikal nga katinlo.

14 Kon sundon naton ini nga mga prinsipio,  indi kita mahuya mag-agda sa mga interesado nga magtambong sa aton mga miting, nga may kompiansa nga ang hitsura sang aton Kingdom Hall nahisuno sa maayong balita nga ginapaambit naton sa ila. Makita nila nga ginasimba naton ang Dios nga balaan kag sa indi madugay himuon niya ang duta nga matinlo nga paraiso.—Isa. 6:1-3; Bug. 11:18.

15, 16. (a) Ngaa mahimo mabudlay huptan nga matinlo ang Kingdom Hall, pero ngaa importante ini? (b) Ano ang mga kahimusan sa pagpaninlo sang aton Kingdom Hall, kag ano ang pribilehiyo sang tagsa sa aton?

15 Mahimo nga ang iban nga tawo mas nagapabalor sa katinlo kon ikomparar sa iban. Bangod ini sa pagpadaku sa ila kag mahimo ang iban nagaistar sa mga lugar nga lunangon, yab-ukon, indi maayo ang dalan, maiwat ang tubig, kag wala sing mga panglimpyo. Ano man ang panimuot sang mga tawo ukon kahimtangan sa aton lugar, ang aton Kingdom Hall dapat mangin halimbawa sa katinlo bangod makita sa sini ang ngalan ni Jehova kag duog ini para sa putli nga pagsimba.—Deut. 23:14.

16 Ang pagpaninlo sa Kingdom Hall indi dapat pagpasapayanan. Ang tagsa ka hubon sang mga gulang dapat maghimo sing iskedyul sini kag mag-aman sing nagakaigo nga suplay kag gamit para mangin maayo gid ang kondisyon sang duog sang pagsimba sang kongregasyon. Bangod ang pila kinahanglan tinluan kada tapos sang miting kag ang iban talagsa lang, kinahanglan ang maayo nga koordinasyon kag pagdumala para wala sing malipatan. Ang tanan nga miembro sang kongregasyon may pribilehiyo nga magbulig.

PAGMENTINAR SANG ATON DUOG SANG PAGSIMBA

17, 18. (a) Ano nga mga pagmentinar sa mga duog sang putli nga pagsimba ang narekord sa Kasulatan? (b) Ngaa dapat mentinahon ang mga Kingdom Hall?

17 Nagapanikasog man ang mga alagad ni Jehova nga mamentinar ang ila mga duog sang pagsimba. Si Hari Jehoas sang Juda nagsugo sa mga saserdote nga gamiton ang mga amot sa balay ni Jehova “sa pagpakay-o sang balay, sa bisan diin nga bahin nga may guba.” (2 Hari 12:4, 5) Kapin sa 200 ka tuig sang ulihi, gingamit man ni Hari Josias ang amot sa templo para sa mga kinahanglan kay-uhon.Basaha ang 2 Cronica 34:9-11.

18 Ang mga sanga talatapan nagreport nga sa pila ka pungsod, indi prioridad ang pagmentinar sang mga bilding ukon kagamitan. Mahimo pila lang sa sina nga mga lugar ang makahibalo sa paghimo sini ukon kulang sila sang pundo para sa sini. Pero maathag nga kon mapabay-an ang pagmentinar sang Kingdom Hall, madasig ini maguba kag mangin indi maayo nga panaksi sa lokal nga komunidad. Pero kon himuon sang mga miembro sang kongregasyon ang ila masarangan para mamentinar ang Kingdom Hall, magadala ini sing kadayawan kay Jehova kag indi magdaku ang gasto halin sa pundo nga gindonar sang mga masigkatumuluo.

Ang pagpaninlo kag pagmentinar sang Kingdom Hall indi dapat pagpabay-an (Tan-awa ang parapo 16 kag 18)

19. Ano ang imo determinasyon parte sa mga bilding nga ginagamit naton para sa putli nga pagsimba?

19 Ang Kingdom Hall isa ka bilding nga nadedikar kay Jehova. Gani, indi masiling nga iya ini sang isa ka indibiduwal ukon kongregasyon, ano man ang ginapakita sang legal nga titulo sini. Ginapalig-on kita sang Cristianong mga prinsipio nga bug-os nga magkooperar para masiguro nga matuman ang katuyuan sini nga bilding. Ang tanan sa kongregasyon makabulig nga mahimo ini paagi sa pagpakita sang nagakaigo nga pagtahod sa aton mga duog sang pagsimba, paagi sa pagdonar para sa pagpanukod sang bag-o nga mga Kingdom Hall, kag paagi sa paghatag sing tion kag kusog para mahuptan nga matinlo kag namentinar ini. Sa paghimo sini, mapakita naton ang aton kakugi sa duog sang putli nga pagsimba kay Jehova, kaangay ni Jesus.—Juan 2:17.

^ par. 2 Ini nga artikulo panguna nga nagapatuhoy sa mga Kingdom Hall. Pero ang mga prinsipio maaplikar man sa mga Assembly Hall kag iban pa nga pasilidad nga ginagamit sa putli nga pagsimba.