Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2015

“Malapit Na ang Pagtubos sa Inyo”!

“Malapit Na ang Pagtubos sa Inyo”!

“Magtindog kamo kag ihangad ang inyo ulo, bangod malapit na ang pagtubos sa inyo.”LUC. 21:28.

AMBAHANON: 133, 43

1. Ano ang natabo sang 66 C.E.? (Tan-awa ang piktyur sa umpisa sini nga artikulo.)

IMADYINA nga Cristiano ikaw nga nagaistar sa Jerusalem sang 66 C.E. Madamo ang nagakatabo sa palibot mo. Una, ginkuha sang Romanong gobernador nga si Florus ang 17 ka talanton nga mga sensilyo sa bahandian sang balaan nga templo. Wala magdugay, nagrebelde ang mga Judiyo, nga nagpatay sang Romano nga mga soldado sa Jerusalem kag nagdeklarar sang ila pagkaindependiente sa Roma. Pero madasig nga nanghikot ang Roma. Sa sulod sang tatlo ka bulan, 30,000 ka soldado ang ginpadala, nga ginapamunuan sang Romanong gobernador sang Siria, nga si Cestius Gallus. Madasig nga nakasulod ang mga soldado sa Jerusalem, kag ang Judiyo nga mga rebelde nagpanago sa pamakod sang templo. Dayon, ginsugdan sang mga soldado sang Roma nga busluton ang nagua nga pader sang templo! Nagsalasala ang bilog nga siudad. Ano ang ginabatyag mo samtang ginatan-aw ini nga mga hitabo?

2. Ano ang dapat himuon sang mga Cristiano sang 66 C.E., kag paano ini nangin posible?

2 Wala sing duhaduha nga nadumduman mo ang ginsiling ni Je sus nga ginsulat sang manunulat sang Ebanghelyo nga si Lucas: “Kon makita ninyo nga ang Jerusalem ginalibutan sang kasuldadusan, hibalua ninyo nga ang paghapay sa iya malapit na.” (Luc. 21:20) Pero mahimo mamangkot ka, ‘Paano ko masunod ang mga instruksion sa sini nga paandam?’ Si Jesus nagsiling man: “Sa amo nga tion, ang mga yara sa Judea dapat magpalagyo sa mga bukid, ang mga yara sa sulod sang Jerusalem maggua, kag ang mga yara sa kaumhan indi na magsulod sa iya.” (Luc. 21:21) Paano ka makagua sa Jerusalem kay tuman kadamo nga soldado ang nagalibot sa sini? May makatilingala dayon nga natabo. Nakita mo nga nagaisol ang mga soldado sang Roma! Suno sa tagna, ang ila pagsalakay “palip-uton.” (Mat. 24:22) May kahigayunan ka na subong nga sundon ang mga instruksion ni Jesus. Nalagyo ka dayon sa kabukiran sa tabok sang Suba Jordan, upod sa iban pa nga matutom nga mga Cristiano sa siudad kag sa palibot sini. * Dayon sang 70 C.E., ginsalakay ang Jerusalem sang bag-o nga grupo sang mga soldado sang Roma kag ginlaglag ang siudad. Pero naluwas ka kay ginsunod mo ang mga instruksion ni Jesus.

3. Ano nga pareho nga sitwasyon ang maatubang sang mga Cristiano sa indi madugay, kag ano ang binagbinagon naton sa sini nga artikulo?

3 Sa indi madugay, tanan kita magaatubang sing pareho sini nga sitwasyon. Wala lamang ginpaandaman ni Jesus ang mga Cristiano parte sa kalaglagan sang Jerusalem kundi gingamit man niya ang mga hitabo sang unang siglo para ipaanggid ang matabo kon ang “dakung kapipit-an” hinali nga mag-abot. (Mat. 24:3, 21, 29) Ang matuod, isa ka maayong balita nga “daku nga kadam-an” sang mga tawo ang makalampuwas sa bug-os kalibutan nga kalaglagan. (Basaha ang Bugna 7:9, 13, 14.) Ano ang ginasugid sa aton sang Biblia parte sa sining mga hitabo sa palaabuton? Dapat mangin interesado gid kita sa sabat, kay nagadepende sa sini ang aton kaluwasan. Binagbinagon naton subong sing detalyado kon paano kita personal nga maapektuhan sini nga mga hitabo sa palaabuton.

ANG PAGSUGOD SANG DAKUNG KAPIPIT-AN

4. Ano ang tanda sang pagsugod sang dakung kapipit-an, kag paano ini matabo?

4 Paano magasugod ang dakung kapipit-an? Ang libro sang Bugna nagasabat paagi sa paglaragway sang kalaglagan sang “Babilonia nga Daku.” (Bug. 17:5-7) Nagakabagay gid nga ipaanggid ang tanan nga butig nga relihion sa makihilawason nga babayi! Ang mga klero nakighilawas sa mga lider sining malaut nga kalibutan. Sa baylo nga sakdagon sing matutom si Jesus kag ang iya Ginharian, ginsakdag nila ang tawhanon nga mga gumalahom kag ginkompromiso ang diosnon nga mga prinsipio para lang may impluwensia sila sa pulitika. Tuhay gid sila sa matinlo kag tulad birhen nga mga hinaplas sang Dios. (2 Cor. 11:2; Sant. 1:27; Bug. 14:4) Pero sin-o ang magalaglag sa tulad makihilawason nga organisasyon? Ibutang ni Jehova nga Dios ang “iya hunahuna” sa tagipusuon sang “napulo ka sungay” sang “mabangis nga sapat nga eskarlata ang kolor.” Ini nga mga sungay nagarepresentar sang tanan nga pulitikal nga kagamhanan subong nga nagasakdag sa Nasyones Unidas, isa ka organisasyon nga ginalaragway sang “mabangis nga sapat nga eskarlata ang kolor.”—Basaha ang Bugna 17:3, 16-18.

5, 6. Ngaa makahinakop kita nga ang kalaglagan sang Babilonia nga Daku wala nagakahulugan sang kamatayon sang tanan nga miembro sini?

5 Pero magahinakop bala kita nga ang kalaglagan sang mga relihion sang Babilonia nga Daku magaresulta sa kamatayon sang tanan nga miembro anay sini nga mga relihion? Indi. Gin-inspirar si manalagna Zacarias nga magsulat parte sa sina nga tion. Nagapatuhoy sa bahin anay sang butig nga relihion,  ang rekord nagasiling: “Magasiling ang kada isa sa ila, ‘Indi ako manalagna. Mangunguma ako, kay sang bata pa ako ginbakal ako sang isa ka tawo bilang ulipon.’ Kag kon pamangkuton sia, ‘Ano inang mga pilas sa tunga sang imo mga abaga?’ magasabat sia, ‘Mga pilas ini sang didto ako sa balay sang akon mga abyan.’” (Zac. 13:4-6) Gani mahimo gid nga ang pila ka klero magabiya sang ila relihioso nga pagkabuhi kag magapanghiwala nga bahin sila sadtong butig nga mga relihion.

6 Ano ang kahimtangan sang katawhan sang Dios sa amo nga tion? Si Jesus nagpaathag: “Kag kon yadto nga mga adlaw wala ginpalip-ot, wala sing tawo nga maluwas; apang tungod sa mga pinili yadto nga mga adlaw palip-uton.” (Mat. 24:22) Subong nabinagbinag na naton, “ginpalip-ot” ang kapipit-an sang 66 C.E. Bangod sini, nakapalagyo ang “mga pinili,” ang hinaplas nga mga Cristiano, halin sa siudad kag sa palibot sini. Sing kaanggid, ang una nga bahin sang magaabot nga dakung kapipit-an “palip-uton” bangod sang “mga pinili.” Ang pulitikal nga “napulo ka sungay” indi pagtugutan sa paglaglag sa katawhan sang Dios. Sa baylo, may malip-ot nga tion sang kalinong.

TION SANG PAGTILAW KAG PAGHUKOM

7, 8. Ano nga kahigayunan ang maabot pagkatapos malaglag ang mga organisasyon sang butig nga relihion, kag paano mangin tuhay ang matutom nga katawhan sang Dios sa sina nga tion?

7 Ano ang matabo pagkatapos malaglag ang mga organisasyon sang butig nga relihion? Tion ini nga makita kon ano gid ang yara sa aton tagipusuon. Ang kalabanan sang katawhan magadangop sa tawhanon nga mga organisasyon nga ginpaanggid sa “mga igang sang mga bukid.” (Bug. 6:15-17) Pero, malaragwayon nga magapalagyo ang katawhan sang Dios pakadto sa pangamlig nga iaman ni Jehova. Sang unang siglo, ang malip-ot nga kalinong indi tion sang pagkumbertir sang tanan nga Judiyo sa Cristianismo. Tion ini para sa mga Cristiano na nga manghikot kag magtuman. Sing kaanggid, indi naton mapaabot nga ang malip-ot nga kalinong sa dakung kapipit-an magaresulta sa pagdamo sang bag-o nga mga tumuluo. Sa baylo, mangin kahigayunan ini sang tanan nga matuod nga tumuluo nga pamatud-an nila ang ila gugma kay Jehova kag sakdagon ang mga utod sang Cristo.—Mat. 25:34-40.

8 Bisan pa indi naton mahangpan sing bug-os ang tanan nga matabo sa tion sang pagtilaw, mapaabot naton nga may pila ka pagsakripisyo. Sang unang siglo, ginbiyaan sang mga Cristiano ang ila mga pagkabutang kag nagbatas sing mga kabudlayan para maluwas. (Mar. 13:15-18) Para makapabilin nga matutom, handa bala kita nga madulaan sang materyal? Handa bala kita nga himuon ang bisan ano nga ginapatuman para pamatud-an ang aton katutom kay Jehova? Hunahunaa ini! Sina nga tion, kita na lang ang nagasunod sang halimbawa ni manalagna Daniel sang una paagi sa padayon nga pagsimba sa aton Dios ano man ang matabo.—Dan. 6:10, 11.

9, 10. (a) Ano nga mensahe ang ibantala sang katawhan sang Dios sa sina nga tion? (b) Ano ang mangin reaksion sang mga kaaway sang katawhan sang Dios?

9 Indi ini ang tion nga magbantala sang “maayong balita sang Ginharian.” Matapos na ini. Maabot na ang tion sang “katapusan”! (Mat. 24:14) Wala sing duhaduha nga ang katawhan sang Dios magabantala sang matigdas nga mensahe sang paghukom. Mahimo lakip sa sini ang pagpahibalo nga madali na lang ang bug-os nga kalaglagan sang malaut nga kalibutan ni Satanas. Ginpaanggid sang Biblia ini nga mensahe sa dalagku nga mga yelo sang nagsiling ini: “Nagkalahulog halin sa langit ang dalagku nga mga yelo nga ang binilog may kabug-aton nga mga isa ka talanton. Nagtupa ini sa mga tawo, kag ginpasipalahan nila ang Dios bangod sang kalalat-an nga yelo, kay makahalalit gid ini.”—Bug. 16:21.

 10 Tanan ini matalupangdan sang aton mga kaaway. Sa idalom sang panuytoy sang Dios, si manalagna Ezequiel nagpaathag kon ano ang himuon ni Gog sang Magog, ang paghimbon sang mga pungsod: “Amo ini ang ginasiling sang Soberanong Ginuong Jehova: ‘Sa sina nga adlaw magahunahuna ka kag magabuko sing malain. Magasiling ka: “Salakayon ko ang mga baryo sa kaumhan nga wala sing pader. Salakayon ko ang mga nagaistar sing malinong. Tanan sila nagaistar sa mga baryo nga wala sing pader, trangka, ukon gawang.” Tuyo mo nga mang-agaw sing mga pagkabutang kag magpang-ati, agod salakayon ang nalaglag nga duta nga gin-istaran liwat kag ang katawhan nga gintipon halin sa mga pungsod, nga nagatipon sing manggad kag pagkabutang, sila nga mga nagaistar sa tunga sang duta.’” (Ezeq. 38:10-12) Sa espirituwal nga kahimtangan, ang katawhan sang Dios mangin pinasahi, nga daw subong bala nga yara “sa tunga sang duta.” Indi na gid ini maantos sang mga pungsod. Huo, luyag nila salakayon ang mga hinaplas ni Jehova kag ang ila mga kaupod.

11. (a) Ano ang dapat naton dumdumon parte sa pagpasunod sang mga hitabo sa dakung kapipit-an? (b) Ano ang mangin reaksion sang mga tawo sa mga tanda nga makita sa langit?

11 Samtang ginabinagbinag naton kon ano ang matabo dayon, dapat naton dumdumon nga ang Pulong sang Dios wala nagasugid sang eksakto nga pagpasunod sang mga hitabo. Mahimo nga ang pila ka hitabo magaabtanay. Si Jesus nagtagna parte sa hingapusan sining sistema sang mga butang: “May mga tanda sa adlaw kag sa bulan kag sa mga bituon. Ang mga pungsod sa duta malisang kag indi mahibaluan ang himuon bangod sang pagdinaguhob sang nagaalimbukad nga dagat. Ang mga tawo magakapunaw sa kahadlok kag sa pagpaabot sa mga butang nga mahanabo sa duta, kay ang gamhanan nga mga butang sa langit magatay-ug. Dayon makita nila ang Anak sang tawo nga nagakari sa panganod nga may gahom kag daku nga himaya.” (Luc. 21:25-27; basaha ang Marcos 13:24-26.) Lakip bala sa katumanan sini nga tagna ang makahaladlok nga mga tanda kag mga hitabo sa literal nga langit? Mahibaluan naton ina sa palaabuton. Pero ano man ang kahimtangan, bangod sini nga mga tanda mahadlok kag magasalasala ang mga kaaway sang Dios.

May positibo kita nga panimuot kag nagasalig nga luwason! (Tan-awa ang parapo 12 kag 13)

12, 13. (a) Ano ang matabo kon mag-abot si Jesus “nga may gahom kag daku nga himaya”? (b) Ano ang mangin reaksion sang mga alagad sang Dios sa sina nga tion?

12 Ano ang matabo kon mag-abot si Jesus “nga may gahom kag daku nga himaya”? Tion ini para padyaan ang mga matutom kag silutan ang mga indi matutom. (Mat. 24:46, 47, 50, 51; 25:19, 28-30) Suno kay Mateo, gintapos ni Jesus ang paghatag sang kabilugan nga tanda paagi sa parabola parte sa mga karnero kag mga kanding, nga nagasiling: “Kon ang Anak sang tawo mag-abot sa iya himaya, kaupod ang tanan nga anghel, magapungko sia gilayon sa iya mahimayaon nga trono. Tipunon sa iya atubangan ang tanan nga pungsod, kag painpainon niya ang katawhan kaangay sang pagpain sang manugbantay sa mga karnero kag mga kanding. Ibutang niya ang mga karnero sa iya tuo, apang ang mga kanding sa iya wala.” (Mat. 25:31-33) Ano nga paghukom ang mabatian sang mga karnero kag mga kanding? Amo ini ang katapusan nga ginsiling sa parabola: “Maagom nila [sang mga kanding] ang kamatayon nga wala sing katapusan, apang ang mga matarong magabaton sang kabuhi nga wala sing katapusan.”—Mat. 25:46.

13 Ano ang mangin reaksion sang mga kanding kon marealisar nila nga maagom nila “ang kamatayon nga wala sing katapusan”? “Magapukpok [sila] sang ila dughan sa kalisod.” (Mat. 24:30) Pero ano ang mangin reaksion sang mga utod sang Cristo kag sang ila matutom nga mga kaupod sa sina nga tion? Bug-os nga nagatuo kay Jehova nga  Dios kag sa iya Anak nga si Jesucristo, sundon nila ang sugo ni Jesus: “Kon magsugod nga mahanabo ini, magtindog kamo kag ihangad ang inyo ulo, bangod malapit na ang pagtubos sa inyo.” (Luc. 21:28) Huo, may positibo kita nga panimuot kag nagasalig nga luwason.

NAGASILAK SING MASANAG SA GINHARIAN

14, 15. Ano nga pagpanipon ang himuon pagkatapos magsugod ang pagsalakay ni Gog sang Magog, kag paano ini matabo?

14 Ano ang matabo pagkatapos magsugod ang pagsalakay ni Gog sang Magog sa katawhan sang Dios? Ginrekord nanday Mateo kag Marcos ini nga hitabo: “Ipadala [sang Anak sang tawo] ang mga anghel kag tipunon ang iya mga pinili halin sa apat ka direksion, halin sa isa ka punta sang duta tubtob sa isa ka punta sang langit.” (Mar. 13:27; Mat. 24:31) Ini nga pagpanipon wala nagapatuhoy sa una nga pagtipon sa mga hinaplas; kag wala man ini nagapatuhoy sa katapusan nga pagmarka sa nagkalabilin nga mga hinaplas. (Mat. 13:37, 38) Ini nga pagmarka matabo antes magsugod ang dakung kapipit-an. (Bug. 7:1-4) Gani ano ining pagpanipon nga ginsambit ni Jesus? Tion ini nga mabaton sang nagkalabilin sang 144,000 ang ila padya sa langit. (1 Tes. 4:15-17; Bug. 14:1) Matabo ini pagkatapos magsugod ang pagsalakay ni Gog sang Magog. (Ezeq. 38:11) Dayon matuman ang ginsiling ni Jesus: “Sa sina nga tion, ang mga matarong magasilak sing masanag kaangay sang adlaw sa Ginharian sang ila Amay.”Mat. 13:43. *

15 Buot bala silingon nga may “rapture” sang mga hinaplas? Madamo sa Cristiandad ang nagapati, nga suno sa sini nga panudlo, ang mga Cristiano pagasabniton halin sa duta. Dayon, nagapaabot sila nga makita ang pagbalik ni Jesus para maggahom sa duta. Pero, maathag nga ginasiling sang Bib lia nga makita sa langit “ang tanda sang Anak sang tawo” kag magakari si Jesus “sa mga panganod sang langit.” (Mat. 24:30) Ini nga mga ekspresyon nagapahangop sang mga indi makita. Dugang pa, “ang unod kag dugo indi makapanubli sang Ginharian sang Dios.” Gani ang dalhon sa langit dapat anay ‘pagabayluhan, sing hinali, sa isa ka pisok sang mata, sa pagtunog sang katapusan nga trumpeta.’ * ( Basaha ang 1 Corinto 15:50-53.) Wala naton ginagamit ang tinaga nga “rapture” kay sayop ang kahulugan sini. Ang nabilin nga mga hinaplas tipunon sing hinali.

16, 17. Ano anay ang dapat matabo antes sang kasal sang Kordero sa langit?

16 Kon ang tanan nga 144,000 didto na sa langit, magasugod ang katapusan nga paghanda sang kasal sang Kordero. (Bug. 19:9) Pero may matabo pa antes sining makalilipay nga hitabo. Dumduma, wala madugay antes dalhon sa langit ang nagkalabilin sang 144,000, salakayon ni Gog ang katawhan sang Dios. (Ezeq. 38:16) Ano ang epekto sini? Ang katawhan sang Dios sa duta daw wala sing pangamlig. Sundon nila ang mga instruksion nga ginhatag sang tion ni Hari Jehosapat: “Indi kamo kinahanglan magpakig-away sa sini nga inaway. Magtindog kamo sa inyo mga puesto, kag magpahimunong lang, kag tan-awa ninyo ang pagluwas sa inyo ni Jehova. Kamo nga mga taga-Juda kag taga-Jerusalem, indi kamo mahadlok.” (2 Cron. 20:17) Pero tuhay ang epekto sa langit. Nagapatuhoy sa tion nga ang tanan nga hinaplas ara na sa langit, ang Bugna 17:14 nagasugid sa aton parte sa mga kaaway sang katawhan sang Dios: “Magapakig-away sila sa Kordero apang mapierde sila, bangod ang Kordero Ginuo sang mga ginuo kag Hari sang mga hari. Kag magadaug man ang kaupod niya nga mga gintawag kag pinili kag matutom.” Upod sa iya mga masigkamanuggahom nga 144,000 sa langit, luwason ni Jesus ang katawhan sang Dios diri sa duta.

17 Magaresulta ini sa inaway sang Armageddon nga magabayaw sang balaan nga ngalan ni Jehova. (Bug. 16:16) Sina nga tion, ang tanan nga tulad kanding ‘magaagom sang kamatayon nga wala sing katapusan.’ Madula na gid man sa duta ang tanan nga kalautan, kag ang daku nga kadam-an makalampuwas sa katapusan nga bahin sang dakung kapipit-an. Kon matapos na ang tanan nga paghanda, matabo ang kasal sang Kordero, nga amo ang talipuspusan sang libro sang Bugna. (Bug. 21:1-4) * Ang tanan nga maluwas sa duta makatigayon sang kahamuot sang Dios kag makaeksperiensia sang iya gugma. Tumalagsahon gid ini nga punsion sa kasal! Ginapaabot gid bala naton ini nga adlaw?—Basaha ang 2 Pedro 3:13.

18. Bangod malapit na ang gintagna nga makakulunyag nga mga hitabo, ano ang dapat naton himuon?

18 Bangod malapit na ining makakulunyag nga mga hitabo, ano ang dapat himuon sang kada isa sa aton subong? Gintuytuyan sang Dios si apostol Pedro sa pagsulat: “Sanglit ining tanan nga butang matunaw sa sini nga paagi, dapat talupangdon ninyo kon ano kamo nga sahi sang mga tawo may kaangtanan sa balaan nga paggawi kag sa mga buhat sang diosnon nga debosyon, samtang ginahulat ninyo kag pirme ginadumdom ang presensia sang adlaw ni Jehova . . . Gani, mga hinigugma, sanglit ginahulat ninyo ining mga butang, himua ninyo ang inyo bug-os nga masarangan agod sa katapusan masapwan niya kamo nga matinlo, wala sing depekto, kag may maayo nga kaangtanan sa iya.” (2 Ped. 3:11, 12, 14) Gani dapat determinado kita nga magpabilin nga matinlo sa espirituwal, nga nagasakdag sa Hari sang Paghidait.

^ par. 2 Tan-awa ang Abril 15, 2012, nga Ang Lalantawan, pahina 25-26.

^ par. 15 Ang undanon nga lawas sang mga hinaplas nga buhi sa sina nga tion indi pagdalhon sa langit. (1 Cor. 15:48, 49) Ang ila mga lawas mahimo nga madula pareho sang natabo sa lawas ni Jesus.

^ par. 17 Ginapakita man sang Salmo 45 ang pagpasunod sang mga hitabo. Una, makig-away ang Hari, kag dayon matabo ang kasal.