Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2015

Naghalad sang Ila Kaugalingon sing Kinabubut-on—Sa Rusya

Naghalad sang Ila Kaugalingon sing Kinabubut-on—Sa Rusya

SANG 1991, nalipay gid ang mga Saksi ni Jehova sa Rusya sang gindula ang madugay na nga pagdumili sa ila mga hilikuton kag legal na sila nga ginkilala sang gobierno. Sadto nga tion, daw wala sing makahunahuna nga magadamo sing napulo ka pilo ang mga Saksi asta nga nangin mga 170,000 na sila subong! Lakip sa sining mapisan nga mga manugbantala sang Ginharian amo ang mga Saksi nga naghalin sa iban nga pungsod kag nagsaylo sa Rusya para magbulig sa espirituwal nga pagpangani. (Mat. 9:37, 38) Kilalahon naton ang pila sa ila.

MGA BROTHER NGA HANDA MAGBULIG SA PAGPABAKOD SANG MGA KONGREGASYON

Sang tuig nga gindula ang pagdumili sa Rusya, 28 anyos sadto si Matthew nga taga-Great Britain. Sa kombension sina nga tuig, may pamulongpulong nga nagpadaku nga kinahanglan buligan ang mga kongregasyon sa East­ern Europe. Bilang halimbawa, ginsambit sang humalambal nga sa isa ka kongregasyon sa St.Petersburg, Rusya, isa lang ang ministeryal nga alagad kag wala sing gulang. Pero ang mga manugbantala nagadumala sing pila ka gatos ka pagtuon sa Biblia! “Pagkatapos sadto nga pamulongpulong,” siling ni Mat­thew, “indi na madula sa akon hunahuna ang Rusya, gani nangamuyo ako kay Jehova nga ginasugid ang akon handum nga magsaylo didto.” Nagsupot sia sing kuarta, nagbaligya sang kalabanan niya nga pagkabutang, kag nagsaylo sa Rusya sang 1992. Ano ang natabo sa iya?

Si Matthew

“Hangkat ang lenguahe,” sugid ni Matthew. “Nabudlayan ako magpakig-istorya parte sa espirituwal.” Ang isa pa ka hangkat amo ang pagpangita sang dalayunan. “Indi ko na maisip kon kapila na ako magsaylo sing apartment.” Wala sapayan sining mga balagbag, sia nagsiling: “Ang pagsaylo sa Rusya amo ang pinakamaayo ko nga desisyon.” Nagpaathag sia: “Natun-an ko nga magsalig pa gid kay Jehova sang nag-alagad ako diri kag naeksperiensiahan ko ang iya panuytoy sa madamo nga paagi.” Sang ulihi, gintangdo sia nga gulang kag espesyal payunir kag nagaalagad na sia subong sa sanga talatapan malapit sa St. Petersburg.

Sang 1999, naggradwar ang 25 anyos nga si Hiroo sa Ministerial Training School sa Japan, kag ang isa sa iya mga instruktor nagpalig-on sa iya nga mag-alagad sa iban nga pungsod. Nabatian niya nga daku ang kinahanglanon sa Rusya gani nagtuon sia sang Russian.  May ginhimo pa gid sia nga nakabulig sa iya. “Nagkadto ako sa Rusya sing anom ka bulan,” sugid niya. “Bangod grabe ang tigtulugnaw didto, nagkadto ako sang Nobiembre para mahibaluan ko kon masarangan ko ini.” Pagkatapos sadto, nagpauli sia sa Japan kag nagkabuhi sing simple para makasupot sing kuarta agod makabalik kag makatener sa Rusya.

Sanday Hiroo kag Svetlana

Dose na ka tuig sa Rusya si ­Hiroo kag nakaalagad na sa pila ka kongregasyon. Kon kaisa, may masobra 100 ka manugbantala sa isa ka kongregasyon kag sia lang ang gulang. Sa isa ka kongregasyon, kada semana, sia ang nagakuha sang halos tanan nga bahin sang Miting sa Serbisyo, nagadumala sang Teokratikong Eskwelahan Para sa Ministeryo, Pagtinuon sa Ang Lalantawan, kag limaka Pagtinuon sang Kongregasyon sa Libro. Madamo man sia sing gina-shepherding. Sa paghinumdom sadtong mga tinuig, si ­Hiroo nagsiling: “Makalilipay gid nga mabuligan ang mga kauturan nga mangin mabakod sa espirituwal.” Ano ang epekto sa iya sang pag-alagad kon diin mas daku ang kinahanglanon? Nagsiling sia: “Antes ako nagkadto sa Rusya, gulang ako kag payunir, pero nabatyagan ko sang pagkadto ko diri nga daw may bag-o ako nga kaangtanan kay Jehova. Natun-an ko nga magsalig pa gid kay Jehova sa tanan nga bahin sang akon kabuhi.” Sang 2005, ginpangasawa ni ­Hiroo si Svetlana, kag padayon sila nga nagpayunir.

Sanday Michael kag Olga upod nanday Marina kag Matthew

Taga-Canada si Matthew, nga 34 anyos, kag ang iya manghod nga si Michael, nga 28anyos. Nakakadto sila sa Rusya kag nakibot gid sa kadamuon sang mga interesado nga nagtambong sa mga miting pero pila lang ka utod ang nagadumala sa sini. Si Matthew nagsiling: “Ang kongregasyon nga ginkadtuan ko may 200 ka tumalambong, pero isa lang ka gulang nga may edad na kag lamharon nga ministeryal nga alagad ang nagadumala sang tanan nga miting. Bangod sini, gusto ko magsaylo didto kag buligan ini nga mga utod.” Nagsaylo sia sa Rusya sang 2002.

Apat ka tuig sang ulihi, nagsaylo sa Rusya si Michael kag nakita niya nga kinahanglan gihapon ang mga utod nga lalaki. Subong ministeryal nga alagad, gin-asayn sia sa pag-atipan sang kuenta, literatura, kag teritoryo. Ginpangabay man sia nga himuon ang hilikuton kuntani sang sekretaryo sang kongregasyon, magpamulongpulong publiko, kag magbulig sa pag-organisar sang mga asembleya kag pagtukod sing mga Kingdom Hall. Ang matuod, bisan subong, kinahanglan gihapon ang bulig sa mga kongregasyon. Bisan mabudlay ang pagtatap sa madamo nga asaynment, si Michael, nga gulang na subong, nagsiling: “Nalipay gid ako sa pagbulig sa mga kauturan. Amo gid ini ang pinakamaayo nga pagkabuhi!”

Ginpangasawa ni Matthew si Marina, kag ginpangasawa ni Michael si Olga. Ining duha ka mag-asawa, upod sa madamo pa nga handa magpangabudlay, padayon nga nagabulig sa nagadamo nga mga kongregasyon.

ANG MAKUGI NGA MGA SISTER NAGABULIG SA PAGPANGANI

Si Tatyana

Sang 1994, sang 16 anyos si Tatyana, anom ka espesyal payunir halin sa Czech Republic, Poland, kag Slovakia ang nag-alagad sa ila kongregasyon sa Ukraine. Nadumduman niya sila: “Makugi sila nga mga payunir nga mainabyanon kag mabuot, kag nahibaluan gid nila ang Biblia.” Nakita niya kon paano ginpakamaayo ni Jehova ang ila pagsakripisyo, kag nahunahuna niya, ‘Luyag ko man mangin pareho sa ila.’

Bangod napalig-on si Tatyana sang halimbawa sang mga payunir, kon bakasyon nagabantala sia upod sa iban sa malayo nga mga teritoryo sang Ukraine kag Belarus nga wala pa mabantalaan sang mga Saksi. Nanamian gid sia sadtong mga paglakbay amo nga nagplano sia nga pasangkaron ang iya ministeryo paagi sa pagsaylo sa Rusya. Una, nagtener sia didto sing makadali sa isa ka utod nga babayi nga halin sa iban nga pungsod kag nangita sia sing trabaho nga makasakdag sa iya pagpayunir. Sang ulihi, sang 2000, nagsaylo sia sa Rusya. Mabudlay bala ang iya kahimtangan?

Si Tatyana nagsiling: “Bangod indi ako makasarang magbayad sang apartment, nagaarkila lang ako sang  kuarto sa balay sang iban. Indi ini mahapos. May mga tion nga gusto ko na magpauli. Pero pirme ako ginbuligan ni Jehova nga mahangpan nga makabenepisyo ako kon padayunon ko ang pag-alagad.” Misyonera na subong sa Rusya si Tat­yana. Nagsiling sia: “Madamo ako sang hamili nga eksperiensia kag mga abyan sa sulod sang mga tinuig nga nagkadto ako sa iban nga pungsod. Labaw sa tanan, naglig-on pa gid ang akon pagtuo.”

Si Masako

Si Masako nga taga-Japan, singkwentahon na, kag handum gid niya halin sang una nga magmisyonera, pero ginaupangan sia sang iya balatian. Sang nag-ayoayo na ang iya pamatyag, namat-od sia nga magsaylo sa Rusya para magbulig sa pagpangani. Bisan mabudlay mangita sang maayo nga dalayunan kag obra, nasuportahan niya ang iya pagpayunir paagi sa pagtudlo sang Japanese kag pagpaninlo sa apartment. Ano ang nakabulig sa iya nga padayunon ang iya ministeryo?

Sa paghinumdom ni Masako sang masobra 14 ka tuig nga pag-alagad sa Rusya, sia nagsiling: “Ang kalipay nga naagom ko sa ministeryo amo ang nagdula sang kabudlayan nga naagihan ko. Ang pagbantala sa mga lugar nga daku ang kinahanglanon sang mga manugbantala sang Ginharian makapapagsik kag makalilipay.” Nagdugang pa sia: “Para sa akon, moderno nga milagro nga makita mismo kon paano ako gin-amanan ni Jehova sa sulod sang mga tinuig sang pagkaon, panapton, kag puluy-an.” Magluwas nga nagaalagad si Masako kon diin mas daku ang kinahanglanon sa Rusya, nakapakigbahin man sia sa pagpangani sa Kyrgyzstan. Dugang pa, nabuligan niya ang mga grupo nga nagagamit sang Ingles, Chinese, kag Uighur nga mga lenguahe. Nagapayunir sia subong sa St. Petersburg.

NAGSAKDAG ANG MGA PAMILYA KAG GINPAKAMAAYO SILA

Sanday Inga kag Mikhail

Bangod sang kapigaduhon, masami nga nagasaylo sa iban nga pungsod ang mga pamilya para mag-ayoayo ang ila kahimtangan sa materyal. Pero pareho nanday Abraham kag Sara sadto, ang pila ka pamilya nagsaylo sa iban nga pungsod bangod sang espirituwal nga mga tulumuron. (Gen. 12:1-9) Binagbinaga ang taga-Ukraine nga mag-asawa nga sanday Mikhail kag Inga nga nagsaylo sa Rusya sang 2003. Nakasapo dayon sila sang mga nagapangita sang kamatuoran sa Biblia.

 Si Mikhail nagsiling: “Isa ka bes, nagbantala kami sa lugar nga wala pa mabantalaan sang mga Saksi. May tigulang nga lalaki nga nagbukas sang puertahan kag namangkot, ‘Manugbantala bala kamo?’ Sang nagsabat kami nga huo, sia nagsiling: ‘Nahibaluan ko nga maabot gid man kamo sa pila ka adlaw. Indi puede nga indi matuman ang ginsiling ni Jesus.’ Ginkutlo dayon sang tawo ang Mateo 24:14.” Si Mikhail nagdugang: “Sa sina nga lugar, may nasapwan man kami nga isa ka grupo sang mga napulo ka Baptist nga babayi, nga sinsero nga nauhaw sa kamatuoran. May libro sila nga Mabuhi sing Dayon, kag kada semana ginagamit nila ini sa pagtuon sang Biblia. Pila ka oras nga ginsabat namon ang ila mga pamangkot kag nag-amba sang mga ambahanon sang Ginharian upod sa ila, kag nagdungan kami panyapon. Isa yadto sa pinakamaayo ko nga pagduaw.” Ugyon sanday Mikhail kag Inga nga ang pag-alagad sa mga lugar nga daku ang kinahanglanon sang mga manugbantala sang Ginharian nagpasuod pa gid sa ila kay Jehova, nagpatudok sang ila gugma sa mga tawo, kag naghatag sa ila sang makalilipay nga kabuhi. Nagaalagad sila subong sa sirkito.

Sanday Oksana, Aleksey, kag Yury

Sang 2007, sanday Yury kag Oksana, mag-asawa nga taga-Ukraine nga mga 35 anyos, kag ang ila bata nga si Aleksey nga 13 anyos subong, nagbisita sa sanga talatapan sa Rusya. Nakita nila didto ang mapa sang Rusya nga may malapad nga mga lugar nga wala sing Saksi. “Pagkatapos makita ang mapa,” siling ni Oksana, “narealisar namon nga may daku gid nga kinahanglanon sang mga manugbantala sang Ginharian. Nabuligan kami sini nga magdesisyon nga magsaylo sa Rusya.” Ano pa ang nakabulig sa ila? Si Yury nagsiling: “Ang pagbasa sang mga artikulo sa aton mga publikasyon subong sang ‘Makaalagad Bala Ikaw sa Iban nga Pungsod?’ nakabulig gid. * Ginkadtuan namon ang lugar sa Rusya nga ginpanugda sang sanga nga sayluhan namon kag nangita kami sing puluy-an kag trabaho.” Sang 2008, nagsaylo sila sa Rusya.

Sang primero, mabudlay mangita sang trabaho, kag pila ka beses nga nagsaylo sila sang apartment. Si Yury nagsiling: “Pirme kami nagapangamuyo nga indi maluyahan sing buot, kag nagpadayon kami sa pagbantala, nga nagasalig sa pagsakdag ni Jehova. Naeksperiensiahan namon kon paano niya kami gin-atipan sang gin-una namon ang mga intereses sang iya Ginharian. Ini nga pag-alagad nagpalig-on sang amon pamilya.” (Mat. 6:22, 33) Kag ano ang epekto sa pamatan-on nga si Aleksey sang ila pag-alagad kon diin mas daku ang kinahanglanon? “Daku ang nabulig sa iya,” siling ni Oksana. “Gindedikar niya ang iya kaugalingon kay Jehova kag nagpabawtismo sang nuebe anyos sia. Bangod nakita niya nga kinahanglan gid ang mga manugbantala sang Ginharian, napahulag sia nga mag-auxiliary payunir kon bakasyon. Nalipay gid kami nga makita ang iya gugma kag kakugi sa ministeryo.” Subong, espesyal payunir na sanday Yuri kag Oksana.

“ANG GINAHINULSULAN KO LANG”

Base sa ginsiling sining mga mangangani, ang pagsaylo sa iban nga lugar para pasangkaron ang imo ministeryo nagakinahanglan sang bug-os nga pagsalig kay Jehova. Ang matuod, ang mga nagaalagad kon diin mas daku ang kinahanglanon nakaatubang sang mga hangkat sa ila bag-o nga teritoryo, pero nakaeksperiensia man sila sang tuman nga kalipay kay napaambitan nila ang mga interesado sang maayong balita sang Ginharian. Makabulig ka bala sa pagpangani sa mga lugar nga daku pa ang kinahanglanon sang manugbantala sang Ginharian? Kon mamat-od ka nga himuon ini, mahimo magabatyag ka man pareho ni Yury, nga nagsiling parte sa iya desisyon nga mag-alagad kon diin mas daku ang kinahanglanon: “Ang ginahinulsulan ko lang amo nga wala ko ini ginhimo sadto pa.”

^ par. 20 Tan-awa ang Oktubre 15, 1999, nga Ang Lalantawan, pahina 23-27.