Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Hulyo 2015

Importante Bala kon Sin-o ang Nakakita sang Imo Hinimuan?

Importante Bala kon Sin-o ang Nakakita sang Imo Hinimuan?

INDI bag-uhan sanday Bezalel kag Oholiab sa pagpanukod. Bangod mga ulipon anay sila sa Egipto, mahimo nga gusto nila kalimtan ang paghimo nila sang madamo nga tisa sadto. Pero nagligad na yadto. Subong, mangin eksperto gid sila sa pagpanukod kay gin-asayn sila nga manguna sa pagtukod sang tabernakulo. (Ex. 31:1-11) Bisan pa amo sini, pila lang ang makakita sang ila matahom gid nga mga hinimuan. Maakig bala sila kay indi ini madayaw? Importante gid bala kon sin-o ang nakakita sang ila hinimuan? Importante bala kon sin-o ang nakakita sang imo hinimuan?

MATAHOM NGA MGA HINIMUAN NGA PILA LANG ANG NAKAKITA

Ang pila ka kagamitan sa tabernakulo tuman gid katahom. Halimbawa, binagbinaga ang bulawan nga mga kerubin sa ibabaw sang kaban sang katipan. Ginlaragway ini ni apostol Pablo nga “mahimayaon.” (Heb. 9:5) Imadyina ang tumalagsahon nga katahom sadtong sinalsal nga bulawan nga mga kerubin!—Ex. 37:7-9.

Kon makita subong ang mga ginhimo nanday Bezalel kag Oholiab, nagakabagay gid ini nga i-displey sa pinakamaayo nga mga museo nga madayaw sang mga tawo. Pero sang ginhimo ini sang una, pila gid bala ang nakakita sang katahom sini? Ang mga kerubin ara sa Labing Balaan; gani ang mataas nga saserdote lamang ang makakita sini kon magsulod sia makaisa kada tuig, kon Adlaw sang Pagtumbas Para sa Sala. (Heb. 9:6, 7) Gani, pila gid lang ka tawo ang nakakita sini.

KONTENTO BISAN INDI KILALA

Kon ikaw si Bezalel ukon si Oholiab nga nagpangabudlay gid sa paghimo sining matahom nga mga butang, ano ang batyagon mo kay nahibaluan mo nga pila lang ang nakakita sini? Subong, nagabatyag ang pila nga nangin madinalag-on sila kon dayawon sila sang ila mga kaupod. Para sa ila, amo ini ang talaksan nga maayo ang ila mga hinimuan. Pero tuhay ang mga alagad ni Jehova. Pareho nanday Bezalel kag Oholiab, kontento kita nga himuon ang kabubut-on ni Jehova kag kahamut-an niya.

Sang tion ni Jesus, kinaandan na para sa mga lider sang relihion nga mangamuyo para dayawon sang iban. Pero tuhay ang ginrekomendar ni Jesus: Mangamuyo sing sinsero kag indi maghandum nga  dayawon sang mga makakita. Ang resulta? “Ang inyo Amay nga nagatan-aw sa tago magapadya sa inyo.” (Mat. 6:5, 6) Maathag nga ang importante amo ang ginahunahuna ni Jehova sa aton mga pangamuyo, indi ang ginahunahuna sang iban. Ang iya opinyon amo gid ang nagapakahamili sang aton mga pangamuyo. Matuod man ini sa ginahimo naton sa aton sagrado nga pag-alagad. Wala kita nagabatyag nga importante ang aton hinimuan kay ginadayaw kita sang iban; sa baylo nagapahalipay ini kay Jehova, “nga nagatan-aw sa tago.”

Sang nahuman ang tabernakulo, “naglikop ang panganod sa tolda nga tilipunan, kag napuno sang himaya ni Jehova ang tabernakulo.” (Ex. 40:34) Maathag gid ini nga pamatuod sang kahamuot ni Jehova! Ano sa banta mo ang ginbatyag nanday Bezalel kag Oholiab sina nga tion? Bisan pa nga wala gintigib ang ila ngalan sa ila mga hinimuan, mahimo nga nalipay sila kay ginpakamaayo sang Dios ang ila mga panikasog. (Hulu. 10:22) Pagligad sang mga tinuig, pat-od nga nalipay sila nga makita nga padayon nga ginagamit sa pag-alagad kay Jehova ang ila mga hinimuan. Kon mabanhaw sanday Bezalel kag Oholiab sa bag-ong kalibutan, wala sing duhaduha nga malipay sila nga mahibaluan nga gingamit ang tabernakulo sa matuod nga pagsimba sing mga 500 ka tuig!

Bisan pa wala sing tawo nga makakita sa imo mapainubuson kag kinabubut-on nga pag-alagad, makita ini ni Jehova!

Sa organisasyon ni Jehova subong, ang mga animator, artist, musikero, retratista, translator, kag manunulat nagapangabudlay nga wala makilala. Daw subong bala nga wala sing “nakakita” sang ila ginahimo. Amo man sini ang madamo nga hilikuton sa masobra 110,000 ka kongregasyon sa bug-os nga kalibutan. Sin-o ang nakakita nga ginasulatan sang accounts servant ang mga pormas sa tapos sang kada bulan? Sin-o ang nagatan-aw kon ginasulatan sang sekretaryo ang pormas para sa report sang kongregasyon sa pag-alagad? Sin-o ang nakakita sang utod nga nagakay-o sang Kingdom Hall?

Sang magtigulang sanday Bezalel kag Oholiab, wala sila sing mga tropeo, medalya, ukon plake para ipadayawdayaw ang ila matahom nga mga desinyo kag kalidad sa pagtukod. Pero may natigayon sila nga mas bilidhon pa—ang kahamuot ni Jehova. Makasalig kita nga nakita ni Jehova ang ila hinimuan. Kabay nga ilugon naton ang ila halimbawa sang mapainubuson kag kinabubut-on nga pag-alagad.