Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2015

Palangga Niya ang mga Tawo

Palangga Niya ang mga Tawo

“Mas nalipay ako sa mga anak sang mga tawo.”HULU. 8:31.

1, 2. Ano ang pamatuod nga palangga gid ni Jesus ang mga tawo?

ANG panganay nga Anak sang Dios amo ang una kag pinakadaku nga halimbawa sang indi matungkad nga kaalam ni Jehova. Sia ang ginpersonipikar nga kaalam, ang “batid nga manugpangabudlay” nga kaupod sang iya Amay. Mahanduraw naton ang iya kalipay sang “ginhimo [sang iya Amay] ang kalangitan” kag “ginpasad niya ang mga sadsaran sang duta.” Ginaapresyar sang panganay nga Anak sang Dios ining mga butang, pero “mas nalipay [sia] sa mga anak sang mga tawo.” (Hulu. 8:22-31) Huo, nalipay na si Jesus sa mga tawo ukon palangga na niya sila bisan sang didto pa sia sa langit.

2 Sang ulihi, ginpamatud-an sang panganay nga Anak sang Dios ang iya pagkamainunungon kag gugma sa iya Amay, kag ang iya pagpalangga “sa mga anak sang mga tawo,” sang kinabubut-on nga “ginbiyaan niya ang tanan” kag nangin kaangay sang tawo. Ginhimo niya ini para maaman ang “gawad kabaylo sang madamo.” (Fil. 2:5-8; Mat. 20:28) Palangga gid niya ang mga tawo! Sang yari si Jesus sa duta, ginhatagan sia sang Dios sing gahom sa paghimo sang mga milagro nga nagapakita nga palangga gid niya sila. Paagi sa sini, ginpakita ni Jesus ang dalayawon  nga mga butang nga malapit na matabo sa bug-os nga duta.

3. Ano ang binagbinagon naton subong?

3 Sang yari si Jesus sa duta, nagbantala man sia sang “maayong balita sang Ginharian sang Dios.” (Luc. 4:43) Nahibaluan niya nga ini nga Ginharian magapakabalaan sang ngalan sang iya Amay kag magasolbar sing dayon sa tanan nga problema sang tawo. Indi katingalahan nga makita sa iya pagbantala ang pamatuod nga nabalaka gid sia sa mga tawo. Ngaa importante ini sa aton? Bangod ang matun-an naton sa sini makahatag sa aton sing pagsalig kag paglaum sa palaabuton. Binagbinagon naton ang apat ka milagro ni Jesus.

‘GINHATAGAN SIA SANG GAHOM SA PAGPANG-AYO’

4. Ilaragway ang natabo sang nakita ni Jesus ang aruon.

4 Masako si Jesus sadto sa iya ministeryo sa Galilea. Sa isa ka siudad didto, nakita niya ang makaluluoy nga tawo. (Mar. 1:39, 40) Yara sa atubang niya ang tawo nga may makangilil-ad nga balatian nga aro. ­Bilang pamatuod nga malala na ini nga balatian, ginlaragway sia sang doktor nga si Lucas nga “puno sang aro.” (Luc. 5:12) “Sang nakita niya si Jesus, naghapa [ang aruon] kag nagpakiluoy sa iya: ‘Ginuo, kon luyag mo gid, matinluan mo ako.’” Wala nagduhaduha ang tawo nga may gahom si Jesus sa pag-ayo sa iya, pero dapat niya mahibaluan kon gusto gid bala ni Jesus nga buligan sia? Ano ang himuon ni Jesus sa sining tinagipusuon nga pangabay? Ano ang ginahunahuna ni Jesus samtang ginatulok niya ang tawo nga mahimo naguba na ang hitsura? Mangin pareho bala sia sa mga Fariseo nga wala na sing kaluoy sa mga nagaantos sini nga balatian? Ano ayhan ang himuon mo?

5. Ngaa nakasiling si Jesus sing “Luyag ko!” sang gin-ayo niya ang aruon?

5 Mahimo gid nga wala nagsinggit ining aruon sing “Indi ako matinlo, indi ako matinlo!” suno sa ginapatuman sang Mosaikong Kasuguan. Pero wala na ini ginmuno ni Jesus. Sa baylo, nabalaka sia sa tawo mismo kag sa kinahanglanon sini. (Lev. 13:43-46) Wala kita makahibalo kon ano gid ang ginhunahuna ni Jesus, pero nakahibalo kita kon ano ang iya ginbatyag. Bangod sa kaluoy, naghimo sia sang milagro. Gintandog niya ang aruon kag nagsiling nga may kalig-on kag sing maluluy-on: “Luyag ko! Magmatinlo ka.” Dayon “nag-ayo sia sa iya aro.” (Luc. 5:13) Yara gid ang gahom ni Jehova—indi lamang para mahimo sang Cristo ini nga milagro kundi para man mapakita ni Jesus nga palangga gid niya ang mga tawo.Luc. 5:17.

6. Ano ang talalupangdon sa mga milagro nga ginhimo ni Jesus, kag ano ang ginapakita sini?

6 Ginhatagan sang Dios si Jesucristo sing gahom sa paghimo sang madamo kag tumalagsahon nga mga milagro. Gin-ayo niya indi lang ang aro kundi ang tanan nga sahi sang balatian kag diperensia sa lawas. Ang Biblia nagsiling sa aton: “Natingala gid ang mga tawo sang makita nila nga ang mga apa makahambal na, ang mga baldado nag-ayo na, ang mga piang makalakat na, kag ang mga bulag makakita na.” (Mat. 15:31) Sa karon, ang mga doktor kon kaisa naga-transplant sang mga organo para mag-ayo ang ila pasyente. Pero gin-ayo mismo ni Jesus ang mga organo nga may balatian! Kag nag-ayo sa gilayon ang mga tawo, kon kaisa bisan malayo pa sila sa iya. (Juan 4:46-54) Ano ang ginapakita sining talalupangdon nga mga halimbawa? Nga si Jesus, bilang Hari na sa langit, wala lamang sing gahom para dulaon sing dayon ang tanan nga balatian kundi gusto gid niya ini himuon.  Ang paghibalo kon paano gintratar ni Jesus ang mga tawo nagapasalig sa aton nga sa bag-o nga kalibutan, matuman ang tagna sang Biblia: “Kaluy-an niya ang kubos kag ang imol.” (Sal. 72:13) Sa sina nga tion, ayuhon ni Jesus ang tanan nga nagaantos bangod gusto gid niya ini himuon.

“BANGON KA, DAL-A ANG IMO HILIGDAAN KAG MAGLAKAT”

7, 8. Ilaragway ang mga hitabo antes nakita ni Jesus ang paralisado nga tawo sa punong sang Bethzatha.

7 Nagligad ang pila ka bulan pagkatapos makita ni Jesus ang aruon sa Galilea. Halin didto, nagkadto si Jesus sa Judea sa pagbantala sang maayong balita sang Ginharian sang Dios. Linibo ang natandog sang mensahe ni Jesus kag sang iya ginhimo. Maathag nga gusto gid niya ipahayag ang maayong balita sa mga imol, ibantala ang kahilwayan sa mga bihag, kag bugkusan ang pilas sang mga nagakalisod.Isa. 61:1, 2; Luc. 4:18-21.

8 Bulan sadto sang Nisan. Nagkadto si Jesus sa Jerusalem para sa Paskua sa pagtuman sa sugo sang iya Amay. Masako ang siudad samtang nagainabot ang mga tawo para sa sining sagrado nga kapiestahan. Yara sa aminhan lang nayon sang templo ang punong nga ginatawag Beth­za­tha, kag didto nakita ni Jesus ang tawo nga may balatian.

9, 10. (a) Ngaa nagakadto ang mga tawo sa punong sang Beth­za­tha? (b) Ano ang ginhimo ni Jesus sa punong, kag ano ang ginatudlo sini sa aton? (Tan-awa ang piktyur sa umpisa sini nga artikulo.)

9 Madamo nga may balatian ang nagakadto sa Beth­za­tha. Ngaa? Sa wala mahibaluan nga rason, nagapati sila nga kon ang nagabalatian nga tawo magpanaug sa punong samtang nagalabugay ang tubig, milagruso sia nga magaayo. Imadyina ang kahimtangan didto! Ang mga tawo desperado, nabalaka, kag nalugaw-an. Pero ngaa nagkadto didto si Jesus kay himpit sia kag wala sing balatian? Bangod ini sang iya kaluoy sa mga tawo. Gani ginpalapitan ni Jesus ang tawo nga nagabalatian na antes pa nangin tawo si Jesus sa duta.Basaha ang Juan 5:5-9.

10 Mahanduraw mo bala ang kasubo sa mga mata sini nga tawo sang ginpamangkot sia ni Jesus kon gusto niya mag-ayo? Nagsabat sia dayon. Gusto niya mag-ayo pero wala sia makahibalo kon paano, kay wala sing makabulig sa iya para makapanaug sa punong. Ginsugo sia dayon ni Jesus nga himuon ang imposible—dal-on ang iya hiligdaan kag maglakat. Gintuman sang tawo si Jesus, gindala niya ang iya hiligdaan kag naglakat. Makalilipay gid ini nga laragway sang pagahimuon ni Jesus sa bag-o nga kalibutan! Sa sini nga milagro, makita man naton ang iya kaluoy. Ginpangita niya ang mga nagakinahanglan sing bulig. Ang halimbawa ni Jesus dapat magpahulag sa aton nga padayon nga pangitaon ang mga tawo sa aton teritoryo nga nasubuan sa malain nga mga nagakatabo sa sini nga kalibutan.

“SIN-O ANG NAGTANDOG SA AKON BAYO?”

11. Paano ginpadaku sang Marcos 5:25-34 ang kaluoy ni Jesus sa mga nagabalatian?

11 Basaha ang Marcos 5:25-34. Dose na ka tuig nga nagaantos ang babayi sang makahuluya nga balatian. Ang iya balatian may epekto sa tanan nga bahin sang iya kabuhi, pati na sa iya pagsimba. “Nag-antos gid sia sa pagpabulong sa madamo nga manugbulong kag naubos ang tanan niya nga manggad,” pero naglubha pa gid ang iya balatian. Isa ka adlaw, may ginplano sia para mag-ayo. Nagpalapit sia kay Jesus. Nagpanagil-ot sia sa kadam-an kag gintandog ang bayo ni Jesus. (Lev. 15:19, 25) Nabatyagan ni Jesus nga may gahom nga naggua sa iya, gani namangkot sia kon sin-o ang nagtandog sa iya.  Ang babayi nga “nagakurog sa kahadlok” “naghapa sa atubangan niya. Dayon ginsugid niya sa iya ang tanan nga natabo.” Nahibaluan ni Jesus nga gin-ayo sang iya Amay nga si Jehova ang babayi, gani mainayuhon sia nga nagsiling sa iya: “Anak, ang imo pagtuo nag-ayo sa imo. Lakat ka nga may paghidait. Nag-ayo ka na sa imo balatian.”

Paagi sa iya mga milagro, ginpakita ni Jesus nga nabalaka gid sia sa aton kag sa aton mga problema (Tan-awa ang parapo 11 kag 12)

12. (a) Sa aton nabinagbinag, paano mo ilaragway si Jesus? (b) Ano nga halimbawa ang ginpakita ni Jesus sa aton?

12 Mainayuhon gid si Jesus! Makita naton nga palangga gid niya ang mga nagabalatian. Gusto ni Satanas nga magpati kita nga wala sing nagapalangga sa aton kag wala kita sing pulos. Pero paagi sa mga milagro ni Jesus, maathag niya nga ginpakita nga nabalaka gid sia sa aton kag sa aton mga problema. Isa gid sia ka Hari kag Mataas nga Saserdote nga may simpatiya sa aton! (Heb. 4:15) Mahimo nga nabudlayan kita sa pag-­intiende sa ginabatyag sang madugay na nga nagabalatian, ilabi na kon wala pa naton ini maeksperiensiahan. Dumdumon naton nga nahangpan ni Jesus ang mga nagabalatian bisan wala gid sia kaagi masakit. Kabay pa nga ilugon naton ang halimbawa ni Jesus sa aton bug-os nga masarangan.1 Ped. 3:8.

“NAGTULO ANG LUHA NI JESUS”

13. Ano ang ginatudlo sa aton parte sa personalidad ni Jesus sang ginbanhaw niya si Lazaro?

13 Natandog ang tagipusuon ni Jesus sang kasakit nga ginabatyag sang iban. Bangod sang kasubo sang iban sang napatay ang iya abyan nga si Lazaro, “natandog gid ang tagipusuon ni Jesus kag natublag sia.” Amo sini ang iya ginbatyag bisan pa nakahibalo sia nga banhawon niya si Lazaro. (Basaha ang Juan 11:33-36.) Wala nahuya si Jesus nga makita sang iban ang iya balatyagon. Nakita sang iban nga palangga gid niya  si Lazaro kag ang iya pamilya. Daku gid nga kaluoy ang ginpakita ni Jesus sang gin­gamit niya ang gahom nga ginhatag sang Dios sa pagbanhaw sa iya abyan!Juan 11:43, 44.

14, 15. (a) Ano ang nagapakita nga gusto gid dulaon ni Jehova ang pag-antos sang tawo? (b) Ano ang matun-an naton sa ekspresyon nga “handumanan nga mga lulubngan”?

14 Ginlaragway sang Biblia si Jesus subong “ang sibu nga larawan” sang kinaugali mismo sang Manunuga. (Heb. 1:3) Gani, paagi sa mga milagro ni Jesus, ginpakita niya nga gusto gid niya kag sang iya Amay nga dulaon ang kasakit bangod sang balatian kag kamatayon. Madamo pa ang gusto nila banhawon, magluwas sa pila nga narekord sa Biblia. Nagsiling si Jesus: “Magaabot ang tion nga ang tanan nga yara sa handumanan nga mga lulubngan . . . magagua.”Juan 5:28, 29.

15 Nagakaigo gid ang paggamit ni Jesus sang ekspresyon nga “handumanan nga mga lulubngan,” kay nadalahig ang memorya sang Dios. Ang Labing Gamhanan nga Dios, ang Isa nga nagtuga sang bug-os nga uniberso, makadumdom sang tanan nga detalye parte sa napatay naton nga mga hinigugma, pati ang ila personalidad. (Isa. 40:26) Indi lang nga madumduman niya ini kundi gusto gid niya kag sang iya Anak nga dumdumon ini. Ginapakita sang pagbanhaw kay Lazaro kag sa iban pa nga narekord sa Biblia ang matabo sa bilog nga duta sa bag-o nga kalibutan.

ANG MATUN-AN NATON SA MGA MILAGRO NI JESUS

16. Ano ang mangin pribilehiyo sang madamo nga nagahupot sang Cristianong integridad subong?

16 Kon huptan naton ang aton Cristianong integridad, mahimo naton masaksihan ang isa sa pinakadaku nga mga milagro nga matabo—ang milagro nga makalampuwas sa dakung kapipit-an. Pagkatapos sang inaway sa Armageddon, madamo pa nga milagro ang matabo, kag may maayo na nga panglawas ang tanan nga tawo. (Isa. 33:24; 35:5, 6; Bug. 21:4) Imadyina ang mga tawo nga wala na nagakinahanglan sang mga antipara, baston, saklay, wheelchair, kag hearing aid. Pahanabuon ni Jehova nga may maayo nga panglawas ang mga makalampuwas sa Armageddon. Kinahanglan ini bangod madamo sila sing pagahimuon. Malipay sila nga himuon nga paraiso ang aton bilog nga planeta, nga isa ka regalo sang Dios.Sal. 115:16.

17, 18. (a) Ngaa naghimo si Jesus sang mga milagro? (b) Ngaa dapat gid ikaw magpanikasog para makasulod sa bag-o nga kalibutan sang Dios?

17 Ang pagpang-ayo ni Jesus sang una nagapalig-on sa “daku nga kadam-an” subong, kag ginapabakod pa gid sini ang ila makalilipay nga paglaum nga ayuhon sa tanan nga balatian. (Bug. 7:9) Makita sa sini nga pagpang-ayo nga palangga gid sang panganay nga Anak sang Dios ang mga tawo. (Juan 10:11; 15:12, 13) Ginalaragway sang kaluoy ni Jesus ang pag-ulikid ni Jehova sa tagsa niya ka alagad.Juan 5:19.

18 Ang mga tawo nagaantos, puno sing kasakit, kag nagakapatay. (Roma 8:22) Kinahanglan naton ang bag-o nga kalibutan sang Dios, diin wala na sang balatian suno sa iya ginpromisa. Ang Malaquias 4:2 nagapasalig sa aton nga ang mga pagaayuhon “magaluksolukso” nga nakunyag kag malipayon bangod ginhimpit na sila. Kabay nga ang pagpasalamat naton sa Dios kag ang pagtuo sa iya mga promisa magpahulag sa aton nga himuon ang kinahanglanon para mangin kalipikado kita sa sina nga bag-o nga kalibutan. Makapalig-on gid mahibaluan nga ang mga milagro nga ginhimo ni Jesus sang yari sia sa duta naglaragway sang permanente nga kaumpawan sa mga tawo sa idalom sang iya Mesianiko nga paggahom!