Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Hunyo 2015

Makapabilin Kita nga Matinlo

Makapabilin Kita nga Matinlo

“Tinlui ang inyo mga kamot, . . . kag putlia ang inyo tagipusuon.”SANT. 4:8.

1. Ano ang pagtamod sang kalibutan sa katinlo?

MADAMO ang wala nagapabalor sa katinlo ukon kaputli. Matuod gid ini subong. Sa madamo nga pungsod, normal lang ang homoseksuwalidad kag ang pagpakigsekso sang wala makasal. Ginapalig-on pa gani ini sa mga pasayod kag kalingawan. (Sal. 12:8) Bangod lapnag na gid ang imoralidad, mahimo mamangkot ka, ‘Posible gid bala ang matinlo nga pagkabuhi?’ Ang aton pat-od nga sabat, Huo, sa bulig ni Jehova, makapabilin nga matinlo ang matuod nga mga Cristiano.Basaha ang 1 Tesalonica 4:3-5.

2, 3. (a) Ngaa importante nga batuan ang indi matinlo nga mga handum? (b) Ano ang binagbinagon naton sa sini nga artikulo?

2 Pero, dapat anay naton batunon nga para magkabuhi nga matinlo, dapat naton isikway ang imoral nga mga handum. Pareho sa isda nga nagapalapit sa paon, mahimo man maganyat ang isa ka Cristiano sa imoral nga mga panghunahuna kag handum—kon indi ini dayon pagsikwayon. Makaganyat ini sa aton makasasala nga unod kag magdul-ong sa imoral nga mga buhat. Sa ulihi, tuman na kabaskog sang ganyat sang sala amo nga ang indi matinlo nga handum magapanamkon. Sa sini nga kahimtangan, bisan ang alagad ni Jehova mahimo handa na nga himuon ang iya handum kon may kahigayunan.  Huo, “ang kailigbon . . . nagabun-ag sang sala.”Basaha ang Santiago 1:14, 15.

3 Makapahunahuna gid kon paano ang umalagi nga handum mangin serioso nga sala. Pero makapalig-on nga mahibaluan nga kon likawan naton nga manggamot ang indi matinlo nga mga handum, indi kita makahimo sing imoral nga buhat kag mag-antos sang malain nga resulta sini! (Gal. 5:16) Binagbinagon naton ang tatlo ka butang nga makabulig sa aton para mabatuan ang indi matinlo nga mga handum: ang aton kaangtanan kay Jehova, ang laygay sang iya Pulong, kag ang bulig sang hamtong nga mga masigka-Cristiano.

“MAGPALAPIT KAMO SA DIOS”

4. Ngaa importante nga magpalapit kay Jehova?

4 Amo ini ang ginasiling sang Biblia sa mga gusto ‘magpalapit sa Dios’: “Tinlui ang inyo mga kamot, . . . kag putlia ang inyo tagipusuon.” (Sant. 4:8) Kon ginapabaloran naton ang aton pagpakig-abyan kay Jehova, panikasugan naton nga pahamut-an sia sa tanan nga bahin sang aton kabuhi, pati ang aton ginahunahuna. Matigayon naton ang ‘matinlo nga tagipusuon’ paagi sa pagpokus sang aton hunahuna sa matinlo, maayo, kag dalayawon nga butang. (Sal. 24:3, 4; 51:6; Fil. 4:8) Matuod, nahangpan ni Jehova nga indi kita himpit. Nahibaluan niya nga mahimo kita maghunahuna sang indi nagakaigo nga mga handum. Pero nahibaluan naton nga mapasubo naton sia kon pasundan lang naton ang sayop nga panghunahuna sa baylo nga panikasugan gid nga sikwayon ini. (Gen. 6:5, 6) Ang pagpamalandong sa sini magabulig sa aton nga mangin determinado gid nga huptan ang matinlo nga panghunahuna.

5, 6. Paano makabulig ang pangamuyo para mabatuan naton ang imoral nga mga handum?

5 Mapakita naton nga nagasalig kita sing bug-os kay Jehova kon ginapangamuyo naton pirme nga mapakigbatuan ang indi matinlo nga mga panghunahuna. Kon nagapalapit kita kay Jehova sa pangamuyo, nagapalapit man sia sa aton. Bugana niya nga ginahatag ang iya balaan nga espiritu, nga magapabakod sang aton pamat-od nga sikwayon ang imoral nga panghunahuna kag magpabilin nga matinlo. Gani ipahibalo naton sa Dios ang aton hanuot nga handum nga pahamut-an sia paagi sa aton ginapamalandungan. (Sal. 19:14) Mapainubuson bala naton nga ginapangabay nga usisaon niya kita para mahibaluan naton kon may ‘malaut kita nga panimuot’—indi nagakaigo nga handum ukon huyog—nga makadul-ong sa aton sa pagpakasala? (Sal. 139:23, 24) Pirme bala naton sia ginapangabay nga buligan kita nga mahuptan ang aton integridad kon ginasulay kita?Mat. 6:13.

6 Bangod sang pagpadaku sa aton ukon sang aton nagligad, mahimo nga nanamian kita sa paghimo sang mga butang nga ginapakamalaut ni Jehova. Pero mabuligan niya kita gihapon nga magbag-o para padayon naton sia nga maalagad sa paagi nga luyag niya. Nahibaluan ini ni Hari David. Sa tapos nga nakighilahi si David kay Bat-seba, nakiluoy sia kay Jehova: “Putlia ang akon tagipusuon, kag hatagi ako sing bag-o kag malig-on nga espiritu.” (Sal. 51:10, 12) Mahimo nga makagalanyat gid ang paghimo sang sala bangod indi kita himpit, pero mahatagan kita ni Jehova sing espiritu ukon handum nga handa sa pagtuman sa iya. Bisan pa daw nanggamot na gid sa aton ang sayop nga mga handum kag daw buslan sini ang aton matinlo nga panghunahuna, matuytuyan kita ni Jehova nga tumanon ang iya mga sugo kag magmadinalag-on sa pagkabuhi sa sini. Mabuligan niya kita nga indi madaug sang bisan ano nga makahalalit.Sal. 119:133.

Kon magtubo ang umalagi nga sayop nga handum kag manggamot sa aton, dapat naton ini gabuton (Tan-awa ang parapo 6)

“MANGIN MGA MANUGTUMAN KAMO SANG PULONG”

7. Paano makabulig ang Pulong sang Dios para masikway naton ang indi matinlo nga panghunahuna?

7 Masabat ni Jehova ang aton mga panga muyo nga buligan kita paagi sa iya Pulong, ang Biblia. Ang kaalam sa Pulong sang Dios “una sa tanan putli.” (Sant. 3:17) Ang pagbasa sa Biblia kada adlaw kag ang pagpamalandong sa nabasa naton makabulig sa aton nga mabatuan ang imoral nga panghunahuna. (Sal. 19:7, 11; 119:9, 11) Isa pa, may mga halimbawa kag espesipiko nga mga laygay sa Biblia nga makabulig sa aton nga masikway ang indi matinlo nga mga handum.

8, 9. (a) Ngaa nakahimo sang seksuwal nga imoralidad ang pamatan-on nga lalaki sa imoral nga babayi? (b) Sa ano nga mga sitwasyon subong maaplikar ang paandam sa Hulubaton kapitulo 7?

8 Sa Hulubaton 5:8, mabasa naton: “Magpalayo kamo sa [imoral nga babayi]; indi kamo magpalapit sa ganhaan sang iya balay.” Ang katalagman kon balewalaon ini nga laygay ginlaragway sa Hulubaton kapitulo 7, diin mabasa naton ang parte sa pamatan-on nga lalaki nga naglakatlakat malapit sa balay sang imoral nga babayi. Gab-i na sadto. Sa ginsang-an sang dalan, ginpalapitan sia sang babayi nga mahimo nagasuksok sang bayo nga makapulukaw. Ginkaptan sia sang babayi kag ginhalukan. Napukaw ang iya balatyagon nga daw indi niya mapunggan bangod sang nagapanghaylo nga panghambal sang babayi. Nakahimo sila sang seksuwal nga imoralidad. Maathag nga wala ginplano sini nga pamatan-on nga maghimo sang imoralidad. Wala sia sing eksperiensia kag indi maalamon. Pero  naani niya ang makahalalit nga resulta sang iya ginhimo. Kon wala lang sia kuntani nagpalapit sa babayi!Hulu. 7:6-27.

9 Mahimo bala nga indi man kita maalamon kon kaisa kag makapalapit sa makatalagam nga mga sitwasyon nga makapukaw sang sayop nga mga handum? Halimbawa, kon gab-i, mahimo ginapagua sa telebisyon ang imoral nga mga programa. Ano abi kon ginasaylosaylo naton ang channel para tan-awon kon ano ang nagagua? Ukon basi sige lang kita klik sang mga link sa Internet ukon nagakadto sa mga chat room kag site nga may mga link sa pornograpiya ukon iban pa nga imoral nga pasayod. Mahimo bala nga sa sini nga mga kahimtangan makakita kita sang butang nga makapukaw sang indi nagakaigo nga mga handum kag indi na kita makapabilin nga matinlo?

10. Ngaa makatalagam ang pagpakiat? (Tan-awa ang piktyur sa umpisa sini nga artikulo.)

10 Ginabuligan man kita sang Biblia paagi sa paghatag sing laygay kon paano makig-angot sa tuhay sing sekso. (Basaha ang 1 Timoteo 5:2.) Ginadumilian sini ang pagpakiat ukon pagpa-flirt. Abi sang iban indi makahalalit ang giho sang lawas, senyas, kag pasiplat nga may motibo basta wala lang nagatanduganay. Pero ang pagpakiat, ukon ang pagbalos sa sini, makapukaw sang indi matinlo nga panghunahuna nga makadul-ong sa paghimo sang seksuwal nga imoralidad. Natabo na ini sang una—mahimo ini matabo liwat.

11. Anong maayo nga halimbawa ang ginpakita ni Jose?

11 Nagpakita si Jose sang isa ka maayo nga halimbawa. Sang ginganyat sia sang asawa sang iya agalon nga si Potifar, ginlikawan niya ini. Pero wala mag-untat ang asawa ni Potifar. Adlaw-adlaw niya nga ginahambalan si Jose nga updan sia. (Gen. 39:7, 8, 10) Suno sa isa ka iskolar sa Biblia, daw nagasiling ang asawa ni Potifar: “‘Updi lang ko bala bisan kadali lang,’ kay para sa iya handumon man sia [ni Jose].” Pero determinado si Jose nga indi pagsapakon, ukon pagpasugtan, ang iya pangganyat. Ginsikway ni Jose ang iya pagpakiat, kag wala man sia magpakiat sa iya, gani wala gid sing sayop nga handum nga nagtubo sa tagipusuon ni Jose. Sang ginpilit niya si Jose nga makigsekso sa iya, naghulag gilayon si Jose. “Nabilin ang iya bayo sa asawa sang iya agalon kag nagpalagyo sia.”Gen. 39:12.

12. Paano naton mahibaluan nga ang aton ginatulok may epekto sa aton tagipusuon?

12 Ginapaandaman man kita sang Biblia sang katalagman sa pagtugot sa aton mata nga mapatalang ang aton tagipusuon. Ang ginatulok sang aton mata makapukaw ukon makapabaskog sang sayop nga seksuwal nga mga handum. Nagpaandam si Jesus nga “ang bisan sin-o nga nagatulok sa isa ka babayi kag nagahandum sa pagpakighilahi sa iya, nakapakighilahi na sa iya tagipusuon.” (Mat. 5:28) Dumduma ang natabo kay Hari David. “Halin sa atop nakita niya ang isa ka . . . babayi nga nagapaligo.” (2 Sam. 11:2) Wala niya ginliso ang iya panulok kag panghunahuna sa iban nga butang. Gani ginhandum niya ang babayi nga asawa sang iban kag nakighilahi sa iya.

13. Ngaa dapat kita ‘makigkatipan sa aton mga mata,’ kag ano ang nadalahig sa sini?

13 Agod mabatuan ang imoral nga mga pantasya, dapat kita ‘makigkatipan sa aton mga mata,’ pareho sa ginhimo sang matutom nga si Job. (Job 31:1, 7, 9) Dapat gid kita mamat-od nga kontrolon ang aton mata nga indi magtulok sa iban nga may kaibog. Iliso dayon naton ang aton panulok kon makakita kita sang imoral nga mga laragway sa kompyuter, sa billboard, sa kober sang magasin, ukon sa iban pa.

14. Ano ang dapat naton himuon para makapabilin nga matinlo?

14 Kon nakita mo base sa nabinagbinag na  nga kinahanglan mo pa gid pakigbatuan ang sayop nga mga handum, maghimo gilayon sing pagbag-o. Mangin handa sa pagsunod sa laygay sang Pulong sang Dios, nga makabulig sa imo nga malikawan ang paghimo sang sala, gani makapabilin ka nga matinlo.Basaha ang Santiago 1:21-25.

‘MAGTAWAG SANG MGA GULANG’

15. Kon nagapakigbato kita sa indi matinlo nga mga handum, ngaa dapat kita mangayo sang bulig?

15 Kon nagapakigbato kita sa sayop nga seksuwal nga mga handum, makabulig man ang aton mga masigka-Cristiano. Matuod, indi mahapos isugid sa iban ang aton personal nga mga problema. Pero kon maisugon kita nga mangayo sing bulig sa isa ka hamtong nga Cristiano, malikawan naton nga pakamatarungon ang sayop nga mga handum. (Hulu. 18:1; Heb. 3:12, 13) Ang pagsugid sang aton kaluyahon sa isa ka hamtong sa espirituwal nga Cristiano makabulig sa aton nga mahibaluan kon ano nga pagbag-o ang dapat naton himuon. Makabulig ini agod makahimo sing mga pagbag-o para makapabilin kita sa gugma ni Jehova.

16, 17. (a) Paano makabulig ang mga gulang sa mga nagapakigbato sa indi matinlo nga mga handum? Iilustrar. (b) Ngaa dapat magpabulig dayon ang mga nagatan-aw sang pornograpiya?

16 Kalipikado gid ang Cristiano nga mga gulang sa pagbulig sa aton. (Basaha ang Santiago 5:13-15.) Isa ka pamatan-on nga lalaki sa Brazil ang tinuig nga nagpakigbato sa sayop nga mga handum. Nagsiling sia: “Nahibaluan ko nga wala nalipay si Jehova sa akon ginahunahuna, pero nahuya gid ako nga isugid ini sa iban.” Maayo lang kay nakita sang nabalaka nga gulang sa ila kongregasyon nga nagakinahanglan sia sing bulig kag ginpalig-on sia nga magpabulig. Nagsiling ang pamatan-on: “Wala ako magpaabot nga kaayo gid sang mga gulang sa akon, mainayuhon sila kag mahinangpanon nga sobra pa sa pamatyag ko nga nagakabagay sa akon. Ginpamatian gid nila ako sa akon mga problema. Gin­gamit nila ang Biblia para pamatud-an nga ginahigugma ako ni Jehova, kag nagpangamuyo sila upod sa akon. Bangod sini, ginbaton ko dayon ang ila laygay halin sa Biblia.” Pila ka tuig sang ulihi, sang mag-uswag na sia sa espirituwal, nagsiling sia: “Nahibaluan ko na karon nga importante gid magpabulig sa baylo nga solohon ang mga problema.”

17 Dapat gid magpabulig kon ang ginahalinan sang imoral nga mga handum amo ang indi matinlo nga bisyo nga pagtan-aw sang pornograpiya. Kon indi ka dayon magpangayo sang bulig, mas daku ang katalagman nga ang indi matinlo nga mga handum ‘makapanamkon kag magabun-ag sang sala’ nga magasakit sa iban kag magapakahuya sa ngalan ni Jehova. Madamo sang alagad ni Jehova ang nagbaton sang mahigugmaon nga bulig bangod gusto nila nga mapahalipay sia kag makapabilin sa Cristianong kongregasyon.Sant. 1:15; Sal. 141:5; Heb. 12:5, 6.

MANGIN DETERMINADO NGA MAGPABILIN NGA MATINLO!

18. Ano ang imo determinasyon?

18 Samtang labi pa nga nangin imoral ang kalibutan ni Satanas, nalipay gid si Jehova nga makita ang iya matutom nga mga alagad nga nagapanikasog para mangin matinlo ang ila panghunahuna kag magkabuhi suno sa iya mataas nga mga talaksan sa moral! Gani, kabay nga mangin determinado ang kada isa sa aton nga magpalapit kay Jehova kag batunon ang iya paggiya paagi sa iya Pulong kag Cristianong kongregasyon. Ang pagpabilin nga matinlo nagaresulta sa kalipay kag malinong nga panghunahuna subong. (Sal. 119:5, 6) Sa palaabuton, kon wala na si Satanas, may pribilehiyo kita nga mabuhi sing wala katapusan sa kalibutan nga wala na sang iya malain nga impluwensia.