Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2015

Magkabuhi Nahisuno sa Modelo nga Pangamuyo —Bahin II

Magkabuhi Nahisuno sa Modelo nga Pangamuyo —Bahin II

“Nahibaluan sang inyo Amay ang inyo ginakinahanglan.”MAT. 6:8.

1-3. Ngaa sigurado gid ang isa ka utod nga nahibaluan ni Jehova ang aton kinahanglanon?

INDI gid malipatan ni Lana ang natabo sa iya sa Germany sang isa ka adlaw sang tig-ilinit sang 2012. Para sa iya, nasabat ang iya duha ka espesipiko nga pangamuyo. Una sia nga nangamuyo samtang nagabiyahe sa tren pakadto sa erport. Nangabay sia kay Jehova nga buligan sia nga makapanaksi. Nangamuyo sia liwat pag-abot niya sa erport sang mabal-an niya nga gin-isol ang iya flight sa masunod nga adlaw. Ginpangamuyo niya nga halos naubos na ang iya euro nga kuarta kag wala sia sang madayunan.

2 Pagkatapos gid niya pangamuyo, may nagsiling sa iya, “Lana, ’gaano ka diri?” Ginsiling ini sang pamatan-on nga lalaki nga kaeskwela niya anay. Upod sini ang iya iloy kag lola nga nagdul-ong sa iya kay mabiyahe sia pa South Africa. Sang mabal-an sang iloy nga si Elke ang sitwasyon ni Lana, ginhagad niya sia nga magdayon sa ila. Gin-amuma ni Elke kag sang iya iloy si Lana kag madamo sila sing ginpamangkot parte sa iya pagpati kag sa iya hilikuton bilang bug-os tion nga ebanghelisador.

3 Pagkaaga, pagkatapos sang makabulusog nga pamahaw,  ginsabat ni Lana ang madamo pa nila nga pamangkot parte sa Biblia, kag nangayo sia sang impormasyon para makontak sila sa ulihi kag mapadayon ang ila interes. Nakapauli si Lana kag nagpadayon sa iya pag-alagad bilang regular payunir. Para sa iya, amo sadto ang natabo bangod sang “Manugpamati sang pangamuyo.”Sal. 65:2.

4. Ano nga mga kinahanglanon ang binagbinagon naton?

4 Kon hinali lang nga magkaproblema kita, madali lang kita mangayo sing bulig sa pangamuyo, kag nalipay si Jehova sa pagpamati sa mga pangabay sang mga mainunungon sa iya. (Sal. 34:15; Hulu. 15:8) Pero kon pamalandungan naton ang modelo nga pangamuyo, mahimo makita naton nga may mas importante nga mga kinahanglanon nga mahimo naton malipatan. Halimbawa, binagbinaga kon paano makita ang aton espirituwal nga mga kinahanglanon sa katapusan nga tatlo ka pangabay sa modelo nga pangamuyo. Kag may mahimo pa bala kita para magkabuhi nahisuno sa ikap-at nga pangabay, parte sa aton adlaw-adlaw nga pagkaon?Basaha ang Mateo 6:11-13.

“HATAGI KAMI SANG AMON PAGKAON PARA SA SINI NGA ADLAW”

5, 6. Ngaa ang aton pangabay para sa aton pagkaon sa isa ka adlaw importante bisan pa bastante kita sa materyal nga mga butang?

5 Talupangda nga isa ini ka personal nga pangabay indi lamang para sa “akon” pagkaon kundi para sa “amon” pagkaon sa isa ka adlaw. Si Victor, nga isa ka manugtatap sang sirkito sa Aprika, nagpaathag: “Pirme ako nagapasalamat kay Jehova nga wala na kami nabalaka sang akon asawa sa amon pagakaunon ukon sa arkila sang balay. Mainayuhon kami nga ginaatipan sang amon mga kauturan kada adlaw. Pero ginapangamuyo ko nga masarangan kuntani sang mga nagabulig sa amon ang ila mga problema sa pinansial.”

6 Kon may bastante kita nga pagkaon sa madamo nga adlaw, hunahunaon man naton ang mga kauturan nga pigado ukon naapektuhan sang mga kalamidad. Indi lamang kita mangamuyo para sa ila kundi dapat may himuon man kita nahisuno sa aton mga pangamuyo. Halimbawa, puede naton mahatagan ang nagakinahanglan nga mga masigkasumilimba. Regular man kita nga makaamot para sa bug-os kalibutan nga hilikuton, kay nakahibalo kita nga ginagamit sing maalamon ini nga mga pundo.1 Juan 3:17.

7. Paano gin-ilustrar ni Jesus ang iya laygay nga ‘indi gid naton pagkabalak-an ang buas’?

7 Sang ginpatuhuyan ni Jesus ang aton adlaw-adlaw nga pagkaon, mahimo ang buot niya silingon amo ang aton gid nga mga kinahanglanon. Gani, ginpakita niya kon paano ginapanaptan sang Dios ang mga bulak sa latagon, kag dayon nagsiling: “Indi bala labi nga panaptan niya kamo, kamo nga diutay sing pagtuo? Gani indi gid kamo magkabalaka kag magsiling, . . . ‘Ano ang aton isuksok?’” Ginsulit niya ining importante nga laygay sa iya konklusion: “Indi gid ninyo pagkabalak-i ang buas.” (Mat. 6:30-34) Ginapakita sini nga sa baylo nga mangin materyalistiko, dapat kita mangin kontento sa aton panguna nga mga kinahanglanon sa kada adlaw. Mahimo nalakip sa sini ang nagakaigo nga ilistaran, trabaho para sa pag-aman sa aton pamilya, kag kaalam para maatubang ang mga problema sa panglawas. Pero, kon ipangamuyo lang naton ining pisikal nga mga kinahanglanon, indi kita balanse. May espirituwal kita nga mga kinahanglanon nga mas importante.

8. Ano ang dapat naton dumdumon sa pagsambit ni Jesus sa aton adlaw-adlaw nga pagkaon? (Tan-awa ang piktyur sa umpisa sini nga artikulo.)

8 Ang pagsambit ni Jesus sa aton adlaw-­adlaw nga pagkaon dapat magpahanumdom sa aton nga kinahanglan naton ang espirituwal nga pagkaon. “Ang tawo indi sa tinapay lamang mabuhi,” siling sang aton Agalon, “kundi sa tagsa ka pulong nga nagagua sa baba ni Jehova.” (Mat. 4:4) Gani dapat pada yon naton nga ipangamuyo nga si Jehova padayon nga magaaman sa aton sang espirituwal nga pagkaon sa nagakaigo nga tion.

“PATAWARA KAMI SANG AMON MGA SALA”

9. Ngaa pareho sa utang ang aton mga sala?

9 Nagsiling si Jesus: “Patawara kami sang amon mga sala [“utang,” foot­note].” (Mat. 6:12; Luc. 11:4) Ang aton mga sala daw pareho sa utang. Sang nagligad nga mga 60 ka tuig, nagpaathag ini nga magasin: “Kon makasala kita nga nagalapas sa kasuguan sang Dios, daw nakautang kita sa iya. . . . Bangod sa aton sala, puede sukton sang Dios ang aton kabuhi. . . . Puede niya kuhaon sa aton ang iya paghidait, kag utdon ang bug-os niya nga kaangtanan sa aton. . . . Utang naton sa iya ang gugma, nga ginapakita paagi sa pagtuman; kag kon makasala kita, wala kita nagabayad sa iya sang aton utang nga gugma, kay ang pagpakasala indi paghigugma sa Dios.”1 Juan 5:3.

10. Ano ang basihan para mapatawad ni Jehova ang aton mga sala, kag ano ang dapat naton batyagon sa sini?

10 Kinahanglan naton ang kapatawaran kada adlaw. Ginapatalupangod sini ang lamang legal nga basihan para mapatawad sang Dios ang aton mga sala—ang halad-­gawad ni Jesus. Bisan pa ginbayad ini nga gawad halos 2,000 ka tuig na ang nagligad, dapat naton ini pabaloran nga daw regalo nga ginhatag subong. “Ang gawad” para sa aton kabuhi “tuman kamahal” amo nga wala gid sing indi himpit nga tawo nga makabayad sini. (Basaha ang Salmo 49:7-9; 1 Pedro 1:18, 19.) Dapat gid naton pasalamatan pirme si Jehova sa sining importante nga regalo. Isa pa, ang ekspresyon nga “amon mga sala,” indi “akon mga sala,” dapat magpahanumdom sa aton nga tanan kita sa aton pamilya sang mga sumilimba nagakinahanglan sining maluluy-on nga aman. Gusto gid ni Jehova nga hunahunaon naton indi lamang ang aton espirituwal nga kaayuhan kundi ang iya man sang iban, pati ang mga nakasala sa aton. Sa masami, gagmay lang ini nga mga sala kag nagahatag sa aton sang kahigayunan nga ipakita nga ginahigugma gid naton ang aton mga kauturan kag handa kita magpatawad, kay maluluy-on nga ginpatawad kita sang Dios.Col. 3:13.

Kon gusto mo patawaron sang Dios, patawara ang iban (Tan-awa ang parapo 11)

11. Ngaa importante nga magpatawad?

11 Bangod indi kita himpit, makapasubo nga kon kaisa maghinakit kita sa iban. (Lev. 19:18) Kon ipanugid naton ini,  mahimo magdampig sa aton ang iban, kag mabahinbahin ang kongregasyon. Kon pabay-an naton ini nga magpadayon, wala naton ginaapresyar ang kaluoy sang Dios kag ang gawad. Indi na paggamiton sang aton Amay sa aton ang balor sang halad sang iya Anak kon indi kita magpatawad. (Mat. 18:35) Ginpaathag ini dayon ni Jesus sa tapos niya ginhatag ang modelo nga pangamuyo. (Basaha ang Mateo 6:14, 15.) Kag para patawaron sang Dios, dapat naton panikasugan nga indi maghimo sang serioso nga sala. Ang handum naton nga indi maghimo sang sala may ara kaangtanan sa masunod nga pangabay.1 Juan 3:4, 6.

“BULIGI KAMI AGOD INDI KAMI MADAUG SANG PAGSULAY”

12, 13. (a) Ano ang natabo kay Jesus sa tapos sia nabawtismuhan? (b) Ngaa kita ang may salabton kon madaug kita sang pagsulay? (c) Ano ang ginpamatud-an ni Jesus sang nagpabilin sia nga matutom tubtob kamatayon?

12 Ang pagbinagbinag sa natabo kay Jesus sa tapos sia nabawtismuhan makabulig sa aton nga mahangpan nga dapat kita mangabay: “Buligi kami agod indi kami madaug sang pagsulay.” Gintuytuyan si Jesus sang espiritu sang Dios pakadto sa kamingawan. Ngaa? “Didto natabo ang pagsulay sa iya sang Yawa.” (Mateo 4:1; 6:13) Makibot bala kita sa sini? Indi, kon nahangpan naton ang panguna nga rason nga ginpadala sang Dios ang iya Anak sa duta. Ina para solbaron ang hulusayon nga nag-utwas sang ginsikway nanday Adan kag Eva ang pagkasoberano sang Dios. Kinahanglan ang tion para masabat ang mga pamangkot. Halimbawa, nagsala bala ang Dios sa pagtuga niya sa tawo? Masakdag bala sang himpit nga tawo ang pagkasoberano sang Dios bisan pa pabudlayan sang “isa nga malauton”? Kag mangin mas maayo bala ang kahimtangan sang mga tawo kon indi sila paggamhan sang Dios, nga amo ang ginpahangop ni Satanas? (Gen. 3:4, 5) Kinahanglan ang tion para masabat ini nga mga pamangkot pero pagkatapos sini, makita sang tanan nga tawo kag anghel nga nagagahom si Jehova sa maayo nga paagi.

13 Balaan si Jehova kag wala gid sia sing ginasulay nga maghimo sing malain. Sa baylo, ang Yawa amo “ang Panulay.” (Mat. 4:3) Ginasulay kita sang Yawa sa madamo nga paagi. Pero depende na sa kada isa sa aton kon tugutan naton nga madaug kita sang pagsulay ukon indi. (Basaha ang Santiago 1:13-15.) Ginsikway dayon ni Jesus ang tanan nga pagsulay paagi sa nagakaigo nga pagkutlo sang Pulong sang Dios. Gani ginsakdag niya ang pagkasoberano sang Dios. Pero wala mangampo si Satanas. “Naghulat [sia] sang isa pa ka maayo nga kahigayunan.” (Luc. 4:13) Padayon nga ginbatuan ni Jesus ang tanan nga panikasog ni Satanas nga gub-on ang iya integridad. Ginsakdag sang Cristo ang pagkamatarong sang pagkasoberano ni Jehova kag ginpamatud-an nga puede mangin matutom ang himpit nga tawo bisan pa pabudlayan sing tuman. Pero ginasulay man ni Satanas ang mga sumulunod ni Jesus, pati na ikaw.

14. Ano ang dapat naton himuon para indi kita madaug sang pagsulay?

14 Bangod padayon gihapon ang hulusayon parte sa pagkasoberano sang Dios, gintugutan ni Jehova ang Panulay nga gamiton ini nga kalibutan para sulayon kita. Wala kita ginasulay sang Dios. Sa baylo, may pagsalig sia sa aton kag gusto niya kita buligan. Pero bangod sang aton kahilwayan sa pagpili, wala dayon ginapunggan ni Jehova nga masulay kita. Dapat naton himuon ang duha ka butang—magpabilin nga nagabugtaw sa espirituwal kag padayon nga magpangamuyo. Paano ginasabat ni Jehova ang aton mga pangamuyo?

Hupti ang imo espirituwalidad kag kakugi sa ministeryo (Tan-awa ang parapo 15)

15, 16. (a) Ano ang pila ka pagsulay nga dapat naton batuan? (b) Sin-o ang may salabton kon madaug ang isa sang pagsulay?

15 Ginahatag ni Jehova sa aton ang iya gamhanan nga balaan nga espiritu, nga makapabakod kag makabulig sa aton para mabatuan ang pagsulay. Ginapaandaman man kita sang Dios paagi sa iya Pulong kag kong regasyon parte sa mga sitwasyon nga dapat naton likawan, pareho sang paggamit sang daku gid nga tion, kuarta, kag kusog sa indi importante nga materyal nga mga butang. Sanday Espen kag ­Janne nagaistar sa manggaranon nga pungsod sa Europa. Madugay na sila nga mga regular payunir sa isa ka lugar sa ila pungsod diin may daku nga kinahanglanon. Sang natawo ang ila una nga bata, nag-untat sila sa pagpayunir, kag duha na ang ila bata subong. “Pirme namon ginapangamuyo kay Jehova,” siling ni Espen, “nga indi kami madaug sang pagsulay subong kay indi na pareho ka daku nga tion ang magamit namon sa teokratiko nga mga hilikuton ikomparar sang una. Ginapangabay namon si Jehova nga buligan kami nga mahuptan ang amon espirituwalidad kag kakugi sa ministeryo.”

16 Ang isa pa ka pagsulay subong amo ang pagtan-aw sang pornograpiya. Kon madaug kita sini nga pagsulay, indi naton mabasol si Satanas. Ngaa? Bangod indi kita mapilit ni Satanas kag sang iya kalibutan nga himuon ang bisan ano nga indi naton gusto. Nadaug ang iban sini nga pagsulay bangod padayon nila nga ginhunahuna ang malain. Pero mabatuan naton ini, pareho sang ginhimo sang linibo naton ka kauturan.1 Cor. 10:12, 13.

“LUWASA KAMI SA ISA NGA MALAUTON”

17. (a) Paano kita magkabuhi nahisuno sa aton pangabay nga luwason sa isa nga malauton? (b) Anong matawhay nga kahimtangan ang malapit na?

17 Para magkabuhi nahisuno sa pangabay nga “luwasa kami sa isa nga malauton,” dapat naton panikasugan nga mangin ‘indi bahin sang kalibutan’ ni Satanas. Indi naton dapat ‘paghigugmaon ang kalibutan ni Satanas ukon ang mga butang sa kalibutan.’ (Juan 15:19; 1 Juan 2:15-17) Dapat padayon kita nga manikasog para mahimo ini. Mangin matawhay na gid kon sabton na ni Jehova ini nga pangabay paagi sa pagdula kay Satanas kag sa iya malaut nga kalibutan! Pero dumdumon naton nga sang gintagbong si Satanas halin sa langit, nahibaluan niya nga malip-ot na lamang ang iya tion. Bangod akig gid sia, ginahimo niya ang iya bug-os nga masarangan para gub-on ang aton integridad. Gani dapat padayon naton nga ipangamuyo nga luwason kita sa iya.Bug. 12:12, 17.

18. Agod makalampuwas kita kon laglagon na ang kalibutan ni Satanas, ano dapat ang padayon naton nga himuon?

18 Ginahandum mo bala ining makalilipay nga palaabuton? Kon amo, padayon nga ipangamuyo ang Ginharian sang Dios nga pakabalaanon ang ngalan sang Dios kag matuman ang iya kabubut-on sa duta. Magsalig kay Jehova nga ihatag niya ang imo espirituwal kag pisikal nga mga kinahanglanon. Mangin determinado nga magkabuhi nahisuno sa modelo nga pangamuyo.