Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2015

Magkabuhi Nahisuno sa Modelo nga Pangamuyo—Bahin I

Magkabuhi Nahisuno sa Modelo nga Pangamuyo—Bahin I

“Pakabalaanon ang imo ngalan.”MAT. 6:9.

1. Paano naton mahimo gamiton sa ministeryo ang pangamuyo nga narekord sa Mateo 6:9-13?

SAULADO sang madamo ang Pangamuyo sang Ginuo. Sa aton ministeryo, masami naton ini ginapatuhuyan para mahangpan sang mga tagbalay nga ang Ginharian sang Dios matuod nga gobierno nga magadala sang matahom nga mga pagbag-o sa duta. Ukon mahimo naton ginapatuhuyan ang una nga pangabay sa sini nga pangamuyo para ipakita nga may ngalan ang Dios nga dapat pakabalaanon.Mat. 6:9.

2. Paano naton mahibaluan nga indi gusto ni Jesus nga sulitsuliton ang modelo nga pangamuyo sing tinaga por tinaga kada magpangamuyo kita?

2 Gusto bala ni Jesus nga sulitsuliton ini nga pangamuyo sing tinaga por tinaga kada magpangamuyo kita, subong sang ginahimo sang madamo sa Cristiandad? Indi. Antes ginhatag ni Jesus ini nga pangamuyo bilang sulundan, nagsiling sia: “Kon magpangamuyo kamo, indi ninyo pagsulitsulita ang inyo ginasiling.” (Mat. 6:7) Sang ulihi, ginsambit niya liwat ini nga pangamuyo pero lain nga mga tinaga ang iya gin­gamit. (Luc. 11:1-4) Gani ginbuligan kita ni Jesus nga mahibaluan ang mga dapat naton ipangabay kag ang  pagpasunod sini halin sa pinakaimportante. Gani, nagakaigo ini tawgon nga modelo nga pangamuyo.

3. Ano nga mga pamangkot ang pamalandungan naton samtang ginabinagbinag ang modelo nga pangamuyo?

3 Sa sini nga artikulo kag sa masunod, binagbinagon naton ang kaundan sang modelo nga pangamuyo. Samtang ginahimo naton ini, mamangkot, ‘Paano makabulig ini nga modelo para mapauswag ko ang akon mga pangamuyo? Kag ang mas importante, nagakabuhi bala ako nahisuno sa sini nga pangamuyo?’

“AMAY NAMON NGA YARA SA LANGIT”

4. Ano ang ginapahanumdom sa aton sang ekspresyon nga “Amay namon,” kag sa ano nga kahulugan nga “Amay” si Jehova sang mga Cristiano nga may paglaum sa duta?

4 Ang ekspresyon nga “Amay namon,” indi “Amay ko,” nagapahanumdom sa aton nga kaupod naton ang mga “kauturan” nga nagahigugmaanay gid. (1 Ped. 2:17) Hamili gid ini nga pribilehiyo! Nagakaigo gid sa hinaplas nga mga Cristiano, nga gin-adoptar bilang mga anak sang Dios nga magakabuhi sa langit, nga tawgon si Jehova nga “Amay.” (Roma 8:15-17) Ang mga Cristiano nga may paglaum nga mabuhi sing dayon sa duta makatawag man kay Jehova nga “Amay.” Sia ang Manughatag sing Kabuhi sa ila, kag mahigugmaon niya nga ginaaman ang mga kinahanglanon sang tanan nga matuod nga sumilimba. Ang mga may paglaum sa duta mangin matuod nga mga anak sang Dios pagkatapos sila mangin himpit kag mapamatud-an nga mainunungon sa katapusan nga pagtilaw.Roma 8:21; Bug. 20:7, 8.

5, 6. Anong maayo nga regalo ang mahatag sang ginikanan sa ila kabataan, kag ano ang dapat himuon sang kada bata sa sini nga regalo? (Tan-awa ang piktyur sa umpisa sini nga artikulo.)

5 Isa ka maayo nga regalo sang mga ginikanan sa ila kabataan ang pagtudlo sa ila nga magpangamuyo kag pagbulig sa ila nga tamdon si Jehova subong mapinalanggaon nga Amay sa langit. Ang isa ka manugtatap sa sirkito sa ­South Africa nagsiling: “Sugod sang natawo ang amon mga bata nga babayi, nagapangamuyo ako kada gab-i upod sa ila magluwas lang kon wala ako sa balay. Masami ginasiling sang amon mga bata nga indi nila madumduman ang eksakto nga mga tinaga sini nga mga pangamuyo. Pero madumduman nila nga nabatyagan nila ang pagkasagrado sang pagpakigsugilanon sa aton Amay nga si Jehova, kag ang kalinong kag kasiguruhan. Sang makasarang na sila, ginpalig-on ko sila nga mangamuyo sing mabaskog para mabatian ko kon paano nila ipabutyag kay Jehova ang ila ginahunahuna kag ginabatyag. Kanami gid sini nga kahigayunan para mahibaluan kon ano ang yara sa ila tagipusuon. Dayon mainayuhon ko sila nga ginbuligan nga ilakip ang importante nga mga punto sang modelo nga pangamuyo para mangin mapuslanon ang ila mga pangamuyo.”

6 Indi katingalahan nga padayon nga nag-uswag sa espirituwal ang mga bata sini nga utod. May mga bana na sila subong kag malipayon, kag nagahimo sang kabubut-on sang Dios sing bug-os tion upod sa ila mga bana. Ang pinakamaayo nga regalo nga mahatag sang ginikanan sa ila kabataan amo ang pagbulig sa ila nga mangin suod kay Jehova. Pero dapat huptan sang kada isa ining hamili nga kaangtanan. Nalakip sa sini ang paghigugma sa ngalan sang Dios kag pagtahod gid sa sini.Sal. 5:11, 12; 91:14.

“PAKABALAANON ANG IMO NGALAN”

7. Ano ang pribilehiyo sang katawhan sang Dios, pero ano ang dapat naton himuon?

7 Pribilehiyo gid naton indi lang nga mahibaluan ang ngalan sang Dios kundi pati man ang mangin “katawhan nga tawgon sa iya ngalan.” (Binu. 15:14; Isa. 43:10) Nagapangamuyo kita sa aton Amay sa langit: “Pakabalaanon ang imo ngalan.” Sa sini, ginapangabay  mo si Jehova nga buligan ka nga malikawan ang paghimo ukon ang paghambal sang bisan ano nga magapakahuya sa iya balaan nga ngalan. Indi naton gusto nga mangin pareho sa iban sang unang siglo nga wala nagaaplikar sang ila ginabantala. Si apostol Pablo nagsulat parte sa ila: “Ang ngalan sang Dios ginapasipalahan sa tunga sang mga pungsod tungod sa inyo.”Roma 2:21-24.

8, 9. Maghatag sing halimbawa kon paano ginapakamaayo ni Jehova ang mga gusto magpakabalaan sang iya ngalan.

8 Gusto naton pakabalaanon ang ngalan sang Dios. Sang hinali nga napatay ang bana sang isa ka utod sa Norway, nabilin sa iya ang ila duha ka tuig nga bata nga lalaki. “Tuman kabudlay gid yadto nga tion sa akon kabuhi,” siling niya. “Nagapangamuyo ako kada adlaw, halos kada oras, nga hatagan ako sing kabakod nga mangin balanse sa emosyon para indi ko mahatagan si Satanas sing rason nga yagutaon si Jehova bangod sang akon indi maalamon nga desisyon ukon indi pagpabilin nga matutom. Gusto ko pakabalaanon ang ngalan ni Jehova, kag gusto ko nga makita liwat sang akon bata ang iya amay sa Paraiso.”Hulu. 27:11.

9 Ginsabat bala ni Jehova ining indi maiyaiyahon nga mga pangamuyo? Huo. Nabuligan ini nga utod paagi sa iya pagpakig-upod pirme sa nagaulikid nga mga masigkatumuluo. Pagligad sang lima ka tuig, nakapamana sia sang isa ka gulang. Ang iya bata, nga 20 anyos na subong, bawtismado na. “Nalipay gid ako,” siling niya, “kay ginbuligan ako sang akon bana sa pagpadaku sa iya.”

10. Ano ang kinahanglan para ang ngalan sang Dios pakabalaanon sing bug-os?

10 Ano ang kinahanglan para ang ngalan sang Dios pakabalaanon sing bug-os kag indi na gid mapakahuy-an? Dapat dulaon ni Jehova ang tanan nga hungod nga nagasikway sang iya pagkasoberano. (Basaha ang Ezequiel 38:22, 23.) Amat-amat nga mangin himpit ang mga tawo. Gusto na gid naton mag-abot ang tion nga ang tanan nga tawo kag anghel magapakabalaan sa ngalan ni Jehova! Sa ulihi, ang aton mahigugmaon nga Amay sa langit amo “ang magagahom sa tanan.”1 Cor. 15:28.

“MAGKARI ANG IMO GINHARIAN”

11, 12. Sang 1876, ano ang nahangpan sang matuod nga mga Cristiano?

11 Antes magkayab si Jesus sa langit, namangkot ang iya mga apostoles: “Ginuo, ipasag-uli mo bala ang ginharian sa Israel sa sini nga tion?” Makita sa sabat ni Jesus nga indi pa sadto tion nga mahibaluan nila kon san-o magasugod sa paggahom ang Ginharian sang Dios. Ginsilingan niya ang iya mga disipulo nga magpokus sa importante nga hilikuton sang pagpanaksi nga dapat nila himuon. (Basaha ang Binuhatan 1:6-8.) Pero gintudluan ni Jesus ang iya mga sumulunod nga paabuton ang Ginharian sang Dios. Gani ginapangamuyo sang mga Cristiano ang pag-abot sini halin pa sang tion sang mga apostoles.

12 Sang malapit na magsugod sa paggahom si Jesus sa Ginharian sang Dios sa langit, ginbuligan ni Jehova ang iya katawhan nga mahangpan kon san-o ini matabo. Sang 1876, ginbalhag sa magasin nga ­Bible ­Examiner ang isa ka artikulo nga ginsulat ni ­Charles ­Taze ­Russell. Ini nga artikulo, “Panag-on sang mga Gentil: San-o Ini Matapos?,” nagsiling nga ang 1914 isa ka importante nga tuig. Ginpaathag sini nga ang “pito ka tion” sa tagna ni Daniel amo man ang “gintalana nga mga tion sang mga pungsod” nga ginhambal ni Jesus. *Dan. 4:16; Luc. 21:24.

13. Ano ang natabo sang 1914, kag ano ang ginapamatud-an sang mga hitabo sa kalibutan halin sadto?

13 Sang 1914, nagsugod ang inaway sa mga  pungsod sa Europa nga naglapnag sa bilog nga kalibutan. Sang matapos ini sang 1918, grabe gid ang tiggulutom kag may epidemia sang trangkaso nga mas madamo pa ang napatay sangsa napatay sa inaway. Gani nagsugod na nga matuman “ang tanda” nga ginhatag ni Jesus para mahibaluan ang iya indi makita nga presensia bilang bag-o nga Hari sang duta. (Mat. 24:3-8; Luc. 21:10, 11) Madamo sing ebidensia nga ang 1914 amo ang tion nga ‘ginhatagan sang korona’ si Ginuong Jesucristo. “Naglakat sia nga nagapangdaug agod lutuson sing bug-os ang iya mga kaaway.” (Bug. 6:2) Gintinluan niya ang langit sang nagpakig-away sia kay Satanas kag sa iya mga demonyo, kag gintagbong sila sa duta. Halin sadto, naeksperiensiahan sang mga tawo nga matuod ining ginsiling sa Biblia: “Makaluluoy ang duta kag ang dagat, bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.”Bug. 12:7-12.

14. (a) Ngaa importante gihapon nga magpangamuyo nga mag-abot ang Ginharian sang Dios? (b) Ano ang pribilehiyo naton nga himuon?

14 Ginapaathag sang tagna nga narekord sa Bugna 12:7-12 kon ngaa nagsugod nga mahanabo ang malain nga mga butang nga nagapaantos sa mga tawo sang nabun-ag ang Ginharian sang Dios. Nagsugod sa paggahom si Jesus, ang Hari sang Ginharian sang Dios, samtang yara pa ang iya mga kaaway. Tubtob sa tion nga matapos niya ang iya pagpangdaug kag dulaon niya ang kalautan sa duta, padayon kita nga magapangamuyo nga mag-abot ang Ginharian sang Dios. Dapat man kita magkabuhi nahisuno sa sini nga  pangamuyo paagi sa pagpakigbahin sa katumanan sang pinakatalalupangdon nga bahin sang “tanda.” Si Jesus nagtagna: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.”Mat. 24:14.

“MATUMAN ANG IMO KABUBUT-ON SA DUTA”

15, 16. Paano kita magkabuhi nahisuno sa pangabay nga matuman ang kabubut-on sang Dios sa duta?

15 Mga 6,000 ka tuig sang una, himpit pa nga ginahimo ang kabubut-on sang Dios sa duta. Amo kon ngaa nakasiling si Jehova sa kahimtangan sang mga tawo sa umpisa: “Maayo gid ini.” (Gen. 1:31) Dayon nagrebelde si Satanas, kag sugod sadto, pila lang ang naghimo sang kabubut-on sang Dios sa duta. Pero subong, pribilehiyo naton nga magkabuhi sa tion nga mga walo ka milyon ka Saksi ang wala lamang nagapangamuyo nga matuman ang kabubut-on sang Dios sa duta kundi nagapanikasog man nga magkabuhi nahisuno sa sini nga pangamuyo. Makita ini sa ila pagkabuhi kag makugi nga pagpakigbahin sa paghimo sing mga disipulo.

Ginabuligan mo bala ang imo kabataan nga magkabuhi nahisuno sa pangabay nga matuman ang kabubut-on sang Dios sa duta? (Tan-awa ang parapo 16)

16 Halimbawa, ang utod nga nabawtismuhan sang 1948 kag misyonera anay sa Aprika nagsiling: “Nahisanto sa sini nga bahin sang modelo nga pangamuyo, pirme ko ginapangamuyo nga ang tanan nga tulad karnero nga tawo makita kag mabuligan nga makilala si Jehova antes mangin ulihi ang tanan. Isa pa, antes ako magpanaksi sa isa ka tawo, nagapangamuyo ako sing kaalam para malab-ot ang iya tagipusuon. Kag parte sa mga tulad karnero nga nakita na, nagapangamuyo ako kay Jehova nga pakamaayuhon niya ang pagpanikasog naton sa pag-atipan sa ila.” Nagmadinalag-on gid ining 80 anyos nga utod sa iya ministeryo kag, sa bulig sang iban, madamo ang nabuligan niya nga mangin Saksi ni Jehova. Sigurado nga may madumduman ka nga maayo man nga mga halimbawa sang nagahimo sang kabubut-on sang Dios sa ila bug-os nga masarangan bisan pa tigulang na sila.Basaha ang Filipos 2:17.

17. Ano ang ginabatyag mo sa himuon pa ni Jehova sa pagsabat sa aton pangabay nga matuman ang iya kabubut-on sa duta?

17 Padayon kita nga magapangamuyo nga matuman ang kabubut-on sang Dios tubtob sa tion nga malaglag ang mga kaaway sang Ginharian sang Dios sa duta. Dayon makita naton nga matuman pa gid ang kabubut-on sang Dios kon banhawon na ang binilyon sa paraiso nga duta. “Indi kamo matingala sa sini,” siling ni Jesus, “bangod magaabot ang tion nga ang tanan nga yara sa handumanan nga mga lulubngan makabati sang [akon] tingog kag magagua.” (Juan 5:28, 29) Makalilipay gid nga buhi kita sa sina nga tion sa pag-abiabi sa napatay naton nga mga hinigugma! “Pahiran [sang Dios] ang tagsa ka luha sa [aton] mga mata.” (Bug. 21:4) Madamo sa pagabanhawon ang “indi matarong,” nga nagkabuhi anay kag napatay nga wala makahibalo sang kamatuoran parte kay Jehova nga Dios kag sa iya Anak. Mangin isa ka pribilehiyo nga isugid sa mga pagabanhawon ang kabubut-on kag katuyuan sang Dios, kag mabuligan sila nga mangin kalipikado sa “kabuhi nga wala sing katapusan.”Binu. 24:15; Juan 17:3.

18. Ano ang pinakaimportante nga mga kinahanglanon sang katawhan?

18 Magaluntad ang paghidait kag paghiusa sa bug-os nga uniberso kon pakabalaanon na ang ngalan ni Jehova paagi sa Ginharian sang Dios. Gani, ang sabat sa una nga tatlo ka pangabay sa modelo nga pangamuyo magahatag sang pinakaimportante nga mga kinahanglanon sang katawhan. Pero may iban pa kita nga kinahanglanon nga ginsambit sa apat pa ka pangabay sa modelo nga pangamuyo ni Jesus. Binagbinagon ini sa masunod nga artikulo.

^ par. 12 Para sa paathag kon paano natuman ini nga tagna sang 1914 sang nabun-ag ang Mesianiko nga Ginharian sang Dios, tan-awa ang libro nga Ano Gid ang Ginatudlo sang Biblia?, pahina 215-218..