Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2015

Madumduman Mo Bala?

Madumduman Mo Bala?

Nabasa mo bala sing maayo ang ulihi nga mga gua sang Ang Lalantawan? Kon amo, tilawi kon masabat mo ang masunod nga mga pamangkot:

Dapat bala mangamuyo ang mga Cristiano kay Jesucristo?

Indi. Gintudluan kita ni Jesus mismo nga mangamuyo kay Jehova, kag nagpakita sia sang halimbawa sa pagpangamuyo sa iya Amay. (Mat. 6:6-9; Juan 11:41; 16:23) Gani, ang iya mga sumulunod sadto nangamuyo sa Dios, indi sa iya. (Binu. 4:24, 30; Col. 1:3)1/1, pahina 14.

Ano ang mahimo naton kada tuig para mangin handa sa pagdumdom sa kamatayon ni Jesus?

Ang isa amo ang pagsunod sa naiskedyul nga pagbasa sa Biblia may kaangtanan sa sini nga okasyon. Madugangan man naton ang aton pagpakigbahin sa ministeryo sa sini nga tion. Kag ipangamuyo naton kag pamalandungan ang paglaum nga ginhatag sang Dios sa aton.1/15, pahina 14-16.

Ano ang natabo sa duha ka Egiptohanon nga bilanggo nga nagsugid kay Jose sang damgo nga indi nila mahangpan?

Ginsilingan ni Jose ang manugtagay sang Paraon nga ibalik sia sa iya anay posisyon. Ang damgo naman sang panadero nagakahulugan nga ipapatay sia sang Paraon kag bitayon sa usok. Nagmatuod ang duha ka kahulugan. (Gen. 40:1-22)2/1, pahina 12-14.

Ano ang wala gid ginapaabot nga regalo nga nabaton sang mga kauturan sa Japan?

Nabaton nila ang bukleta nga nagaunod sang libro ni Mateo halin sa Bag-ong Kalibutan nga Badbad. Gingamit ini sa ministeryo, kag ginbaton sang madamo nga indi pamilyar sa Biblia.2/15, pahina 3.

Ano nga mga kahimtangan sang unang siglo ang nagbulig nga maglapnag ang maayong balita?

Bangod sang kalig-unan sang Pax Romana, halos wala sing inaway sadto. Ang mga disipulo sadto makalakbay sa maayo nga mga dalan. Lapnag nga gingamit ang Griego nga lenguahe, nga nakabulig sa pagbantala, bisan sa mga Judiyo nga naglapta sa bug-os nga emperyo. Kag magamit sang mga disipulo ang kasuguan sang Roma sa pagpangapin sa maayong balita.2/15, pahina 20-23.

Ngaa wala nagaselebrar sang Easter ang matuod nga mga Cristiano?

Ginsugo ni Jesus ang iya mga sumulunod nga dumdumon ang iya kamatayon, indi ang iya pagkabanhaw. (Luc. 22:19, 20)3/1, pahina 8.

Sining karon lang nga tinuig, ngaa talagsa na lang nagasambit sang larawan kag ginalarawan sa Biblia ang aton mga publikasyon?

Ang Biblia nagasiling nga ang pila ka indibiduwal mga larawan sang mas dalagku nga mga butang. Ang isa ka halimbawa sini makita sa Galacia 4:21-31. Pero indi kita dapat maghatag sing ginalarawan kon wala ini sa Kasulatan. Apang, makatuon kita sang mga leksion sa mga indibiduwal kag kasaysayan sa Biblia. (Roma 15:4)3/15, pahina 17-18.

Ngaa importante gid ang isa ka panid sang papiro nga nakuha sa tinumpok sang basura sa Egipto?

Sang nagligad nga siglo, nakit-an ang isa ka panid nga nagaunod sang mga bahin sang Ebanghelyo ni Juan. Ang kadugayon sini mahimo pila lang ka dekada sa tapos ginsulat ni Juan ang iya libro, kag ang unod sini nagapamatuod sang teksto nga yara sa aton subong, nga nagapadaku sang pagkamasaligan sang Biblia.4/1, pahina 10-11.

Ngaa mahigugmaon ang pag-disfellowship sa nakasala nga wala nagahinulsol?

Mabasa sa Biblia ang serioso nga kahimusan sang pag-disfellowship, nga may mga benepisyo. (1 Cor. 5:11-13) Nagapadungog ini sa ngalan sang Dios, nagaamlig sa matinlo nga kongregasyon, kag makaparealisar sa isa nga mabug-at ang iya sala.4/15, pahina 29-30.