Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MAYO 2015

Mangin Mabinantayon—Luyag Ka Tukbon ni Satanas!

Mangin Mabinantayon—Luyag Ka Tukbon ni Satanas!

“Mangin mabinantayon! Ang inyo kaaway, ang Yawa, nagaluyong subong sang nagangurob nga leon, nga nagapangita sing tulukbon.”1 PED. 5:8.

1. Ipaathag kon paano nangin Satanas ang isa ka espiritu nga tinuga.

MAY isa ka espiritu nga tinuga nga maayo anay ang kaangtanan kay Jehova. Pero sang ulihi, ginhandum niya nga simbahon sia sang mga tawo. Imbes nga isikway ang indi nagakaigo nga handum, ginpatubo pa niya ini asta nga nagbun-ag sang sala. (Sant. 1:14, 15) Nakilala naton ini nga tinuga nga si Satanas, nga “wala . . . magpabilin sa kamatuoran.” Nagrebelde sia kay Jehova kag nangin “amay sang kabutigan.”Juan 8:44.

2, 3. Ano ang ginapakita sang mga termino nga “Satanas,” “Yawa,” “man-ug,” kag “dragon” parte sa labing daku nga kaaway ni Jehova?

2 Sugod sang nagrebelde si Satanas, ginpamatud-an niya nga sia ang labing daku nga kaaway ni Jehova, kag indi gid sia abyan sang katawhan. Ang titulo nga ginhatag kay Satanas nagapakita kon daw ano sia ka malain. Ang Satanas nagakahulugan sing “Manugpamatok,” nga nagapakita nga ining malaut nga espiritu nga tinuga wala nagasakdag sa soberanya sang Dios; kundi ginakaugtan niya ini kag ginapamatukan. Labaw sa tanan, luyag ni Satanas nga madula ang pagkasoberano ni Jehova.

3 Suno sa Bugna 12:9, si Satanas gintawag nga Yawa, buot silingon “Manugpasipala.” Ginapahanumdom kita sini nga ginpakahuy-an ni Satanas si Jehova paagi sa pagtawag sa iya nga butigon.  Ang termino nga “ang orihinal nga man-ug” nagapahanumdom sa aton sang masubo nga adlaw sa Eden diin gingamit ni Satanas ang man-ug para madaya si Eva. Ang termino nga “ang daku nga dragon” nagapahanumdom sa aton sang makahaladlok kag daku nga sapat nga nagalaragway gid sa grabe nga handum ni Satanas nga balabagan ang katuyuan ni Jehova kag halitan ang Iya katawhan.

4. Ano ang binagbinagon sa sini nga artikulo?

4 Maathag nga si Satanas ang panguna nga nagaguba sa aton integridad. Amo nga ginpaandaman kita sang Biblia: “Hupti ang inyo ikasarang sa paghunahuna sing maayo, mangin mabinantayon! Ang inyo kaaway, ang Yawa, nagaluyong subong sang nagangurob nga leon, nga nagapangita sing tulukbon.” (1 Ped. 5:8) Gani, binagbinagon sa sini nga artikulo ang tatlo ka kinaiya ni Satanas nga nagapakita nga kinahanglan naton magbantay batok sa sining malaut nga kaaway ni Jehova kag sang Iya katawhan.

GAMHANAN SI SATANAS

5, 6. (a) Maghatag sing mga halimbawa nga nagapakita nga ang espiritu nga mga tinuga “gamhanan.” (b) Sa ano nga paagi nga si Satanas “may ikasarang sa pagpahanabo sing kamatayon”?

5 Ang espiritu nga mga tinuga nga ginatawag mga anghel mga “gamhanan.” (Sal. 103:20) Mas labaw sila sangsa mga tawo gani mas maalam sila kag mas makusog. Siempre, ginagamit sang matutom nga mga anghel ang ila gahom sa maayo. Halimbawa, isa ka bes ginpatay sang isa ka anghel ni Jehova ang 185,000 ka soldado sang Asiria—imposible gid nga mahimo ini sang isa ka tawo kag mabudlay ini bisan pa sang bug-os nga hangaway. (2 Hari 19:35) Sa isa pa ka hitabo, gingamit sang anghel ang iya labaw sa kinaandan nga gahom kag kaalam para hilwayon ang mga apostoles ni Jesus sa bilangguan. Ginbuksan sadto nga espiritu nga tinuga ang mga puertahan sang bilangguan, ginpagua sila, kag pagkatapos gintrangkahan ang puertahan, samtang ang mga guardia ara lang sa malapit nga nagabantay!Binu. 5:18-23.

6 Kon ang matutom nga espiritu nga mga tinuga nagagamit sang ila gahom sa maayo, si Satanas naman nagagamit sini sa malain. Kag daku gid ang iya gahom kag impluwensia! Gintawag sia sang Kasulatan nga “manuggahom sini nga kalibutan” kag “dios sini nga sistema sang mga butang.” (Juan 12:31; 2 Cor. 4:4) Si Satanas nga Yawa “may ikasarang sa pagpahanabo sing kamatayon.” (Heb. 2:14) Indi buot silingon sini nga direkta niya nga ginapatay ang tanan nga tawo. Pero, ang iya impluwensia subong manugpatay lapnag sa kalibutan. Dugang pa, bangod nagpati si Eva sa kabutigan ni Satanas kag ginsupak ni Adan ang Dios, naglapnag ang sala kag kamatayon sa tanan nga tawo. (Roma 5:12) Gani, matuod gid nga ang Yawa “may ikasarang sa pagpahanabo sing kamatayon.” Matuod gid ang tawag ni Jesus sa iya—‘manugpatay sing tawo.’ (Juan 8:44) Gamhanan gid nga kaaway si Satanas!

7. Paano ginpakita sang mga demonyo nga gamhanan sila?

7 Kon pamatukan naton si Satanas, indi lang sia ang mangin kaaway naton kundi ang tanan nga nagadampig sa iya sa isyu sang bug-os uniberso nga soberanya. Nagalakip ini sang madamo nga iban pa nga nagrebelde nga espiritu, ukon mga demonyo. (Bug. 12:3, 4) Ginpakita man sang mga demonyo ang ila labaw sa tawhanon nga kusog, nga nangin kabangdanan sang grabe nga pag-­antos sang ila mga biktima. (Mat. 8:28-32; Mar. 5:1-5) Indi gid pagpakadiutaya ang gahom sining malaut nga mga anghel ukon sang “manuggahom sang mga demonyo.” (Mat. 9:34) Kon indi kita pagbuligan ni Jehova, indi gid naton madaug si Satanas.

MAPINTAS SI SATANAS

8. (a) Ano ang luyag himuon ni Satanas? (Tan-awa ang piktyur sa umpisa sini nga artikulo.) (b) Suno sa imo naobserbahan, paano ginapakita sini nga kalibutan ang kapintas ni Satanas?

8 Ginpaanggid ni apostol Pedro si Satanas  sa “nagangurob nga leon.” Suno sa isa ka reperensia, ang Griego nga tinaga nga ginbadbad “nagangurob” nagapahangop sang “pag-uwang sang tuman ka gutom nga sapat.” Nagalaragway gid ini sa kapintas ni Satanas! Bisan ang bilog nga kalibutan yara na sa iya gahom, gutom pa gihapon sia sa dugang nga biktima. (1 Juan 5:19) Ginliso ni Satanas ang iya igtalupangod sa nagkalabilin nga hinaplas, kag sa mga kaupod nila nga “iban nga mga karnero.” (Juan 10:16; Bug. 12:17) Determinado si Satanas nga tukbon ang katawhan ni Jehova. Ang tuman kadamo niya nga paghingabot sa mga sumulunod ni Jesus halin sang unang siglo asta sa karon nagapamatuod kon daw ano sia kapintas.

9, 10. (a) Paano gintinguhaan ni Satanas nga balabagan ang katuyuan sang Dios sa pungsod sang Israel? (Maghatag sing mga halimbawa.) (b) Ngaa may pinasahi nga rason si Satanas sa pagpuntariya sa dumaan nga Israel? (c) Ano sa banta mo ang ginabatyag sang Yawa kon ang isa ka alagad ni Jehova subong makahimo sing serioso nga sala?

9 Luyag gid ni Satanas balabagan ang katuyuan sang Dios, gani ginpakita niya ang iya kapintas sa isa pa ka paagi. Ang tuman ka gutom nga leon wala sing kaluoy sa iya biktima. Wala sia naluoy antes magpatay, wala man sia nagahinulsol pagkatapos sia makapatay. Sing kaanggid, wala man naluoy si Satanas sa iya mga tulukbon. Halimbawa, hunahunaa kon daw ano ayhan kasunson nagatiid si Satanas nga Yawa sang ang mga Israelinhon nagpadala sa sala subong sang seksuwal nga imoralidad kag kakagod. Sang nabasa mo ang malain nga resulta sang pagkaimoral ni Zimri kag kakagod ni Gehazi, “makita” mo bala ang nagangurob nga leon nga nagakalipay kay nagdaug sia?Num. 25:6-8, 14, 15; 2 Hari 5:20-27.

Nalipay si Satanas kon ang isa ka alagad ni Jehova makahimo sing sala (Tan-awa ang parapo 10)

10 May pinasahi nga rason si Satanas kon ngaa ginpuntariya niya ang dumaan nga Israel. Kay man, ina nga pungsod ang magapatubas sang Mesias—ang isa nga magadugmok kay Satanas kag magabindikar sa soberanya ni Jehova. (Gen. 3:15) Indi gusto ni Satanas nga mag-uswag ang mga Israelinhon, kag mapintas niya nga gintinguhaan nga makasala sila. Indi pagpamensara nga naluoy si Satanas kay David sang nakapanghilahi ini ukon naluoy sia kay propeta Moises sang wala ini makasulod sa Ginsaad nga Duta. Sa baylo, pat-od nga nagakalipay si Satanas kon  ang isa ka alagad sang Dios mamantsahan sing serioso nga sala. Ang matuod, mahimo nga isa ini sa mga gamiton sang Yawa sa pagyaguta kay Jehova.Hulu. 27:11.

11. Ngaa ginpuntariya gid ni Satanas si Sara?

11 Naugot gid si Satanas sa kaliwatan nga magapatubas sang Mesias. Halimbawa, binagbinaga ang natabo wala madugay pagkatapos nga ginsilingan si Abraham nga sia mangin “isa ka daku nga pungsod.” (Gen. 12:1-3) Sang si Abraham kag si Sara ara sa Egipto, gindala sang Paraon si Sara sa iya puluy-an—maathag nga gusto niya sia pangasaw-on. Pero, nagpasilabot si Jehova kag ginluwas si Sara sa katalagman sa moral. (Basaha ang Genesis 12:14-20.) Natabo ini liwat sa Gerar antes ginbun-ag si Isaac. (Gen. 20:1-7) Si Satanas bala ang sa likod sini nga mga hitabo? Nagalaum bala sia nga si Sara, nga nagbiya sa mahamungayaon nga Ur para mag-istar sa mga tolda, maganyat sa malahalon nga mga palasyo sang Paraon kag ni Abimelec? Ginahunahuna bala ni Satanas nga luiban ni Sara ang iya bana—kag si Jehova—kag magpakighilahi? Wala ini ginasiling sang Biblia, pero may rason gid kita sa pagpati nga malipay ang Yawa kon mangin indi na kalipikado si Sara nga magbun-ag sing ginsaad nga kaliwat. Indi gid pagkonsiensiahon si Satanas kon maguba ang pag-asawahay ni Sara, ang iya reputasyon, kag ang iya tindog kay Jehova. Mapintas gid si Satanas!

12, 13. (a) Paano ginpakita ni Satanas ang iya kapintas sang ginbun-ag si Jesus? (b) Ano sa banta mo ang ginabatyag ni Satanas sa mga kabataan nga nagahigugma kay Jehova kag nagapanikasog nga alagaron Sia subong?

12 Ginbun-ag si Jesus siniglo pagkatapos ni Abraham. Nanamian bala si Satanas sa lapsag, naumol-umol, ukon palangga niya ini? Wala, kay nahibaluan ni Satanas nga ining bag-o ginbun-ag nga lapsag magadaku kag mangin ginsaad nga Mesias. Huo, si Jesus ang panguna nga bahin sang kaliwat ni Abraham, ang isa nga ‘magaguba sa ulihi sang mga binuhatan sang Yawa.’ (1 Juan 3:8) Magahunahuna ayhan si Satanas nga indi na makatarunganon ang pagpatay sa lapsag? Wala sing maayo nga kinaiya si Satanas. Kag parte sa bata nga si Jesus, wala na nangalag-ag si Satanas. Paano?

13 Naakig gid si Hari Herodes sang ginpamangkot sia sang mga astrologo kon “diin natawo ang hari sang mga Judiyo,” kag determinado sia nga patyon ini. (Mat. 2:1-3, 13) Agod masigurado niya nga mahimo ini, nagsugo sia nga pamatyon ang tanan nga bata nga lalaki halin sa duha ka tuig paubos sa Betlehem kag sa tanan nga distrito sini. (Basaha ang Mateo 2:13-18.) Naluwas si Jesus sa grabe nga pagpamatay, pero ano ang ginapakita sini parte sa aton kaaway nga si Satanas? Maathag nga wala ginapabaloran sang Yawa ang kabuhi sang tawo. Wala sia sing kaluoy sa mga bata. Matuod gid nga si Satanas “nagangurob nga leon.” Indi pagpa­ka­diu­taya ang iya kapintas!

MALIMBUNGON SI SATANAS

14, 15. Paano ‘ginbulag ni Satanas ang mga hunahuna sang mga indi tumuluo’?

14 Paagi lamang sa paglimbong mapatalikod ni Satanas ang mga tawo sa mahigugmaon nga Dios nga si Jehova. (1 Juan 4:8) Ginalimbungan ni Satanas ang mga tawo agod indi sila mangin “mahunahunaon sa ila espirituwal nga kinahanglanon.” (Mat. 5:3) Gani ‘ginbulag niya ang mga hunahuna sang mga indi tumuluo, agod indi nila makita ang kapawa sang mahimayaon nga maayong balita tuhoy sa Cristo, nga amo ang larawan sang Dios.’2 Cor. 4:4.

15 Ang panguna nga paagi ni Satanas sa pagpanglimbong amo ang butig nga relihion. Nalipay gid sia nga makita ang mga tawo nga nagasimba sa ila mga katigulangan, ukon sa mga butang sa palibot, ukon sa mga  sapat—sa bisan sin-o ukon sa bisan ano magluwas kay Jehova, nga “nagapatuman nga [sia] lang ang dapat simbahon.” (Ex. 20:5) Bisan ang mga nagapamensar nga nagasimba sila sa Dios sing nagakaigo nagapos sa butig nga mga pagpati kag wala pulos nga mga ritwal. Makaluluoy sila, kaangay sang mga ginsilingan ni Jehova: “Ngaa nagabakal kamo sing mga butang nga indi makaon? Kag ngaa ginagasto ninyo ang inyo kinitaan sa wala sing pulos? Pamati kamo sing maayo sa akon, kag magkaon sing maayo nga pagkaon, kag makabatyag kamo sing kalipay sa matuod nga kabuganaan.”Isa. 55:2.

16, 17. (a) Ngaa ginsilingan ni Jesus si Pedro: “Kadto ka sa likod ko, Satanas”? (b) Paano kita mahimo malimbungan ni Satanas kon parte sa pagkahilingagawon?

16 Mahimo malimbungan ni Satanas bisan ang makugi nga mga alagad ni Jehova. Halimbawa, binagbinaga ang natabo sang ginsilingan ni Jesus ang iya mga disipulo nga lapit na lang sia pagapatyon. Wala sing duhaduha maayo ang motibo ni apostol Pedro sang gindala niya si Jesus sa higad kag ginsilingan: “Maluoy ka sa imo kaugalingon, Ginuo; indi gid ina matabo sa imo.” Prangka ang sabat ni Jesus kay Pedro: “Kadto ka sa likod ko, Satanas!” (Mat. 16:22, 23) Ngaa gintawag ni Jesus si Pedro nga “Satanas”? Kay nahangpan ni Jesus kon ano ang matabo. Nagahilapit na ang oras nga mapatay sia bilang halad gawad kag pamatud-an niya nga butigon ang Yawa. Pero bangod importante ini nga tion sa kasaysayan sang tawo, indi ini tion nga “maluoy” si Jesus sa iya kaugalingon. Gusto gid ni Satanas nga indi na magmabinantayon si Jesus.

17 Samtang nagahilapit na kita sa katapusan sining sistema sang mga butang, nagakabuhi man kita sa makahalanguyos nga tion. Luyag ni Satanas nga indi kita magmabinantayon, nga “maluoy” kita sa aton kaugalingon paagi sa paghimakas sa sini nga kalibutan, amo nga madula naton ang espiritu sang pagkahilingagawon. Indi pagtuguti nga matabo ini sa imo! Sa baylo, “padayon . . . nga magbantay.” (Mat. 24:42) Indi magpati sa propaganda ni Satanas nga ang katapusan madugay pa, ukon indi na gid mag-abot.

18, 19. (a) Paano ginatinguhaan ni Satanas nga limbungan kita sa aton pagtamod sa aton kaugalingon? (b) Paano kita ginabuligan ni Jehova nga mahuptan ang aton ikasarang sa paghunahuna sing maayo kag mangin mabinantayon?

18 May isa pa ka paagi si Satanas sa paglimbong sa aton. Ginapapati niya kita nga wala kita ginahigugma sang Dios kag indi mapatawad ang aton mga sala. Bahin lang ini sang malimbungon nga propaganda ni Satanas. Kay man, sin-o gid bala ang wala ginahigugma ni Jehova? Si Satanas. Sin-o gid bala ang indi na mapatawad? Sa liwat, si Satanas. Pero ginapasalig kita sang Biblia: “Ang Dios matarong kag indi niya pagkalimtan ang inyo binuhatan kag ang gugma nga ginpakita ninyo para sa iya ngalan.” (Heb. 6:10) Ginaapresyar gid ni Jehova ang aton panikasog nga pahamut-an sia, kag ang aton pag-alagad indi wala sing pulos. (Basaha ang 1 Corinto 15:58.) Gani indi kita magpadala sa malimbungon nga propaganda ni Satanas.

19 Subong sang nakita naton, si Satanas gamhanan, mapintas, kag malimbungon. Paano naton madaug ini nga kaaway? Wala kita ginapabay-an ni Jehova. Ginatudluan kita sang iya Pulong parte sa mga paagi ni Satanas, gani “nakahibalo gid kita sang iya mga pahito.” (2 Cor. 2:11) Kon mahangpan naton ang mga paagi ni Satanas, mahuptan naton ang aton ikasarang sa paghunahuna sing maayo kag mangin mabinantayon. Pero ang paghibalo sa mga pahito ni Satanas indi bastante. Ang Biblia nagsiling: “Pamatuki ang Yawa, kag magapalagyo sia sa inyo.” (Sant. 4:7) Binagbinagon sa masunod nga artikulo ang tatlo ka kahimtangan nga mabatuan naton si Satanas kag madaug.