Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MAYO 2015

 HALIN SA AMON ARCHIVE

Nakita Niya nga Gugma ang Nagapadalagan sa Kapiterya

Nakita Niya nga Gugma ang Nagapadalagan sa Kapiterya

ANG pagkaon sing tingob sa lamesa ni Jehova pirme gid panguna nga bahin sang aton mga pagtilipon. Sa pagtipon sang katawhan sang Dios para sa espirituwal nga kapiestahan, ang pagsalo sa materyal nga pagkaon nagadugang man sa ila kalipay.

Sang Septiembre 1919, naghiwat ang mga Estudyante sa Biblia sing walo ka adlaw nga kombension sa Cedar Point, Ohio, U.S.A. May mga hotel kuntani nga magaaman sing dalayunan kag pagkaon sang mga delegado, pero linibo ang sobra nga nag-abot sangsa ginapaabot. Bangod sobra kadamo sang tawo, naglakat ang tanan nga weyter. Nagalalain ang manedyer sang kapiterya kag namangkot sia kon may lamharon nga mga delegado nga handa magbulig, kag madamo ang nagboluntaryo. Isa sa ila amo si Sa­die Green. “First time ko nga magweyter,” hinumdom niya, “pero kasadya sa amon.”

Sierra Leone, sang 1982

Sa sulod sang mga tinuig, ang kapiterya sa kombension naghatag sing kahigayunan sa malipayon nga mga boluntaryo nga makaalagad sa ila kauturan. Ang pagboluntaryo sang mga pamatan-on upod sa ila mga masigkatumuluo nakabulig sa ila nga maghimo sing espirituwal nga tulumuron. Si Gladys Bolton nakaboluntaryo sa kapiterya sang 1937 nga kombension. “Nakilala ko ang mga halin sa iban nga lugar,” siling niya, “kag nabatian ko kon paano nila nalandas ang mga problema. Didto nag-umpisa ang handum ko nga mangin payunir.”

Ang isa nga nagtambong sa kombension nga si Beu­lah Co­vey nagsiling nga ang dedikasyon sang mga nagatrabaho amo ang padayon nga nagapadalagan sang obra. Pero may mga kabudlayan man ini. Sang nag-abot si An­gelo Mane­ra sa Dodger Stadium sa Los Angeles, California, sang 1969, amo pa lang niya nabal-an nga sia gali ang gintangdo nga magadumala sa kapiterya. Sia nagsiling, “Nakibot gid ako sa sadto nga hitabo sa akon kabuhi!” Ang paghanda sa kombension nagalakip sing pagkutkot sang halos tunga sa kilometro nga kanal para sa linya sang gas asta sa kusina!

Frankfurt, Germany, sang 1951

Sa Sierra Leone sang 1982, ang mapisan nga mga boluntaryo nanghawan anay sang latagon para patindugan sang kapiterya nga nagagamit sang kon ano lang nga materyal nga ara sa ila. Sa Frankfurt, Germany, sang 1951, gin-arkilahan sang mga kauturan ang makina nga makapainit sang 40 ka lulutuan. Ang mga nagaserbe nakahatag sing 30,000 ka pagkaon kada oras.  Para indi mabudlayan ang 576 ka boluntaryo sa pagpanghugas, ang mga nagatambong nagadala sang ila kaugalingon nga mga kutsilyo kag tinidor. Sa Yangon, Myanmar, diutay lang nga pangpakahang ang ginabutang sang mga manugluto sa pagkaon nga ginahatag sa mga delegado nga naghalin sa iban nga pungsod.

“NAGATINDOG SILA KON MAGKAON”

Ang malaba nga pila sa nagatagiti nga init sa kapiterya sa kombension sa Estados Unidos sang 1950 nangin pagpakamaayo kay An­nie Pog­gensee. Sia nagsiling: “Nawili gid ako sa pagpamati sa pag-istoryahanay sang duha ka utod nga babayi nga nagbiyahe halin sa Europa paagi sa barko para makatambong.” Ginasaysay sang kada isa sa ila kon paano sila nabuligan ni Jehova nga makatambong. “Daw wala na sing mas malipayon pa sa sining duha ka utod,” siling ni Annie. “Daw wala lang sila makabatyag sang kadugay kag kainit sa pagpila.”

Seoul, Korea, sang 1963

Sa kalabanan nga dalagku nga kombension, may dalagku nga mga tolda sa kapiterya nga ang mga lamesa mataas amo nga kinahanglan magtindog ang mga nagakaon. Ginapalig-on sini ang mga nagatambong nga dasigon ang pagkaon para makabulos ang iban. May iban pa bala nga paagi nga mapakaon ang linibo sa tion sang tigpalanyaga? Ang isa ka tawo nga indi Saksi nagsiling: “Tumalagsahon gid ini nga relihion. Nagatindog sila kon magkaon.”

Nagdayaw gid ang mga awtoridad sa nakita nila nga kadasig kag pagkaorganisado. Pagkatapos mainspeksion sang mga tinawo sang United States Army ang aton kapiterya sa Yankee Stadium sa New York City, ginsilingan nila si Major Faulkner sang British War Department nga mag-inspeksion man. Gani, nagkadto sila sang iya asawa sa 1955 nga “Triumphant Kingdom” nga Asembleya sa Twickenham, England. Nagsiling sia nga nakita niya nga gugma ang nagapadalagan sa kapiterya.

Sa sulod sang mga dekada, mahigugmaon nga nagaserbe ang mga boluntaryo sing masustansia kag barato nga pagkaon para sa mga tumalambong sang kombension. Pero daku nga trabaho ang kinahanglan nga sa masami madamo nga boluntaryo ang nagatrabaho sing malawig amo nga indi sila makapanginpulos sa pila ukon bug-os nga programa. Sang ulihi nga bahin sang katuigan 1970, ginpasimple ang kahimusan sa pagkaon sa mga kombension sa madamo nga lugar. Dayon sugod sang 1995, ginpangabay ang mga delegado nga magbalon sang ila kaugalingon nga pagkaon sa mga kombension. Gani ang mga nagapreparar kag nagaserbe sang mga pagkaon sang una makapanginpulos na sa espirituwal nga programa kag pagpakig-upod sa mga kauturan. *

Ginpabaloran gid ni Jehova yadtong mga nagtrabaho agod maalagaran ang ila masigkatumuluo! Ang iban mahimo nagahinumdom sang makalilipay nga mga adlaw sa pagtrabaho sa kapiterya sadto. Pero isa ka butang ang pat-od: Gugma gihapon ang nagapangibabaw sa aton mga kombension.Juan 13:34, 35.

^ par. 12 Siempre, madamo man sing kahigayunan ang mga boluntaryo nga magbulig sa iban nga departamento sang kombension.

Magtuon sing Dugang Pa

Pagdumdom sa “Bilog nga Kalibutan” nga Asembleya

Sang nagligad nga 50 ka tuig, 583 ka Saksi ni Jehova ang nagbiyahe sing napulo ka semana sa bilog nga kalibutan.

Pila ka Bahin sang 1963 nga Internasyonal nga mga Asembleya

Tan-awa ang pila ka bahin sang duha ka oras nga video sang “Walay Katapusan nga Maayong Balita” nga Internasyonal nga Asembleya nga ginhiwat sang 1963.

Ginatipon ni Jehova ang Iya Malipayon nga Katawhan

Ano ang pagkaanggid sang mga kapiestahan sa Biblia sa mga kombension sang mga Saksi ni Jehova? Ngaa dapat naton ini tambungan?