Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MAYO 2015

Iluga ang Isa nga Nagsaad sang Kabuhi nga Wala sing Katapusan

Iluga ang Isa nga Nagsaad sang Kabuhi nga Wala sing Katapusan

“Mangin manug-ilog kamo sa Dios, subong mga anak nga hinigugma.”EFE. 5:1.

1. Ano nga ikasarang ang makabulig sa aton nga mailog ang mga kinaiya sang Dios?

GINHATAGAN kita ni Jehova sing ikasarang nga ibutang ang aton kaugalingon sa sitwasyon sang iban. Gani mahimo naton mahunahuna ang isa ka sitwasyon bisan wala pa naton ini maeksperiensiahan. (Basaha ang Efeso 5:1, 2.) Paano naton magamit sing maalamon ini nga regalo sang Dios? Paano naton malikawan nga makahalit ini sa aton?

2. Ano ang epekto kay Jehova sang aton pag-antos?

2 Wala sing duhaduha nalipay gid kita nga nagsaad ang Dios sing imortalidad sa mga matutom nga hinaplas kag kabuhi nga wala sing katapusan sa duta para sa “iban nga mga karnero” nga mainunungon kay Jesus. (Juan 10:16; 17:3; 1 Cor. 15:53) Siempre, ang imortal nga kabuhi sa langit ukon ang dayon nga kabuhi sa duta wala na sing pag-antos nga kaangay sa naeksperiensiahan naton karon. Nahibaluan ni Jehova ang aton mga kasakit, pareho nga nahibaluan niya ang pag-antos sang mga Israelinhon sang una sang nangin mga  ulipon sila sa Egipto. Matuod gid nga “sa tanan nila nga pag-antos, nag-antos man sia.” (Isa. 63:9) Pagligad sang mga siniglo, nahadlok ang mga Judiyo bangod ang ila mga kaaway nagapamatok sa pagpatindog liwat sang templo, pero ang Dios nagsiling: “Ang nagatandog sa inyo nagatandog sa tawotawo sang akon mata.” (Zac. 2:8) Pareho sa pagpalangga sang iloy sa iya lapsag, napahulag man si Jehova nga manghikot sing mahigugmaon para sa iya katawhan. (Isa. 49:15) Daw pareho lang nga ginabutang ni Jehova ang iya kaugalingon sa lugar sang iban, kag ginhatagan man niya kita sina nga ikasarang.Sal. 103:13, 14.

KON PAANO GINPAKITA NI JESUS ANG GUGMA SANG DIOS

3. Ano ang nagapakita nga maluluy-on si Jesus?

3 Nahibaluan ni Jesus ang pag-antos sang iban, bisan pa yadtong mga tawo nga ang espesipiko nga kahimtangan wala pa niya maagyan. Halimbawa, ang ordinaryo nga mga tawo nahadlok sa mga lider sang relihion, nga nagadaya kag nagapabug-at sa ila sang madamo nga pagsulundan nga ginhimo sang tawo. (Mat. 23:4; Mar. 7:1-5; Juan 7:13) Wala gid si Jesus makaagi nga nahadlok ukon nadaya, pero mahangpan niya ang kahimtangan nga wala niya maeksperiensiahan. Gani, “sang makita niya ang mga tawo, naluoy sia sa ila kay ginpanitan sila kag nag-alaplaag kaangay sang mga karnero nga wala sing manugbantay.” (Mat. 9:36) Kaangay sang iya Amay, mahigugmaon kag maluluy-on si Jesus.Sal. 103:8.

4. Paano ang pagkakita sa pag-antos sang iban nakaapektar kay Jesus?

4 Kon makita ni Jesus ang mga tawo nga nagaantos, napahulag sia nga pakitaan sila sing gugma. Gani, himpit niya nga napakita ang gugma sang iya Amay. Pagkatapos sang ila pagbantala sa madamo nga lugar, manugkadto na si Jesus kag ang iya mga apostoles sa baw-ing nga lugar para makapahuway. Pero bangod naluoy si Jesus sa madamo nga tawo nga nagahulat sa iya, naghinguyang sia sing tion para ‘tudluan sila sing madamo nga butang.’Mar. 6:30, 31, 34.

KON PAANO NATON MAILOG ANG GUGMA NI JEHOVA

5, 6. Para mailog naton ang gugma sang Dios, paano naton dapat pakig-angutan ang aton isigkatawo? Iilustrar. (Tan-awa ang piktyur sa umpisa sini nga artikulo.)

5 Mailog naton ang gugma sang Dios paagi sa aton pagpakig-angot sa aton isigkatawo. Sa pag-ilustrar: Halimbawa may pamatan-on nga Cristiano, nga tawgon naton nga Alan, nga nagahunahuna sa tigulang nga utod nga lalaki nga indi na gawa makakita kag nabudlayan sa pagbasa. Nabudlayan naman sia maglakat sa pagpamalaybalay. Nadumduman ni Alan ang ginsiling ni Jesus: “Himua ninyo sa inyo isigkatawo ang luyag ninyo nga himuon nila sa inyo.” (Luc. 6:31) Gani ginpamangkot ni Alan ang iya kaugalingon, ‘Ano ang gusto ko nga himuon sang akon isigkatawo sa akon?’ Ang prangka niya nga sabat, ‘Gusto ko nga updon ko nila hampang!’ Pero indi na makasarang ang utod maghampang indi bala? ­Ginapakita sang ginsiling ni Jesus nga dapat pamangkuton naton ang aton kaugalingon, ‘Ano ang gusto ko nga himuon sang isigkatawo ko sa akon kon ako ang ara sa iya kahimtangan?’

6 Indi tigulang si Alan, pero may ikasarang sia nga mahangpan ang butang nga wala pa niya maeksperiensiahan. Ginapanilagan niya ang tigulang nga utod kag ginapamatian ang iya mga ginakabalak-an. Amat-amat niya nga maintiendihan kon ano ang kahimtangan sang tigulang nga nabudlayan sa pagbasa sing Biblia ukon maglakat sa pagpamalaybalay. Kon mabatyagan na ni Alan ang kabudlay sang tigulang nga utod, makita niya kon ano ang kinahanglanon nga bulig, kag gusto niya sia nga buligan. Mahimo man naton ini. Para mailog ang gugma sang Dios, dapat ibutang naton ang aton kaugalingon sa lugar sang aton utod.1 Cor. 12:26.

Iluga si Jehova paagi sa pagpakita sing gugma (Tan-awa ang parapo 7)

7. Paano naton makilala sing maayo ang iban para mahangpan naton ang ila kasakit?

 7 Kon kaisa indi mahapos ang paghangop sa pag-antos sang iban. Madamo nga tawo ang may mga kabudlayan nga wala naton mahibaluan. Ang iban nagaantos sa pisikal bangod sang kasamaran, balatian, ukon pagtigulang. Ang iban nagalandas sing mga kabudlayan sa emosyon bangod sa depresyon, panic attack, ukon resulta sang pag-abuso sa ila. May ara man nga lainlain ang relihion sang miembro sang pamilya ukon nagasolo nga ginikanan. Ang tanan nagaatubang sing problema, kag sa masami wala naton ini maagyan. Sa sini nga kahimtangan, paano naton mailog ang gugma sang Dios? Paagi sa pagpamati sing maayo sa iban asta mahangpan naton ang ila ginabatyag tubtob posible. Mapahulag kita sini nga ilugon ang gugma ni Jehova nga nagabulig kon may kinahanglanon. Lainlain ang kinahanglanon sang tagsatagsa, pero makahatag kita sing espirituwal nga pagpalig-on kag iban pa nga praktikal nga bulig.Basaha ang Roma 12:15; 1 Pedro 3:8.

ILUGA ANG KAAYO NI JEHOVA

8. Ano ang nakabulig kay Jesus nga magpakita sing kaayo?

8 Ang Anak sang Dios nagsiling: ‘Ang Labing Mataas mainayuhon sa mga indi mapinasalamaton kag mga malauton.’ (Luc. 6:35) Ang matuod, gin-ilog ni Jesus ang kaayo sang Dios. Ano ang nakabulig kay Jesus nga mahimo ini? Nangin mainayuhon sia sa mga tawo paagi sa paghunahuna kon ano ang epekto sang iya ginahambal kag ginahimo sa balatyagon sang iban. Halimbawa, nagpalapit sa iya ang babayi nga kilala nga makasasala, nagahibi sia kag ginabasa niya sang iya mga luha ang mga tiil ni Jesus. Nahantop ni Jesus nga nagahinulsol sia, kag nahibaluan niya nga masakit gid ang balatyagon sang babayi kon pahalinon niya sia. Gani, ginkomendahan sia ni Jesus kag ginpatawad. Sang naakig ang isa ka Fariseo sa natabo, mainayuhon man sia nga gin-istorya ni Jesus.Luc. 7:36-48.

9. Ano ang makabulig sa aton nga mailog ang kaayo sang Dios? Maghatag sing halimbawa.

9 Paano naton mailog ang kaayo sang Dios? Si apostol Pablo nagsulat: “Ang ulipon sang Ginuo indi kinahanglan makig-away, kundi kinahanglan mangin malulo [ukon, “mataktika,” footnote] sa tanan.” (2 Tim. 2:24) Ang mataktikanhon nga mga tawo nakahibalo kon ano ang himuon sa sensitibo nga mga sitwasyon para malikawan nga masakit ang balatyagon sang iban. Hunahunaa kon paano kita mangin mainayuhon sa masunod nga mga sitwasyon: Sa trabaho, wala ginahimo sing maayo sang aton superbisor ang iya obra. Ano ang aton himuon? Ang isa ka utod amo pa lang liwat nakatambong sa miting pagkatapos sang pila na ka bulan. Ano ang ihambal naton sa iya? Sa ministeryo, nagsiling ang tagbalay, “Tama pa ako kasako subong, indi ako makaistorya sa imo.” Mangin makonsiderasyon bala kita? Sa balay, namangkot ang aton tiayon, “Ngaa wala mo ko ginsugiran kon ano ang plano mo sa Sabado?” Mangin mainayuhon bala kita magsabat? Kon ibutang naton ang aton kaugalingon sa lugar sang iban kag hunahunaon ang epekto sang aton ginahambal sa ila, mahibaluan naton kon paano naton mailog ang kaayo ni Jehova sa aton panghambal kag paggawi.Basaha ang Hulubaton 15:28.

ILUGA ANG KAALAM SANG DIOS

10, 11. Ano ang makabulig sa aton nga mailog ang kaalam sang Dios? Maghatag sing halimbawa.

10 Ang aton ikasarang nga mahangpan ang mga hitabo nga wala naton maagyan makabulig sa aton nga mailog ang kaalam ni Jehova kag makita kon ano ang posible nga resulta sang aton ginahimo. Ang kaalam isa sa panguna nga mga kinaiya ni Jehova, kag kon gustuhon niya, detalyado niya nga makita ang resulta sang isa ka buhat. Wala kita sing amo sini nga ikasarang, pero mahunahuna naton ang mahimo nga resulta sang aton pagahimuon. Ang mga Israelinhon napaslawan sa paghunahuna kon ano ang resulta sang ila indi  pagtuman sa Dios. Bisan pa madamo na sing ginhimo ang Dios para sa ila, nahibaluan ni Moises nga magahimo sila sing malain sa panan-aw ni Jehova. Nabatian sang bilog nga katilingban sang Israel ang ambahanon ni ­Moises nga nagasiling: “Ang Israel isa ka pungsod nga wala sing kaalam, kag wala sila sing paghangop. Kon maalam lamang sila kuntani! Hunahunaon nila ini. Binagbinagon nila ang ila madangatan.”Deut. 31:29, 30; 32:28, 29.

11 Agod mailog naton ang kaalam sang Dios, hunahunaon naton ukon handurawon ang posible nga resulta sang aton mga ginahimo. Halimbawa, samtang naganobyahanay, dapat naton batunon nga mabaskog ang ganyat sa sekso. Indi gid kita magplano ukon maghimo sing bisan ano nga makahalit sa aton hamili nga kaangtanan kay Jehova! Manghikot kita suno sa sining pulong nga halin sa Dios: “Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.”Hulu. 22:3.

LIKAWI ANG MAKAHALALIT NGA PAGHANDURAW

12. Paano ang paghanduraw makahalit sa aton?

12 Narealisar sang maalamon nga tawo nga ang paghanduraw daw pareho sa kalayo. Kon gamiton ini sa husto nga paagi, makabulig ini, pareho sa pagluto sang pagkaon. Pero makamamatay ang kalayo kon indi na ini makontrol kag magasunog ini sa balay kag magapatay sa mga nagaistar diri. Sing kaanggid, mapuslanon ang paghanduraw kon nagabulig ini sa aton nga ilugon si Jehova. Pero makahalalit ini kon ginadabukan sini ang imoral nga mga handum. Halimbawa, kon pirme kita nagahunahuna sing sala nga mga buhat, magadul-ong ini sa paghimo sina nga sala. Matuod gid nga ang paghanduraw sang mga butang nga imoral makamamatay sa espirituwal!—Basa­ha ang Santiago 1:14, 15.

13. Ano nga kabuhi ang posible ginhanduraw ni Eva?

13 Binagbinaga kon paano nagtubo ang handum sang una nga babayi, si Eva, nga kaunon ang ginadilian nga “bunga sang kahoy sang pagkilala sang maayo kag malain.” (Gen. 2:16, 17) Ang man-ug nagsiling sa iya: “Indi kamo mapatay. Kay nakahibalo ang Dios nga sa adlaw nga magkaon kamo sini, magamuklat ang inyo mga mata kag mangin kaangay kamo sa Dios, nga nakahibalo kon ano ang maayo kag malain.” “Nakita [ni Eva] nga ang bunga sang kahoy maayo nga kalan-on. Makagalanyat ini.” Ano ang resulta? “Nagkuha sia sang bunga sini kag ginkaon ini. Pagkatapos, sang upod na niya ang iya bana, ginhatagan man niya ang iya bana kag nagkaon sia.” (Gen. 3:1-6) Para kay Eva, daw may makagalanyat gid sa ginsiling ni Satanas. Si Eva na ang magadesisyon, imbes nga tudluan sia sa  kon ano ang maayo kag malain. Makahalalit gid yadto nga panghunahuna! Paagi sa makasasala nga bana ni Eva nga si Adan, “nagsulod ang sala sa kalibutan kag ang kamatayon paagi sa sala.”Roma 5:12.

14. Paano kita ginabuligan sang Biblia nga malikawan ang malain nga buhat?

14 Ang sala ni Eva sa hardin sang Eden wala nagadalahig sing seksuwal nga imoralidad. Pero, nagpaandam si Jesus batok sa paghunahuna pirme sang imoral nga buhat. Sia nagsiling: “Ang bisan sin-o nga nagatulok sa isa ka babayi kag nagahandum sa pagpakighilahi sa iya, nakapakighilahi na sa iya tagipusuon.” (Mat. 5:28) Dugang pa, si Pablo nagpaandam: “Indi kamo magplano para sa mga kailigbon sang unod.”Roma 13:14.

15. Ano nga klase sang bahandi ang dapat naton tipunon, kag ngaa?

15 Ang isa pa ka katalagman amo ang paghanduraw nga mangin tuman ka manggaranon nga wala na nagapamati sa Dios. Ang matuod, “ginahunahuna” sang manggaranon nga ang iya manggad kaangay “sang pader nga nagaamlig sa iya.” (Hulu. 18:11) Ginsaysay ni Jesus ang istorya nga nagailustrar sang masubo nga resulta sang tawo “nga nagatipon sang bahandi para sa iya kaugalingon apang indi manggaranon sa Dios.” (Luc. 12:16-21) Nalipay si Jehova kon nagahimo kita sang mga butang nga makapahamuot sa iya. (Hulu. 27:11) Nalipay gid kita kon mahamuot sia bangod nagatipon kita sing ‘mga bahandi didto sa langit’! (Mat. 6:20) Kag pat-od gid nga ang maayo nga kaangtanan kay Jehova amo ang pinakabilidhon nga bahandi nga matigayon naton.

PAGKONTROL SA KABALAKA

16. Ano ang isa ka paagi nga makontrol ang kabalaka?

16 Hunahunaa ang aton kabalaka kon nagapanikasog gid kita nga magtipon sing ‘mga bahandi diri sa duta.’ (Mat. 6:19) Naggamit si Jesus sing ilustrasyon para ipakita nga “ang kabalaka sa sini nga sistema sang mga butang kag ang limbong sang manggad” makalumos sa pulong parte sa Ginharian. (Mat. 13:18, 19, 22) Nagakabalaka man sa kuarta ukon wala, ang pila ka tawo padayon nga nagahunahuna sang malain nga mga butang nga mahimo matabo. Pero, ang indi kontrolado nga kabalaka mahimo makahalit sa aton sa pisikal kag espirituwal. Magsalig kita kay Jehova kag dumdumon nga “ang kabalaka sa tagipusuon sang tawo nagapabug-at sini, apang ang maayo nga pulong nagapasadya sa iya.” (Hulu. 12:25) Ang pagpalig-on halin sa isa nga nakaintiende sa aton nagapahalipay gid sa aton tagipusuon. Ang pagsugid sa aton mga ginikanan, tiayon, ukon masaligan nga abyan nga may pareho nga pagtamod sa Dios makapahaganhagan sang aton kabalaka.

17. Paano kita ginabuligan ni Jehova nga mahaganhagan ang kabalaka?

17 Wala na sing mas makaintiende sang aton kabalaka sangsa kay Jehova. “Indi kamo magkabalaka sa bisan ano nga butang,” sulat ni Pablo, “kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna paagi kay Cristo Jesus.” (Fil. 4:6, 7) Hunahunaa ang mga nagabulig sa aton nga maamligan kita sa katalagman sa espirituwal—mga masigkatumuluo, mga gulang, ang matutom nga ulipon, mga anghel, si Jesus, kag si Jehova mismo.

18. Paano ang paghanduraw makabulig sa aton?

18 Subong sang nakita naton, ang paghanduraw nagabulig sa aton nga mailog ang mga kinaiya sang Dios, pareho sang gugma. (1 Tim. 1:11; 1 Juan 4:8) Mangin malipayon kita kon may matuod kita nga gugma, nagahunahuna sa resulta sang aton ginahimo, kag nagalikaw nga madula ang aton kalipay bangod sa kabalaka. Gani gamiton naton sing maayo ang ginhatag sang Dios nga ikasarang para sa paghanduraw sang aton paglaum kag pag-ilog sa gugma, kaayo, kaalam, kag kalipay ni Jehova.Roma 12:12.