Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2015

Kon Ngaa Mahigugmaon nga Kahimusan ang Pag-disfellowship

Kon Ngaa Mahigugmaon nga Kahimusan ang Pag-disfellowship

“SANG nagapamati ako sa pahibalo nga gin-disfellowship ang akon bata, daw narumpag ang akon kalibutan,” hinumdom ni ­Julian. “Sia ang subang namon, kag suod gid kami; pirme gid kami updanay. Huwaran sia nga bata nga lalaki, kag hinali lang nga ang iya paggawi nangin indi na maayo. Puerte ang hilibion sang akon asawa, kag indi ako kabalo kon paano sia lugpayan. Pirme namon ginapamangkot ang amon kaugalingon kon sa diin kami nagkulang subong ginikanan.”

Paano masiling nga ang pag-disfellowship sa isa ka Cristiano mahigugmaon nga kahimusan kay tuman man nga kasakit ang mahatag sini? Ano ang mga rason sa Kasulatan nga ginahimo ini? Kag ngaa gina-disfellowship ang isa?

DUHA KA RASON KON NGAA NAGA-DISFELLOWSHIP

Dapat may duha ka rason nga ma-disfellowship ang isa ka Saksi ni Jehova. Una, nakasala sing serioso ang bawtismado nga Saksi. Ikaduha, wala sia maghinulsol.

Bisan wala ginapangayo ni Jehova nga mangin himpit kita, may talaksan sia sang pagkabalaan nga ginapaabot niya nga sundon sang iya mga alagad. Halimbawa, ginapatuman ni Jehova nga dapat naton likawan ang serioso nga mga sala subong sang seksuwal nga imoralidad, idolatriya, pagpangawat, pagpangilkil, pagpatay, kag espiritismo.1 Cor. 6:9, 10; Bug. 21:8.

Ugyon ka bala nga ang matinlo nga mga talaksan ni Jehova makatarunganon kag nagaamlig ini sa aton? Sin-o ang indi maluyag magpuyo upod sa mahidaiton kag disente nga mga tawo nga masaligan? Amo sini ang kahimtangan sa tunga sang aton espirituwal nga mga kauturan. Bangod ini sa aton panaad sang nagdedikar kita sa Dios nga magkabuhi suno sa mga panuytoy nga masapwan sa iya Pulong.

Pero ano abi kon ang bawtismado nga Cristiano nakahimo sing serioso nga sala bangod sang tawhanon nga kaluyahon? Ang matutom nga mga alagad ni Jehova sang una nakahimo sini nga sahi sang mga sala, pero wala sila dayon ginsikway sang Dios. Si Hari David ang panguna nga halimbawa. Nakighilahi si David kag nakapatay; pero ginsilingan sia ni manalagna Natan: “Ginpatawad ni Jehova ang imo sala.”2 Sam. 12:13.

Ginpatawad sang Dios si David kay sinsero sia nga naghinulsol. (Sal. 32:1-5) Sing kaanggid, ma-disfellowship lamang ang alagad ni Jehova subong kon indi sia maghinulsol ukon magpadayon sia sa paghimo sing malain. (Binu. 3:19; 26:20) Kon indi makita sang mga gulang sa hudisyal nga komite ang sinsero nga paghinulsol sang isa, dapat i-disfellowship nila sia.

Sa primero, mahimo magbatyag kita nga sobra ukon indi mainayuhon nga desisyon ang pag-disfellowship sa nakasala, ilabi na kon suod kita sa sina nga tawo. Pero, may makatarunganon nga mga  rason ang Pulong ni Jehova nga ini nga desisyon mahigugmaon.

MGA BENEPISYO SA PAG-DISFELLOWSHIP

Ginpakita ni Jesus nga ang “kaalam ginapamatud-an nga matarong paagi sa mga resulta sini.” (Mat. 11:19, footnote) Ang maalamon nga desisyon sa pag-disfellowship sa indi mahinulsulon may matarong nga mga resulta. Binagbinaga ang tatlo:

Ang pag-disfellowship sa mga nakasala nagapadungog sa ngalan ni Jehova. Bangod ginadala naton ang ngalan ni Jehova, may epekto ang aton paggawi sa iya ngalan. (Isa. 43:10) Subong nga ang paggawi sang anak magapadungog ukon magapakahuya sa iya mga ginikanan, ang pagtamod sang mga tawo kay Jehova nagadepende sa maayo ukon malain nga halimbawa nga nakita nila sa katawhan nga nagadala sang iya ngalan. Ginapadunggan ang maayo nga ngalan sang Dios kon ang katawhan nga nagadala sina nga ngalan nagasunod sa moral nga talaksan ni Jehova. Daw pareho ini sa tion ni Ezequiel sang gin-angot sang mga tawo sang mga pungsod ang ngalan ni Jehova sa mga Judiyo.Ezeq. 36:19-23.

Mapakahuy-an naton ang balaan nga ngalan sang Dios kon maghimo kita sang imoralidad. Ginlaygayan ni apostol Pedro ang mga Cristiano: “Subong matinumanon nga mga anak, untati na ninyo ang pagpadihon sa mga kailigbon nga yara anay sa inyo sang wala pa kamo sing nahibaluan, sa baylo mangin balaan kamo sa tanan ninyo nga paggawi subong sang Isa nga Balaan nga nagtawag sa inyo, kay nasulat na: ‘Dapat mangin balaan kamo, tungod balaan ako.’ ” (1 Ped. 1:14-16) Ang matinlo kag balaan nga paggawi nagapadungog sa ngalan sang Dios.

Pero kon ang isa ka Saksi ni Jehova nagahimo sing malain, mahimo nga mahibaluan ini sang iya mga abyan kag kilala. Ang pag-disfellowship nagapakita nga may matinlo nga katawhan si Jehova nga nagasunod sa mga talaksan sa Kasulatan para mahuptan ang pagkabalaan. Isa ka bes, may bisita nga nagtambong sa Kingdom Hall sa Swit­zer­land kag nagsiling nga luyag niya mangin katapo sang kongregasyon. Gin-disfellowship ang iya utod nga babayi bangod sa imoralidad. Nagsiling sia nga luyag niya mag-upod sa organisasyon nga “wala nagaugyon sa malain nga paggawi.”

Ang pag-disfellowship nagaamlig sa katinlo sang Cristianong kongregasyon. Nagpaandam si apostol Pablo sa mga taga-Corinto parte sa katalagman kon tugutan nila ang hungod nga mga nagapakasala nga magpabilin sa tunga nila. Ginpaanggid niya ang ila impluwensia sa lebadura nga nagapaalsa sang bug-os nga linamas. “Ang diutay nga lebadura nagapakumbo sa bug-os nga linamas,” siling niya. Ginlaygayan dayon niya sila: “Sikwaya ang malaut nga tawo sa tunga ninyo.”1 Cor. 5:6, 11-13.

Maathag nga ang ginsambit ni Pablo nga “malaut nga tawo” dayag nga nagahimo sing imoralidad. Kag ang iban nga katapo sang kongregasyon nagsugod sa pagpakamatarong sang iya paggawi. (1 Cor. 5:1, 2) Kon pasugtan ining serioso nga sala, ang iban nga Cristiano mahimo masulay nga sundon ang imoral nga kustombre sang tuman kalain nga siudad nga ila ginapuy-an. Ang indi pagsapak sa hungod nga mga sala nagapalig-on sang panimuot nga nagabalewala sa mga talaksan sang Dios. (Man. 8:11) Dugang pa, ang indi mahinulsulon nga mga makasasala mangin “mga bato nga natago sa idalom sang tubig” nga makalunod sang tulad sakayan nga pagtuo sang iban sa kongregasyon.Jud. 4, 12.

Ang pag-disfellowship makaparealisar sa isa nga mabug-at ang iya sala. May ginsaysay si Jesus parte sa isa ka lamharon nga lalaki nga nagbiya sa balay sang iya amay kag nag-ubos sang iya palanublion paagi sa pagpatuyang sa pagkabuhi. Narealisar sang buhaha nga anak nga ang kabuhi sa gua sang ila puluy-an wala pulos kag tama kabudlay. Nakamarasmas sia sang ulihi, naghinulsol, kag nagmatumato pauli sa ila. (Luc. 15:11-24) Ang paglaragway ni Jesus sang mahigugmaon nga amay nga nagkalipay kay naghinulsol ang iya anak makabulig sa aton nga mahangpan ang balatyagon ni Jehova. “Wala ako nalipay nga mapatay ang malauton, kundi luyag ko nga magbag-o sia sang iya dalanon,” pasalig niya.Ezeq. 33:11.

Sing kaanggid, ang mga na-disfellowship nga indi na katapo sang Cristianong kongregasyon—ang ila espirituwal nga pamilya—mahimo makarealisar kon ano ang ila nadula. Ang malain nga epekto sang ila pagpakasala, lakip ang makalilipay nga mga handumanan sang maayo pa ang ila kaangtanan kay Jeho va kag sa iya katawhan, mahimo makapamarasmas sa ila.

Kinahanglan ang gugma kag kalig-on para mangin maayo ang resulta. “Kon sakiton ako sang matarong, buhat ini sang mainunungon nga gugma,” siling ni salmista David, kag “kon sabdungon niya ako, mangin kaangay ini sang lana sa akon ulo.” (Sal. 141:5) Sa pag-ilustrar: Imadyina ang isa ka tawo nga nagataklad sa bukid sa tion sang tigtulugnaw nga nakapoy na gid. Amat-amat nga naubusan sia sang init sa iya lawas, kag ginatuyo sia. Kon matulugan sia sa yelo, mapatay sia. Samtang nagahulat sang manugbulig, ginatampa sia kon kaisa sang iya kaupod para indi sia matulugan. Mahimo masakit ini, pero makaluwas ini sang iya kabuhi. Sing kaanggid, nahibaluan ni David nga ang matarong nagakinahanglan sang masakit nga pagtadlong para sa iya kaayuhan.

Masami nga ang pag-disfellowship amo ang kinahanglan nga disiplina sang nakasala. Pagligad sang napulo ka tuig, ang bata ni ­Julian nga ginsambit kaina nagbag-o, nagbalik sa kongregasyon, kag gulang na subong. “Bangod gin-disfellowship ako, narealisar ko ang malain nga resulta sang akon pagkabuhi,” baton niya. “Kinahanglan ko ini nga disiplina.”Heb. 12:7-11.

ANG MAHIGUGMAON NGA PAAGI SA PAGPAKIG-ANGOT SA MGA GIN-DISFELLOWSHIP

Matuod, ang pag-disfellowship isa ka trahedya sa espirituwal, pero may paglaum pa nga makapanumbalik. Tanan kita makabulig para mangin mapuslanon ang pag-disfellowship.

Ginatinguhaan nga buligan ang mga mahinulsulon nga makabalik kay Jehova

Ang mga gulang nga may masubo nga hilikuton nga ipaalinton ang pag-disfellowship nagatinguha nga ipakita ang gugma ni Jehova. Kon ginapahibalo nila sa nakasala ang ila desisyon, malulo kag ginapaathag nila sing maayo ang mga tikang nga dapat niya himuon para makapanumbalik sa kongregasyon. Para mapahanumdom ang mga na-disfellowship kon paano sila makapanumbalik kay Jehova, regular nga ginaduaw sang mga gulang ang nagapakita nga nagbag-o sila. *

Ang mga miembro sang pamilya makapakita sang gugma sa kongregasyon kag sa nakasala paagi sa pagtahod sa desisyon. “Anak ko gihapon sia,” paathag ni ­Julian, “pero ang iya paagi sang pagkabuhi amo ang nagbalabag sa amon.”

Ang tanan sa kongregasyon makapakita sang gugma nga nabase sa prinsipio paagi sa paglikaw kag indi pag-istorya sa gin-disfellowship. (1 Cor. 5:11; 2 Juan 10, 11) Kon himuon nila ini, ginasakdag nila ang disiplina nga ginhatag ni Jehova paagi sa mga gulang. Dugang pa, mapakita nila ang daku nga gugma kag pagsuporta sa pamilya sang na-disfellowship, nga nagaantos gid kag indi dapat pagpabatyagon nga ginasikway sila sang ila mga masigkatumuluo.Roma 12:13, 15.

“Ang pag-disfellowship isa ka kahimusan nga kinahanglan naton kag makabulig sa aton nga ­magkabuhi sa mga talaksan ni Jehova,” hinakop ni ­Julian. “Bisan pa masakit ini, mangin maayo ang resulta sini sa ulihi. Kon ginkunsinti ko ang malain nga buhat sang akon bata, wala gid sia makapanumbalik.”

^ par. 24 Tan-awa ang Lalantawan, Abril 15, 1991, pahina 21-23.

Magtuon sing Dugang Pa

ANG LALANTAWAN (TULUN-AN NGA EDISYON)

Ngaa May Gina-disfellowship?

Paano ang mahigugmaon nga pagdisiplina ni Jehova nakabulig sa mahinulsulon nga nakasala?