Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2015

Matuod Gid Bala ang Imo Kaangtanan kay Jehova?

Matuod Gid Bala ang Imo Kaangtanan kay Jehova?

“Magpalapit kamo sa Dios, kag magapalapit sia sa inyo.”SANT. 4:8.

1. Ngaa dapat naton huptan nga mabakod ang aton kaangtanan kay Jehova?

DEDIKADO ka bala kag bawtismado nga Saksi ni Jehova? Kon amo, may hamili ka nga ginapanag-iyahan—ang imo kaangtanan sa Dios. Pero, ini nga kaangtanan ginasalakay indi lamang sang mga pag-ipit halin sa kalibutan ni Satanas kundi halin man sa aton indi himpit nga unod. Ang tanan nga Cristiano nagaatubang sining makatalagam nga sitwasyon. Gani, dapat mangin mabakod gid ang aton kaangtanan kay Jehova.

2. (a) Ano ang kaangtanan? (Tan-awa ang footnote.) (b) Paano naton mapabakod ang aton kaangtanan kay Jehova?

2 Matuod gid bala ang imo kaangtanan kay Jehova? Luyag mo bala mapabakod ini? Ang Santiago 4:8 nagasugid sa imo kon paano ini himuon: “Magpalapit kamo sa Dios, kag magapalapit sia sa inyo.” Talupangda nga nadalahig kamo nga duha. * Samtang nagapanghikot kita nga mangin suod sa Dios, nagapanghikot man sia nga mangin suod sa aton. Ang pirme nga pagpakig-angot ­amat-amat nga  magapabakod sang aton kaangtanan kay Jehova. Bilang resulta, mangin mas matuod sa aton ina nga kaangtanan. Mapalambo naton ang pagsalig kaangay ni Jesus nga nagsiling: “Ang Isa nga nagpadala sa akon matuod, kag . . . kilala ko sia.” (Juan 7:28, 29) Pero ano ang espesipiko nga mga tikang nga puede naton himuon para mangin suod kay Jehova?

Paano ka makakomunikar sa Dios? (Tan-awa ang parapo 3)

3. Paano ka makakomunikar kay Jehova?

3 Ang regular nga komunikasyon kay Jehova importante nga bahin sa pagpakigsuod sa iya. Paano ka makakomunikar sa Dios? Ti, paano ka nagakomunikar sa isa ka abyan nga malayo sa imo? Mahimo pirme kamo nagasulatay kag nagatawganay sa telepono. Nagapakighambal ka kay Jehova paagi sa imo pirme nga pagpangamuyo sa iya. (Basaha ang Salmo 142:2.) Kag daw subong bala nga ginatugutan mo si Jehova nga magpakighambal sa imo kon regular ka nga nagabasa sang iya nasulat nga Pulong kag nagapamalandong sa sini. (Basaha ang Isaias 30:20, 21.) Gani binagbinagon naton kon paano ining komunikasyon sa tunga naton kag ni Jehova makapabakod sang aton kaangtanan sa iya kag makabatyag kita nga Abyan gid naton sia.

PAGTUON SA BIBLIA—SI JEHOVA NAGAPAKIGHAMBAL SA IMO

4, 5. Paano nagapakigkomunikar si Jehova sa imo paagi sa iya nasulat nga Pulong? Maghatag sing halimbawa.

4 Mahimo magaugyon ka nga ang Biblia nagaunod sang mensahe sang Dios para sa katawhan. Pero ginasugid man bala sang Biblia kon paano ka mangin suod mismo kay Jehova? Huo. Paano? Samtang regular mo nga ginabasa kag ginatun-an ang Biblia, binagbinaga ang imo reaksion sa ginasiling sini kag hunahunaa kon paano mo maaplikar ini sa imo mga kahimtangan; sa amo ginatugutan mo nga maghambal sa imo si Jehova paagi sa iya Pulong. Bilang resulta, magasuod ka pa gid sa iya.Heb. 4:12; Sant. 1:23-25.

5 Halimbawa, basaha kag pamalandungi ang ginsiling ni Jesus nga “untati ninyo ang pagtipon sing mga bahandi para sa inyo kaugalingon diri sa duta.” Kon para sa imo nasentro na ang imo kabuhi sa mga intereses sang Ginharian, mabatyagan mo ang komendasyon ni Jehova. Sa pihak nga bahin, kon nakita mo nga kinahanglan mo pa pasimplehon ang imo kabuhi kag magpokus sa mga intereses sang Ginharian, ginpatalupangod ni Jehova sa imo ang isa ka bahin nga dapat mo pa panikasugan agod mangin suod sa iya.Mat. 6:19, 20.

6, 7. (a) Paano ang pagtuon sa Biblia makaapektar sa aton gugma kay Jehova kag sa iya gugma sa aton? (b) Ano dapat ang aton tulumuron sa personal nga pagtuon?

6 Ang pagtuon sang Kasulatan wala la mang nagapakita sang mga butang nga dapat naton palambuon sa espirituwal. Ginapadalom man sini ang aton apresasyon sa matahom nga mga dalanon ni Jehova, amo nga labi pa gid naton sia nga higugmaon. Kag kon magtubo ang aton gugma sa Dios, nagadugang man ang gugma niya sa aton, gani mangin mabakod ang aton kaangtanan sa iya.Basaha ang 1 Corinto 8:3.

7 Pero agod mangin suod kita kay Jehova, dapat husto ang aton tulumuron sa pagtuon. Ang Juan 17:3 nagasiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.” Gani, ang aton tulumuron indi lang ang pagkuha sing ihibalo kundi ang “pagkilala” pa gid kay Jehova subong Persona.Basaha ang Exodo 33:13; Sal. 25:4.

8. (a) Ano ang ginahunahuna sang iban parte sa pagpakig-angot ni Jehova kay Hari Azarias, nga ginlaragway sa 2 Hari 15:1-5? (b) Paano ang pagkilala naton kay Jehova makadula sang aton pagduhaduha sa iya mga buhat?

8 Samtang nakilala pa gid naton si Jehova, indi kita matublag kon may pila ka rekord sa Biblia nga indi maathag sa aton kon ngaa amo sina ang iya ginhimo. Halimbawa, ano ang imo reaksion sa pagpakig-angot ni Jehova kay Hari Azarias sang Juda? (2 Hari 15:1-5) Talupangda nga bisan pa “ang katawhan nagahalad kag nagapaaso gihapon sing mga halad sa mataas nga mga duog,” padayon si Azarias nga naghimo sing “matarong sa panulok ni Jehova.” Pero “ginpabudlayan ni Jehova ang hari kag nangin aruon sia tubtob napatay sia.” Ngaa? Wala ini ginpaathag sa sini nga rekord. Dapat bala kita matublag ukon magpalibog kon bala indi husto ang silot ni Jehova kay Azarias? Indi, ina kon may madalom kita nga ihibalo sa mga dalanon ni Jehova. Nagalakip ini sa paghibalo nga pirme nagadisiplina si Jehova “sa nagakaigo nga paagi.” (Jer. 30:11) Ini nga ihibalo nagapasalig sa aton nga bisan wala pa naton mahibaluan kon ngaa amo sina ang ginhimo ni Jehova kay Azarias, masaligan naton nga matarong ang Iya paghukom.

9. Ano nga impormasyon ang nagpaathag kon ngaa ginsilutan ni Jehova sing aro si Azarias?

9 Pero sa sini nga hitabo, may dugang nga detalye nga mabasa naton sa Biblia. Nakilala man si Hari Azarias nga si Hari Uzias. (2 Hari 15:7, 32) Sa kaanggid nga kasaysayan sa 2 Cronica 26:3-5, 16-21, matun-an naton nga bisan pa sang primero naghimo sing maayo si Uzias sa atubangan ni Jehova, sang ulihi “nangin matinaastaason ang iya tagipusuon kag nakahalit ini sa iya.” Bugalon nga gintinguhaan niya nga himuon ang papel sang saserdote nga indi bahin sang iya awtoridad. Ginsaway sia sang 81 ka saserdote kag gintinguhaan nila nga tadlungon sia. Ano ang reaksion ni Uzias? Ginpakita niya kon daw ano sia ka bugalon. ‘Naakig sia’ sa mga saserdote. Indi katingalahan nga ginsilutan sia ni Jehova sing aro!

10. Ngaa indi naton pirme kinahanglan ang paathag sa mga buhat ni Jehova, kag paano naton mapalig-on ang aton pagsalig sa iya matarong nga dalanon?

10 Athagon naton ini. Ano abi kon wala ginlakip sa Pulong sang Dios ang nagapaathag nga mga detalye, pareho sang ginpalip-ot nga mga detalye sa Biblia? Duhaduhaan mo bala ang pagkamatarong sang Dios? Ukon mangatarungan ka bala nga ang Biblia may bastante nga impormasyon para pamatud-an nga husto ang ginahimo ni Jehova, nga ang iya ginahimo amo ang talaksan kon ano ang husto kag kon ano ang sayop? (Deut. 32:4) Samtang makilala pa gid naton si Jehova subong Persona, magadalom ang aton gugma kag apresasyon sa iya mga dalanon asta sa punto nga indi na naton kinahanglan ang paathag sa iya ginahimo. Saligi nga ining apresasyon magadalom samtang nagapanikasog ka nga tun-an kag pamalandungan  ang pagkomunikar sang Dios paagi sa iya nasulat nga Pulong. (Sal. 77:12, 13) Kag magapalig-on pa gid ini sang imo kaangtanan kay Jehova, kag labi pa gid ini nga mangin matuod.

PANGAMUYO—NAGAPAKIGHAMBAL KA KAY JEHOVA

11-13. Paano naton mapat-od nga nagapamati si Jehova sa aton mga pangamuyo? (Tan-awa ang piktyur sa umpisa sini nga artikulo.)

11 Mangin suod kita kay Jehova paagi sa pangamuyo. Ginadayaw naton sia, ginapasalamatan, kag ginapangayo ang iya panuytoy. (Sal. 32:8) Pero para mangin matuod ang imo kaangtanan kay Jehova, dapat kumbinsido ka nga nagapamati sia sang mga pangamuyo.

12 Ang pila ka tawo nagapati nga ang pangamuyo isa lang ka paagi para mag-ayo ang ila pamatyag. Suno sa ila, nagabatyag ka lang nga ginsabat ang imo pangamuyo bangod ginsugid mo ang imo ginahunahuna, ginhibalo ang imo problema, kag ginpaligban kon ano ang solusyon. Magluwas pa sa sining mga benepisyo, paano mo mahibaluan nga ang sinsero nga mga pangamuyo ginapamatian gid ni Jehova?

13 Binagbinaga ini: Antes nangin tawo si Jesus, nakita niya mismo kon paano ginasabat ni Jehova ang mga pangamuyo sang Iya tawhanon nga mga alagad. Sang ari si Jesus sa duta, nagapangamuyo sia para isugid sa iya Amay sa langit ang iya balatyagon. Himuon bala niya ini, nga magpangamuyo pa gani sa bug-os nga gab-i, kon nahibaluan niya nga wala nagapamati si Jehova? (Luc. 6:12; 22:40-46) Tudluan bala niya ang iya mga disipulo nga mangamuyo kon nahibaluan niya nga ang pangamuyo para lang mangin maayo ang ila pamatyag? Maathag nga nahibaluan ni Jesus nga ang pangamuyo matuod nga komunikasyon kay Jehova. Isa ka bes, nagsiling si Jesus: “Amay, nagapasalamat ako sa imo nga ginpamatian mo ako. Nakahibalo ako nga pirme mo ako ginapamatian.” Makapat-od man kita nga si Jehova “Manugpamati sang pangamuyo.”Juan 11:41, 42; Sal. 65:2.

14, 15. (a) Paano kita makabenepisyo kon espesipiko ang aton mga pangamuyo? (b) Paano nagbakod ang kaangtanan sang isa ka utod nga babayi kay Jehova paagi sa pangamuyo?

14 Ang sabat sa imo mga pangamuyo indi hilmunon kon kaisa. Pero kon ­espesipiko ang imo mga pangamuyo, mangin mas ­maathag ang sabat ni Jehova. Mangin matu od pa gid si Jehova sa imo kon ginasabat niya ang imo mga pangamuyo. Dugang pa, samtang ginapabutyag mo kay Jehova ang imo mga kabalaka, magasuod pa gid sia sa imo.

15 Binagbinaga ang eksperiensia ni Kathy. * Wala sia nalipay sa paggua sa latagon, bisan regular pa sia nga nagapakigbahin. Sia nagsiling: “Wala ako nanamian sa pagbantala. Ang matuod, wala ko gid ini naluyagan. Sang nagretiro ako sa akon obra, ginpalig-on ako sang gulang nga magregular payunir; ginhatagan pa gani niya ako sing aplikasyon. Nagpayunir ako, pero adlaw-adlaw ko nga ginapangamuyo kay Jehova nga maluyagan ko lang kuntani ang pag-alagad sa latagon.” Ginsabat bala ni Jehova ang iya pangamuyo? Sia nagsiling: “Tatlo na ako ka tuig sa pagpayunir. Bangod pirme ako nagabantala kag nakatuon sa iban nga mga utod nga babayi, amat-amat nga napauswag ko ang akon ikasarang sa pagpanaksi. Karon, wala lang ako nanamian mag-alagad sa latagongusto ko gid ini. Dugang pa, nagsuod pa gid ako kay Jehova.” Nakabulig gid kay Kathy ang pangamuyo para mangin matuod ang iya kaangtanan kay Jehova.

PAGHIMO SANG ATON BAHIN

16, 17. (a) Ano ang aton himuon agod padayon nga mangin buhi kag suod ang aton kaangtanan kay Jehova? (b) Ano nga mabudlay nga hangkat ang binagbinagon sa masunod nga artikulo?

16 Ang pagpakigsuod kay Jehova isa ka bug-os kabuhi nga tulumuron. Dapat kita manikasog nga mangin suod sa Dios kon gusto naton nga makigsuod sia sa aton. Gani, tinguhaan naton nga mangin regular ang aton komunikasyon sa aton Dios paagi sa pagtuon sa Biblia kag pagpangamuyo. Kay kon himuon naton ini, ang aton nagabakod nga kaangtanan kay Jehova makabulig sa aton nga malampuwasan ang mga pagtilaw.

Ang pagpakigsuod kay Jehova isa ka bug-os kabuhi nga tulumuron (Tan-awa ang parapo 16, 17)

17 Pero mahimo isa ka mabudlay nga hangkat kon ang aton personal nga problema magpadayon bisan pa pirme kita nagapangamuyo. Kon kaisa, nagaluya ang aton pagsalig kay Jehova. Mahimo magduhaduha kita kon ginapamatian gid man ni Jehova ang aton pangamuyo ukon kon luyag gid man niya nga mangin suod sa aton. Paano naton maatubang ini nga mga kahimtangan nga nagasalig nga matuod ang aton kaangtanan sa Dios? Binagbinagon ini sa masunod nga artikulo.

^ par. 2 Ginalaragway ang kaangtanan subong ang balatyagon kag pagpakig-angot sang duha ka tawo sa isa kag isa. Gani duha sila ang nadalahig.

^ par. 15 Gin-islan ang ngalan.

Magtuon sing Dugang Pa

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Paano Ka Makapalapit sa Dios?

Mahimo ka gid makapakig-abyan sing suod sa Dios.