Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MARSO 2015

Mga Pamangkot Gikan sa mga Bumalasa

Mga Pamangkot Gikan sa mga Bumalasa

Sang una, ang aton mga publikasyon nagasambit sang larawan kag ginalarawan, pero sining karon lang nga tinuig, talagsa na lang ini ginahimo. Ngaa?

Ang Watchtower sang Septiembre 15, 1950, nagahatag sing kahulugan sa “larawan” kag “ginalarawan” sa sini nga paagi: “Ang larawan amo ang representasyon sang isa ka butang nga mahanabo sa palaabuton. Ang ginalarawan amo ang katunayan sang butang nga ginarepresentar sang larawan. Ang larawan nagakaigo tawgon nga landong; ang ginalarawan amo ang katunayan.”

Sang nagligad nga mga tinuig, ang aton mga publikasyon nagsiling nga ang matutom nga mga lalaki kag babayi subong nanday Debora, Elihu, Jefte, Job, Rahab, Rebeca, kag ang madamo nga iban pa, mga larawan ukon landong sang mga hinaplas ukon sang “daku nga kadam-an.” (Bug. 7:9) Halimbawa, sanday Jefte, Job, kag Rebeca ginapatihan nga nagarepresentar sa mga hinaplas, samtang sanday Debora kag Rahab nagalandong sa daku nga kadam-an. Apang, sining karon lang nga tinuig, wala naton ginahimo ini nga pagpaanggid. Ngaa?

LARAWAN

Ang kordero sa paskua nga ginhalad sang dumaan nga Israel isa ka larawan.Num. 9:2

GINALARAWAN

Ginpatuhuyan ni Pablo ang Cristo subong “aton kordero sa Paskua.”1 Cor. 5:7

Ginapakita sang Kasulatan nga ang pila ka indibiduwal nga ginsambit sa Biblia mga larawan sang mas dalagku nga mga butang. Subong sang narekord sa Galacia 4:21-31, si apostol Pablo nagsambit sing “simbuliko nga drama” nga nagadalahig sa duha ka babayi. Si Hagar, nga alagad nga babayi ni Abraham, nagarepresentar ukon nagapatuhoy sa literal nga Israel, nga nakatigayon sing kaangtanan kay Jehova paagi sa Mosaikong Kasuguan. Pero si Sara, ang “hilway nga babayi,” nagalaragway sa asawa sang Dios, ang langitnon nga bahin sang iya organisasyon. Sa iya sulat sa mga Hebreo, gin-angot ni Pablo ang hari kag saserdote nga si Melquisedec kay Jesus, nga nagapadaku sang espesipiko nga mga butang nga magkaanggid sila. (Heb. 6:20; 7:1-3) Dugang pa, ginpaanggid ni Pablo si Isaias kag ang iya mga anak nga lalaki kay Jesus kag sa iya hinaplas nga mga sumulunod. (Heb. 2:13, 14) Si Pablo nagsulat sa panuytoy sang Dios; gani ginabaton gid naton ang iya ginsiling parte sa sini nga mga larawan.

Apang, bisan pa ginapakita sang Biblia nga ang isa ka tawo larawan sang isa pa, indi kita dapat maghinakop nga ang tagsa ka detalye ukon hitabo sa  kabuhi sang larawan, nagalaragway sa mas dalagku nga butang. Halimbawa, bisan pa nagsiling si Pablo nga si Melquisedec larawan ni Jesus, wala sing ginsiling si Pablo parte sa hitabo nga nagdala si Melquisedec sing tinapay kag alak para kay Abraham agod kaunon sa tapos niya malutos ang apat ka hari. Gani, wala sing Makasulatanhon nga basihan nga pangitaan sing kahulugan ini nga insidente.—Gen. 14:1, 18.

Siniglo sa tapos sang kamatayon sang Cristo, ang pila ka manunulat nasiod sa pagpangita sing mga larawan sa halos tanan nga kasaysayan sa Biblia. Sa paglaragway sa mga panudlo nanday Origen, Ambrose, kag Jerome, ang The International Standard Bible Encyclopaedia nagpaathag: “Ginpangitaan nila sing mga larawan ang tagsa ka insidente kag hitabo nga narekord sa Kasulatan, kag nakita nila ini bisan pa indi man gid importante. Bisan ang simple katama kag kinaandan nga kahimtangan ginapatihan nga may natago nga importante nga kamatuoran . . . , bisan ang kadamuon sang isda nga nakuha sang mga disipulo sang gab-i nga nagpakita sa ila ang nabanhaw nga Manluluwas—ginhatagan sing kahulugan sang iban ina nga numero, nga 153!”

Madamo sing ginhambal si Augustine sang Hippo tuhoy sa kasaysayan nga ginpakaon ni Jesus ang mga 5,000 ka lalaki sing lima ka tinapay nga sebada kag duha ka isda. Bangod ang sebada ginakabig nga mapigaw sangsa trigo, naghinakop si Augustine nga ang lima ka tinapay nagarepresentar sa lima ka libro ni Moises (ang mapigaw nga “sebada” nagarepresentar sa pagkakubos kuno sang “Daan nga Katipan”). Ano naman ang duha ka isda? Sa pila ka rason ginpaanggid niya sila sa isa ka hari kag isa ka saserdote. Ang isa pa ka iskolar nga nanamian sa pagpangita sing larawan kag ginalarawan nagsiling nga ang pagbakal ni Jacob sang pagkapanganay ni Esau paagi sa isa ka yahong sang mapula nga linaga nagalaragway sa pagbakal ni Jesus sang langitnon nga palanublion para sa katawhan paagi sa iya mapula nga dugo!

Kon ina nga mga interpretasyon daw kalayo gid, makita mo ang problema. Indi mahibaluan sang mga tawo kon ano nga kasaysayan sa Biblia ang landong sang mga butang nga magaabot. Apang amo ini ang maathag naton nga himuon: Kon ginatudlo sang Kasulatan nga ang isa ka tawo, hitabo, ukon butang larawan sang isa pa, batunon naton ini. Pero indi kita dapat maghatag sing kahulugan nga ginalarawan ang isa ka tawo ukon hitabo kon wala ini sing espesipiko nga basihan sa Kasulatan.

Gani, paano kita makabenepisyo sa mga hitabo kag mga halimbawa sa Kasulatan? Sa Roma 15:4, nagsiling si apostol Pablo: “Ang tanan nga butang nga ginsulat sadto ginsulat sa pagtudlo sa aton. Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.” Ginapahangop ni Pablo nga ang iya hinaplas nga mga utod sang unang siglo makatuon sing mapuslanon nga mga leksion sa mga hitabo nga narekord sa Kasulatan. Pero, ang katawhan sang Dios sa tagsa ka kaliwatan, mga hinaplas man ukon “iban nga mga karnero,” nagakabuhi man sila sa “katapusan nga mga adlaw” ukon antes sini, makabenepisyo—kag nakabenepisyo—sa mga leksion gikan sa “tanan nga butang nga ginsulat sadto.”—Juan 10:16; 2 Tim. 3:1.

Gani ang kalabanan nga kasaysayan sa Biblia wala lamang naaplikar sa mga hinaplas, sa “iban nga mga karnero,” ukon sa mga Cristiano nga nagakabuhi sa isa ka espesipiko nga panag-on. Sa baylo, ang tanan nga alagad sang Dios sang una kag karon, makabenepisyo gid sa mga leksion nga ginatudlo sang kasaysayan sa Biblia. Halimbawa, ang pag-antos ni Job indi lang naton pag-iaplikar sa mga kabudlayan nga ginbatas sang mga hinaplas sa tion sang Bug-os Kalibutan nga Inaway I. Madamo nga alagad sang Dios, mga lalaki kag mga babayi, mga hinaplas kag bahin sang daku nga kadam-an, ang nakaeksperiensia pareho sa mga inagihan ni Job kag “nahibaluan [nila] ang pagpakamaayo nga ginhatag ni Jehova, kag nakita [nila] nga si Jehova mapinalanggaon gid kag maluluy-on.”—Sant. 5:11.

Binagbinaga ini: Sa aton kongregasyon karon, indi bala nga may mga tigulang nga babayi nga matutom pareho kay Debora, huwaran nga pamatan-on nga mga gulang nga maalam pareho kay Elihu, maisog nga mga payunir nga makugi pareho kay Jefte, kag matutom nga mga lalaki kag mga babayi nga mapailubon kaangay ni Job? Nagapasalamat gid kita nga gintipigan ni Jehova ang rekord sang “tanan nga butang nga ginsulat sadto,” agod paagi sa pagpabakod sang Kasulatan matigayon naton ang paglaum!

Gani bangod sini, ang aton mga publikasyon sining nagligad nga tinuig nagapadaku sa mga leksion nga matun-an naton sa kasaysayan sa Biblia sa baylo nga pangitaan ini sang larawan kag sang ginalarawan kag sang mga katumanan sini.