Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Pebrero 2015

Iluga ang Kaisog kag Pagkamahinantupon ni Jesus

Iluga ang Kaisog kag Pagkamahinantupon ni Jesus

“Bisan pa wala gid ninyo sia makita, ginahigugma ninyo sia. Bisan pa sa karon wala ninyo sia makita, apang nagatuo kamo sa iya.”—1 PED. 1:8.

1, 2. (a) Paano naton matigayon ang kaluwasan? (b) Ano ang makabulig sa aton nga makapadayon sa paglakbay padulong sa kaluwasan?

SANG nangin mga disipulo kita sang Cristo, nagsugod kita sa paglakbay. Ina nga paglakbay nagapadulong sa kabuhi, sa langit man ukon sa duta. Si Jesus nagsiling: “Ang nagbatas tubtob sa katapusan [ang katapusan sang iya kabuhi ukon katapusan sang malaut nga sistema sang mga butang] maluwas.” (Mat. 24:13) Kon mangin matutom kita, matigayon naton ang kaluwasan. Apang sa aton paglakbay, dapat kita maghalong nga indi matublag ukon magtalang. (1 Juan 2:15-17) Paano naton ina mahimo?

2 Si Jesus nga aton Huwaran nagagiya sa aton. Ang iya paglakbay nasulat sa Biblia. Paagi sa pagtuon sa Biblia, makilala naton sing maayo si Jesus. Matun-an naton sia nga higugmaon kag magatuo sa iya. (Basaha ang 1 Pedro 1:8, 9.) Dumduma nga si apostol Pedro nagsiling nga si Jesus nagbilin sing huwaran agod masunod naton sing maayo ang iya mga tikang. (1 Ped. 2:21) Kon sundon naton sing  maayo ang iya mga tikang, “magaresulta” ini sa aton kaluwasan. * Sang nagligad nga artikulo, nabinagbinag naton kon paano naton mailog ang halimbawa ni Jesus sa pagpakita sing pagpaubos kag pagpalangga. Binagbinagon naton karon kon paano naton masunod ang iya mga tikang sa pagpakita sing kaisog kag paghantop.

SI JESUS MAISUGON

3. Ano ang kaisog, kag paano naton ini matigayon?

3 Ang kaisog isa ka sahi sang pagsalig nga nagapabakod kag nagasakdag sa aton. Ginlaragway ini subong “pagbatas sa tion sang kabudlayan,” “pagpanindugan sa kon ano ang husto,” kag “pag-atubang sa pag-antos nga may dignidad ukon pagtuo.” Ang kaisog suod nga naangot sa kahadlok, paglaum, kag gugma. Paano? Ang kahadlok sa Dios nagahatag sa aton sing kaisog nga madaug ang kahadlok sa tawo. (1 Sam. 11:7; Hulu. 29:25) Ang matuod nga paglaum nagabulig sa aton nga hunahunaon sing maayo ang aton palaabuton kag indi ang mga pagtilaw sa aton. (Sal. 27:14) Ang masinakripisyuhon nga gugma nagapahulag sa aton nga ipakita ang kaisog bisan pa mabutang kita sa katalagman. (Juan 15:13) Makatigayon kita sing kaisog paagi sa pagsalig sa Dios kag pagsunod sa mga tikang sang iya Anak.—Sal. 28:7.

4. Paano ginpakita ni Jesus ang kaisog sang ‘kaupod niya ang mga manunudlo’ sa templo? (Tan-awa ang piktyur sa umpisa sini nga artikulo.)

4 Sang 12 anyos si Jesus, maisugon sia nga nanindugan sa kon ano ang husto. Talupangda kon ano ang natabo sang yara sia “sa templo, nga nagapungko kaupod sa mga manunudlo.” (Basaha ang Lucas 2:41-47.) Yadto nga mga manunudlo eksperto, indi lamang sa Mosaikong Kasuguan, kundi pati na sa mga tradisyon nga ginhimo sang tawo. Pero si Jesus wala nahadlok sa pagpautwas sing ‘mga pamangkot sa ila.’ Pat-od gid nga indi binatabata ang iya mga pamangkot. Mahanduraw naton si Jesus nga nagapautwas sing makapahunahuna nga mga pamangkot amo nga nagpungko gid ining eksperto nga mga manunudlo kag namati sa iya. Kag kon ginatilawan sang mga manunudlo si Jesus paagi sa pagpautwas sing kontrobersiyal nga mga pamangkot, napaslawan gid sila. Ang tanan nga nagapamati—lakip na ang mga manunudlo—“nahayanghag gid sa iya paghangop kag sa iya mga sabat.” Pat-od gid nga ang iya mga sabat nagsakdag sa kamatuoran sang Pulong sang Dios!

5. Paano ginpakita ni Jesus ang kaisog sa tion sang iya ministeryo?

5 Sa tion sang ministeryo ni Jesus, nagpakita sia sing kaisog sa lainlain nga paagi. Maisugon niya nga ginbuyagyag ang butig nga mga panudlo sang relihioso nga mga lider nga nagapatalang sa mga tawo. (Mat. 23:13-36) Nanindugan sia sing malig-on batok sa malain nga impluwensia sang kalibutan. (Juan 16:33) Nagpadayon sia sa pagbantala walay sapayan sang paghingabot sang mga manugpamatok. (Juan 5:15-18; 7:14) Duha ka beses niya nga gintinluan ang templo paagi sa pagtabog sa mga nagadagta sang pagsimba diri.—Mat. 21:12, 13; Juan 2:14-17.

6. Paano si Jesus nagpakita sing kaisog sa katapusan nga adlaw sang iya dutan-on nga kabuhi?

6 Makapabakod gid sing pagtuo nga mahibaluan nga nangin maisugon si Jesus sa idalom sang pag-antos. Binagbinaga ang iya kaisog sa katapusan nga adlaw sang iya dutan-on nga kabuhi. Nahibaluan niya ang mga matabo sa tion nga luiban sia. Pero sa tion sang panihapon sa Paskua, ginsilingan ni Jesus si Judas: “Himua gilayon ang imo himuon.” (Juan 13:21-27) Sa hardin sang Getsemane, maisugon nga nagpakilala si Jesus sa mga soldado nga madakop sa iya. Bisan pa nabutang sia sa katalagman, naghambal sia para  amligan ang iya mga disipulo. (Juan 18:1-8) Sang ginpamangkot sia sang Sanhedrin, maisugon niya nga gin-aku nga sia amo ang Cristo kag Anak sang Dios, bisan pa nahibaluan niya nga nagapangita sing rason ang mataas nga saserdote sa pagpatay sa iya. (Mar. 14:60-65) Malig-on nga ginhuptan ni Jesus ang iya integridad asta sa kamatayon sa usok. Sang nagahimumugto na sia, nagsiling sia: “Natuman na!”—Juan 19:28-30.

ILUGA ANG KAISOG NI JESUS

7. Mga pamatan-on, ano ang inyo ginabatyag nga tawgon kamo sa ngalan ni Jehova, kag paano ninyo mapamatud-an nga maisugon kamo?

7 Paano naton mailog si Jesus sa pagpakita sing kaisog? Sa eskwelahan. Mga pamatan-on, ginapamatud-an ninyo nga maisugon kamo kon ginapakilala ninyo ang inyo kaugalingon nga mga Saksi ni Jehova, bisan pa sunlugon kamo sang inyo mga klasmeyt ukon sang iban. Sa amo, ginapakita ninyo nga ginapabugal ninyo nga tawgon sa ngalan ni Jehova. (Basaha ang Salmo 86:12.) Mahimo piliton kamo nga magpati sa ebolusyon. Pero may maayo kamo nga mga rason sa pagsalig sa inyo nabase sa Biblia nga pagpati sa pagpanuga. Mahimo ninyo magamit ang brosyur nga The Origin of Life—Five Questions Worth Asking para makumbinsi ninyo ang mga gusto makahibalo sang “pangatarungan tuhoy sa inyo paglaum.” (1 Ped. 3:15) Nian, mangin malipayon kamo kay ginpangapinan ninyo ang kamatuoran sang Pulong sang Dios.

8. Ngaa maisugon kita nga nagabantala?

8 Sa aton ministeryo. Subong matuod nga mga Cristiano, dapat kita “magpanaksi nga may kaisog” bangod “ginpabakod [kita] ni Jehova.” (Binu. 14:3) Ngaa maisugon kita nga nagabantala? Una, nahibaluan naton nga kamatuoran ang aton ginabantala bangod nabase ini sa Biblia. (Juan 17:17) Ikaduha, ginakilala naton nga “mga masigkamanugpangabudlay [kita] sang Dios” kag ginabuligan kita sang balaan nga espiritu. (1 Cor. 3:9; Binu. 4:31) Nahangpan man naton nga paagi sa makugi nga pagpanaksi, ginapakita naton ang aton debosyon kay Jehova kag gugma sa aton isigkatawo. (Mat. 22:37-39) Bangod sa kaisog, wala sing may makapahipos sa aton. Sa baylo, determinado kita nga ibuyagyag ang relihioso nga mga kabutigan nga nagabulag sa mga tawo sa kamatuoran. (2 Cor. 4:4) Kag magapadayon kita sa pagbantala sang maayong balita bisan pa ginayaguta kita, ginapamatukan, ukon wala ginasapak.—1 Tes. 2:1, 2.

9. Paano naton mapakita ang kaisog sa idalom sang pag-antos?

9 Sa idalom sang pag-antos. Ang pagsalig sa Dios nagahatag sa aton sing pagtuo kag kaisog nga atubangon ang mga kabudlayan. Kon mapatay ang aton hinigugma, nagakasubo kita, pero wala kita nagakadulaan sing paglaum. Nagasalig kita nga pabakuron kita sang “Dios nga nagahatag sang tanan nga sahi sang lugpay.” (2 Cor. 1:3, 4; 1 Tes. 4:13) Kon may malala kita nga balatian ukon nasamaran, nagaantos kita, pero wala kita nagakompromiso. Ginapangindian naton ang bisan ano nga pagbulong nga supak sa mga prinsipio sang Biblia. (Binu. 15:28, 29) Kon napung-awan kita, “ginapakamalaut kita sang aton tagipusuon,” pero bangod nagasalig kita nga ang Dios ‘malapit sa mga nagaantos,’ wala kita nagapangampo. *1 Juan 3:19, 20; Sal. 34:18.

SI JESUS MAHINANTUPON

10. Ano ang paghantop, kag paano nagahambal kag nagapanghikot ang mahinantupon nga sumilimba ni Jehova?

10 Ang paghantop amo ang maayo nga paghukom—ang ikasarang sa paghibalo sang husto sa sayop, kag dayon pagdesisyon sing maalamon. (Heb. 5:14) Amo ini ang “ikasarang sa paghimo sing husto nga desisyon sa espirituwal  nga mga butang.” Ang mahinantupon nga sumilimba nagahambal kag nagapanghikot kon ano ang makapahamuot sa Dios. Ini nga tawo nagahambal sing makapalig-on sa baylo nga makasaklaw. (Hulu. 11:12, 13) ‘Indi sia dali maakig.’ (Hulu. 14:29) Nagapadayon sia sa ‘paglakat sa husto nga dalanon’ padulong sa kabuhi. (Hulu. 15:21) Paano naton matigayon ang paghantop? Paagi sa pagtuon sa Pulong sang Dios kag pag-aplikar sang aton natun-an. (Hulu. 2:1-5, 10, 11) Makabulig gid ang pagbinagbinag sa halimbawa ni Jesus, ang pinakamahinantupon nga tawo nga nagkabuhi.

11. Paano si Jesus nagpakita sing paghantop sa iya panghambal?

11 Si Jesus nagpakita sing paghantop sa tanan niya nga ginahambal kag ginahimo. Sa iya panghambal. Nagdesisyon sia sing maalamon sang nagbantala sia sang maayong balita, nga nagagamit sing “matahom nga mga pulong,” amo nga nagdayaw gid ang iya mga tagpalamati. (Luc. 4:22; Mat. 7:28) Ginagamit gid niya ang Pulong sang Dios—ginabasa ini, ginakutlo, ukon ginapatuhuyan sing sibu ang kasulatan para mangin maathag ang iya punto. (Mat. 4:4, 7, 10; 12:1-5; Luc. 4:16-21) Napahulag man ang mga tagpalamati ni Jesus sa iya pamaagi sa pagpaathag sang Kasulatan. Sang nabanhaw sia, nagpakig-istorya sia sa iya duha ka disipulo sa dalan pakadto sa Emaus, kag “ginpaathag niya sa ila ang ginasiling sang bug-os nga Kasulatan.” Sang ulihi nagsiling ang mga disipulo: “Indi bala natandog gid ang aton tagipusuon sang ginabuksan niya sa aton ang Kasulatan samtang nagalakat kita sa dalan?”—Luc. 24:27, 32.

12, 13. Ano ang mga halimbawa nga nagapakita nga si Jesus indi dali maakig kag makatarunganon?

12 Sa iya balatyagon kag panimuot. Ang paghantop nagbulig kay Jesus nga mapunggan ang iya balatyagon, amo nga ‘indi sia dali maakig.’ (Hulu. 16:32) “Malulo” sia. (Mat. 11:29) Mapinasensiahon gid sia sa iya mga disipulo walay sapayan sang ila mga kakulangan. (Mar. 14:34-38; Luc. 22:24-27) Nagpabilin sia nga kalmado bisan pa indi makatarunganon ang pagpakig-angot sa iya.—1 Ped. 2:23.

13 Ang paghantop nagbulig man kay Jesus nga mangin makatarunganon. Nahangpan niya kon ngaa ginhatag ang Mosaikong Kasuguan, kag gin-aplikar ini sa iya pagpakig-angot sa mga tawo. Halimbawa, binagbinaga ang hitabo sa Marcos 5:25-34. (Basaha.) Ang babayi nga ginatagasan sing dugo nagpanagil-ot sa kadam-an, nagtandog sa bayo ni Jesus, kag nag-ayo. Indi sia matinlo suno sa Kasuguan, gani indi niya dapat pagtandugon ang bisan sin-o. (Lev. 15:25-27) Pero bangod nahangpan ni Jesus “ang mas importante nga mga sugo sang Kasuguan” lakip na ang “kaluoy, kag katutom,” wala niya gin-akigan ang babayi sa pagtandog sang iya bayo. (Mat. 23:23) Sa baylo, mainayuhon sia nga nagsiling: “Anak, ang imo pagtuo nag-ayo sa imo. Lakat ka nga may paghidait. Nag-ayo ka na sa imo balatian.” Bangod may paghantop si Jesus, nangin mainayuhon gid sia!

14. Ano ang ginhimo ni Jesus, kag paano sia nakapabilin sa sini nga dalanon?

14 Sa iya dalanon sang pagkabuhi. Ginpakita ni Jesus ang paghantop paagi sa paglakat sa husto nga dalanon kag pagpabilin sa sini. Nasentro ang iya kabuhi sa pagbantala sang maayong balita. (Luc. 4:43) Nagpabilin man si Jesus sa sini nga dalanon paagi sa paghimo sing mga desisyon nga nakabulig sa iya nga matapos ang iya hilikuton sing madinalag-on. Maalamon sia nga nagpasimple sang iya kabuhi agod mahinguyang ang iya tion kag kusog sa ministeryo. (Luc. 9:58) Nahantop niya nga kinahanglan hanason ang iban agod magpadayon sa hilikuton kon mapatay na sia. (Luc. 10:1-12; Juan 14:12) Nagpromisa sia sa iya mga sumulunod nga buligan niya sila sa sini nga hilikuton “tubtob sa hingapusan sang sistema sang mga butang.”—Mat. 28:19, 20.

ILUGA ANG PAGKAMAHINANTUPON NI JESUS

Hantupa ang nanamian sang mga tawo, kag maghambal sing mainayuhon suno sa ila mga kinahanglanon(Tan-awa ang parapo 15)

15. Paano naton mapakita ang paghantop sa aton panghambal?

15 Binagbinaga ang isa pa ka paagi nga mailog naton si Jesus. Sa aton panghambal. Sa pagpakig-istorya sa mga masigkatumuluo, nagagamit kita sing mga tinaga nga makapabakod imbes nga makapaluya. (Efe. 4:29) Kon ginasugid naton sa iban ang Ginharian sang Dios, daw ginatimplahan naton “sing asin” ang aton ginahambal. (Col. 4:6) Ginatinguhaan naton nga hantupon ang mga kinahanglanon kag nanamian sang mga tagbalay kag nagahambal kita sing mainayuhon. Dumdumon naton nga ang mainayuhon nga mga tinaga makapahumok sang balatyagon. Isa pa, kon nagasugid kita sang aton mga pagpati, ginagamit naton ang Biblia sa pagpaathag sini. Ginagamit naton ini subong awtoridad kag kon posible, ginabasa ini. Ginakilala naton nga ang mensahe sang Biblia mas gamhanan sangsa bisan ano nga mahimo naton isiling.—Heb. 4:12.

16, 17. (a) Paano naton mapakita nga indi kita dali maakig kag makatarunganon? (b) Paano kita makakonsentrar sa aton ministeryo?

16 Sa aton balatyagon kag panimuot. Bangod sa paghantop makontrol naton ang aton balatyagon, amo nga ‘indi kita dali maakig.’ (Sant. 1:19) Kon masaklaw kita sang iban, ginatinguhaan naton nga hantupon ang rason sang ila mga ginhambal ukon ginhimo. Nagapaugdaw ini sang aton kaakig kag nagabulig sa aton nga “palampason ang sala.” (Hulu. 19:11) Nagabulig man ang paghantop para mangin makatarunganon kita. Gani ginatinguhaan naton nga mangin realistiko sa aton ginapaabot, kag dumdumon naton nga ang aton mga masigkatumuluo mahimo may mga problema nga indi naton mahangpan sing bug-os. Handa kita sa pagpamati sang ila mga ihambal kag kon nagakaigo, nagaugyon kita sa ila pagtamod.—Fil. 4:5.

17 Sa aton dalanon sang pagkabuhi. Subong mga sumulunod ni Jesus, nahantop naton nga isa ka daku nga pribilehiyo ang pagpakigbahin sa pagbantala sang maayong balita. Makapadayon kita sa sini nga hilikuton paagi sa paghimo sing mga desisyon nga nagabulig sa aton nga magkonsentrar sa aton ministeryo. Ginauna naton ang espirituwal nga mga butang kag ginahuptan ang simple nga kabuhi agod mauna naton ang pinakaimportante nga hilikuton nga pagbantala antes mag-abot ang katapusan.—Mat. 6:33; 24:14.

18. Paano kita makapadayon sa paglakbay padulong sa kaluwasan, kag ano ang imo determinasyon?

18 Makalilipay gid nga mailog naton ang pila ka makagalanyat nga mga kinaiya ni Jesus! Hunahunaa kon daw ano ka makapaladya nga matun-an ang iban niya nga kinaiya kag tinguhaan nga ilugon sia. Gani, mangin determinado kita nga sundon sing maayo ang iya mga tikang. Paagi sini, makapadayon kita sa aton paglakbay padulong sa kaluwasan kag mangin suod pa gid kay Jehova, ang Isa nga gin-ilog gid ni Jesus.

^ par. 2 Ang 1 Pedro 1:8, 9 ginsulat para sa mga Cristiano nga may langitnon nga paglaum. Apang ang prinsipio diri maaplikar man sa mga indibiduwal nga may dutan-on nga paglaum.

^ par. 9 Para sa mga halimbawa parte sa kaisog sa idalom sang pag-antos, tan-awa ang Lalantawan, Disiembre 1, 2000, pahina 24-28; Awake! Abril 22, 2003, pahina 18-21; kag Enero 22, 1995, pahina 11-15.