Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ENERO 2015

Magpasalamat kay Jehova kag Pakamaayuhon Ka Niya

Magpasalamat kay Jehova kag Pakamaayuhon Ka Niya

“Magpasalamat kamo kay Jehova, kay maayo sia.”—SAL. 106:1, NEW WORLD TRANSLATION, NW.

1. Ngaa takus gid nga pasalamatan si Jehova?

SI Jehova, nga Manughatag sang “tagsa ka maayong dulot kag tagsa ka himpit nga regalo,” takus gid nga pasalamatan. (Sant. 1:17) Subong aton mapinalanggaon nga Manugbantay, mainayuhon niya nga ginaaman ang aton pisikal kag espirituwal nga mga kinahanglanon. (Sal. 23:1-3) Sia gid ang “aton dalangpan kag kusug”—ilabi na sa mga tion sang kalisdanan! (Sal. 46:1) Pat-od nga madamo kita sing rason sa pag-ugyon gid sa ginsulat sang salmista: “Magpasalamat kamo kay Jehova, kay maayo sia; ang iya mainunungon nga gugma wala sing katapusan!”—Sal. 106:1, NW.

Ang aton tuigan nga teksto sa 2015: “Magpasalamat kamo kay Jehova, kay maayo sia.”—Salmo 106:1

2, 3. (a) Ano ang matabo kon balewalaon naton ang mga pagpakamaayo sa aton? (b) Ano nga mga pamangkot ang aton binagbinagon sa sini nga artikulo?

2 Ngaa importante nga binagbinagon naton ang parte sa pagpasalamat? Subong sang gintagna, ang mga tawo sa sining katapusan nga mga adlaw nangin indi na gid mapinasalamaton. (2 Tim. 3:2) Madamo ang nagabalewala sang ila mga pagpakamaayo. Bangod sa impluwensia sang mga negosyo kag sang mga pasayod sini, minilyon ang nagatinguha nga maangkon ang mas madamo pa imbes nga mangin kontento sang yara sa ila. Mahimo man kita maimpluwensiahan sining indi mapinasalamaton nga panimuot. Kaangay sang Israel sang una, mahimo nga mangin indi kita mapinasalamaton kag madula ang aton apresasyon sa aton bilidhon nga kaangtanan kay Jehova kag sa mga pagpakamaayo niya sa aton.—Sal. 106:7, 11-13.

3 Gani, binagbinaga man ang matabo kon makaeksperiensia kita sing mabudlay nga mga pagtilaw. Sina nga mga tion, mahimo nga maluyahan kita dayon kag indi na naton makita ang mga pagpakamaayo sa aton. (Sal. 116:3) Kon amo, paano naton mapalambo kag mahuptan ang pagkamapinasalamaton? Kag ano ang makabulig sa aton nga magpabilin nga positibo bisan pa makaeksperiensia kita sing grabe nga mga pagtilaw? Tan-awon naton.

‘O GINOO MADAMU NGA BUHAT NGA IMO NAHIMO’

4. Paano naton mahuptan ang pagkamapinasalamaton?

4 Kon palambuon naton kag huptan ang pagkamapinasalamaton, dapat naton hibaluon kag pamalandungan ang mga pagpakamaayo ni Jehova sa aton kag binagbinagon sing maayo ang iya mapinalanggaon nga pagsakdag sa aton. Sang ginhimo ini sang salmista, nagdayaw gid sia sa madamo nga makatilingala nga butang nga nahimo ni Jehova.—Basaha ang Salmo 40:5; 107:43.

5. Ano ang matun-an naton kay apostol Pablo parte sa pagpalambo sing pagkamapinasalamaton?

5 Madamo kita sing matun-an kay apostol Pablo parte sa pagpalambo sing pagkamapinasalamaton. Maathag nga ginpamalandungan niya ang mga pagpakamaayo sa iya, kay tinagipusuon sia pirme nga nagapasalamat. Nahibaluan gid ni Pablo nga “manugpasipala [sia sadto] kag manughingabot kag tampalasan nga tawo.” Pero, nagpasalamat sia nga bisan pa makasasala sia sang una, ginkaluy-an sia sang Dios kag sang Cristo kag ginsaligan sing ministeryo. (Basaha ang 1 Timoteo 1:12-14.) Gin-apresyar gid ni Pablo ang pareho niya nga mga Cristiano kag masami nga nagapasalamat kay Jehova bangod sa ila maayo nga mga kinaiya kag matutom nga pag-alagad. (Fil. 1:3-5, 7; 1 Tes. 1:2, 3) Kag sang nakaeksperiensia si Pablo sing mga kabudlayan, gilayon sia nga nagapasalamat kay Jehova bangod sa suporta sang iya espirituwal nga mga kauturan. (Binu. 28:15; 2 Cor. 7:5-7) Gani, indi na kita matingala nga ang mga sinulatan ni Pablo nagapalig-on sa mga Cristiano: “Ipakita nga mapinasalamaton kamo . . . , kag maglaygay sa isa kag isa nga may mga salmo, mga pagdayaw sa Dios, espirituwal nga mga ambahanon upod ang pagkamainayuhon.”—Col. 3:15-17.

PAGPAMALANDONG KAG PANGAMUYO—IMPORTANTE PARA MAHUPTAN ANG PAGKAMAPINASALAMATON

6. Ano gid ang ginapasalamatan mo kay Jehova?

6 Paano naton mailog ang maayo nga halimbawa ni Pablo sa pagpalambo kag pagpabutyag sing pagkamapinasalamaton? Kaangay ni Pablo, dapat naton pamalandungan kon ano ang ginhimo ni Jehova para sa aton subong indibiduwal. (Sal. 116:12) Ano ang imo sabat kon pamangkuton ka sing, ‘Ano nga mga pagpakamaayo ni Jehova ang ginapasalamatan mo?’ Ilakip mo bala ang imo bilidhon nga kaangtanan kay Jehova? Ukon ang kapatawaran nga imo nabaton bangod sang imo pagtuo sa halad-gawad sang Cristo? Ihambal mo bala ang ngalan sang mga kauturan nga nagbulig sa imo sa mabudlay nga mga pagtilaw? Siempre, pat-od nga ilakip mo gid ang imo pinalangga nga tiayon ukon mga kabataan. Kon pamalandungan mo ining matahom nga mga pagpakamaayo sang imo mapinalanggaon nga Amay, nga si Jehova, mangin mapinasalamaton ka kag mapahulag nga magpabutyag sing pagpasalamat kada adlaw.—Basaha ang Salmo 92:1, 2.

7. (a) Ngaa dapat kita mangamuyo sing pagpasalamat? (b) Paano ka makabenepisyo sa pagpabutyag sing pagpasalamat sa imo mga pangamuyo?

7 Kon pamalandungan naton ang tanan nga pagpakamaayo sa aton, handa kita nga mangamuyo kay Jehova kag magpasalamat sa iya. (Sal. 95:2; 100:4, 5) Para sa madamo, ang pangamuyo isa lamang ka paagi nga makapangabay sa Dios. Pero, nahibaluan naton nga nahamuot si Jehova kon ipabutyag naton ang pagpasalamat sa aton nabaton. Mabasa sa Biblia ang madamo nga makatalandog nga pangamuyo sang pagpasalamat, lakip na ang pangamuyo nanday Hana kag Ezequias. (1 Sam. 2:1-10; Isa. 38:9-20) Iluga ining matutom nga mga alagad nga nagpakita sing pagkamapinasalamaton. Huo, paagi sa pangamuyo, pasalamati si Jehova sa mga pagpakamaayo nga imo nabaton. (1 Tes. 5:17, 18) Madamo ang benepisyo sa paghimo sini. Mapalig-on ka, magalambo ang imo gugma kay Jehova, kag mangin malapit ka pa gid sa iya.—Sant. 4:8.

Ano nga mga pagpakamaayo ni Jehova ang ginapasalamatan mo? (Tan-awa ang parapo 6 kag 7)

8. Ano ang mahimo magdula sang aton apresasyon sa tanan nga ginhimo ni Jehova para sa aton?

8 Ngaa dapat kita magpabilin nga alisto sa mga katalagman nga madula ang aton apresasyon sa kaayo ni Jehova? Bangod napanubli naton ang huyog nga mangin indi mapinasalamaton. Binagbinaga: Ang aton una nga mga ginikanan, sanday Adan kag Eva, ginbutang sa isa ka paraiso nga hardin. Gin-aman ang tanan nila nga kinahanglanon, kag may kahigayunan sila nga mabuhi sing malinong kag wala sing katapusan. (Gen. 1:28) Pero wala nila gin-apresyar ang ila mga pagpakamaayo. Mahamkunon sila nga naghandum sing dugang pa. Bilang resulta, nadula nila ang tanan. (Gen. 3:6, 7, 17-19) Bangod nagaistar kita sa indi mapinasalamaton nga kalibutan, mahimo man nga madula ang aton apresasyon sa tanan nga ginhimo ni Jehova para sa aton. Mahimo nga balewalaon naton ang aton pagpakig-abyan sa iya. Mahimo nga indi na naton maapresyar ang aton pribilehiyo nga nangin bahin sang aton bug-os kalibutan nga paghiliutod. Mahimo nga mangin masako kita sa mga butang sini nga kalibutan nga malapit na lang magtaliwan. (1 Juan 2:15-17) Para malikawan ini, dapat naton pamalandungan ang aton mga pagpakamaayo kag pasalamatan pirme si Jehova sa aton pribilehiyo nga mangin iya katawhan.—Basaha ang Salmo 27:4.

KON NAGAATUBANG SING MGA PAGTILAW

9. Kon makaatubang kita sing mabudlay nga mga pagtilaw, ngaa dapat naton pamalandungan ang aton mga pagpakamaayo?

9 Ang pagkamapinasalamaton makabulig man sa aton nga maatubang ang mabudlay nga mga pagtilaw. Mahimo maluyahan gid kita kon hinali lang magbag-o ang aton kabuhi bangod sang mga hitabo kaangay sang pagluib sang tiayon, malubha nga balatian, pagkapatay sang tiayon, ukon grabe nga epekto sang kalamidad. Sa sina nga mga tion, malugpayan kita kag mapabakod kon pamalandungan naton ang aton mga pagpakamaayo. Binagbinaga ang masunod nga mga eksperiensia.

10. Paano nakabenepisyo si Irina sa pag-isip sang iya mga pagpakamaayo?

10 Si Irina *, nga isa ka regular payunir sa Aminhan nga Amerika, nakapamana sang isa ka gulang nga nagluib sang ulihi kag nagbiya sa iya kag sa ila mga kabataan. Ano ang nakabulig kay Irina nga magpabilin nga matutom kay Jehova? Nagsiling sia: “Nagapasalamat ako sa personal nga pag-atipan ni Jehova sa akon. Paagi sa pag-isip sang akon mga pagpakamaayo kada adlaw, narealisar ko nga pribilehiyo gid nga makilala kag higugmaon sang aton mainamligon nga Amay sa langit. Nahibaluan ko nga indi gid niya ako pagbiyaan.” Bisan pa naagyan ni Irina ang madamo nga makapasubo nga mga kahimtangan, ang iya malipayon nga panimuot nagbulig sa iya nga makabatas kag nangin pagpalig-on sia sa iban.

11. Ano ang nakabulig kay Kyung-sook nga maatubang ang malala nga balatian?

11 Si Kyung-sook, nga nagaistar sa Asia, nagpayunir upod sa iya bana sing sobra 20 ka tuig. Pero hinali lang nahibaluan nga may malala sia nga kanser sa baga kag ginsilingan sia nga tatlo tubtob anom ka bulan na lang sia nga mabuhi. Bisan pa nakaatubang na sila sang iya bana sing dalagku kag gamay nga mga pagtilaw, masami nga kampante sila sa ila panglawas. Nagsiling sia: “Naluyahan gid ako sa akon problema sa panglawas. Daw nadula sa akon ang tanan, kag nahadlok gid ako.” Ano ang nakabulig kay Kyung-sook nga maatubang ini? Nagsiling sia: “Kada gab-i antes ako magtulog, nagasaka ako sa rooftop sang amon balay kag nagapangamuyo sing matunog parte sa lima ka butang nga ginapasalamatan ko sina nga adlaw. Dayon nagahaganhagan ang akon pamatyag, kag napahulag ako nga ipabutyag ang akon gugma kay Jehova.” Paano nakabenepisyo si Kyung-sook sa iya pangamuyo kada gab-i? Nagsiling sia: “Narealisar ko nga ginabuligan ako ni Jehova sa sining mabudlay nga mga sitwasyon kag mas madamo ang akon mga pagpakamaayo sangsa mga pagtilaw.”

Upod sa nabilin niya nga utod nga si John (Tan-awa ang parapo 13)

12. Paano nalugpayan si Jason sang mapatay ang iya asawa?

12 Si Jason, nga nagaalagad sa sanga talatapan sa Aprika, sobra 30 ka tuig na sa bug-os tion nga pag-alagad. Nagsiling sia: “Sang nagligad nga pito ka tuig, napatay ang akon asawa, kag nasakitan gid ako. Makapaluya gid kon pamensaron ko lang pirme ang iya pagpakigbato sa kanser.” Ano ang nakabulig kay Jason nga maatubang ini? “Isa ka bes,” siling niya, “ginadumdom ko ang maayo nga tion nga nag-updanay kami sang akon asawa, kag ginpasalamatan ko si Jehova sa pangamuyo bangod sina nga handumanan. Nalugpayan ako kag pirme ko na ginapasalamatan si Jehova bangod sinang makalilipay nga mga handumanan. Ang pagkamapinasalamaton nakabulig gid sa akon pagtamod. Nasakitan ako gihapon sa iya kamatayon, pero ang pagpasalamat kay Jehova bangod sa maayo nga pag-asawahay kag sa pribilehiyo nga maalagad sia upod sa isa nga nagahigugma gid sa iya may maayo gid nga epekto sa akon pagtamod.”

“Nagapasalamat gid ako nga si Jehova ang akon Dios.”—Sheryl

13. Ano ang nakabulig kay Sheryl nga maatubang ang kamatayon sang halos bilog niya nga pamilya?

13 Sang ginlaslas sang tuman kabaskog nga Bagyo Yolanda [Haiyan] ang sentral nga bahin sang Pilipinas sang Nobiembre 2013, si Sheryl, nga 13 anyos pa lang sadto, halos nadulaan sang tanan. Nagsiling sia: “Wala na ako sing balay, kag halos wala na ako sing pamilya.” Ang iya amay, iloy, kag ang iya tatlo ka utod napatay bangod sang mabaskog nga storm surge. Ano ang nakabulig kay Sheryl nga mabatas ini nga trahedya nga wala nagahinakit? Mapinasalamaton sia kag padayon niya nga ginadumdom ang nabilin niya nga mga pagpakamaayo. “Nakita ko ang tanan nga ginhimo sang mga kauturan sa pagbulig kag pagpalig-on sa mga nagakinahanglan. Nakahibalo ako nga ang mga kauturan sa bilog nga kalibutan nagapangamuyo para sa akon.” Nagsiling pa sia: “Nagapasalamat gid ako nga si Jehova ang akon Dios. Ginahatag gid niya ang mga butang nga kinahanglan naton.” Huo, ang pagdumdom sa aton mga pagpakamaayo epektibo gid nga bulong batok sa grabe nga kasubo. Ang mapinasalamaton nga panimuot makabulig sa aton nga magpadayon bisan pa sa makapaluya nga hitabo nga aton maatubang.—Efe. 5:20; basaha ang Filipos 4:6, 7.

“AKO MAGAKASADYA SA GINOO”

14. Ano ang aton makalilipay nga paglaum? (Tan-awa ang piktyur sa umpisa sini nga artikulo.)

14 Halin sang una, ang katawhan ni Jehova nagakalipay sa ila mga pagpakamaayo. Halimbawa, sa tapos maluwas ang mga Israelinhon batok sa Paraon kag sa iya mga soldado sa Pula nga Dagat, ginpabutyag nila ang ila kalipay paagi sa mga ambahanon sang pagdayaw kag pagpasalamat. (Ex. 15:1-21) Sa karon, nalakip sa aton hamili gid nga mga pagpakamaayo ang aton pat-od nga paglaum nga maluwas sa tanan nga kabangdanan sang kasakit kag kasubo. (Sal. 37:9-11; Isa. 25:8; 33:24) Imadyina ang aton mabatyagan kon dugmukon na ni Jehova ang tanan niya nga kaaway kag pasudlon kita sa bag-o nga kalibutan nga may paghidait kag pagkamatarong. Tion gid ina sang pagpasalamat!—Bug. 20:1-3; 21:3, 4.

15. Ano ang determinado mo nga himuon sa tuig 2015?

15 Ginapaabot gid naton ang tuman kadamo nga espirituwal nga pagpakamaayo ni Jehova sa tuig 2015. Matuod, mahimo man kita makaeksperiensia sing mga pagtilaw. Ano man ang matabo, nahibaluan naton nga indi gid kita pagbiyaan ni Jehova. (Deut. 31:8; Sal. 9:9, 10) Padayon niya nga iaman ang tanan naton nga kinahanglanon para makaalagad kita sa iya sing matutom. Gani, kabay pa nga mangin determinado kita nga huptan ang panimuot nga kaangay ni manalagna Habacuc, nga nagsiling: “Bisan ang higuera indi magpamulak, ukon walay bunga sa mga uvas; ang patubas sang olivo mawad-an, kag ang mga latagon indi magpatubas sing kalan-on, ang panong mapapas sa toril kag walay kabakahan sa mga palasudlan, apang ako magakasadya sa GINOO, magakalipay ako sa Dios sang akon kaluwasan.” (Hab. 3:17, 18) Huo, sa bilog nga tuig, kabay pa nga malipayon naton nga pamalandungan ang aton mga pagpakamaayo kag mapahulag nga sundon ang laygay sang aton tuigan nga teksto sa 2015: “Magpasalamat kamo kay Jehova, kay maayo sia.”—Sal. 106:1, NW.

^ par. 10 Gin-islan ang pila ka ngalan sa sini nga artikulo.

Magtuon sing Dugang Pa

“Mangin Mabinantayon May Kaangtanan sa mga Pangamuyo”

Ngaa dapat magpadayon sa pagpangamuyo ang matuod nga mga Cristiano? Sin-o ang makabenepisyo kon mangamuyo ka para sa iban?