Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Disiembre 2014

Nahangpan Mo Bala “ang Kahulugan”?

Nahangpan Mo Bala “ang Kahulugan”?

“Ginbuksan niya ang ila hunahuna agod mahangpan nila ang kahulugan sang Kasulatan.”LUC. 24:45.

1, 2. Paano ginpabakod ni Jesus ang iya mga disipulo sang adlaw nga ginbanhaw sia?

ADLAW gihapon sadto sang pagkabanhaw ni Jesus. Ang duha ka disipulo nagalakat pakadto sa isa ka lugar nga mga 11.2 ka kilometro halin sa Jerusalem. Bangod wala nila nahibaluan nga nabanhaw si Jesus, nasubuan gid sila sa mga natabo. Hinali lang nga nagpakita si Jesus kag naglakat upod sa ila. Nalugpayan niya ini nga mga disipulo. Paano? “Sugod kay Moises kag sa tanan nga Manalagna, ginpaathag niya sa ila ang mga butang nahanungod sa iya sa bug-os nga Kasulatan.” (Luc. 24:13-15, 27) Gani, nagdabdab ang ila tagipusuon bangod “ginapaathag niya” sa ila ang Kasulatan.Luc. 24:32.

2 Sina man nga gab-i, ining duha ka disipulo nagbalik sa Jerusalem. Sang nakita nila ang mga apostoles, ginsugid nila sa ila ang ila eksperiensia. Samtang nagahambal sila, si Jesus nagpakita sa ila tanan. Pero hinadlukan ang mga apostoles. Nagduhaduha sila kon si Jesus gid man ang ila nakita. Paano sila ginpabakod ni Jesus? Aton mabasa: “Ginbuksan niya ang ila hunahuna agod mahangpan nila ang kahulugan sang Kasulatan.”Luc. 24:45.

3. Ano nga mga kabudlayan ang mahimo naton maatubang, kag ano ang makabulig para mangin balanse ang aton pagtamod sa aton ministeryo?

3 Pareho sini nga mga disipulo, kon kaisa mahimo nga naluyahan kita. Mahimo nga masako kita sa hilikuton sang Ginuo,  pero naluyahan kita bangod wala kita sing nakita nga resulta. (1 Cor. 15:58) Ukon mahimo nga ang aton ginatun-an daw wala nagauswag. Ang iban nga aton ginabuligan mahimo pa gani magtalikod kay Jehova. Ano ang mahimo naton agod mangin balanse ang aton pagtamod sa aton ministeryo? Ang isa ka butang nga makabulig sa aton amo ang paghangop sing maayo sa kahulugan sang mga ilustrasyon ni Jesus sa Balaan nga Kasulatan. Binagbinagon naton ang tatlo sini nga mga ilustrasyon kag tan-awon kon ano nga mga leksion ang aton matun-an.

ANG MANUGSAB-UG NGA NAGTULOG

4. Ano ang kahulugan sang ilustrasyon ni Jesus parte sa manugsab-ug nga nagtulog?

4 Basaha ang Marcos 4:26-29. Ano ang kahulugan sang ilustrasyon ni Jesus parte sa manugsab-ug nga nagtulog? Ang tawo sa ilustrasyon nagarepresentar sa indibiduwal nga mga manugbantala sang Ginharian. Ang binhi amo ang mensahe sang Ginharian nga ginbantala sa mga sinsero. Subong sang kinaandan, ang manugsab-ug “nagatulog . . . sa gab-i kag nagabangon sa adlaw.” Ang proseso sang pagtubo natabo sa sulod sang pila ka tion, halin sa pagtanom asta sa pag-ani. Sina nga tion, “ang binhi nagatubo kag nagataas.” Nagakatabo ini “sa iya kaugalingon,” sing amat-amat kag pasunod. Sing kaanggid, ang espirituwal nga pagtubo nagakatabo sing amat-amat kag pasunod. Kon ang isa ka indibiduwal nagauswag asta nga napahulag sia nga mag-alagad sa Dios, nagapamunga sia sa kahulugan nga ginadedikar niya ang iya kabuhi kay Jehova kag magpabawtismo.

5. Ngaa ginsugid ni Jesus ang ilustrasyon parte sa manugsab-ug nga nagtulog?

5 Ngaa ginsugid ni Jesus ini nga ilustrasyon? Ginabuligan kita ni Jesus nga marealisar nga si Jehova amo ang nagapatubo sang kamatuoran sa tagipusuon sang mga “husto nga nahuyog.” (Binu. 13:48; 1 Cor. 3:7) Nagatanom kita kag nagabunyag, pero indi naton kontrolado ang pagtubo. Indi naton ini mapilit ukon mapadasig. Pareho sang tawo sa ilustrasyon, wala naton nahibaluan kon paano nagakatabo ang pagtubo. Masami nga indi naton ini matalupangdan samtang ginahimo naton ang aton mga hilikuton kada adlaw. Pero sa ulihi, ang binhi sang Ginharian mahimo mamunga. Ang bag-o nga disipulo magaupod sa aton sa pagpangani, kag makabenepisyo kita sa iya bulig.Juan 4:36-38.

6. Ano ang dapat naton batunon parte sa espirituwal nga pagtubo?

6 Ano ang matun-an naton sa sini nga ilustrasyon? Una, dapat naton batunon nga indi naton kontrolado ang espirituwal nga pagtubo sang aton ginatun-an sa Biblia. Ang kaugdang makabulig sa aton nga likawan ang pagsulay nga dalidalion ukon piliton ang estudyante nga magpabawtismo. Ginahimo naton ang aton masarangan nga buligan ang tawo, pero ginabaton naton nga sia gid dapat ang magadesisyon sa pagdedikar. Ang dedikasyon dapat kinabubut-on kag ginapahulag sang gugma sa Dios. Amo lamang ini ang dedikasyon nga ginabaton ni Jehova.Sal. 51:12; 54:6; 110:3.

7, 8. (a) Ano ang iban pa nga leksion nga aton matun-an sa ilustrasyon ni Jesus parte sa manugsab-ug nga nagtulog? Maghatag sing halimbawa. (b) Ano ang ginatudlo sini sa aton parte kay Jehova kag kay Jesus?

7 Ikaduha, ang paghangop sa leksion sini nga ilustrasyon makabulig sa aton nga indi maluyahan kon wala naton makita sa umpisa ang mga resulta sang aton hilikuton. Dapat kita magpailob. (Sant. 5:7, 8) Kon ginahimo naton ang aton masarangan para buligan ang estudyante, marealisar naton nga bisan pa indi magpamunga ang binhi, wala ini nagapakita nga indi kita matutom. Ginatugutan ni Jehova nga magtubo ang binhi sang kamatuoran sa mapainubuson nga tagipusuon nga handa maghimo sing mga pagbag-o. (Mat. 13:23) Gani indi naton dapat  paghunahunaon nga ang pagkaepektibo sang aton ministeryo makita lamang sa mga resulta. Para kay Jehova, ang kadalag-an sang aton ministeryo wala nagadepende sa reaksion sang aton mga ginatun-an. Sa baylo, ginapabaloran niya ang aton katutom ano man ang mga resulta sini.Basaha ang Lucas 10:17-20; 1 Corinto 3:8.

8 Ikatlo, indi naton pirme mahangpan ang mga pagbag-o nga nagakatabo sa isa ka tawo. Halimbawa, ang mag-asawa nga ginatun-an sa Biblia sang isa ka misyonero nagpalapit sa iya, nga nagapangabay nga mangin di-bawtismado nga manugbantala. Ginpahanumdom niya ang mag-asawa nga agod makalipikar sila, dapat nila untatan ang pagpanigarilyo. Nakibot sia sang nagsiling sila sa iya nga pila ka bulan na nila ini nga gin-untatan. Ngaa? Narealisar nila nga makita ni Jehova nga nagapanigarilyo sila kag ginakaugtan niya ang pagkasalimpapaw. Gani ginpahulag sila sang ila tagipusuon nga magdesisyon—kon bala manigarilyo sila sa atubangan sang misyonero ukon untatan nila ini. Ang bag-o nila nga gugma kay Jehova nakabulig sa ila sa paghimo sing husto nga desisyon. Nag-uswag sila sa espirituwal, bisan pa wala sing ideya ang misyonero sa pagbag-o nga natabo.

ANG PUKOT

9. Ano ang kahulugan sang ilustrasyon parte sa pukot?

9 Basaha ang Mateo 13:47-50. Ano ang kahulugan sang ilustrasyon ni Jesus parte sa pukot? Ginpaanggid ni Jesus ang pagbantala sang mensahe sang Ginharian sa tanan nga tawo sa pagladlad sang daku nga pukot sa dagat. Subong nga ang pukot makakuha sang madamo kag lainlain nga “sahi sang isda,” ang aton pagbantala nagaganyat sa minilyon ka lainlain nga tawo. (Isa. 60:5) Ginapamatud-an ini sang madamo katama nga indibiduwal nga nagatambong sa aton mga kombension kag sa Memoryal kada tuig. Ang pila sining simbuliko nga isda “maayo” kag ginatipon sa Cristianong kongregasyon. Pero ang iban “indi maayo,” kay indi tanan nga natipon kalahamut-an para kay Jehova.

Sa tapos mabasa ang Mateo 13:47-50 . . .

10. Ngaa ginsugid ni Jesus ang ilustrasyon parte sa pukot?

10 Ngaa ginsugid ni Jesus ini nga ilustrasyon? Ang simbuliko nga pagpain sa mga isda wala nagapatuhoy sa katapusan nga paghukom sa tion sang dakung kapipit-an. Sa baylo, ginapadaku sini ang matabo sa tion sang katapusan nga mga adlaw sining malaut nga sistema. Ginpakita ni Jesus nga indi tanan nga naganyat sa kamatuoran magadampig kay Jehova. Madamo ang nagatambong sa aton mga miting. Ang iban luyag magtuon sa Biblia pero indi sila handa nga magdedikar kay Jehova. (1 Hari 18:21) Ang iban naman wala na nagapakig-upod sa kongregasyon. Ang pila ka pamatan-on ginpadaku sang Cristiano nga mga ginikanan pero wala nila mapalambo ang gugma sa mga talaksan ni Jehova. Ano man ang sitwasyon, ginpadaku ni Jesus nga ang tanan kinahanglan maghimo sing personal nga desisyon. Ang mga nagahimo sini ginkabig niya nga “bilidhon” nga mga butang “sang tanan nga pungsud.”Hag. 2:7.

. . . binagbinaga kon paano ini maaplikar sa karon

11, 12. (a) Paano kita makabenepisyo sa ilustrasyon parte sa pukot? (b) Ano ang ginatudlo sini sa aton parte kay Jehova kag kay Jesus?

11 Paano kita makabenepisyo sa ilustrasyon parte sa pukot? Ang paghangop sa leksion sini nga ilustrasyon makabulig sa aton nga indi sobra nga masubuan ukon maluyahan kon ang aton ginatun-an sa Biblia ukon isa naton ka bata wala nagbaton sang kamatuoran. Posible ini matabo bisan pa ginhimo na naton ang aton bug-os nga masarangan. Indi buot silingon nga kon ginbaton sang isa ang pagtuon sa Biblia ukon ginpadaku sia sa kamatuoran, matigayon niya gilayon ang mabakod nga kaangtanan kay Jehova. Ang mga indi gusto magpasakop sa paggahom ni Jehova painon sa ulihi gikan sa katawhan sang Dios.

Ang pila nga naganyat sa kamatuoran magadampig kay Jehova (Tan-awa ang parapo 9 asta 12)

 12 Ginapahangop bala sini nga ang mga nagbiya sa kamatuoran indi na gid pagtugutan nga magbalik sa kongregasyon? Ukon kon ang isa wala makadedikar kay Jehova, makabig na bala sia nga “indi maayo” asta san-o? Indi. Bukas gihapon ang kahigayunan para sa ila antes magsugod ang dakung kapipit-an. Pareho lang nga ginasilingan sila ni Jehova: “Balik kamo sa akon, kag magabalik ako sa inyo.” (Mal. 3:7) Ginpadaku ini sang ilustrasyon ni Jesus parte sa buhaha nga anak.Basaha ang Lucas 15:11-32.

ANG BUHAHA NGA ANAK

13. Ano ang kahulugan sang ilustrasyon parte sa buhaha nga anak?

13 Ano ang kahulugan sang ilustrasyon ni Jesus parte sa buhaha nga anak? Ang maluluy-on nga amay sa sini nga ilustrasyon nagarepresentar sa aton mahigugmaon nga Amay, si Jehova. Ang anak nga nagpangabay sang iya palanublion kag dayon gin-uyangan ini nagarepresentar sa mga nagbiya sa kongregasyon. Sang nagbiya sila, pareho lang nga naglakbay sila sa “malayo nga kadutaan,” ukon kalibutan ni Satanas, nga nahamulag kay Jehova. (Efe. 4:18; Col. 1:21) Pero ang iban nakamarasmas sang ulihi, kag nagpanikasog sa paglakbay liwat pabalik sa organisasyon ni Jehova. Ining mapainubuson nga mga mahinulsulon malipayon nga gin-abiabi liwat sang aton mahigugmaon nga Amay.Isa. 44:22; 1 Ped. 2:25.

14. Ngaa ginsugid ni Jesus ang ilustrasyon parte sa buhaha nga anak?

14 Ngaa ginsugid ni Jesus ini nga ilustrasyon? Makatalandog nga gin-ilustrar ni Jesus ang handum ni Jehova nga magbalik sa Iya ang mga nagbiya. Sa ilustrasyon, ang amay nagalaum gihapon nga magbalik ang iya anak. Sang nakita niya nga nagbalik ang iya anak, bisan “malayo pa sia,” nagdalidali sia sa pag-abiabi sa iya. Ini nga ilustrasyon dapat magpahulag sa mga nagbiya sa kamatuoran nga magbalik gilayon kay Jehova! Ayhan ginkapoy sila sa espirituwal, kag ang pagbalik mahimo nga daw makahuluya kag mabudlay. Pero takus gid ini pangabudlayan, kay bisan ang langit magakalipay kon magbalik sila.Luc. 15:7.

15, 16. (a) Ano nga mga leksion ang aton matun-an sa ilustrasyon ni Jesus parte sa buhaha nga anak? Maghatag sing pila ka halimbawa. (b) Ano ang ginatudlo sini sa aton parte kay Jehova kag kay Jesus?

15 Paano kita makabenepisyo sa ilustrasyon parte sa buhaha nga anak? Dapat naton ilugon ang halimbawa ni Jehova. Indi kita dapat “maglakas katarung” amo nga indi na naton pag-abiabihon ang nagbalik nga  mga mahinulsulon. Magaresulta lamang ini sa espirituwal nga ‘kalaglagan.’ (Man. 7:16) May isa pa ini ka leksion. Ang isa nga nagbiya sa kongregasyon dapat kabigon nga “nadula nga carnero,” indi subong indibiduwal nga indi na mabuligan. (Sal. 119:176) Kon makita naton ang isa nga nagbiya sa kongregasyon, makahatag bala kita sing mahigugmaon kag praktikal nga bulig para makabalik sia? Pahibaluon bala naton gilayon ang mga gulang para mahatagan sia sing nagakaigo nga bulig? Himuon naton ini kon maalamon naton nga iaplikar ang aton natun-an sa ilustrasyon ni Jesus parte sa buhaha nga anak.

16 Talupangda kon paano ang pila nga nangin buhaha nagpabutyag sang ila apresasyon sa kaluoy ni Jehova kag sa gugma kag bulig sang kongregasyon. Ang isa ka utod nga lalaki nga na-disfellowship sing 25 ka tuig nagsiling: “Ang akon kalipay sugod sang nakapanumbalik ako padayon nga nagadugang samtang nagabaton ako sang ‘mga tion sang kaumpawan’ halin kay Jehova. (Binu. 3:19) Ang tanan mabinuligon gid kag mahigugmaon! Sa karon, may dalayawon ako nga espirituwal nga pamilya.” Ang pamatan-on nga utod nga babayi nga nagbiya kay Jehova sing lima ka tuig nagsiling parte sa iya pagbalik: “Indi ko mapaathag sa inyo ang akon nabatyagan sang ginpakita gid sa akon ang gugma nga ginsiling ni Jesus. Bilidhon gid nga mangin bahin sang organisasyon ni Jehova!”

17, 18. (a) Ano ang praktikal nga mga leksion nga aton natun-an sa tatlo ka ilustrasyon nga aton ginbinagbinag? (b) Ano dapat ang aton determinasyon?

17 Ano ang praktikal nga mga leksion nga aton natun-an sa sining tatlo ka ilustrasyon? Una, dapat naton batunon nga indi naton kontrolado ang espirituwal nga pagtubo. Kontrolado ini ni Jehova. Ikaduha, indi naton mapaabot nga ang tanan nga nagapakig-upod sa aton kag nagatuon magadampig sa kamatuoran. Kag sa katapusan, bisan pa ang pila magbiya sa kamatuoran kag kay Jehova, indi kita madulaan sing paglaum nga makabalik sila. Kag kon magbalik sila, abiabihon naton sila bilang pag-ilog sa pagtamod ni Jehova.

18 Kabay pa nga ang kada isa sa aton padayon nga magpangita sing ihibalo, paghangop, kag kaalam. Kag samtang ginabasa naton ang mga ilustrasyon ni Jesus, hibalua kon ano ang buot silingon sini, kon ngaa ginrekord ini sa Biblia, kon paano naton maaplikar ang mga leksion sini, kag kon ano ang aton matun-an sa sini parte kay Jehova kag kay Jesus. Ang paghimo sini nagapakita nga ginahangop naton ang kahulugan sang ginsiling ni Jesus.