Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) DISIEMBRE 2014

‘Nahibaluan Niya ang Dalan’

‘Nahibaluan Niya ang Dalan’

NATAPOS ni Guy Hollis Pierce, nga miembro sang Nagadumala nga Hubon sang mga Saksi ni Jehova, ang iya kabuhi sa duta sang Martes, Marso 18, 2014. Nagaedad sia sing 79 sang nabaton niya ang iya paglaum nga mangin isa sa mga ginbanhaw nga kauturan sang Cristo.Heb. 2:10-12; 1 Ped. 3:18.

Si Guy Pierce natawo sa Auburn, California, U.S.A., sang Nobiembre 6, 1934, kag nabawtismuhan sang 1955. Nagpakasal sila sang iya pinalangga nga asawa nga si Penny sang 1977 kag nakaangkon sang pamilya. Ang iya eksperiensia subong ulo sang pamilya nakabulig sa iya nga daw mangin tatay man sa iban. Sang 1982, nagpayunir sila sang iya asawa, kag sugod sang 1986, nangin manugtatap sang sirkito sa Estados Unidos sa sulod sang 11 ka tuig.

Sang 1997, sanday Guy kag Penny Pierce nangin miembro sang pamilya Bethel sa Estados Unidos. Si Utod Pierce nagtrabaho sa Service Department, kag sang 1998 gintangdo sia subong kabulig sang Personnel Committee sang Nagadumala nga Hubon. Ang pagtangdo kay Utod Pierce subong miembro sang Nagadumala nga Hubon ginpahibalo sang Oktubre 2, 1999, sa annual meeting sang Watch Tower Bible and Tract Society of Pennsylvania. Sining karon lang nga tinuig, nag-alagad sia sa komite sang Personnel, Writing, Publishing, kag Coordinators.

Ang mga tawo nga may lainlain nga ginhalinan kag kultura nanamian gid kay Utod Pierce bangod sa iya matam-is nga yuhum kag pagkapalalahog. Pero ang mga kinaiya nga nanamian gid sa iya sang iban amo ang iya gugma, pagkamapainubuson, pagtahod sa matarong nga mga kasuguan kag mga prinsipio, kag ang iya bug-os nga pagtuo kay Jehova. Para kay Guy Pierce, mas posible pa nga indi magbutlak ang adlaw sangsa indi matuman ang mga saad ni Jehova, kag gusto niya ipaambit ina nga kamatuoran sa bilog nga kalibutan.

Si Utod Pierce daw wala ginakapoy sa pag-alagad kay Jehova. Temprano pa sia nagabugtaw kag masami nagatrabaho asta sa gab-i. Bangod sa iya mga paglakbay para palig-unon ang iya mga kauturan, nakalab-ot sia sa bilog nga kalibutan, kag may tion gid sia pirme sa indibiduwal nga mga miembro sang pamilya Bethel kag sa iban pa nga luyag makig-upod sa iya, subong man sa mga nagapangayo sang iya laygay kag bulig. Bisan pa nagligad ang mga tinuig, madumduman sang iya mga masigkatumuluo ang iya pagkamaabiabihon, pagpakig-abyan, kag pagpalig-on base sa Kasulatan.

Nabilin sang aton utod kag pinalangga nga abyan ang iya asawa kag anom ka kabataan, subong man mga apo kag mga apo sa tuhod. Madamo man ang iya espirituwal nga kabataan. Ang pamulongpulong sa lubong para kay Utod Pierce ginhiwat sa Bethel sa Brooklyn sang Sabado, Marso 22, 2014, nga ginhatag ni Mark Sanderson, nga miembro man sang Nagadumala nga Hubon. Lakip sa iya ginsambit amo ang paglaum sa langit ni Utod Pierce kag ginbasa niya ang ginsiling ni Jesus: “Sa balay sang akon Amay may madamo nga puluy-an. . . . Kon maglakat ako kag maghanda sang duog para sa inyo, magakari ako liwat kag batunon ko kamo sa akon kaugalingon, agod kon diin ako didto man kamo. Kag kon diin ako makadto mahibaluan ninyo ang dalan.”Juan 14:2-4.

Matuod, hidlawon gid kita kay Utod Pierce. Pero nagakalipay kita kay ‘nahibaluan niya ang dalan’ pakadto sa iya permanente nga “puluy-an.”